ជំនួបត្រីភាគី អាមេរិក ជប៉ុន កូរ៉េខាងត្បូង ដើម្បីរិះរកវិធីទប់ទល់នឹងកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៦:៥៧
ថ្ងៃអាទិត្យ ទី១៣វិច្ឆិកា ក្នុងបរិបទប្រជុំកំពូលអាស៊ាន នៅរាជធានីភ្នំពេញ ថ្នាក់ដឹកនាំសហរដ្ឋអាមេរិក ជប៉ុន និងកូរ៉េខាងត្បូង ឆ្លៀតជួបប្រជុំគ្នាក្រៅផ្លូវ ដើម្បីពិភាក្សាគ្នាសំណុំរឿងកូរ៉េខាងជើង។ នេះជាសំណើរបស់ភាគីទីក្រុងសេអ៊ូល។ ជំនួបត្រីភាគីនេះ គឺជាចលករជំរុញបន្ថែម ជុំវិញបញ្ហាឧបទ្វីបកូរ៉េ មុននឹងប្រធានាធិបតីសហរដ្ឋអាមេរិក ត្រូវជួបពិភាក្សាផ្ទាល់ជាមួយនឹងប្រមុខរដ្ឋចិន នៅកោះបាលី។ លោក ចូ បៃដិន ប្តេជ្ញាចិត្តថានឹងជជែកជាមួយលោក ស៊ី ជីនពីង ដើម្បីឲ្យចិនដាស់តឿន កូរ៉េខាងជើង ឲ្យឈប់សកម្មភាពបង្កគ្រោះថ្នាក់ដល់តំបន់។
ជំនួបត្រីភាគី មុននឹងប្រមុខរដ្ឋអាមេរិក លោក ចូ បៃដិន ជួបនឹងលោក ស៊ី ជីនពីង។
ជំហររបស់សម្ព័ន្ធមិត្តទាំងបីនេះ គេបានដឹងសេ្រចជាហូរហែមកហើយ។ នៅក្នុងកិច្ចប្រជុំអាស៊ានបូក ចិន ជប៉ុន និងកូរ៉េខាងត្បូង គឺសេចក្តីថ្លែងជំហររបស់នាយករដ្ឋមន្ត្រី ជប៉ុន និងប្រធានាធិបតីកូរ៉េខាងត្បូង ក៏បញ្ជាក់ស្រេចហើយដែរ។ នាយករដ្ឋមន្ត្រី ហ្វូមីអូ គីស៊ីដា ( Fumio Kishida) គឺលោកអំពាវនាវឲ្យសហគមអន្តរជាតិ និងប្រទេសក្នុងតំបន់ «រួមគ្នាក្នុងសំឡេងតែមួយ» ជំរុញឲ្យ កូរ៉េខាងជើង បញ្ឈប់កម្មវិធីនុយក្លេអ៊ែរ និងក្រុងព្យុងយ៉ាងត្រូវឈប់សាកល្បងមីស៊ីល។
ជំហររបស់កូរ៉េខាងត្បូង ក៏ច្បាស់ដែរ។ ប្រធានាធិបតី យូន ស៊ុកយោល (Yoon Suk-yeol) សង្កត់ធ្ងន់ថា ប្រសិនបើកូរ៉េខាងជើងនៅបន្តសកម្មភាពដ៏គ្រោះថ្នាក់ គឺការគំរាមកំហែង ប៉ះពាល់ដល់សន្តិសុខក្នុងតំបន់ទាំងមូល។
