តើអ្វីខ្លះជាហានិភ័យនៅមជ្ឈមណ្ឌលនុយក្លេអ៊ែរហ្សាប៉ូរីចា?
ចុះផ្សាយនៅថ្ងៃ៖
ស្តាប់ - ០៧:២២
លោកប្រធានាធិបតីបារាំង អេម៉ានុយអែល ម៉ាក្រុង បានជជែកតាមទូរសព្ទជាមួយលោកប្រធានាធិបតីអ៊ុយក្រែន ហ្សេឡិនស្គី កាលពីថ្ងៃចន្ទ។ បើយោងតាមលោកម៉ាក្រុង ការជជែកតាមទូរសព្ទនេះត្រូវបានធ្វើឡើងដោយបន្ទាន់ ដើម្បីជជែក អំពីបញ្ហាសុវត្ថិភាពនៅឯមជ្ឈមណ្ឌលនុយក្លេអ៊ែរហ្សាប៉ូរីចា ក្រោយពីរងការបាញ់ផ្លោងជាច្រើនគ្រាប់ កាលពីថ្ងៃចុងសប្តាហ៍កន្លងទៅ។
ស្ថានភាពមជ្ឈមណ្ឌលនុយក្លេអ៊ែរហ្សាប៉ូរីចា ក្រោយការបាញ់ផ្លោងកាលពីចុងសប្តាហ៍
អ្នកជំនាញរបស់ទីភ្នាក់ងារ AIEA បានវាយតម្លៃស្ថានភាពទូទៅ កាលពីថ្ងៃចន្ទម្សិលមិញ ទាំងស្ថានភាពរ៉េអាក់ទ័រ និងហេដ្ឋារចនាសម្ព័ន្ធដែលនៅជុំវិញ។ បើយោងតាម AIEA ក្នុងចំណោមរ៉េអាក់ទ័រទាំង ៦ នៅមជ្ឈមណ្ឌលនុយក្លេអ៊ែរហ្សាប៉ូរីចានេះ មិនមានរ៉េអាក់ទ័រណាមួយត្រូវខូចខាតដោយការបាញ់ផ្លោង កាលពីចុងសប្តាហ៍កន្លងទៅនេះទេ។ អគារ និងសម្ភារៈមួយចំនួនត្រូវរងការខូចខាត ក៏ប៉ុន្តែ ការខូចខាតនេះមិនមានលើហេដ្ឋារចនាសម្ព័ន្ធចាំបាច់ សម្រាប់រក្សាសុវត្ថិភាពនុយក្លេអ៊ែរទេ។ ទីតាំងស្តុកសារធាតុវិទ្យុសកម្ម ប្រព័ន្ធគ្រប់គ្រងរ៉េអាក់ទ័រ និងប្រព័ន្ធផ្គង់ផ្គង់ចរន្តអគ្គិសនី ក៏មិនមានរងការខូចខាតអ្វីធ្ងន់ធ្ងរ ចំណែកកម្រិតវិទ្យុសកម្ម គឺនៅទាបក្នុងកម្រិតធម្មតា។
ក៏ប៉ុន្តែ អគ្គនាយកទីភ្នាក់ងារ AIEA បានទាញសញ្ញាអាសន្ន ពីព្រោះការបាញ់ផ្លោងកាលពីចុងសប្តាហ៍កន្លងទៅនេះ ត្រូវបានធ្វើឡើងជាច្រើនគ្រាប់ ដែលបង្ហាញថា ជាការធ្វើឡើងដោយចេតនាសំដៅលើមជ្ឈមណ្ឌលនុយក្លេអ៊ែរហ្សាប៉ូរីចាតែម្តង។ ម្យ៉ាងទៀត ការបាញ់ផ្លោងនេះមិនមែនធ្លាក់នៅឆ្ងាយរាប់រយម៉ែត្រនោះទេ គឺធ្លាក់ចំតែប៉ុន្មានម៉ែត្រប៉ុណ្ណោះ ពីហេដ្ឋារចនាសម្ព័ន្ធសំខាន់ៗរបស់មជ្ឈមណ្ឌលនុយក្លេអ៊ែរ។
ប្រសិនបើមានគ្រាប់ផ្លោងធ្លាក់ត្រូវចំតួរ៉េអាក់ទ័រនុយក្លេអ៊ែរ តើអាចនឹងនាំឲ្យទៅជាការផ្ទុះនុយក្លេអ៊ែរណាមួយដែរទេ?
