អាហ្វហ្កានីស្ថាន៖ បន្ទាប់ពីឈប់ឲ្យរៀនខ្ពស់ ស្ត្រីត្រូវហាមឃាត់មិនឲ្យធ្វើការទៀត
ចុះផ្សាយនៅថ្ងៃ៖
ស្តាប់ - ០៥:៥០
អង្គការសហប្រជាជាតិ និង អង្គការក្រៅរដ្ឋាភិបាលនៅអាហ្វហ្កានីស្ថាន ជួបប្រជុំគ្នានៅរសៀលថ្ងៃអាទិត្យ ទី២៥ធ្នូ ក្រោយពី ពួកកាន់អំណាចរដ្ឋតាលីបង់ បានបញ្ឈប់លែងឱ្យស្ត្រីធ្វើការនៅអង្គការសង្គមស៊ីវិលនិងអង្គការអន្តរជាតិ។ ការហាមឃាត់ស្ត្រី មិនឲ្យធ្វើការនៅអង្គការសង្គមស៊ីវិល គឺបន្ទាប់ពី ៤ ថ្ងៃមុន ពួកតាលីបង់ បានហាមឃាត់ឈប់ឲ្យនារីនិងក្មេងស្រី រៀនសូត្រថ្នាក់ខ្ពស់។ នៅអាហ្វហ្កានីស្ថាន ចាប់តាំងពីពួកតាលីបង់ ឡើងក្តាប់អំណាចជាថ្មី នៅតុលាឆ្នាំ២០២១មក គឺ បញ្ហាសិទ្ធិមនុស្ស ពិសេសសិទ្ធិកុមារី និងស្ត្រី បានធ្លាក់ចុះដុបដាបខ្លាំង។ នារីៗមួយចំនួន ដែលមានលទ្ធភាពគ្រាន់បើ បានសម្រេចចិត្តចាកចេញពីប្រទេស ជាបន្តបន្ទាប់។
បណ្តាអង្គការ សម្រេចចិត្តយ៉ាងណា?
អ្នកទទួលខុសត្រូវព័ត៌មាន នៃការិយាល័យសម្របសម្រួលជំនួយមនុស្សធម៌ របស់អង្គការសហប្រជាជាតិ ប្រចាំអាហ្វហ្គានីស្ថាន បានបញ្ជាក់ប្រាប់អ្នកសារព័ត៌មានថា ក្រុមអង្គការនិងភ្នាក់ងារខាងកិច្ចការសប្បុរធម៌ ជួបប្រជុំគ្នាជាបន្ទាន់ ដើម្បីនឹងជជែកពិគ្រោះយោបល់គ្នា ហើយនិង រកផ្លូវដោះស្រាយយ៉ាងដូចម្តេចទៀត ចំពោះបញ្ហាថ្មីនេះ។ នៅពេលនេះ ពួកអង្គការអន្តរជាតិ នៅមិនទាន់ទទួលដំណឹងច្បាស់លាស់និងល្អិតល្អន់នៅឡើយដែរ ថាតើ បម្រាមហាមឃាត់ស្ត្រីមិនឲ្យធ្វើការនៅសង្គមស៊ីវិលនិងនៅអង្គការអន្តរជាតិនេះ គឺហាមសម្រាប់តែស្ត្រីជនជាតិអាហ្វហ្កានីស្ថានទេ ឬក៏សម្រាប់ចំពោះនារីបរទេសនិងស្ត្រីជាទូទៅ ឲ្យតែនៅក្នុងទឹកដីអាហ្វហ្កានីស្ថាន។
តំណាងអង្គការសហប្រជាជាតិប្រចាំអាហ្វហ្កានីស្ថាន កំពុងតែរកផ្លូវ ជួបពិគ្រោះយោបល់ជាមួយថ្នាក់ដឹកនាំពួកតាលីបង់ផ្ទាល់តែម្តងដែរ។ ជំនួយអន្តរជាតិសម្រាប់អាហ្វហ្គានីស្ថាន គឺមានច្រើនសន្ធឹករាប់រយលានដុល្លារ។ អង្គការសហប្រជាជាតិនិងភ្នាក់ងាររបស់ខ្លួន ក៏បានឲ្យដឹងថា ប្រជាពលរដ្ឋអាហ្វហ្គានីស្ថាន ៣៨លាននាក់ ត្រូវការជំនួយមនុស្សធម៌ចាំបាច់ សម្រាប់ឆ្លងកាត់រដូវរងានេះ។
នៅថ្ងៃអាទិត្យ អង្គការសង្គមស៊ីវិល ជាច្រើន ព្រោះតែសេចក្តីភ័យខ្លាច បានសម្រេចចិត្តផ្អាកសកម្មភាព ទម្រាំរង់ចាំការសម្រេចថ្មី ក៏ប៉ុន្តែ ស្ត្រីប្រធានអង្គការ មួយចំនួនខ្លះទៀត បានបន្តប្តេជ្ញាចិត្ត ថានឹងមិនបិទអង្គការទេ ទោះបីជាត្រូវប្រឈមមុខនឹងគ្រោះថ្នាក់ប៉ះពាល់ដល់សុវត្ថិភាពអាយុជីវិតផ្ទាល់ខ្លួនក្តី ហើយនិងអំពាវនាវប្រាប់បុគ្គលិករបស់ខ្លួនឲ្យរួមគ្នាតស៊ូដល់ទីបំផុត។