ក្រុងសេអ៊ូមិនមែនត្រឹមតែដាក់សម្ពាធឲ្យឈប់ប្រព្រឹត្តទេ តែ កូរ៉េខាងត្បូង ដែលនៅជិតនឹងគ្រោះថ្នាក់ជាងគេ បានឲ្យជាដំណោះស្រាយផង ថាប្រសិនបើ របបក្រុងព្យុងយ៉ាង យល់ព្រមបញ្ឈប់គម្រោងកម្មវិធីនុយក្លេអ៊ែរ នោះគឺរដ្ឋបាលទីក្រុងសេអ៊ូល ថាខ្លួនស្ម័គ្រចិត្តចេញមុខ ជួយស្វែងរកគាំទ្រផ្នែកសេដ្ឋកិច្ច ឲ្យកូរ៉េខាងជើង។ នេះបើតាមសេចក្តីថ្លែងការណ៍របស់វិមានប្រធានាធិបតីកូរ៉េខាងត្បូង និងផ្សាយតាមទីភ្នាក់ងារព័ត៌មាន យ៉ុនហាប់។
ចំពោះសហរដ្ឋអាមេរិកវិញ លោក ចូ បៃដិន បញ្ជាក់ថាបញ្ហាកូរ៉េគឺប៉ះពាល់ដល់អាមេរិក។ បើតាមការប្រកាសរបស់លោក បៃដិន គឺគេអាចយល់ថា រឿងនេះ វាមិនត្រឹមតែប៉ះពាល់ដល់កូរ៉េខាងត្បូង ជប៉ុន និងតំបន់ ប៉ុណ្ណោះទេ តែសហរដ្ឋអាមេរិក ដែលនៅទ្វីបដទៃសោះ ក៏រងការគំរាមកំហែងដែរ។ ដូច្នេះហើយ ទើបលោក បៃដិន ប្រកាស់ថា ភាគីចិនប៉េកាំង គឺត្រូវដើរតួសំខាន់សម្រាប់និយាយជាមួយកូរ៉េខាងជើង និងដើម្បីបញ្ជៀសការប្រឈមមុខដាក់គ្នា។
រីឯថ្នាក់ដឹកនាំអាស៊ានក៏យល់ឃើញដូច្នេះ និងស្នើឲ្យរបបក្រុងព្យុងយ៉ាងគោរពបទដ្ឋាននិយាមអន្តរជាតិនិងសេចក្តីសម្រេចរបស់អង្គការសហប្រជាជាតិ។
បើ កូរ៉េខាងជើង នៅតែបន្តសកម្មភាពដដែល។ តើសហរដ្ឋអាមេរិក នឹងធ្វើបែបណា ?
សហរដ្ឋអាមេរិក មានមូលដ្ឋានយោធានៅជប៉ុន និង នៅកូរ៉េខាងត្បូង ជាសម្ព័ន្ធមិត្តដ៏ចាស់ឆ្នាំនៅអាស៊ី។ ករណីកូរ៉េខាងជើង មិនស្ងប់ស្ងាត់ មិនឈប់កម្មវិធីនុយក្លេអ៊ែរ និងមិនឈប់សាកល្បងមីស៊ីល ទេនោះ សហរដ្ឋអាមេរិក ច្បាស់ជានឹងបង្កើនវត្តមានកម្លាំងយោធារឹងរឹតតែច្រើន នៅជប៉ុន និង នៅកូរ៉េខាងត្បូង បន្ថែមទៀត។
កាន់តែជាក់ច្បាស់នោះ គឺទីប្រឹក្សាសន្តិជាតិអាមេរិក ជេក ស៊ូលីវ៉ាន់ (Jack Sullivan) ដែលបានអមដំណើរលោក បៃដិន ទៅភ្នំពេញ បានបញ្ជាក់ហើយថា ប្រសិនបើរដ្ឋបាលក្រុងព្យុងយ៉ាង នៅតែបន្តអភិវឌ្ឍកម្មវិធីនុយក្លេអ៊ែរ និងប្រឹងសាកល្បងមីស៊ីលបន្តទៀត គឺសហរដ្ឋអាមេរិកនឹងបង្កើនវត្តមានកម្លាំងយោធាអាមេរិកនៅក្នុងតំបន់ ដើម្បីធានាសុវត្ថិភាពនិងថែរក្សាស្ថិរភាពសន្តិភាព។
