ប៉េរូ៖ ប្រធានធិបតីប៉េដ្រូ កាស្ទីឡូ ប៉ុនប៉ងរំលាយសភាតែត្រូវសភារំលាយវិញ ហើយត្រូវចាប់ខ្លួនពីបទពុករលួយ
ចុះផ្សាយនៅថ្ងៃ៖
ស្តាប់ - ០៧:៤១
ប្រទេសប៉េរូ បានជួបនឹងភាពរំជើបរំជួលនយោបាយ អស់ជាច្រើនខែមកហើយ ក្រោយការចូលកាន់តំណែង របស់លោកប្រធានាធិបតី ប៉េដ្រូ កាស្ទីឡូ ។ ភាពរំជើបរំជួលវិបត្តនយោបាយ បានកក្រើកកាន់តែខ្លាំងកាលពីថ្ងៃពុធ ទី៧ធ្នូ បន្ទាប់ពីលោកប្រធានាធិបតីរូបនេះ បានប្រកាសរំលាយសភាចោល បង្កើតរដ្ឋាភិបាលបន្ទាន់មួយ និង បង្កើតសភាធម្មនុញ្ញដើម្បីតាក់តែងរដ្ឋធម្មនុញ្ញថ្មី។ តែទីបំផុត គឺលោកប្រធានាធិបតីប៉េដ្រូខ្លួនឯង ដែលត្រូវបានសភាប៉េរូ បោះឆ្នោតទំលាក់ពីតំណែង។ ភ្លាមៗនោះ លោកត្រូវបានសមត្ថកិច្ចចុះទៅចាប់ខ្លួន ដោយចោទពីបទពុករលួយ ស៊ីសំណូក។ លោកស្រី ឌីណា បូលូអាត អតីតប្រធានាធិបតី ត្រូវបានរដ្ឋសភាប្រកាសតែងតាំងឲ្យធ្វើជាប្រធានាធិបតី ជំនួសលោកប៉េដ្រូ កាស្ទីឡូ។
គ្រូបង្រៀនជនបទ ដែលគ្មានបទពិសោធន៍នយោបាយ
វិបត្តិនយោបាយនៅប៉េរូ មានជាញឹកញាប់ ហើយបានធ្លាក់ដុនដាបតាំងតែពីឆ្នាំ២០១៨ម្លេះ។ វិបត្តិនយោបាយដែលកើតឡើងដោយការមិនចុះសម្រុងគ្នា រវាងរដ្ឋសភា និងប្រធានាធិបតី។ រដ្ឋសភាបានបោះឆ្នោតទំលាក់ប្រធានាធិបតីប៉េរូ ២នាក់រួចមកហើយ ម្នាក់នៅឆ្នាំ២០១៨ និងម្នាក់ទៀតនៅឆ្នាំ២០២០។ តែវិបត្តិនយោបាយនេះ មិនបានបិទបញ្ចប់ទេ គឺកាន់តែធ្ងន់ធ្ងរ នៅក្រោយការបោះឆ្នោត ខែកក្កដា ឆ្នាំ២០២១ ដែលបានរុញលោក ប៉េដ្រូ កាស្ទីឡូ ឲ្យឈានក្លាយជាប្រធានាធិបតី។ លោកម្នាក់នេះមកពីបក្សឆ្វេងសង្គមនិយម លទ្ធិម៉ាក្សឡេនីន ហើយជាអតីតគ្រូបង្រៀនស្រុកស្រែជនបទ ដែលពុំមានបទពិសោធន៍នយោបាយទាល់តែសោះ។
