លោកចូ បៃដិន និងលោកស៊ី ជីនពីង ជួបនិយាយគ្នាដើម្បីគូស “បន្ទាត់ក្រហម” ចាត់ចែងការប្រកួតប្រជែងគ្នា
ចុះផ្សាយនៅថ្ងៃ៖
ស្តាប់ - ០៨:០៦
ថ្ងៃចន្ទទី១៤វិច្ឆិកា លោកចូ បៃដិន និងលោកស៊ី ជីនពីង ជួបគ្នាជាលក្ខណៈទ្វេភាគី នៅឯកោះបាលីប្រទេសឥណ្ឌូណេស៊ី មុនពេលដែលជំនួបកំពូលG20 ត្រូវចាប់ផ្តើម។ បើតាមការឲ្យដឹង ពីសេតវិមានអាមេរិក គឺលោកប្រធានាធិបតី ចូ បៃដិន មានបំណងនិយាយដោយផ្ទាល់ជាមួយលោកស៊ី ជីនពីង ដើម្បីស្វែងរកដំណោះស្រាយ មកបន្ធូរបន្ថយភាពតានតឹងទាំងឡាយ ដោយសារតែការប្រជែងគ្នា រវាងមហាអំណាចទាំង២ មិនថាសេដ្ឋកិច្ច ឬក៏យុទ្ធសាស្ត្រនយោបាយការបរទេស។ យ៉ាងណាមិញ លោកចូ បៃដិនធ្លាប់បានប្រាប់អ្នកកាសែតថា លោកចង់គូស “គំនូសក្រហម” ជាមួយលោកស៊ី ជីនពីង។ គំនូសបន្ទាត់ដែលភាគីទាំងសងខាងត្រូវគោរព មិនត្រូវឈានជើងរំលង។
“ចិនជាគូប្រជែងតែមួយគត់របស់អាមេរិក”
សហរដ្ឋអាមេរិកនិងចិន កំពុងតែប្រឈមមុខដាក់គ្នា ច្រើនសំណុំរឿងណាស់។ ជាការប្រឈមមុខ ដែលបង្កើត បន្ថែមឲ្យមានបរិយាកាសអាប់អួរកាន់តែខ្លាំង សម្រាប់ពិភពលោកយើង ដែលកំពុងតែឆ្លងកាត់វិបត្តិសង្គ្រាមនៅអ៊ុយក្រែនរួចទៅហើយ។ បើចិននិងអាមេរិកឈ្លោះគ្នាថែមទៀតនោះ ប្រាកដជាវិកវរមិនខានទេ។
នៅក្នុងឯកសារយុទ្ធសាស្ត្រសន្តិសុខជាតិអាមេរិក ដែលសេតវិមានបានផ្សព្វផ្សាយ កាលពីដើមខែតុលា គឺរដ្ឋាភិបាលលោកចូ បៃដិន បានទទួលស្គាល់ថា “ចិនគឺជាដៃគូប្រជែងតែមួយគត់របស់អាមេរិក ដែលមានចេតនា ធ្វើឲ្យប្រែប្រួលដល់សណ្តាប់ធ្នាប់ពិភពលោក”។ ឃ្លានេះ គឺវាមានន័យថា អាមេរិកគិតថា ចិនមានចេតនាប្រជែង ដើម្បីដណ្តើមយកភាពជាអ្នកដឹកនាំពិភពលោក ដែលធ្លាប់តែនៅក្នុងដៃរបស់អាមេរិកកន្លងមក។ យ៉ាងណាមិញ លោក Jake Sullivan ទីប្រឹក្សាពិសេសផ្នែកសន្តិសុខជាតិ របស់លោកចូ បៃដិន បាននិយាយកាលពីថ្ងៃទី១០វិច្ឆិកាថ្មីៗនេះ ថា អ្វីដែលលោកចូ បៃដិន ចង់ធ្វើនាពេលនេះ គឺចង់ “ចាត់ចែងដោះស្រាយការប្រកួតប្រជែង” រវាងចិននិងអាមេរិក កុំឲ្យវាឈានក្លាយទៅជាជម្លោះ តទល់គ្នាដោយចំហរ។
