សហភាពអឺរ៉ុប-អូស្ត្រាលី-G7 ចាប់ផ្តើមអនុវត្តទណ្ឌកម្ម លើការនាំចេញប្រេងឆៅរបស់រុស្ស៊ី
ចុះផ្សាយនៅថ្ងៃ៖
ស្តាប់ - ០៧:១៦
ចាប់ពីថ្ងៃចន្ទទី៥ធ្នូនេះតទៅ ការនាំចេញប្រេងឆៅរបស់រុស្ស៊ី នឹងត្រូវជាប់ទណ្ឌកម្ម។ ជាទណ្ឌកម្ម ដែលត្រូវបានអនុម័តដោយសហភាពអឺរ៉ុប ក្រុមប្រទេសសេដ្ឋកិច្ចនាំមុខG7 និងអូស្ត្រាលី។ ទណ្ឌកម្មនេះ នឹងហាមឃាត់ក្រុមហ៊ុនទាំងអស់នៅតាមបណ្តាប្រទេសទាំងនេះ មិនឲ្យធានារ៉ាប់រង មិនឲ្យដឹកជញ្ជូនតាមសមុទ្រ និងមិនឲ្យទិញលក់បន្ត ប្រសិនបើប្រេងឆៅ របស់រុស្ស៊ីនោះ មានតម្លៃលើសពី៦០ដុល្លារ ក្នុងមួយធុងបារីល។
តម្លៃអតិបរមា ៦០ដុល្លារក្នុងមួយធុងបារីល
ទណ្ឌកម្មទៅលើការនាំចេញប្រេងឆៅរុស្ស៊ីនេះ គឺជាការសម្រេចរួមគ្នា របស់សហភាពអឺរ៉ុប រួមជាមួយក្រុមប្រទេសសេដ្ឋកិច្ចនាំមុខ G7 និងអូស្ត្រាលីផងដែរ។ នៅក្នុងយន្តការទណ្ឌកម្មនេះវាមាន២ចំណុចគោលដែលប្រទាក់គ្នា។ ទីមួយ គឺការកំណត់តម្លៃអតិបរមានៃប្រេងឆៅរបស់រុស្ស៊ី មិនឲ្យលើសពី៦០ដុល្លារ ក្នុងមួយធុងបារីស។ ទី២គឺ ក្រុមហ៊ុនទាំងអស់ដែលចុះបញ្ជីនៅតាមប្រទេសពាក់ព័ន្ធទាំងអម្បាលម៉ានខាងលើ មានទាំងក្រុមហ៊ុនរកស៊ីគួកជេ ដេញថ្លៃ លក់បន្តចែកចាយ ក្រុមហ៊ុនដឹកជញ្ជូនតាមសមុទ្រ និងក្រុមហ៊ុនធានារ៉ាប់រងការដឹកជញ្ជូនជាដើម មិនអាចធ្វើប្រតិបត្តិការជំនួញលើប្រេងឆៅរុស្ស៊ី ប្រសិនបើប្រេងនោះ មានតម្លៃលើសពី៦០ដុល្លារក្នុងមួយធុងបារីល។
ទណ្ឌកម្មនេះ គឺក្រុមប្រទេសលោកខាងលិច បានយកពេលពិចារណា ច្រើនខែមកហើយ បន្ទាប់ពីរុស្ស៊ីបានធ្វើសង្គ្រាមឈ្លានពានអ៊ុយក្រែន។ វាជាយន្តការទណ្ឌកម្ម ដើម្បីដាក់ពិន័យ និងវាយឲ្យចំ ទៅលើចំណូលថវិកាដ៏សំខាន់របស់រុស្ស៊ី។ រុស្ស៊ីគឺជាប្រទេសផលិតប្រេងឆៅ ដើម្បីនាំចេញ ធំជាងគេលំដាប់ទី២នៃពិភពលោក។ ក៏ប៉ុន្តែ ការនាំចេញប្រេងឆៅរបស់រុស្ស៊ី គឺរុស្ស៊ីត្រូវការប្រើប្រាស់ក្រុមហ៊ុនដឹកជញ្ជូនតាមកាប៉ាល់ ដែលភាគច្រើនលើសលប់ គឺជាក្រុមហ៊ុនចុះបញ្ជីនៅសហភាពអឺរ៉ុប។ ហើយការដឹកជញ្ជូនតាមសមុទ្រនេះ ក៏ត្រូវតែមានកិច្ចសន្យាធានារ៉ាប់រងជាចាំបាច់។ ហើយ៩០%នៃក្រុមហ៊ុនធានារ៉ាប់រង ដែលធ្វើប្រតិបត្តិការក្នុងការដឹកជញ្ជូនប្រេងឆៅតាមសមុទ្រនេះ គឺសុទ្ធសឹងតែជាក្រុមហ៊ុនរបស់ប្រទេសសេដ្ឋកិច្ចនាំមុខ G7។ ដូច្នេះហើយបានជា ក្រុមប្រទេសលោកខាងលិច សម្រេចយកយន្តការនេះ ដើម្បីដាក់សំពាធទៅលើការនាំចេញប្រេងឆៅរបស់រុស្ស៊ី។
