ទណ្ឌកម្មបន្ថែមលើរុស្ស៊ី បស្ចិមប្រទេស កំណត់តម្លៃប្រេងរុស្ស៊ី ត្រឹម៦០ដុល្លារមួយបារីល
ចុះផ្សាយនៅថ្ងៃ៖
ស្តាប់ - ០៧:០៧
ប្រទេសមានសេដ្ឋកិច្ចជឿនលឿននាំមុខ G7 និង អូស្ត្រាលី យល់ព្រមព្រៀងលើការកំណត់តម្លៃប្រេងរុស្ស៊ី គឺតម្លៃ ៦០ដុល្លារ ក្នុងមួយធុងបារីល។ នេះគឺជាទណ្ឌកម្មសេដ្ឋកិច្ចលើរុស្ស៊ី ដែលបង្កសង្គ្រាមឈ្លានពានអ៊ុយក្រែន។ វិធានការកំណត់តម្លៃប្រេងនេះ គឺស្របគ្នានឹងចំណាត់ការរបស់សហភាពអឺរ៉ុប ដែលនឹងចូលជាធរមាន ចាប់ពីថ្ងៃច័ន្ទ ទី៥ធ្នូ។
ប្រទេសលោកខាងលិច ពួតដៃគ្នា ដាក់ទណ្ឌកម្មសេដ្ឋកិច្ចលើរុស្ស៊ី?
ច្រើនខែមកហើយ ដែលបណ្តាបច្ចិមប្រទេស ជជែកគ្នានិងរិះរកគន្លឹះ ដើម្បីបង្ក្រាបរុស្ស៊ី ហើយក៏បានដាក់ទណ្ឌកម្មជាបន្តបន្ទាប់។ ថ្ងៃសុក្រទី២ធ្នូ ប្រទេសមានសេដ្ឋកិច្ចជឿនលឿននាំមុខ ទាំង៧ G7 គឺអាល្លឺម៉ង់ អ៊ីតាលី បារាំង ជប៉ុន កាណាដា សហរដ្ឋអាមេរិក អង់គ្លេស បួករួមទាំង អូស្ត្រាលី បានឯកភាពកំណត់តម្លៃប្រេងរុស្ស៊ី ត្រឹម ៦០ដុល្លារ ក្នុងមួយធុងបារីល ចំពោះប្រេងដឹកតាមផ្លូវសមុទ្រ។
ក្នុងចំណោម G7 នេះ គឺបីប្រទេស អាល្លឺម៉ង់ អ៊ីតាលី បារាំង ជាសមាជិកសហភាពអឺរ៉ុប ស្រេចហើយ ។ សហភាពអឺរ៉ុប បានសម្រេចជាកំហិត កំណត់តម្លៃប្រេងនេះ ថានឹងចូលជាធរមានចាប់ពីថ្ងៃច័ន្ទ ទី៥ធ្នូ ដើមសប្តាហ៍ថ្មីទៅ។ ដូច្នេះ ការសម្រេចរបស់ G7 និង អូស្រាលី ហើយនិង សហភាពអឺរ៉ុប គឺរលូនក្នុងគោលគំនិតតែមួយ។
ភ្លាមៗ រដ្ឋមន្ត្រីហិរញ្ញវត្ថុសហរដ្ឋអាមេរិក Janet Yallen បានប្រកាសសាទរ និងចាត់ទុកថា ការសម្រេចនេះ ជាផ្លែផ្កានៃសាមគ្គីភាពរួមគ្នា ដែលគ្រប់គ្នាបានប្រឹងប្រែងធ្វើច្រើនខែមកហើយ។
ចំពោះសហភាពអឺរ៉ុប គឺនេះជាការសម្តែងសាមគ្គីភាពរួមគ្នាជួយអ៊ុយក្រែន។ ប្រធានគណៈកម្មការអឺរ៉ុប ថ្លែងសាទរចំពោះការព្រមព្រៀងក្នុងសំឡេងតែមួយ ពួតដៃគ្នាចាត់ការបង្ក្រាប រុស្ស៊ី។ អ្នកស្រី អួរស៊ូឡា វ៉ុនឌែរ ឡេយែន ក៏អះអាងដែរថា ការកំណត់តម្លៃប្រេង ត្រឹម៦០ដុល្លារមួយបារីល ឬទិញក្នុងតម្លៃតិចជាងនេះ គឺវានឹងជួយដល់ផ្តល់ប្រយោជន៍ដល់ប្រទេសក្រីក្រ និងប្រទេសកំពុងអភិវឌ្ឍ ទៀតផង។
តើប៉ះពាល់កម្រិតណា ចំពោះរុស្ស៊ី?
