លោកពូទីនប្រជុំជាមួយមេបញ្ជាការកងទ័ព មួយថ្ងៃក្រោយការសំរុកបាញ់មីស៊ីលផ្តាច់អគ្គិសនីអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:៤៦
កាលពីថ្ងៃសុក្រទី១៦ធ្នូ រុស្ស៊ីបានបាញ់សំរុកគ្រាប់មីស៊ីល ជាង៧០គ្រាប់ មកលើអ៊ុយក្រែន។ ជាការវាយប្រហារដែលបានសំដៅបំផ្លាញហេដ្ឋារចនាសម្ព័ន្ធស៊ីវីលរបស់អ៊ុយក្រែន មានចរន្តអគ្គិសនី និងបណ្តាញផ្គត់ផ្គង់ទឹកជាដើម។ ប្រជាជនអ៊ុយក្រែន កំពុងរស់នៅក្នុងស្ថានភាពលំបាកជាខ្លាំង ជាមួយនឹងសីតុណ្ហភាពចុះត្រជាក់ក្រោម 0°C គ្មានម៉ាស៊ីនកំដៅ គ្មានទឹកប្រើប្រាស់។ អាជ្ញាធរអ៊ុយក្រែន កំពុងតែប្រឹងប្រែងព្យាយាមតភ្ជាប់បណ្តាញចរន្តអគ្គិសនី យ៉ាងសស្រាក់សស្រាំ។
“ឧក្រិដ្ឋកម្មសង្គ្រាម”
ថ្ងៃសុក្រទី១៦ធ្នូ កងទ័ពរុស្ស៊ីបានបាញ់មីស៊ីលចំនួន៧៤គ្រាប់ ដែលភាគច្រើន សុទ្ធតែជាប្រភេទមីស៊ីលក្រ័រស្យែរ។ យ៉ាងហោច៦០គ្រាប់ ត្រូវបានប្រព័ន្ធខែលមីស៊ីលរបស់អ៊ុយក្រែន ស្ទាក់កម្ទេចបាន។ ការសំរុកវាយប្រហាររបស់រុស្ស៊ីនេះ គឺជាប្រតិបត្តិការសំដៅ កំទេចហេដ្ឋារចនាសម្ព័ន្ធស៊ីវីលរបស់អ៊ុយក្រែន ធ្វើឲ្យប្រជាជនអ៊ុយក្រែន ស្លាប់ដោយស្ថានភាពវេទនាក្នុងសីតុណ្ហភាពដ៏ត្រជាក់ ក្រោម 0°c ដោយសារគ្មានចរន្តអគ្គិសនី គ្មានម៉ាស៊ីនកំដៅ គ្មានទឹកបរិភោគនិងប្រើប្រាស់។
លោក Josep Borrell ប្រមុខការទូតអឺរ៉ុប បានថ្លែងថ្កោលទោសថា ប្រតិបត្តិការបាញ់គ្រាប់មីស៊ីលរបស់រុស្ស៊ីមកលើអ៊ុយក្រែន កាលពីថ្ងៃសុក្រ វាគឺជាឧទាហរណ៍ជាក់ច្បាស់ បង្ហាញអំពីភាពឃោរឃៅព្រៃផ្សៃដ៏ងងឹតងងុល នៃរបបដឹកនាំរុស្ស៊ី។ លោកបន្ថែមថា ការវាយប្រហារដ៏សាហាវ គ្មានធម៌មេត្តា មកលើអាយុជីវិតប្រជាជនស្លូតត្រង់អ៊ុយក្រែននេះ វាគឺជា “ឧក្រិដ្ឋកម្មសង្គ្រាម”។ ឆ្លើយតបទៅនឹងអំពើឃោរឃៅនេះ សហភាពអឺរ៉ុបទើបតែបានសម្រេចបន្ថែមទណ្ឌកម្មមួយទៀត ទៅលើរុស្ស៊ី ដោយបានហាមឃាត់ ការនាំចេញម៉ាស៊ីនបំពាក់យានដ្រូនទាំងអស់ ដែលអាចធ្លាក់ទៅដល់ដៃរុស្ស៊ី។
