កូវីដនៅចិន៖ រដ្ឋាភិបាលបញ្ជាឲ្យសហគ្រាសឱសថ ទុកថ្នាំនិងសម្ភារៈពេទ្យសម្រាប់តែរដ្ឋ
ចុះផ្សាយនៅថ្ងៃ៖
ស្តាប់ - ០៨:៣០
ស្ថានការណ៍ឆ្លងរាលដាលកូវីដ១៩នៅចិន បានស្ទុះហក់ឡើងជាខ្លាំង នាប៉ុន្មាន៣សប្តាហ៍ចុងក្រោយនេះ បន្ទាប់ពីរដ្ឋាភិបាលចិន បានបោះបងចោលគោលនយោបាយកូវីដសូន្យ។ យោងតាមប្រភពព័ត៌មានជាច្រើនបានឲ្យដឹងថា ចំនួនអ្នកជំងឺឈឺធ្ងន់ បានកើនឡើងខ្លាំង ជាពិសេសក្នុងចំណោមមនុស្សចាស់ដែលបានឆ្លងកូវីដ១៩។ ទន្ទឹមគ្នានេះ ប្រជាជនចិនទូទៅបាននាំគ្នាផ្អើលឈូរឆរ ទិញថ្នាំគ្រុនក្តៅ ថ្នាំផ្តាសាយជាដើម ដើម្បីទុកព្យាបាលតាមផ្ទះរៀងៗខ្លួន ធ្វើឲ្យថ្នាំនៅតាមឱសថដ្ឋាន ត្រូវដាច់ស្តុក។ ប្រឈមនឹងស្ថានការណ៍ចលាចលនេះ រដ្ឋាភិបាលចិនទើបតែបានចេញបញ្ជា នៅថ្ងៃសុក្រទី២៣ធ្នូ ប្រាប់សហគ្រាសផលិតឱសថ ត្រូវតែរក្សាទុកស្តុកឱសថសំខាន់ៗ និងសម្ភារៈមួយចំនួន សម្រាប់រដ្ឋ មិនត្រូវលក់ចែកចាយទៅឯកជនឡើយ។
កាក់ស្តុកឱសថ និងឧបករណ៍ធ្វើតេស្តទុកសម្រាប់រដ្ឋ
ប្រមាណ៣សប្តាហ៍មកហើយ ដែលប្រជាជនចិនបានផ្អើលឈូរឆរ បន្ទាប់ពីរដ្ឋាភិបាលចិន បានលុបចោលនូវវិធានការរឹតបន្តឹងមួយចំនួនធំ ក្នុងការទប់ស្កាត់កូវីដ១៩។ ដូចយើងដឹងហើយ ប្រមាណ៣ឆ្នាំមកនេះ រដ្ឋចិនបានអនុវត្តវិធានការតឹងតែងខ្លាំង បិទខ្ទប់ទីក្រុង តំបនធំៗ ធ្វើតេស្តទ្រង់ទ្រាយធំសឹងរៀងរាល់ថ្ងៃ ដើម្បីបំបែកយកអ្នកវិជ្ជមានកូវីដ ទៅធ្វើចត្តាឡីស័កដាច់ដោយឡែក។ វិធានការទាំងនេះ បានធ្វើឲ្យប្រជាជនចិនភាគច្រើនលើសលុប មិនសូវមានអ្នកឆ្លងកូវីដទេ កន្លងមក។
តែពេលនេះ ការផ្លាស់ប្តូរគោលនយោបាយសុខភាពសាធារណៈ លែងបិទខ្ទប់ លែងធ្វើតេស្តទ្រង់ទ្រាយធំ គឺវា បានធ្វើឲ្យប្រជាជនចិនភ័យបារម្ភ ខ្លាចឆ្លង ខ្លាចឈឺធ្ងន់ ព្រោះទន្ទឹមគ្នានេះ ប្រជាជនចិនប្រមាណតែ១០%ប៉ុណ្ណោះ ដែលបានចាក់វ៉ាក់សាំងបង្ការកូវីដ។ ម្លោះហើយ ប្រជាជនចិនបានផ្អើល នាំគ្នាទៅទិញថ្នាំផ្តាសាយ ថ្នាំគ្រុន ថ្នាំបំបាត់ការឈឺចាប់បន្ថយកំដៅ និងឧបករណ៍ធ្វើតេស្តរកកូវីដជាដើម។ មនុស្សផ្អើលដណ្តើមគ្នាទិញខ្លាំងពេក ធ្វើឲ្យតាមឱសថស្ថានត្រូវដាច់ស្តុក ហើយសហគ្រាសផលិត ក៏ផលិតមិនទាន់ទៀត។