រុស្ស៊ី បានចំណូលច្រើនពាន់លានអឺរ៉ូពីការលក់ប្រេងនិងឧស្ម័ន ហើយនិង រដ្ឋបាលក្រុងម៉ូស្កូយកប្រាក់ចំណូលនោះ សម្រាប់បំប៉នម៉ាស៊ីនធ្វើសឹកសង្គ្រាម។ ដូច្នេះហើយ ទើបប្រទេសលោកខាងលិចរកផ្លូវទប់ទល់ តាមរយៈបន្ថយកម្លាំងសេដ្ឋកិច្ចរុស្ស៊ី។
បើគិតក្នុងរង្វង់ប្រទេសសហភាពអឺរ៉ុប រយៈពេលចាប់តាំងពីផ្ទុះសង្គ្រាមនៅអ៊ុយក្រែនមក គឺ រុស្ស៊ីបានផលចំណេញទឹកប្រាក់ចំនួន ៦៧ ពាន់លានអឺរ៉ូ ពីការលក់ប្រេងក្នុងសហភាពអឺរ៉ុប ខណៈពេលដែលគម្រោងថវិកាយោធារុស្ស៊ីប្រចាំឆ្នាំ ដំឡើងប្រហែលជា ៦០ពាន់លានអឺរ៉ូ។ នេះបើតាមការបញ្ជាក់របស់អ្នកជំនាញផ្នែកថាមពល នៃវិទ្យាស្ថាន Jacques-Delors។
បន្ថែមលើទណ្ឌកម្មផ្សេងទៀត វិធានការរបស់លោកខាងលិចជុំវិញការកំណត់ថ្លៃប្រេងរុស្ស៊ី គឺច្បាស់ជាប៉ះពាល់ចំពោះសេដ្ឋកិច្ច រុស្ស៊ី។ ម្យ៉ាងទៀត បើក្រុមហ៊ុនណាចង់នាំប្រេងរុស្ស៊ីមកលក់នៅអឺរ៉ុប ឬក្នុងប្រទេសដែលយល់ព្រមកំណត់តម្លៃថោកបែបនេះ គឺជួបការលំបាក ហើយចំណែកវិស័យសេវាកម្មផ្លូវសមុទ្រ និងវិស័យធានារ៉ាប់រងផ្សេងទៀត គឺមិនសូវជាលើកទឹកចិត្តឲ្យគេចង់វិនិយោគជាមួយឡើយ។
នៅថ្ងៃសៅរ៍ ទី៣ធ្នូ ប្រធានាធិបតីអ៊ុយក្រែន បានថ្លែងអបអរសាទរចំពោះចំណាត់ការរបស់ប្រទេសជាមិត្តនៅបស្ចិមប្រទេស ហើយលោក វ៉ូឡូឌីមៀរ ហ្សេឡេនស្គី សង្ឃឹមថា សេដ្ឋកិច្ចរុស្ស៊ីនឹងត្រូវបំផ្លាញខូចខាត។ ប្រធានខុទ្ទកាល័យវិមានប្រធានាធិបតីអ៊ុយក្រែន បញ្ជាក់តាមប្រព័ន្ធតេលេក្រាមដែរថា បើចង់ឲ្យរុស្ស៊ីទន់ខ្សោយរឹតតែឆាប់នោះ គឺកំណត់តម្លៃប្រេងរុស្ស៊ី ឲ្យចុះខ្លាំងថែមទៀត ត្រឹមតែ៣០ដុល្លារតែម្តង ទើបសេដ្ឋកិច្ចរុស្ស៊ីនឹងដួលបាស់ជើងឆាប់។
ចំណែកភាគីរុស្ស៊ី ចៅហ្វាយវិមានក្រេមឡាំង បានព្រមានពីផលវិបាកធ្ងន់ធ្ងរចំពោះវិធានការរបស់លោកខាងលិចនៅពេលនេះ ព្រោះវានឹងនាំឲ្យអស្ថិរភាពទីផ្សារថាមពល។ លោក វ្ល៉ាឌីមៀរ ពូទីន ក៏ព្រមានដែរថា នឹងឈប់លក់ប្រេងឲ្យប្រទេសដែលយល់ព្រមអនុវត្តវិធានការកំណត់ថ្លៃប្រេងរុស្ស៊ីបែបនេះ។