ចំណុចនេះ គឺអ្វីដែល ចិន ច្បាស់ជាមិនចង់ឃើញនោះទេ ហើយរឿងនេះក៏ធ្វើឲ្យភាគីរុស្ស៊ីមិនសប្បាយចិត្តដែរ។ បុរសខ្លាំងទី២របស់វិមានក្រេមឡាំង បានចោទប្រកាន់ថា សហរដ្ឋអាមេរិកនិងសម្ព័ន្ធមិត្តលោកខាងលិច ចង់ធ្វើជាម្ចាស់នៅតំបន់នេះ គឺតាមរយៈការបង្កើនកម្លាំងយោធានៅអាស៊ី។ នេះបើតាមប្រសាសន៍របស់ ប្រមុខការទូតរុស្ស៊ី Sergeuï Lavrov ក្នុងសន្និសីទកាសែត ពីភ្នំពេញ។
«បៃដិន និង ស៊ី ជួបគ្នាផ្ទាល់លើកដំបូង»
តាមគម្រោង គឺលោក ចូ បៃដិន នឹងត្រូវជួបលោក ស៊ី ជីនពីង នៅជំនួបកំពូលប្រទេសសេដ្ឋកិច្ចជឿនលឿន ទាំង២០ នៅកោះបាលី នាថ្ងៃចន្ទ ទី១៤វិច្ឆិកា។ នោះជាការជួបគ្នាលើកទី១ ដោយផ្ទាល់ រវាងថ្នាក់ដឹកនាំទាំងពីរ គិតចាប់តាំងពីលោក បៃដិន ចូលកាន់អំណាចពីរឆ្នាំមកនេះ។ ជាផ្លូវការ គឺលោក ចូ បៃដិន បានជួបប្រាស្រ័យតាមទូរសព្ទនិងវីដេអូ ពីចម្ងាយ ជាមួយនឹងប្រធានាធិបតីចិន ចំនួនយ៉ាងហោច ៥ ដង មកហើយ ចាប់តាំងពីលោក បៃដិន ចូលកាន់អំណាចនៅសេតវិមាន នៅដើមឆ្នាំ២០២១មកនេះ។ លោក បៃដិន បានជួបលោក ស៊ី រួមមកហើយ នៅក្រោមអាណត្តិដឹកនាំរបស់អតីតប្រធានាធិបតី បារ៉ាក់ អូបាម៉ា។
ថ្ងៃអាទិត្យទី១៣វិច្ឆិកា ថ្លែងទៅកាន់អ្នកកាសែតនៅភ្នំពេញ ប្រធានាធិបតីអាមេរិក ចូ បៃដិន មានប្រសាសន៍ថា ខ្លួនលោក«បានស្គាល់លោក ស៊ី ជីនពីង ច្បាស់ ហើយនិងបានចំណាយពេលវេលាជាមួយលោក ស៊ី ច្រើន គឺច្រើនជាងជាមួយថ្នាក់ដឹកនាំផ្សេងទៀត នៅលើពិភពលោក។ លោក បៃដិន ថែមទាំងថាលោកតែងតែពិភាក្សាគ្នាដោយស្មោះនិងនិយាយជាមួយគ្នាត្រង់ទៅត្រង់មក ។ បើតាមលោក បៃដិន, លោក ស៊ី ជីនពីង មិនដែលវិភាគច្រឡំសោះឡើយ ហើយនិង បានដឹងច្បាស់ពីជំហររបស់ភាគីនីមួយៗ។
អ្នកជំនាញកិច្ចការអាស៊ី និងអាមេរិក យល់ឃើញថា ជំនួបដោយផ្ទាល់ នៅបាលី ស្អែកនេះ រវាងថ្នាក់ដឹកនាំចិននិងអាមេរិក គឺច្បាស់ជានឹងបន្ធូរបន្ថយភាពតាន់តឹងច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