ស្ថិតក្នុងបរិបទខ្វះថ្នាំ ខ្វះសម្ភារៈពេទ្យនេះ ស្រាប់តែនៅថ្ងៃសុក្រនេះ រដ្ឋាភិបាលចិនបានចេញបញ្ជា ប្រាប់ទៅសហគ្រាសផលិតឱសថរាប់រយសហគ្រាសនៅចិន ត្រូវតែទុកស្តុកឱសថសំខាន់ៗ និងឧបករណ៍ធ្វើតេស្ត សម្រាប់តែរដ្ឋប៉ុណ្ណោះ មិនត្រូវលក់ចេញចែកចាយទៅលើទីផ្សារឯកជនទេ។ សហគ្រាស Wiz Biotech ដែលជាសហគ្រាសផលិតឧបករណ៍ធ្វើតេស្តរកកូវីដ នៅក្រុងXiamen បានអះអាងប្រាប់អ្នកយកព័ត៌មានបារាំងថា សហគ្រាសគេពិតជាបានទទួលបញ្ជាពីអាជ្ញាធរតំបន់ ថាត្រូវតែទុកស្តុកដែលមានសម្រាប់អាជ្ញាធរ។ ចំណែកនៅប៉េកាំងវិញ ផ្អែកតាមលោក Zhou Zhicheng តំណាងសហព័ន្ធចែកចាយផ្គត់ផ្គង់ទំនិញចិន គឺអាជ្ញាធរក្រុងប៉េកាំងបានសម្រេចបញ្ជូនមនុស្ស ទៅជួយសហគ្រាសផលិតចំនួន៦ ដើម្បីបង្កើនសង្វាក់ផលិតកម្ម បំពេញស្តុកឲ្យបានឆាប់រហ័ស។
អាជ្ញាធរអំពាវនាវ ឲ្យប្រជាជនទិញថ្នាំឲ្យសមហេតុផល
លោក Zhou Zhicheng បានលើកឡើងថា កន្លងមកប៉ុន្មានសប្តាហ៍នេះ បញ្ហាគ្មានថ្នាំ គ្មានឧបករណ៍ធ្វើតេស្តនេះ បានចោទជាបញ្ហាខ្លាំងណាស់ ដោយសារតែមនុស្សផ្អើលឈូរឆរ សំរុកទិញព្រមៗគ្នា។ អ្នកខ្លះទិញក្នុងចំនួនច្រើនខ្លាំង ហួសហេតុ គ្មានហេតុផល ដោយសារតែភ័យគិតតែពីខ្លួនឯង មិនខ្វល់ពីអ្នកដ៏ទៃ។ ឥឡូវពេលនេះ នៅតាមឱសថដ្ឋាន គឺពិបាលរកថ្នាំណាស់ ជាពិសេសថ្នាំគ្រុនក្តៅខ្លួន ថ្នាំក្អក និងថ្នាំបំបាត់ការឈឺចាប់ជាដើម។ នេះបើផ្អែកតាមប្រភពព័ត៌មាន ដែលអ្នករាយការណ៍ទីភ្នាក់ងារព័ត៌មានបារាំង AFP ប្រចាំនៅចិន បានប្រមូលបាន ពីតាមខេត្តនានារបស់ចិន។
នៅតាមឱសថដ្ឋានខ្លះ គេបានកំណត់ មិនឲ្យទិញថ្នាំគ្រុនក្តៅខ្លួន លើសពី៦ប្រអប់ទេ ក្នុងមួយអាទិត្យ សម្រាប់មនុស្សម្នាក់។ អ្នកទៅទិញ ត្រូវបង្ហាញអត្តសញ្ញាណបណ្ណសំគាល់ខ្លួនថែមទៀត។ នៅក្រុងហាងចូវ វិញ អាជ្ញាធរក្រុងបានអំពាវនាវឲ្យប្រជាជន ត្រូវតែទិញថ្នាំដោយសមហេតុសមផល មិនត្រូវទិញដោយការភ័យជ្រួលច្របល់ ចេះតែទិញស្តុកទុកហួសប្រមាណ ទាំងខ្លួនឯងអត់ទាំងឈឺផង ធ្វើឲ្យថ្នាំដាច់ស្តុកនោះទេ។ គ្រប់គ្នាត្រូវតែគិតដល់អ្នកផ្សេងៗទៀត ដែលឈឺ ហើយដែលត្រូវការថ្នាំជាចាំបាច់ផង។
អ្នកជំងឺឈឺធ្ងន់ភាគច្រើនជាមនុស្សចាស់ កកកុញតាមមន្ទីរពេទ្យ