បើទោះជាគ្រាប់ផ្លោងធ្លាក់ត្រូវចំតួរ៉េអាក់ទ័រនុយក្លេអ៊ែរដោយផ្ទាល់ក៏ដោយ គឺមិនអាចនាំឲ្យផ្ទុះ ដូចជាការផ្ទុះគ្រាប់បែកនុយក្លេអ៊ែរបានទេ ពីព្រោះ នៅក្នុងរ៉េអាក់ទ័រមិនមានសារធាតុនុយក្លេអ៊ែរ ដែលអាចផ្ទុះដូចអាវុធនុយក្លេអ៊ែរបាន។
នៅក្នុងអាវុធនុយក្លេអ៊ែរ គេត្រូវការសារធាតុអ៊ុយរ៉ាញ៉ូម ដែលបន្សុទ្ធរហូតដល់ទៅយ៉ាងតិច ៩០% ឯណោះ ដើម្បីអាចបង្កើតជាប្រតិកម្មនុយក្លេអ៊ែរគ្រប់គ្រាន់ អាចផ្ទុះជាគ្រាប់នុយក្លេអ៊ែរ។ ចំណែកនៅក្នុងរ៉េអាក់ទ័រនុយក្លេអ៊ែរផលិតថាមពលអគ្គិសនីវិញ មិនថានៅហ្សាប៉ូរីចា ឬក៏នៅរោងចក្រអគ្គិសនីនុយក្លេអ៊ែរណាផ្សេងទៀតក៏ដោយ គេប្រើអ៊ុយរ៉ាញ៉ូមបន្សុទ្ធត្រឹមក្រោម ២០% ប៉ុណ្ណោះ។ ដូច្នេះ វាមិនអាចផ្ទុះជាគ្រាប់បែកនុយក្លេអ៊ែរបានទេ។
តើអ្វីទៅជាហានិភ័យចម្បង ដែលអាចកើតឡើងនៅហ្សាប៉ូរីចា?
ហានិភ័យចម្បងបំផុត គឺការលេចធ្លាយវិទ្យុសកម្ម។ បើសិនជាមានការបាញ់ផ្លោងត្រូវចំតួរ៉េអាក់ទ័រ ទោះជាវាមិនត្រូវផ្ទុះដូចជាអាវុធនុយក្លេអ៊ែរក៏ដោយ ក៏ប៉ុន្តែ វាអាចធ្វើឲ្យលេចធ្លាយសារធាតុវិទ្យុសកម្មចេញមកក្រៅ។
ហានិភ័យនៃការលេចធ្លាយវិទ្យុសកម្មនេះ មិនមែនកើតឡើងតែក្នុងករណីបាញ់ផ្លោងត្រូវចំតួរ៉េអាក់ទ័រដោយផ្ទាល់ទេ។ នៅក្នុងមជ្ឈមណ្ឌលនុយក្លេអ៊ែរ មានទីតាំងផ្សេងទៀត ដែលសុទ្ធតែមានហានិភ័យខ្ពស់ អាចនាំឲ្យមានលេចធ្លាយវិទ្យុសកម្ម ជាអាទិ៍ ទីតាំងស្តុកសារធាតុវិទ្យុសកម្ម ដែលគេប្រើរួច បណ្តាញគ្រប់គ្រងរ៉េអាក់ទ័រ និងជាពិសេស បណ្តាញផ្គត់ផ្គង់អគ្គិសនី ដែលជាកត្តាចាំបាច់បំផុតមិនអាចខ្វះបាន នៅក្នុងការរក្សាសុវត្ថិភាពនុយក្លេអ៊ែរ។
គួរបញ្ជាក់ថា នៅក្នុងយន្តការផលិតអគ្គិសនី ដោយថាមពលនុយក្លេអ៊ែរ មិនមែនប្រតិកម្មនុយក្លេអ៊ែរបង្កើតទៅជាថាមពលអគ្គិសនីដោយផ្ទាល់នោះទេ។ ប្រតិកម្មនុយក្លេអ៊ែរនៅក្នុងស្នូលរ៉េអាក់ទ័របង្កើតបានជាថាមពលទែរមិច ពោលគឺ កម្តៅ។ កម្តៅបង្កើតជាចំហាយទឹក។ កម្លាំងចំហាយទឹកបង្វិលតួរប៊ីន ទើបផលិតជាថាមពលអគ្គិសនី។