ចំណែកពីភាគីចិនវិញ គេមិនបានបញ្ជាក់អ្វីច្រើនទេ គ្រាន់តែនិយាយក្នុងន័យថា ជំនួបនៅថ្ងៃនេះ គឺភាគីអាមេរិកជាអ្នកផ្តើមគំនិតស្នើមក។ កាសែត China Daily បានចុះផ្សាយព្រឹកមិញនេះថា “ពិភពលោក ត្រូវការចង់ដឹងណាស់ ថាមហាអំណាចដ៏សំខាន់ជាងគេទាំង២នេះ អាចរួមរស់ជាមួយគ្នា សហការគ្នា ដើម្បីដោះស្រាយបញ្ហាសកលទាំងឡាយទាំងពួងដែរឬយ៉ាងណា”។
បើគិតពីចាប់ពីពេលលោកចូ បៃដិនចូលកាន់អំណាច កាលពីដើមឆ្នាំ២០២១មក គឺនេះជាលើកទី១ហើយ ដែលលោក ចូ បៃដិន ជួបលោកស៊ី ជីនពីងដោយផ្ទាល់បែបនេះ។ កន្លងមក មេដឹកនាំទាំង២ បានជួបនិយាយគ្នាតែតាមទូរស័ព្ទទេ ចំនួន៥ដងមកហើយ។ ៥ដងវាច្រើនសមគួរដែរ ដែលបញ្ជាក់ថា ភាគីអាមេរិកចង់និយាយ ចង់ដោះស្រាយដើម្បី បន្ធូរបន្ថយភាពតាមតែង។ ភាពតានតឹង ប្រកាន់គ្នា មើលមុខគ្នាមិនត្រង់ ដែលពេលខ្លះវាកើតចេញពីការយល់ច្រឡំ គិតស្មានខុសតែរៀងៗខ្លួន មានចេតនាអាក្រក់អ្វីម្យ៉ាងមកលើខ្លួនជាដើម។ កាលពីសប្តាហ៍កន្លងទៅនេះ លោកចូ បៃដិន បានលើកឡើងថា ក្នុងជំនួបនៅបាលី លោកនឹងនិយាយជាមួយលោកស៊ី ជីនពីង ស្វែងយល់ពីគ្នាទៅវិញទៅមក និងដើម្បីគូស “គំនូសក្រហម” ដែលភាគីទាំងសងខាងត្រូវគោរព មិនត្រូវឈានជើងរំលង។
ដោះស្រាយបញ្ហាកោះតៃវ៉ាន់
ក្រៅពីបញ្ហាប្រកួតប្រជែងផ្នែកសេដ្ឋកិច្ច ពាណិជ្ជកម្ម សំណុំរឿងកោះតៃវ៉ាន់ គឺជាចំណុចមួយសំខាន់ ដែលសេតវិមានអាមេរិក បានអះអាងថា លោកចូ បៃដិន ចង់លើកទៅនិយាយជាមួយលោកស៊ី ជីនពីង។ បញ្ហាកោះតៃវ៉ាន់ ដែលយើងបានដឹងកន្លងមកហើយ ថាបានពុះកញ្ជ្រោល ក្តៅគគុកខ្លាំងឡើង បន្ទាប់ពីលោកស្រីណាន់ស៊ី ប៉េឡូស៊ី ប្រធានាសភាអាមេរិក បានធ្វើដំណើរទៅតៃប៉ិ។ ភាគីចិនបានចាត់ទុកថា នេះគឺជាការរករឿងពីសំណាក់ភាគីអាមេរិក ហើយបានឆ្លើយតបវិញ តាមរយៈការធ្វើសមយុទ្ធយោធា ហាត់សមគំរាមឡោមព័ទ្ធកោះតៃវ៉ាន់។