ក្រោយក្លាយជាប្រធានាធិបតី ពីមួយថ្ងៃទៅមួយថ្ងៃ លោកប៉េដ្រូ កាស្ទីឡូ បានធ្វើឲ្យប្រជាពលរដ្ឋ ក៏ដូចជាថ្នាក់ដឹកនាំនយោបាយភាគច្រើន ខកចិត្តជាខ្លាំងដោយសារតែកង្វះសមត្ថភាពក្នុងការដឹកនាំប្រទេស ធ្វើឲ្យមានវិបត្តិ ឈ្លោះប្រកែកគ្នានៅតាមក្រសួងស្ថាប័នរដ្ឋ។ ក្នុងរយៈពេលប្រមាណ៨ខែ លោកប្រធានាធិបតីរូបនេះ ដូរនាយករដ្ឋមន្ត្រីដល់ទៅ៤នាក់។ រដ្ឋមន្ត្រីក្រសួងការបរទេស ធ្វើការបានមិនដល់២០ថ្ងៃផង សុំលាឈប់វិញ។ ភាគច្រើននៃសមាជិករដ្ឋាភិបាល ដែលលោកប្រធានាធិបតី ប៉េដ្រូ កាស្ទីឡូ បានជ្រើសរើសមកដាក់ គឺសុទ្ធតែជាមនុស្សគ្មានបទពិសោធន៍ គ្មានសមត្ថភាពធ្វើការ ដឹកនាំស្ថាប័នរដ្ឋ។
បន្ថែមពីនេះទៀត លោកប្រធានាធិបតីប៉េដ្រូ ត្រូវប្រឈមជាមួយក្រុមគណបក្សប្រឆាំងនៅក្នុងសភា ដែលជាបក្សស្តាំនិយម ហើយដែលបានព្យាយាមរកវិធីគ្រប់យ៉ាង ដើម្បីរិះគន់ និងរំខានការដឹកនាំ។ លោកប៉េដ្រូ កាស្ទីឡូ ក៏ត្រូវជាប់ការសង្ស័យ ពីបទពុករលួយស៊ីសំណូក ពាក់ព័ន្ធនិងខ្លួនលោកផ្ទាល់ ក្រុមគ្រួសារលោក ព្រមទាំងមនុស្សមួយចំនួនដែលស្និទ្ធនឹងលោកថែមទៀតផង។ រដ្ឋសភាប៉េរូ បានប្រជុំដកហូតតំណែងលោកប៉េដ្រូ កាស្ទីឡូ ២ដងរួចមកហើយ តែមិនបានសម្រេច។
ចង់រំលាយសភា តែត្រូវសភាបោះឆ្នោតដកហូតតំណែងវិញ
ថ្ងៃពុធទី៧ធ្នូ ដោយដឹងថារដ្ឋសភា នឹងបើកការប្រជុំដើម្បីដកហូតតំណែងខ្លួន ជាលើកទី៣ លោកប៉េដ្រូ កាស្ទីឡូ ស្រាប់តែបានប្រកាសរំលាយសភាចោល ដើម្បីបង្កើតរដ្ឋាភិបាលបន្ទាន់មួយ ហើយឈានទៅបង្កើតសភាធម្មនុញ្ញ តាក់តែងរដ្ឋធម្មនុញ្ញថ្មី។ លោកបានអំពាវនាវ ឲ្យអ្នកនយោបាយ ព្រមទាំងប្រជាពលរដ្ឋប៉េរូនៅពីក្រោយលោក ដើម្បីដឹកនាំរដ្ឋាភិបាលបន្ទាន់នេះ។ តែទីបំផុត គ្មាននរណាស្តាប់ទេ។ ផ្ទុយទៅវិញ ការប្រកាសរំលាយសភានេះ ត្រូវបានអ្នកនយោបាយប៉េរូ ពីគ្រប់បក្សទាំងអស់ ថ្កោលទោសលោកប៉េដ្រូ កាស្ទីឡូ ថាបានប៉ុនប៉ងធ្វើរដ្ឋប្រហារ ប្រឆាំងរដ្ឋធម្មនុញ្ញ។