ពីបារាំងវិញ ក្រសួងការបរទេសបារាំង បានចេញលិខិតប្រកាស ថ្កោលទោសការវាយប្រហាររបស់រុស្ស៊ី ថាជាអំពើឧក្រិដ្ឋកម្មសង្គ្រាម និងបានអះអាងថា ការវាយប្រហារដ៏ព្រៃផ្សៃនេះ នឹងមិនអាចមកបង្អាក់ ការតាំងចិត្តរបស់បារាំង ក្នុងការជួយទំនុកបម្រុងគាំទ្រអ៊ុយក្រែនបានឡើយ។ ក្រសួងការបរទេសបារាំងអះអាងថា នឹងប្រឹងប្រែងជំរុញ ឲ្យមានការផ្តន្ទាទោសឲ្យបាន ទៅលើអំពើឧក្រិដ្ឋដែលរុស្ស៊ីបាននិងកំពុងតែប្រព្រឹត្តិ។
ទឹកចិត្តរឹងមាំ ទោះស្ថានភាពលំបាកខ្លាំង
រដូវរងារឆ្នាំនេះជារដូវរងារដ៏សែនលំបាកបំផុត សម្រាប់ប្រជាជនអ៊ុយក្រែន។ លោកវ្លូឌីមៀរ ហ្សេឡេនស្គី បានថ្លែងសារតាមវីដេអូ កាលពីយប់ថ្ងៃសុក្រ ថា តំបន់ទីក្រុងកៀវ និងតំបន់ចំនួន១៤ផ្សេងទៀត នៅទូទាំងប្រទេស គ្មានចរន្តអគ្គិសនីប្រើប្រាស់ទេ ហើយបណ្តាញផ្គត់ផ្គង់ទឹកស្អាតក៏ត្រូវកាត់ផ្តាច់ដែរ។ លោកហ្សេឡេនស្គី បានថ្លែងថា គោលដៅនៃការវាយប្រហាររបស់កងទ័ពរុស្ស៊ីនាអំឡុវពេលនេះ គឺសំដៅមកហេដ្ឋារចនាសម្ព័ន្ធស៊ីវីល ដូចជារោងចក្រផលិតចរន្តអគ្គិសនី បណ្តាញខ្សែភ្លើង និងរោងចក្របន្សុតទឹកស្អាតជាដើម។
ក្រៅពីបានអំពាវនាវឲ្យសម្ព័ន្ធមិត្តលោកខាងលិច បន្តជួយផ្តល់ប្រព័ន្ធខែលមីស៊ីលមកឲ្យអ៊ុយក្រែន ដើម្បីតាមស្ទាក់មីស៊ីល របស់រុស្ស៊ី លោកប្រធានាធិបតីអ៊ុយក្រែន បានលើកឡើងផងដែរ ថាមន្ត្រីអាជ្ញាធរអ៊ុយក្រែន កំពុងតែប្រឹងប្រែងជួសជុល ដាក់ឲ្យដំណើរការឡើងវិញ នូវការផ្គត់ផ្គង់ចរន្តអគ្គិសនី ក៏ដូចជាទឹកស្អាត។