ក្រោយបញ្ហានេះផ្ទុះឡើង យើងឃើញថាភាគីរដ្ឋាភិបាលលោកចូ បៃដិន បានព្យាយាមរកផ្លូវចរចាជាមួយចិន។ ចុងខែកញ្ញាលោកអង់តូនី ប្លីងកិន និងលោកវ៉ាង យី បានជួបនិយាយគ្នាតទល់ នៅមហាសន្និបាតអង្គការសហប្រជាជាតិឯក្រុងញូយ៉ក។ ហើយមួយអាទិត្យក្រោយមក ទូរស័ព្ទនិយាយគ្នាទៀត។ ក៏ប៉ុន្តែក្រោយពេលដែលគណបក្សកុម្មុយនីស្តចិន បានបើកមហាសន្និបាតកាលពីពេលថ្មីៗនេះ ដើម្បីតែងតាំងលោកស៊ី ជីនពីងមួយអាណត្តិទៀត យើងឃើញថាគេមានការបារម្ភច្រើន អំពីវិវាទជុំវិញកោះតៃវ៉ាន់នេះ។ លោកស៊ី ជីនពីង ពង្រឹងអំណាចកាន់តែខ្លាំងឡើង ហើយបញ្ហាបូរណភាពទឹកដី យកកោះតៃវ៉ាន់មកគ្រប់គ្រងវិញ វាគឺជាផ្នែកមួយនៃអំណាចឃោសនានយោបាយរបស់គាត់។
អាមេរិកជាអ្នកបំផ្លាញគោលការណ៍គ្រិះ “ចិនតែមួយ”
ជាការពិត អាមេរិកទទួលស្គាល់ចិនតែមួយមែន តែអាមេរិកអះអាងបន្តរក្សាជំហយុទ្ធសាស្ត្រជួយតៃវ៉ាន់ ឲ្យមានលទ្ធភាពការពារខ្លួន តាមរយៈការលក់អាវុធឲ្យ។ ក៏ប៉ុន្តែលោកចូ បៃដិន បាននិយាយធ្លោយមាត់ច្រើនដង ជាក់ស្តែងនៅពេលឆ្លើយក្នុងបទសម្ភាសន៍តាមទូរទស្សន៍ CBS នៅពាក់កណ្តាលខែកញ្ញា ដែលលោកបានឆ្លើយថា អាមេរិកអាចនឹងធ្វើអន្តរាគមន៍យោធាដោយផ្ទាល់ ដើម្បីជួយការពារតៃវ៉ាន់ ពីការឈ្លានពានរបស់ចិន។
ថ្ងៃទី៨វិច្ឆិកា ចំថ្ងៃបោះឆ្នោតពាក់កណ្តាលអាណ្តតិនៅអាមេរិក លោក ស៊ី ជីនពីនបានចុះទៅត្រួតពល និងបានប្រកាសប្រាប់ឲ្យកងទ័ពចិន ត្រៀមកម្លាំងដើម្បីប្រយុទ្ធយកឈ្នះ។ ក្រោយមកថ្ងៃទី១០វិច្ឆិកា លោក Zhao Lijian អ្នកនាំពាក្យក្រសួងការបរទេសចិន បានបរិហារទៀតថា គឺអាមេរិក ដែលជាអ្នកធ្វើខូចខ្ទេចខ្ទី ដល់គោលការណ៍គ្រិះ ”ប្រទេសចិនតែមួយ”។
គឺចំណុចទាំងអស់នេះហើយ ដែលគួបផ្សំគ្នា ធ្វើឲ្យមានការបារម្ភថា ចិនកំពុងតែប្តេជ្ញាចិត្តហើយ ក្នុងការក្តោបក្តាប់យកតៃវ៉ាន់មកវិញឲ្យបាន។ អ្វីដែលយើងសង្កេតឃើញ គឺភាគីអាមេរិកខំព្យាយាមបន្ធូរបន្ថយស្ថានការណ៍ ដើម្បីបញ្ចៀសសង្គ្រាមមួយទៀត មកបន្ថែមពីលើសង្គ្រាមនៅអ៊ុយក្រែន។ លោក Jake Sullivan បានទទួលស្គាល់ថា ត្រូវតែរក្សាបណ្តាញទំនាក់ទំនងគ្នា ជាប្រចាំរវាងភាគីកងទ័ពទាំង២ ដើម្បីចៀសវាងគ្រោះថ្នាក់ផ្ទុះអាវុធ ដោយសារតែការបះទង្គិចគ្នាដោយអចេតនាណាមួយ។