ជាការពិត ប្រជាជនចិនពិតជាភ័យបារម្ភខ្លាំងពិតមែន ព្រោះថាកូវីដ១៩កំពុងតែឆ្លងរាលដាលខ្លាំងសម្បើមណាស់។ សន្ទុះឆ្លងរាលដាល ដែលអាជ្ញាធរចិនខ្លួនឯង បានសារភាពទទួលស្គាល់ថា ច្រើនរហូតដល់លែងរាប់ចំនួនករណីឆ្លងថ្មីទៅហើយ ប្រមាណ៣សប្តាហ៍មកនេះ។ មន្ទីរពេទ្យនៅចិនកាន់តែច្រើន កកកុញដោយអ្នកជំងឺ ដែលឈឺធ្ងន់ មានបញ្ហាផ្លូវដង្ហើមធ្ងន់ធ្ងរ ក្រោយឆ្លងកូវីដ១៩។
ចំនួនអ្នកជំងឺកូវីដដែលឈឺធ្ងន់ ត្រូវការការសង្គ្រោះបន្ទាន់ បានកើនឡើងខ្លាំងណាស់ ប្រមាណ១សប្តាហ៍មកនេះ នៅចិន។ ជាក់ស្តែង គ្រូពេទ្យម្នាក់ធ្វើការនៅមន្ទីរពេទ្យមួយ ក្នុងក្រុងចុងឈីង បានប្រាប់ថា ក្នុងមួយថ្ងៃយ៉ាងហោចណាស់ មានអ្នកជំងឺថ្មីចូលសង្រ្គោះបន្ទាន់ ខ្ទង់១០នាក់ ដែលប្រមាណ ៨០ ទៅ៩០% គឺសុទ្ធតែជាមនុស្សវ័យចំណាស់។ លោកក៏បានបន្ថែមដែរថា ក្នុងចំណោមអ្នកធ្វើការក្នុងមន្ទីរពេទ្យ ក៏ឆ្លងកូវីដច្រើនសន្ធឹកដែរ មួយរយៈចុងក្រោយនេះ តែនៅតែបន្តមកធ្វើការអញ្ចឹង ព្រោះមានអ្នកជំងឺច្រើនខ្លាំងពេក។
នៅសៀងហៃ វិញអ្នកកាសែត AFP ដែលបានចូលទៅដល់មន្ទីរពេទ្យមួយ បានអះអាងថា ឃើញអ្នកជំងឺចាស់ៗ ដេកលើគ្រែកកកុញនតាមផ្លូវដើរក្នុងអាគារពេទ្យ ជាមួយនឹងឧបករណ៍ជំនួយការដកដង្ហើម។ ប្រភព័ត៌មានផ្សេងៗទៀតរបស់ AFP បានឲ្យដឹងថា នៅកន្លែងបញ្ចុះ និងបូជាសព គឺកំពុងតែរវល់មមារញឹកសម្បើមណាស់។ តែមិនមានប្រភពបញ្ជាក់ច្បាស់ថា សាកសពដែលស្លាប់នោះ គឺសុទ្ធតែស្លាប់ដោយកូវីដ១៩នោះទេ។
អាជ្ញាធរផ្លាស់ប្តូរនីតិវិធីរាប់ចំនួនអ្នកស្លាប់ដោយសារកូវីដ
ប្រជាជនវ័យចំណាស់ ចំនួនតិចខ្លាំងណាស់ ដែលបានចាក់វ៉ាក់សាំងបង្ការកូវីដទេ ហើយក៏មិនធ្លាប់ឆ្លងកូវីដទៀត។ ម្លោះហើយពេលឆ្លងលើកទី១ ប្រាកដជាប្រឈមនឹងគ្រោះថ្នាក់ស្លាប់ច្រើនណាស់។ តាមការសន្និដ្ឋាន របស់វិទ្យាស្ថានជំនាញជាច្រើននៅឯបរទេស គេលើកឡើងថា អាចមានអ្នកស្លាប់នៅចិន ដល់២លាននាក់ឯណោះ ក្នុងរវាងប៉ុន្មានខែទៅមុខទៀតនេះ។
