កិច្ចប្រជុំ APEC គ្របដណ្តប់ដោយសំណុំរឿងអ៊ុយក្រែន និងកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៦:១៥
ជំនួបកំពូល G20 នៅបាលី ត្រូវគ្របដណ្តប់ដោយព្រឹត្តិការណ៍សង្គ្រាមអ៊ុយក្រែន តាមរយៈមីស៊ីល ធ្លាក់នៅប្រទេសប៉ូឡូញ។ នៅពេលនេះ ក្នុងជំនួបកំពូល APEC នៅទីក្រុងបាងកក ថ្នាក់ដឹកនាំអន្តរជាតិ ក៏អាចនឹងលើកឡើងរឿង អ៊ុយក្រែន នេះបន្តទៀត។ ក្នុងប្រទេសថៃខ្លួនឯង ប្រជាពលរដ្ឋថៃ បានជួបប្រជុំនៅកណ្តាលរាជធានី ដើម្បីសម្តែងមតិប្រឆាំង និងអំពាវនាវឲ្យគោរពសិទ្ធិមនុស្ស ហើយនិងសុំឲ្យលុបចោលច្បាប់ជេរប្រមាថព្រះមហាក្សត្រ។ អ្នកខ្លះក៏លើកបដា ប្រឆាំងនឹងចិន ដែលធ្វើទុក្ខបុកម្នេញនៅហុងកុង ជាដើម។ សំណុំរឿងក្តៅៗផ្សេងទៀត គឺវិបត្តិឧបទ្វីបកូរ៉េ ដែលជាព្រឹត្តិការណ៍ធំ ពីព្រោះតែ ថ្ងៃព្រហស្បតិ៍ ទី១៧វិច្ឆិកា កូរ៉េខាងជើង បានបាញ់មីស៊ីល ជាថ្មីបន្ថែមទៀត។
«ព្យុងយ៉ាង ឆ្លើយតបយ៉ាងចាស់ដៃ»
ការបាញ់មីស៊ីលថ្មីនេះ ក៏ព្រោះតែ ក្រុងព្យុងយ៉ាង សម្តែងក្តីខឹងក្រោធចំពោះថ្នាក់ដឹកនាំអន្តរជាតិ ដែលចេះតែជួបប្រជុំគ្នានិងថ្កោលទោសខ្លួន។ ការប្រជុំអាស៊ានសប្តាហ៍មុន សហរដ្ឋអាមេរិក កូរ៉េខាងត្បូង និងជប៉ុន ឆ្លៀតជួបគ្នា នៅភ្នំពេញ ហើយថ្កោលទោស និងព្រមាន កូរ៉េខាងជើង។ ដើមសប្តាហ៍នេះ ថ្នាក់ដឹកនាំអាមេរិកនិងចិន ជួបគ្នានៅបាលី ហើយនិយាយពីករណីកូរ៉េខាងជើងទៀត។ នេះបើមើលតាមសេចក្តីថ្លែងការណ៍របស់ក្រសួងកិច្ចការបរទេសកូរ៉េខាងជើង និងដែលរដ្ឋមន្ត្រី Choe Son Hui បញ្ជាក់ថា «ព្យុងយ៉ាង ឆ្លើយតបយ៉ាងចាស់ដៃ»។ ជាក់ស្តែង ប៉ុន្មានម៉ោងក្រោយចេញក្តីថ្លែងការណ៍ នៅថ្ងៃព្រហស្បតិ៍ របបក្រុងព្យុងយ៉ាង បាញ់មីស៊ីលបាលីស្ទិកជាថ្មីពិតមែន។
នោះគឺជាប្រភេទមីស៊ីលបាលីស្ទិក រយៈចម្ងាយខ្លី រត់បានចម្ងាយ ២៤០ គីឡូម៉ែត្រ រយៈកម្ពស់មធ្យម ៤៧គីឡូម៉ែត្រ ដែលបាញ់ចេញពីតំបន់ វុនសាន់ ប៉ែកខាងកើតកូរ៉េខាងជើង បាញ់ឆ្ពោះទៅសមុទ្រជប៉ុន។ នេះជាការបញ្ជាក់របស់ភាគីជប៉ុន។ ជប៉ុន សម្តែងក្តីបារម្ភជាថ្មី ហើយការិយាល័យនាយករដ្ឋមន្ត្រីជប៉ុន បានគូសបង្ហាញថា ការគឃ្លើនបាញ់បោះមីស៊ីលផ្ទួនៗរបស់ព្យុងយ៉ាង គឺ គំរាមដល់សន្តិភាពក្នុងតំបន់ និងប៉ះពាល់ដល់សន្តិសុខសហគមន៍អន្តរជាតិ។
ហេតុដូច្នេះហើយ នាយករដ្ឋមន្ត្រីជប៉ុន នឹងត្រូវឆ្លៀតជួបពិគ្រោះគ្នាជាមួយប្រធានាធិបតីចិន។ ចិនដែលមានទឹកមាត់ប្រៃ និយាយជាមួយ កូរ៉េខាងជើង។
ក្តីរំពឹងពីជំនួប ចិន-ជប៉ុន នៅបាងកក