ជំហានដំបូងដ៏ចាំបាច់
តាមការវិភាគមើលទៅ គឺគេមិនរំពឹងសង្ឃឹមច្រើនប៉ុន្មានទេ ថាភាគីទាំង២ នឹងនិយាយចុះគ្នា។ តែយ៉ាងណា វាគឺជាជំហានដំបូង ដែលសំខាន់ ហើយដែលអាចនាំឲ្យមានជំហានបន្ទាប់ទៀតទៅថ្ងៃមុខ។ ការប្រឈមមុខ បញ្ចេញកម្លាំងចង់ឈ្នះរៀងៗខ្លួន គឺគ្មាននរណាម្នាក់ចំណេញទេ។ ដូច្នេះយុទ្ធសាស្ត្រការទូតទាំងសងខាង ត្រូវតែរកវិធី ដើម្បីនិយាយគ្នា ស្វែងរកការយោគយល់ និងគោរពគ្នាទៅវិញទៅមក។
ត្រង់នេះហើយ ដែលពាក្យថា “បន្ទាត់ក្រហម” ដែលលោកចូ បៃដិន បានលើកឡើងនោះ វាមានសារៈសំខាន់ណាស់។ តើអ្វីទៅដែលជាផលប្រយោជន៍យុទ្ធសាស្ត្រ ដែលអាមេរិកត្រូវតែការពារឲ្យខាងតែបាន ហើយដែលជាបន្ទាត់ក្រហមរបស់អាមេរិកនោះ។ ដូចគ្នាដែរ តើអ្វីទៅដែលចិនចង់ការពារថាជាបន្ទាត់ក្រហមរបស់ខ្លួន។ ក៏ប៉ុន្តែការយល់ព្រមដកថយ ទុកផ្លូវដើរឲ្យភាគីម្ខាងទៀតនេះ គឺវាអាស្រ័យលើ ទំងន់កម្លាំងខ្លាំងខ្សោយ នរណាមានប្រៀបជាងនរណា។ ដំណាក់កាលកន្លងមក ម្នាក់ៗហាក់បានប្រឹងបង្ហាញកម្លាំង ថាខ្លួនមានប្រៀបជាងដើម្បីឲ្យម្ខាងទៀតដកថយ។
ដោយឡែក នៅក្នុងសំណុំរឿងសង្គ្រាមនៅអ៊ុយក្រែវិញ លោក Jake Sullivan បានអះអាងថា ភាគីអាមេរិកមិនបានសង្កេតឃើញថា ចិនបានជួយផ្គត់ផ្គង់អាវុធទៅឲ្យរុស្ស៊ី ឬក៏ជួយរុស្ស៊ីដោយប្រការណាមួយ ដើម្បីទប់ទល់នឹងទណ្ឌកម្មសេដ្ឋកិច្ចនោះទេ។ ហើយកាលពីថ្ងៃទី៩ វិច្ឆិកា លោក ចូ បៃដិន បាននិយាយថាលោកសប្បាយចិត្តដែរ ដែលឃើញថាចិនមកយកខ្លួនទៅប្រឡាក់ប្រឡូសជាមួយរុស្ស៊ី នៅក្នុងសំណុំរឿងសង្គ្រាមអ៊ុយក្រែន។ ចំណុចបន្តិចៗទាំងអស់នេះ ធ្វើឲ្យយើងសង្កេតឃើញថា ភាគីអាមេរិកហាក់ដូចជាខំនិយាយថ្នម លួងចិត្ត សរសើរអង្អែលខ្នងចិន។ ពាក្យសរសើរដោយប្រយោលទាំងនេះ វាមានន័យថាអាមេរិកចង់ប្រាប់ទៅចិនថា មិនមែនអាមេរិកស្អប់ចិន ចង់រករឿងចិនគ្រប់តែរឿងនោះទេ។ វាមានរឿងខ្លះ ដែលអាមេរិកទទួលស្គាល់ចំណុចល្អ និងគុណសម្បត្តិរបស់ចិនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