នៅទីក្រុងកៀវ បើផ្អែកតាមលោកអភិបាលក្រុង គឺ១ភាគ៣នៃប្រជាជនតែប៉ុណ្ណោះ ដែលមានទឹកនិងម៉ាស៊ីនកំដៅប្រើប្រាស់ ហើយ៤០% មានចរន្តអគ្គិសនីប្រើ។ នៅក្រុង Kryvyi Rig ភាគខាងត្បូងអ៊ុយក្រែន មានមនុស្សស្លាប់យ៉ាងហោច៣នាក់ ដោយសារមីស៊ីលរបស់រុស្ស៊ីកាលពីថ្ងៃម្សិលមិញ។ យោងតាម Ukrainergo ក្រុមហ៊ុនរដ្ឋផ្គត់ផ្គង់ចរន្តអគ្គិសនី គឺការវាយប្រហាររបស់រុស្ស៊ីកាលពីថ្ងៃសុក្រម្សិលមិញនេះ បានធ្វើឲ្យខូចខាតខ្លាំងសម្បើមណាស់ ដល់ទីតាំងផលិតចរន្តអគ្គិសនី។ ក្រុមហ៊ុននេះអះអាងថា គេអាចនឹងត្រូវការពេលយូរថ្ងៃ ដើម្បីតភ្ជាប់ចរន្តឡើងវិញ ហើយសម្រាប់រយៈពេលដែលខ្វះចរន្តអគ្គិសនី គឺគេនឹងផ្គត់ផ្គង់ជាអាទិភាព តែទីតាំងសំខាន់ចាំបាច់តែប៉ុណ្ណោះ ដែលមានដូចជាមន្ទីរពេទ្យ ស្ថានីយផលិតនិងចែកចាយទឹកស្អាត បណ្តាញម៉ាស៊ីនកំដៅ និងស្ថានីយ៍បន្សុតទឹកក្រខ្វក់ជាដើម។
យ៉ាងណាក៏ដោយ គេសង្កេតឃើញថា ប្រជាជនអ៊ុយក្រែន ទោះលំបាកវេទនាយ៉ាងណា តែម្នាក់ៗមានការតាំងចិត្ត តស៊ូខ្ពស់ណាស់។ នៅតាមទីក្រុងភាគច្រើន ប្រជាជនរៀបចំជួយគ្នា ចែកទឹក ចែកម៉ាស៊ីនកំដៅគ្នា និងចែកចរន្តអគ្គីសនីគ្នាប្រើ។ តំបន់ខ្លះ អាជ្ញាធរបានចែកចង្ក្រានឡដុតអុសទៅប្រជាជន ដើម្បីបានចម្អិនម្ហូប ដាំទឹកក្តៅនិងកំដៅខ្លួនជាដើម។ សមាគមន៍អង្គការជាច្រើនពីបណ្តាប្រទេសអឺរ៉ុបផ្សេងទៀត បានអំពាវនាវ ទិញម៉ាស៊ីនភ្លើង ទៅជួយប្រជាជនអ៊ុយក្រែនផងដែរ។
ពូទីនប្រជុំជាមួយមេបញ្ជាការកងទ័ព
ងាកទៅកាន់សមរភូមិប្រយុទ្ធវិញ យើងឃើញថាប្រមាណ២ខែមកហើយ ដែលកងទ័ពរុស្ស៊ី សឹងតែលែងប្រយុទ្ធជាមួយកងទ័ពអ៊ុយក្រែន ហើយបែរមកសំរុកបាញ់ប្លោងគ្រាប់មីស៊ីល កំទេចហេដ្ឋារចនាសម្ព័ន្ធស៊ីវីលអ៊ុយក្រែនទៅវិញ។ ក៏ប៉ុន្តែនៅថ្ងៃសៅរ៍នេះ គេឃើញលោកពូទីន មានវត្តមានចូលរួមប្រជុំធំមួយ ជាមួយមេបញ្ជាការកងទ័ពរុស្ស៊ីទាំងអស់ ដែលធ្វើប្រតិបត្តិការនៅអ៊ុយក្រែន។
យោងតាមការបញ្ជាក់ពីវិមានក្រេមឡាំង គឺលោក ពូទីន បានចូលរួមប្រជុំពេញមួយថ្ងៃសុក្រម្សិលមិញ ជាមួយមេបញ្ជាការកងទ័ពចម្រុះទាំងអស់ ដែលកំពុងធ្វើបេសកកម្មនៅអ៊ុយក្រែន។ កម្មវិធីប្រជុំនេះ មានវត្តមានចូលរួមដែរ ដូចជា លោករដ្ឋមន្ត្រីការពារជាតិរុស្ស៊ី Serguei Cho¨gou និងអគ្គមេបញ្ជាការកងទ័ពជាតិរុស្ស៊ី Valérie Guérassimov។