រុស្ស៊ី ព្រមានពីអស្ថិរភាពទីផ្សារថាមពល។
អ្នកជំនាញខាងវិស័យថាមពល បានថ្លែងក្តីព្រួយបារម្ភចំពោះចំណាត់ការរបស់ប្រទេសលោកខាងលិច នៅពេលនេះ គឺខ្លាចក្រែងធ្វើឲ្យអស្ថិរភាពខាងថាមពលប្រេងឥន្ធនៈ។ មុនការកំណត់តម្លៃ៦០ដុល្លារនេះ គឺប្រេងឆៅរុស្ស៊ី ថ្លៃជាង ៦៥ដុល្លារ ក្នុងមួយធុងបារីល។ តម្លៃប្រេងឆៅពិភពលោក ក៏បានធ្លាក់ចុះជាបន្តបន្ទាប់ ព្រោះតែ កូវីដ១៩។ មុននៅខែមីនា ប្រេងមានតម្លៃ ១៣០ដុល្លារ ក្នុងមួយធុងបារីល ហើយធ្លាក់មកត្រឹម ៨០-៨៥ដុល្លារ នៅពេលក្រោយមក។ ពេលនេះ បើចង់លក់-ទិញប្រេងឆៅ ថ្លៃត្រឹម៦០ដុល្លារ គឺច្បាស់ជា ប្រទេសផលិតប្រេងមិនសប្បាយចិត្ត ហើយនិងចង់ឬមិនចង់ ច្បាស់ត្រូវកាត់បន្ថយការផលិត ជាក់ជាមិនខាន។
នៅពេលនេះ អ្នកជំនាញព្យាករស្រេចហើយថា គេអាចនឹងបន្ថយការផលិត ប្រមាណជា ២លានបារីលក្នុងមួយថ្ងៃ។ កាលណាតម្លៃប្រេងចុះថោក ប្រទេសផលិតប្រេង ផ្អាកឈប់ផលិត ឬបន្ថយចំនួនផលិត ដែលវានាំឲ្យជ្រួលច្របល់ដល់ទីផ្សារប្រេង ដូចដែលលោក ពូទីន បានលើកឡើងដូច្នោះមែន។
នៅពេលនេះ គេរំពឹងរង់ចាំមើលការសម្រេច និងប្រតិកម្មឆ្លើយតបពីបណ្តាក្រុមប្រទេសផលិតប្រេង OPEP ។ OPEP នឹងប្រជុំគ្នា ថ្ងៃអាទិត្យ ទី៤ធ្នូ នៅក្រុងវីយែន។
ក្រៅពីនេះ គេក៏កំពុងសម្លឹងមើលប្រតិកម្មរបស់ ឥណ្ឌា និង ចិន ជាប្រទេសធំ២នៅអាស៊ី ដែលទិញប្រេងយ៉ាងច្រើនសន្ធឹក។ បើថ្លែងចំពោះតែរដ្ឋបាលប៉េកាំង គឺ ចិនជាប្រទេសនាំចូលប្រេងច្រើនជាងទី២លើកពិភពលោក។ ចិន ដែលសេដ្ឋកិច្ចរងផលប៉ះពាល់ដោយសារកូវីដផង គឺត្រូវការប្រេងសម្រាប់បញ្ឆេះក្បាលម៉ាស៊ីន ស្តារសេដ្ឋកិច្ចឡើងវិញ។ បើសេដ្ឋកិច្ចចិន មានបញ្ហា ប្រទេសផ្សេងៗ ប្រហែលជាជៀសមិនផុត ពីរងឥទ្ធិពល។
ហេតុដូច្នេះ ការសម្រេចរបស់លោកខាងលិចនៅពេលនេះ វាមិនប៉ះពាល់ត្រឹមតែរុស្ស៊ីទេ តែវាអាចរាលដល់ធំដល់ប្រទេសច្រើនផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