ដូច្នេះ គេចាំបាច់ត្រូវការប្រព័ន្ធទឹកត្រជាក់ ដើម្បីរក្សាសីតុណ្ហភាពស្នូលរ៉េអាក់ទ័រកុំឲ្យកើនឡើងហួសកំណត់ ហើយប្រព័ន្ធទឹកត្រជាក់នេះ អាចដំណើរការទៅបាន គឺចាំបាច់ត្រូវការចរន្តអគ្គិសនី។
នៅក្នុងដំណើរការធម្មតា គេអាចយកថាមពលអគ្គិសនី ដែលផលិតបានដោយរ៉េអាក់ទ័រមកប្រើ ដើម្បីដំណើរការប្រព័ន្ធទឹកត្រជាក់។ ក៏ប៉ុន្តែ បញ្ហាចោទនៅត្រង់ថា បើទោះជាក្រោយពេលដែលគេបិទរ៉េអាក់ទ័រលែងឲ្យដំណើរការហើយក៏ដោយ ប្រតិកម្មនុយក្លេអ៊ែរនៅក្នុងស្នូលរ៉េអាក់ទ័រមិន ឈប់ភ្លាមៗនោះទេ។ ដូច្នេះ គេនៅតែត្រូវការចរន្តអគ្គិសនី ដើម្បីដាក់ឲ្យដំណើរការប្រព័ន្ធទឹកត្រជាក់ ដើម្បីគ្រប់គ្រងសីតុណ្ហភាពស្នូលរ៉េអាក់ទ័រ ហើយដោយសារតែរ៉េអាក់ទ័រលែងដំណើរការ លែងអាចផលិតអគ្គិសនីបាន ដូច្នេះ ចរន្តអគ្គិសនី ដើម្បីដំណើរការប្រព័ន្ធទឹកត្រជាក់នេះ គឺចាំបាច់ត្រូវមកពីប្រភពផ្សេង។
ប្រសិនបើបណ្តាញផ្គត់ផ្គង់អគ្គិសនីពីក្រៅនេះត្រូវអាក់ខានដោយប្រការណាមួយ ប្រព័ន្ធទឹកត្រជាក់នៅក្នុងរ៉េអាក់ទ័រនឹងមិនអាចដំណើរការបាន សីតុណ្ហភាពក្នុងស្នូលរ៉េអាក់ទ័រក៏ត្រូវកើនឡើងគ្រប់គ្រងលែងបាន វាអាចនឹងធ្វើឲ្យស្នូលរ៉េអាក់ទ័រត្រូវក្តៅខ្លាំងរហូតត្រូវរលាយ ហើយបញ្ចេញសារធាតុវិទ្យុសកម្មមកខាងក្រៅ។
យើងធ្លាប់ឃើញករណីបែបនេះរួចមកហើយ កាលពីនៅហ្វូគូស្ហ៊ីម៉ា កាលពីឆ្នាំ២០១១កន្លងទៅ។ នៅពេលនោះ រលកយក្សស៊ូណាមិ មិនបានធ្វើឲ្យខូចខាតទៅដល់តួរ៉េអាក់ទ័រ នៅហ្វូគូស្ហ៊ីម៉ាដោយផ្ទាល់នោះទេ ក៏ប៉ុន្តែ វាធ្វើឲ្យខូចខាតប្រព័ន្ធផ្គត់ផ្គង់អគ្គិសនី ប្រព័ន្ធទឹកត្រជាក់លែងដំណើរការ ទើបធ្វើឲ្យរលាយស្នូលរ៉េអាក់ទ័រ ហើយលេចធ្លាយវិទ្យុសកម្មមកក្រៅ។
នៅហ្សាប៉ូរីចា រ៉េអាក់ទ័រនុយក្លេអ៊ែរទាំង ៦ ត្រូវបិទលែងដំណើរការ តាំងពីខែកញ្ញាមកម៉្លេះ ដូច្នេះ គេត្រូវការចរន្តអគ្គិសនីពីប្រភពខាងក្រៅរ៉េអាក់ទ័រទាំងស្រុង ដើម្បីដំណើរការប្រព័ន្ធទឹកត្រជាក់ គ្រប់គ្រងសីតុណ្ហភាពនៅក្នុងស្នូលរ៉េអាក់ទ័រ។ ដូច្នេះ ហានិភ័យធំបំផុតនៅមជ្ឈមណ្ឌលនុយក្លេអ៊ែរហ្សាប៉ូរីចានេះ គឺការខូចខាតបណ្តាញផ្គត់ផ្គង់អគ្គិសនីពីខាងក្រៅទៅរ៉េអាក់ទ័រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