ចំពោះរឿងកូរ៉េខាងជើង គឺ ថ្មីៗនេះ ប្រធានាធិបតីអាមេរិក បានសុំឲ្យប្រមុខរដ្ឋចិន ផ្លុំត្រចៀកថ្នាក់ដឹកនាំរបបក្រុងព្យុងយ៉ាង ហើយនៅបាងកកនេះទៀត គឺ គេសង្ឃឹមជាថ្មីថា នាយករដ្ឋមន្ត្រីជប៉ុន អាចបញ្ចុះបញ្ជូលប្រធានាធិបតីចិន ឲ្យដាស់តឿនមេដឹកនាំ គីម ជុងអ៊ុន។ ដ្បិតថា រដ្ឋធានីប៉េកាំង មានទំនាក់ទំនងការទូតល្អជាមួយព្យុងយ៉ាង ហើយចិនជាប្រទេសផ្គត់ផ្គង់គាំទ្រសេដ្ឋកិច្ចដ៏សំខាន់ដល់កូរ៉េខាងជើង។
ឈរលើមូលដ្ឋាននេះហើយ ដែលលោក ចូ បៃដិន ជួបលោក ស៊ី ជីនពីង កាលពីដើមសប្តាហ៍ ហើយបានជូនយោបល់ផ្តាំឲ្យកូរ៉េខាងជើងបញ្ឈប់សកម្មភាព។ ប្រធានាធិបតីអាមេរិក មានប្រសាសន៍បញ្ជាក់ហើយថា ការធ្វើតេស្តសាកល្បងមីស៊ីលជាបន្តបន្ទាប់របស់កូរ៉េខាងជើង គឺនឹងនាំឲ្យសហរដ្ឋអាមេរិកបង្កើនកងទ័ពនៅក្នុងប្រទេសសម្ព័ន្ធមិត្តកូរ៉េខាងត្បូងនិងជប៉ុន ដែលអាមេរិកមានមូលដ្ឋានយោធាស្រាប់។ ប្រទេស ចិន ក៏ច្បាស់ជាមិនចង់ឃើញដែរ។ អាស្រ័យហេតុនេះ ជំនួបចិន-ជប៉ុន នៅបាងកក គឺជាឱកាសប្រសើរជំរុញបន្ថែមក្នុងការដោះស្រាយវិបត្តិឧបទ្វីបកូរ៉េ។
ដោយឡែក បញ្ហាទ្វេភាគីវិញ គឺក្នុងរយៈជិត៣ឆ្នាំមកនេះ នេះជាលើកទី១ហើយ ដែលនាយករដ្ឋមន្ត្រីជប៉ុន ហ្វូមីអូ គីស៊ីដា បានជួបផ្ទាល់ជាមួយប្រធានាធិបតីចិន ស៊ី ជីនពីង។ ចិននិងជប៉ុន សុទ្ធសឹងតែជាមហាប្រទេសមានសេដ្ឋកិច្ចជឿនលឿនលំដាប់លេខ២និងលេខ៣ លើពិភពលោក។
ហេតុអ្វី បារាំង ចូលរួមប្រជុំនឹងគ្នាដែរ?
បន្ទាប់ពីចេញពីកិច្ចប្រជុំប្រទេសមានសេដ្ឋកិច្ចជឿនលឿនទាំង២០ នៅបាលី ឥណ្ឌូណេស៊ីរួចមក ប្រមុខរដ្ឋបារាំង លោក ម៉ាក្រុង តម្រង់មកបាងកក នៅល្ងាចថ្ងៃពុធ និងបានមើលកីឡាប្រដាល់វាយបុកនៅបាកកក។ បារាំងពុំមែនជារដ្ឋសមាជិករបស់APECទេ តែប្រទេសនេះ ត្រូវអញ្ជើញឲ្យចូលរួមជាភ្ញៀវកិត្តិយស គឺជាប្រទេសទី១ក្នុងរង្វង់សហភាពអឺរ៉ុប ដែលត្រូវអញ្ជើញឲ្យចូលរួមជាភ្ញៀវក្នុងជំនួប APEC នៅថៃ។
បើគិតឲ្យស៊ីជម្រៅ នេះក៏ជាឋិតក្នុងយុទ្ធសាស្ត្ររបស់បារាំង។ បារាំងក៏ដូចសហរដ្ឋអាមេរិកដែរ បានផ្តោតការយកចិត្តទុកដាក់ខ្លាំងចំពោះយុទ្ធសាស្ត្រនៅតំបន់ឥណ្ឌូប៉ាស៊ីហ្វិក។ ក្នុងខណៈពេលដែលចិនបង្កើនឥទ្ធិពលយោធាក្នុងតំបន់ បារាំងដែលឲ្យតម្លៃជាយុទ្ធសាស្ត្រសេរីភាពនាវាចរណ៍ គឺបានដាក់ពង្រាយទាហានប្រចាំការក្នុងតំបន់ ៧ ពាន់នាក់ រង់ចាំឈ្លបឃ្លាំមើលសភាពការណ៍។ បារាំង ក៏បង្កើនសមយុទ្ធជាច្រើនជាមួយ ឥណ្ឌា និង ជប៉ុន។ បារាំងបានលក់យន្តហោះចម្បាំងនិងយន្តហោះប្រដេញឲ្យ ឥណ្ឌូណេស៊ី ហើយរដ្ឋបាលក្រុងហ្សាការតា ក៏ចាប់ចិត្តចង់ទិញនាវាមុជទឹកនិងគ្រឿងចម្បាំងផលិតផលរបស់បារាំងដែរ។
ទោះជាយ៉ាងនេះក្តី វត្តមានរបស់ថ្នាក់ដឹកនាំបារាំងនៅពេលនេះ ហាក់ត្រូវប្រឈមមុខនឹង អូស្ត្រាលី ។ អូស្ត្រាលី ដែលបានផ្តាច់កិច្ចសន្យាឈប់ទិញនាវាមុជទឹកបារាំង កាលពីឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