ទីបំផុតទៅ សភាប៉េរូ បានរួមកម្លាំងគ្នា បោះឆ្នោតដកលោកប៉េដ្រូ កាស្ទីឡូ ចេញពីតំណែង ដោយចោទថា លោកមានបញ្ហា “វិសមត្ថភាពធ្ងន់ធ្ងរ” ក្នុងការដឹកនាំប្រទេស។ សម្លេងឆ្នោតគាំទ្រឲ្យដកលោកចេញតំណែង មានចំនួន ១០១ ក្នុងចំណោមសមាជិកសភាទាំងអស់ ១៣០។ លោក Francisco Morales ប្រធានតុលាការធម្មនុញ្ញប៉េរូ បានលើកឡើងថា កាលពីថ្ងៃពុធករណីរដ្ឋប្រហារមួយ ត្រូវបានធ្វើឡើងដោយប្រធានាធិបតីខ្លួនឯង។ លោកបានអំពាវនាវ ឲ្យប្រជាជាតិទាំងមូល ត្រូវប្រឆាំងដាច់ខាតចំពោះរដ្ឋាភិបាលបោកប្រាស់ អសមត្ថភាព ដែលដឹកនាំដោយលោក ប៉េដ្រូ កាស្ទីឡូ។ យោងតាមអ្នកវិភាគនយោបាយឯករាជ្យឈ្មោះ Augusto Alvarez បានលើកឡើងថា លោកប៉េដ្រូ កាស្ទីឡូ បានបំពាននឹងមាត្រា ១១៧ នៃរដ្ឋធម្មនុញ្ញប៉េរូ តាមរយៈការប្រកាសរំលាយសភា ហើយធ្វើរដ្ឋប្រហារខ្លួនឯង។
សំណុំរឿងស៊ើបអង្កេតចំនួន៦ករណី
បន្ទាប់ពីត្រូវបានសភាដកតំណែងភ្លាម លោកប្រធានាធិបតីអតីតគ្រូបង្រៀនស្រុកស្រែ វ័យ៥៣ឆ្នាំ ប៉េដ្រូ កាស្ទីឡូ ក៏អស់អភ័យឯកសិទ្ធិដែរ។ សមត្ថកិច្ចក៏បានចុះទៅចាប់ខ្លួនលោកភ្លាមៗ ដោយពាក់ព័ន្ធទៅនឹងការស៊ើបអង្កេតចំនួន៦ករណី ទាក់ទិននឹងរឿងអាស្រូវពុករលួយ ស៊ីសំណូក បក្សពួកនិយម និងបទឧក្រិដ្ឋជាប្រព័ន្ធ។ យោងតាមនគរបាលប៉េរូ លោកប៉េដ្រូ កាស្ទីឡូ បានគ្រោងទៅសុំសិទ្ធិជ្រកកោននៅស្ថានទូតប្រទេសម៉ិចសិក បន្ទាប់ពីដឹងថាខ្លួនត្រូវរដ្ឋសភាដកហូតតំណែង និងអស់អភ័យឯកសិទ្ធិ។
លោកស្រី marita Barreto រដ្ឋអាជ្ញាប៉េរូ ប្រកាសថា លោកប៉េដ្រូ កាស្ទីឡូ ត្រូវបានឃាត់ខ្លួនហើយ។ បណ្តាញព័ត៌មានប៉េរូវិញ បានផ្សព្វផ្សាយថា លោកប៉េដ្រូ កាស្ទីឡូ ត្រូវគេបញ្ជូនតាមឧត្ថម្ភាគចក្រ យកទៅទុកនៅមូលដ្ឋានកម្លាំងពិសេស នៃនគរបាលក្រុងលីម៉ា ដើម្បីឃុំខ្លួនចំនួនយ៉ាងហោច១៥ថ្ងៃ មុននឹងមានសាវនកា។ សមត្ថកិច្ចប៉េរូ ក៏បានធ្វើការរឹបអូសឯកសារ វត្ថុតាងនានាដែរ នៅវិមានប្រធានាធិបតី។