ទណ្ឌកម្មដើម្បីកុំឲ្យរុស្ស៊ីចំណេញខ្លាំងពេក ពីការលក់ប្រេងឆៅ
រុស្ស៊ីអាចបន្តនាំចេញប្រេងឆៅបានធម្មតា តែតម្លៃមិនត្រូវឲ្យលើសពី៦០ដុល្លារក្នុងមួយធុងបារីល។ ក្រុមប្រទេសលោកខាងលិច ក៏បានទទួលស្គាល់ដែរថា ពិតមែន តម្លៃ៦០ដុល្លារក្នុងមួយធុងបារីលនេះ គឺវានៅខ្ពស់ខ្លាំងណាស់ បើប្រៀបធៀបទៅតម្លៃចំណាយផលិតរបស់រុស្ស៊ី ដែលមានន័យថា រុស្ស៊ីនៅតែចំណេញអញ្ចឹង។ ក៏ប៉ុន្តែ អ្វីដែលជាកម្មវត្ថុរបស់ក្រុមប្រទេសលោកខាងលិច សម្រាប់ពេលនេះ គឺមិនចង់ឲ្យរុស្ស៊ីខាតខ្លាំង ហើយឈប់ផលិត និងនាំចេញប្រេងឆៅនោះទេ។ គេចង់ជំរុញឲ្យរុស្ស៊ីបន្តនាំចេញ តែក្នុងកម្រិតចំណេញមួយ មិនខ្លាំងជ្រុល បើប្រៀបធៀបទៅតម្លៃនៅលើទីផ្សារប្រេងជាទូទៅ ដែលបច្ចុប្បន្ន ខ្ទង់៨០ទៅ៨៥ដុល្លារក្នុងមួយធុងបារីល។
អ្នកជំនាញ គឺជឿថា តាមរយៈយន្តការនេះ រុស្ស៊ីនឹងបាត់បង់ប្រាក់ចំណេញមួយចំនួនធំពិតមែន តែនៅតែចំណេញ ហើយនឹងនៅតែបន្តនាំចេញ។ ដរាបរុស្ស៊ីបន្តនាំចេញប្រេងឆៅ មានន័យថា ទីផ្សារប្រេង ចំនួនស្តុកប្រេងពិភពលោក នឹងមិនជួបបញ្ហារំជើបរំជួល ហើយធ្វើឲ្យតម្លៃឡើងស្រឺតៗនោះទេ។ ហើយមួយវិញទៀត ខាងសហភាពអឺរ៉ុប បានអះអាងថា ការកំណត់តម្លៃអតិបរមាលើប្រេងឆៅរបស់រុស្ស៊ី មិនឲ្យលើសពី៦០ដុល្លារនេះ គឺវានឹងជួយក្រុមប្រទេសក្រីក្រ ប្រទេសកំពុងអភិវឌ្ឍន៍ ឲ្យអាចបន្តទិញប្រេងរុស្ស៊ីបាន ក្នុងតម្លៃមួយថោកសមរម្យ។
បន្ថែមពីនេះ ក្រុមប្រទេសG7 សហភាពអឺរ៉ុប និងអូស្ត្រាលី បានអះអាងថា នៅពាក់កណ្តាលខែមករា ដើមឆ្នាំក្រោយ គេនឹងប្រជុំស្រុះស្រួលគ្នា សើរើកម្រិតអតិបរមានៃតម្លៃប្រេងឆៅរបស់រុស្ស៊ីនេះជាថ្មី។ ហើយគេអាច សើរើទាញទម្លាក់តម្លៃ ចំនួន៥% នៃតម្លៃមធ្យមនៅលើទីផ្សារប្រេង នៅរៀងរាល់២ខែម្តង ដោយអាស្រ័យលើស្ថានភាពជាក់ស្តែង។
ទោះចំណេញតិច រុស្ស៊ីនៅតែបន្តផលិតនាំចេញ
កាលពីថ្ងៃអាទិត្យទី៤ធ្នូ រុស្ស៊ីបានប្រកាសថា គេត្រៀមខ្លួននឹងឈប់នាំចេញប្រេងឆៅរបស់គេ ប្រសិនបើលក់បានតម្លៃថោកពេក។ ហេតុដូច្នេះហើយ បានជាក្រុមប្រទេសលោកខាងលិច មិនចង់រុញឲ្យរុស្ស៊ីទាល់ច្រកខ្លាំងទេ ដោយទុកផ្លូវឲ្យចំណេញបង្គួរ។ ក្រៅពីនាំចេញប្រេងមកលក់នៅអឺរ៉ុប រុស្ស៊ីនាំចេញប្រមាណ៥លានធុងបារីលក្នុងមួយថ្ងៃ ទៅកាន់បណ្តាប្រទេសផ្សេងៗទៀតទូទាំងពិភពលោក។ ក្រុមប្រទេសលោកខាងលិច មិនចង់ឃើញប្រេងឆៅ៥លានធុងបារីលនេះ បាត់បង់លែងមាននៅលើទីផ្សារ ធ្វើឲ្យជ្រួលច្របល់ តម្លៃឡើងថ្លៃថែមទៀតនោះទេ។