នៅក្នុងវីដេអូផ្សាយដោយបណ្តាញទូរទស្សន៍រដ្ឋរុស្ស៊ី នៅព្រឹកថ្ងៃសៅរ៍នេះ គឺបានឃើញលោកពូទីន ដែលបាននិយាយថា “ខ្ញុំចង់ស្តាប់ឮ នូវសំណើររបស់មេបញ្ជាការកងទ័ពទាំងអស់ ស្តីអំពីប្រតិបត្តិការដែលកងទ័ពយើងត្រូវធ្វើ ក្នុងរយៈពេលខ្លី និងមធ្យម”។ ប្រមាណ២ខែមកហើយ ដែលកងទ័ពរុស្ស៊ីបានដកថយ សឹងតែលែងប្រយុទ្ធសោះតែម្តង នៅសមរភូមិ ដោយសំរុកគិតតែពីបាញ់ប្លោងគ្រាប់មីស៊ីលពីចម្ងាយតែប៉ុណ្ណោះ។ វត្តមានរបស់លោកពូទីន ប្រជុំជាមួយមេបញ្ជាការកងទ័ពរុស្ស៊ីនេះ គឺទំនងប្រហែលជារុស្ស៊ីកំពុងត្រៀមបើកប្រតិបត្តិការប្រយុទ្ធឡើងវិញនៅសមរភូមិ។
រុស្ស៊ីត្រៀមបើកសមរភូមិ ចូលមកក្រុងកៀវម្តងទៀត?
នៅថ្ងៃចន្ទសប្តាហ៍ក្រោយនេះ លោកពូទីន នឹងទៅជួបលោក ប្រធានាធិបតីបេឡារុស លូកាឆិនកូ នៅទីក្រុងមីនស្គ៍។ កាលពីសង្គ្រាមបានចាប់ផ្តើមដំបូង ប្រធានាធិបតីបេឡារុស បានបើកដៃឲ្យកងទ័ពរុស្ស៊ី យកទឹកដីខ្លួនបើកការវាយប្រហារមកលើអ៊ុយក្រែន ដោយចូលពីភាគខាងជើងសំដៅមកទីក្រុងកៀវ។
បើផ្អែកតាមការវិភាគរបស់លោក Valéry Zaloujny អគ្គមេបញ្ជាកងទ័ពអ៊ុយក្រែន គឺជំនួបរវាងលោកលូកាឆិនកូ និងលោកពូទីននៅថ្ងៃចន្ទក្រោយនេះ គឺប្រាកដណាស់ថា រុស្ស៊ីប្រាកដជាមានគម្រោងបើកប្រតិបត្តិការប្រយុទ្ធសំដៅចូលមកទីក្រុងកៀវសាជាថ្មី នៅដើមឆ្នាំ២០២៣។ ដោយឡែក លោក Jens Stoltenberg អគ្គលេខាធិការអូតង់ បានប្រាប់អ្នកកាសែតថា មិនត្រូវមើលស្រាលរុស្ស៊ីជាដាច់ខាត។ លោកបន្ថែមថា ជាមួយនឹង “ប្រតិបត្តិការសង្គ្រាមរយៈពេលវែង” ដែលរុស្ស៊ីកំពុងតែធ្វើនេះ គឺសម្ព័ន្ធមិត្តលោកខាងលិច ត្រូវតែបន្តជួយអ៊ុយក្រែន ទាំងយុទ្ធសាស្ត្រទាំងគ្រឿងសព្វាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