ស្ត្រីប្រធានាធិបតីប៉េរូដំបូងគេ
លោកស្រី ឌីណា បូលូអាត មេធាវី អាយុ៦០ឆ្នាំ គឺជាស្ត្រីទីមួយហើយ ដែលនឹងមកកាន់មុខតំណែងប្រធានាធិបតីប៉េរូ។ តែយើងមិនដឹងថា លោកស្រីនឹងកាន់ការងារបានរយៈពេលប៉ុន្មានទេ ព្រោះថាវិបត្តិអាចនឹងកម្រើកឡើងវិញក៏ថាបាន។ លោកស្រី ជាប់ឆ្នោតជាមួយលោកប៉េដ្រូ កាស្ទីឡូ កាលពីពេលបោះឆ្នោតខែកក្កដាឆ្នាំ២០២១ដែរ ដោយមកពីបក្សជាមួយគ្នា។ លោកស្រីគឺជាអ្នកនយោបាយម្នាក់ ដែលមានឥទ្ធិពល ព្រមទាំងប្រជាប្រិយភាពខ្លាំង ដែលធ្វើឲ្យគេសង្ឃឹម។ ជាអតីតអនុប្រធានាធិបតី លោកស្រីក៏ធ្លាប់ធ្វើជារដ្ឋមន្ត្រី ក្រសួងអភិវឌ្ឍន៍និងសមាហរណ្ណកម្មសង្គមផងដែរ។
នៅមុខអង្គសភា លោកស្រី ឌីណា បូលូអាត បានប្រកាសទទួលស្គាល់ថា ពិតជាមានផែនការធ្វើរដ្ឋប្រហារ បង្កឡើងដោយលោកប៉េដ្រូ កាស្ទីឡូពិតមែន។ ដូច្នេះហើយ លោកស្រីសូមប្រកាសទទួលការងារ ជាប្រធានាធិបតីជំនួសលោកប៉េដ្រូ កាស្ទីឡូ ដោយគោរពទៅតាមការសម្រេចរបស់រដ្ឋសភា ក្នុងក្របខណ្ឌរដ្ឋធម្មនុញ្ញ។ លោកស្រីនឹងកាន់មុខតំណែងនេះ ដល់ឆ្នាំ២០២៦ ដូចអ្វីដែលបានកំណត់។ ជាអាណត្តិ៥ឆ្នាំ ដែលប្រជាពលរដ្ឋប៉េរ៉ូ បានបោះឆ្នោតកាលពីខែកក្កដាឆ្នាំ២០២១។
គួរកត់សំគាល់ថា ដំណោះស្រាយវិបត្តិនយោបាយ ដោយគ្មានឆ្លងកាត់អំពើហិង្សានៅប៉េរូនេះ បានទទួលការអបអរសាទរផងដែរ ពីបណ្តាប្រទេសក្បែរខាងក្នុងតំបន់។ វ៉ាស៊ីនតោន ប្រកាសឈប់ទទួលស្គាល់លោកប៉េដ្រូ កាស្ទីឡូជាប្រធានាធិបតី និងច្រានចោលរាល់ការធ្វើប៉ុនប៉ងរដ្ឋប្រហារបំបានរដ្ឋធម្មនុញ្ញ។ លោកប្រធានាធិបតីប្រេស៊ីលវិញ លើកឡើងថាគួរឲ្យសោកស្តាយដែរ ដែលប្រធានាធិបតីត្រូវគេបោះឆ្នោតត្រឹមត្រូវបែជាត្រូវសភាដកហូតតំណែងទៅវិញ តែយ៉ាងណាលោកស្វាគមន៍ចំពោះដំណោះស្រាយ ដែលត្រូវបានធ្វើឡើងក្នុងក្របខណ្ឌរដ្ឋធម្មនុញ្ញ ដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