មួយវិញទៀត អ្នកជំនាញនៅអឺរ៉ុបជឿថា រុស្ស៊ីនឹងមិនឈប់ផលិតប្រេងឆៅនោះទេ ព្រោះថាបើឈប់ វានឹងធ្វើឲ្យខូច ដល់ប្រព័ន្ធហេដ្ឋារចនាសម្ព័ន្ធផលិត នៅតាមអណ្តូងប្រេងឆៅ ដែលមិនអាចទុកចោលយូរខែបាន។ ទោះចំណេញតិចឬច្រើន គឺរុស្ស៊ីនឹងនៅតែបន្តផលិតនាំចេញ ព្រោះថាវាជាប្រភពចំណូលសំខាន់ខ្លាំងណាស់ សម្រាប់រដ្ឋរុស្ស៊ី។ ចំណូលសេដ្ឋកិច្ច ដែលចុះថយខ្លាំងរួចទៅហើយ ដោយសារតែអឺរ៉ុបឈប់ទិញឧស្ម័ន ហើយវិស័យធនាគារក៏ជាប់គាំងថែមទៀត ដោយសារតែទណ្ឌកម្ម។
រុស្ស៊ីអាចជ្រើសយកផ្លូវងងឹត ដើម្បីគេចចេញពីទណ្ឌកម្ម?
គ្មានទណ្ឌកម្មណា អាចបិទផ្លូវជិតទាំងស្រុងនោះទេ។ វារមែងតែងមានច្រកផ្លូវកាត់ បង្វៀងបង្វែងដាន ដើម្បីគេចវេសពីទណ្ឌកម្មទាល់តែបាន។ ជាក់ស្តែង ទណ្ឌកម្មដែលគេបានដាក់ទៅលើការនាំចេញប្រេង របស់អ៊ីរ៉ង់ និងវ៉េណេស៊ុយអេឡាជាដើម។ របបផ្តាច់ការទាំង២នេះ នៅតែអាចបន្តនាំចេញប្រឹង តាមផ្លូវងងឹង ក្នុងកម្រិតចំនួនណាមួយដដែល។
មានការលើកឡើងថា រុស្ស៊ីអាចនឹងប្រើប្រាស់ នាវាដឹកជញ្ជូនផ្ទាល់ខ្លួន ដើម្បីនាំប្រេងឆៅចេញ ហើយប្រើប្រាស់ក្រុមហ៊ុនធានារ៉ាប់រងតូចតាច ចុះបញ្ជីនៅតាមប្រទេសផ្សេងៗទៀត ក្រៅពីនៅតាមបណ្តាប្រទេស ដែលត្រូវអនុវត្តទណ្ឌកម្ម។ តែយ៉ាងណា វាមិនមែនជារឿងងាយស្រួលធ្វើ ក្នុងរយៈពេលមួយភ្លាមៗនោះទេ។ វិស័យដឹកជញ្ជូនផ្លូវសមុទ្រ មានភាពចាក់ស្រែស មានបណ្តាញរឹងមាំរាប់សិបឆ្នាំ ដែលមិនអាចធ្វើបានដោយងាយនោះឡើយ។ ចំនួននាវាដឹកប្រេងរបស់រុស្ស៊ី មានមិនច្រើនទេ ហើយក្រុមប្រទេសពាក់ព័ន្ធទាំងអស់ គេនឹងបង្កើនការត្រួតពិនិត្យ ទៅលើនាវាដឹកជញ្ជូនប្រេងតាមសមុទ្រ ដែលអាចក្លែងបន្លំដឹកប្រេងរុស្ស៊ី។
មួយវិញទៀត ដំណោះស្រាយផ្លូវកាត់ បែបផ្លូវងងឹតបែបនេះ វានឹងធ្វើឲ្យអតិថិជនរុស្ស៊ី ដែលមានជាអាថិ៍ ចិន និងឥណ្ឌា បារម្ភ លែងសូវទុកចិត្ត ប្រសិនបើត្រូវគេចាប់បាន។ ចិន និងឥណ្ឌា គឺជាអតិថិជនធំណាស់ ដែលរុស្ស៊ីមិនអាចបណ្តោយឲ្យរបូតបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