ប្រហែលជាដោយសារតែបារម្ភ ពីចំនួនតួលេខមនុស្សស្លាប់ច្រើននេះហើយ ទើបបានជា អាជ្ញាធរសុខាភិបាលចិន បានប្រកាសកាលពីប៉ុន្មានថ្ងៃមុននេះ អំពីនីតិវិធីថ្មី ក្នុងការចាត់ទុកនិងរាប់ថាអ្នកជំងឺណាម្នាក់ ស្លាប់ដោយសារកូវីដ។ អាជ្ញាធរចិនបានចេញបញ្ជាថា អំណេះតទៅ ទាល់តែអ្នកឆ្លងកូវីដ ស្លាប់ដោយខូចប្រព័ន្ធដកដង្ហើមដោយផ្ទាល់តែម្តង ទើបអាចចាត់ទុកបាន ថាអ្នកនោះស្លាប់ដោយកូវីដ។ ចំពោះអ្នកជំងឺផ្សេងៗទៀត ជាពិសេសចាស់ៗជាដើម អាចស្លាប់ដោយសុខភាពទន់ខ្សោយ មានជំងឺប្រចាំកាយផ្សេងទៀត ទោះបីជាឆ្លងកូវីដមែនក៏ដោយ តែមិនអាចចាត់ទុកថាស្លាប់ដោយកូវីដនោះទេ។
អាមេរិក៖ ចិនត្រូវតែមានតម្លាភាព បែងចែកទិន្នន័យ ក្រែងមានកូវីដបំប្លែងខ្លួនថ្មី
ប្រឈមនឹងបញ្ហាឆ្លងរាលដាលកូវីដខ្លាំងនៅចិននេះ សហរដ្ឋអាមេរិក ក៏បានប្រតិកម្មដែរ ដោយបានអំពាវនាវ ឲ្យរដ្ឋាភិបាលចិនត្រូវតែបង្ហាញតម្លាភាព ស្តីពីស្ថានការណ៍ឆ្លងរាលដាល ក៏ដូចជាចំនួនមនុស្សស្លាប់។ នៅចំពោះមុខអ្នកកាសែត កាលពីថ្ងៃពុធកន្លងទៅ លោកអង់តូនី ប្លីងកិន បានលើកឡើងថា អាជ្ញាធរសុខាភិបាលចិន ត្រូវតែមានតម្លាភាព ផ្តល់ទិន្នន័យព័ត៌មាននានា ស្តីពីស្ថានការណ៍ឆ្លងរាលដាលកូវីដនៅចិននេះ ប្រាប់មកពិភពលោកទាំងមូលដោយភាពស្មោះត្រង់ មិនត្រូវលាក់លាមទេ។ ទិន្នន័យព័ត៌មាននេះ វាសំខាន់ណាស់ សម្រាប់ទាំងអស់គ្នា ព្រោះគេត្រូវតែតាមដានឲ្យម៉ដ្ឋចត់បំផុត ក្រែងវាមានកូវីដបំប្លែងខ្លួនថ្មីណាមួយផ្សេងទៀត ផុសខ្លួនឡើង។
ទាំងការធ្វើតេស្តរកមេរោគ ទាំងថ្នាំព្យាបាល និងតួលេខនៃការចាក់វ៉ាក់សាំងជាដើម គឺចិនត្រូវតែមានភាពស្មោះត្រង់ ព្រោះអ្វីៗវាអាចជះឥទ្ធិពលមកលើពិភពលោកទាំងមូល។ ជាមួយគ្នានេះដែរ លោករដ្ឋមន្ត្រីការបរទេសអាមេរិក បានស្នើសាជាថ្មីដែរ ថារដ្ឋាភិបាលអាមេរិក ត្រៀមខ្លួនជាស្រេច ក្នុងការផ្គត់ផ្គង់វ៉ាក់សាំងបង្ការកូវីដ១៩ ទៅឲ្យចិន ឲ្យតែចិនដាច់ចិត្តហារមាត់ប្រាប់ថាចង់បាន។
ប្រជាជនចិនតិចណាស់ដែលបានចាក់វ៉ាក់សាំង ហើយជាវ៉ាក់សាំងផលិតដោយមន្ទីរពិសោធន៍ចិន ដែលមានប្រសិទ្ធភាពខ្សោយ។ រហូតមកទល់ពេលនេះ រដ្ឋាភិបាលចិនមិនព្រមទិញវ៉ាក់សាំងពីប្រទេសផ្សេងទេ ដោយសារតែមានគំនិតជាតិនិយម មោទនភាព ចង់ប្រើតែវ៉ាក់សាំងរបស់ចិនខ្លួនឯង។ មិនដឹងថា ចំនួនមនុស្សស្លាប់ឡើងដល់ប៉ុន្មាននាក់ ទើបអាចធ្វើឲ្យរដ្ឋាភិបាលចិន បោះបង់ចោលគំនិតនេះចោលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