«បញ្ហាមិនទទូរក្រណាត់ឲ្យត្រឹមត្រូវតាមច្បាប់កាតព្វកិច្ចសាសនាអ៊ីស្លាម»
អ្នកនាំពាក្យក្រសួងសេដ្ឋកិច្ចអាហ្វហ្កានីស្ថាន បញ្ជាក់ថា ក្រសួងសេដ្ឋកិច្ច បានទទួលពាក្យបណ្តឹងដែលគួរឲ្យទុកចិត្តបាន ថាស្ត្រីៗទៅធ្វើការឲ្យអង្គការសង្គមស៊ីវិលនិងអង្គការអន្តរជាតិ គឺមិនបានពាក់ស្បៃទទូរក្បាលឲ្យខ្ជាប់ខ្ជួនទេ។
សហគមអន្តរជាតិ បានថ្កោលទោសអាហ្វហ្កានីស្ថាន។ តាមរយៈអ្នកនាំពាក្យរបស់ប្រមុខការទូតសហភាពអឺរ៉ុប គឺ សហភាពអឺរ៉ុប ថ្កោលទោសយ៉ាងដាច់ខាតចំពោះការហាមឃាតស្ត្រីមិនឲ្យធ្វើការនៅអង្គការសង្គមស៊ីវិលនិងអង្គការអន្តរជាតិ នៅអាហ្វហ្កានីស្ថាន។ សហភាពអឺរ៉ុប កំពុងវាយតម្លៃពីផលវិបាកប៉ះពាល់ទៅលើកម្មវិធីជំនួយរបស់ខ្លួន។ ទន្ទឹមនឹងគ្នានេះ រដ្ឋមន្ត្រីក្រសួងកិច្ចការបរទេសអាមេរិក លោក អង់តូនី ប្ល៊ីងកិន បានសម្តែងព្រួយបារម្ភជាខ្លាំង និងថា «ការសម្រេចចិត្តរបស់រដ្ឋាភិបាលអាហ្វហ្កានីស្ថាន គឺបំផ្លិចបំផ្លាញ់អាយុជីវិតពលរដ្ឋ»។
ចំពោះការហាមឃាត់ថ្មីនេះ គឺក្រោយពី ៤ ថ្ងៃប៉ុណ្ណោះ បន្ទាប់ពីហាមឃាត់ឈប់ឲ្យរៀនមហាវិទ្យាល័យ ឬហាមឃាត់ឈប់ឲ្យរៀនសូត្រខ្ពង់ខ្ពស់។ អង្គការការពារសិទ្ធិមនុស្ស Amnesty International បញ្ជាក់ថា ការសម្រេចបែបនេះ គឺលុបបំបាត់ស្ត្រី ពី រង្វង់នយោបាយ សង្គម និងសេដ្ឋកិច្ចស្រុកទេស។ រដ្ឋមន្ត្រីសិក្សាធិការជាតិ អាហ្វហ្កានីស្ថាន លោក Neda Mohammad Nadeem បានពន្យល់នៅក្នុងបទសម្ភាសវីដេអូមួយ ថា «និស្សិតស្រីៗ ដែលទៅរៀនសកលវិទ្យាល័យ គឺមិនបានគោរពកាតព្វកិច្ចពាក់កំណាត់ទទូរក្បាលឲ្យត្រឹមត្រូវ។ ការវ័នកំណាត់ជូតក្បាលនេះ ជាកាតព្វកិច្ចក្នុងសាសនាអ៊ីស្លាម។» នេះជាការបញ្ជាក់របស់រដ្ឋមន្ត្រីអប់រំ ដោយសង្កត់ធ្ងន់ទៀតថា ស្ត្រីអាហ្វហ្កានីស្ថានត្រូវគ្របដណ្តប់ស្បៃពេញដងខ្លួននិងបិទមុខផង។
ប្រុសៗធ្វើបាតុកកម្មសម្តែងស្មារតីសាមគ្គីភាពជាមួយនារីៗ។
ស្ត្រីអាហ្វហ្កានីស្ថាន បានធ្វើបាតុកម្មប្រឆាំងនឹងការសម្រេចចិត្តរបស់រដ្ឋអំណាចតាលីបង់។ នៅប៉ាគីស្ថាន ក្បែរខាង ក៏មានបាតុកម្មគាំទ្រស្រីអាហ្វហ្កានីស្ថានដែរ។ ប្រុសៗអាហ្វហ្កានីស្ថាន វិញ ក៏ចូលរួមបាតុកម្មដែរ។ ថ្ងៃសៅរ៍ទី២៤ធ្នូ ពួកប្រុសៗ និស្សិត នៅទីក្រុងកាន់ដាហារ ប្រមាណ ៤០០នាក់ បានសម្រេចចិត្តមិនចូលរួមប្រលងទេ ដើម្បីសម្តែងមតិ និង ស្មារតីសាមគ្គីភាពជាមួយនារីៗ។ គេកម្រនឹងឃើញប្រុសៗបញ្ចេញសកម្មភាពដើម្បីបុព្វហេតុស្ត្រីភេទណាស់។ នេះជាកាយវិការក្លាហ៊ានមួយនៃពួកប្រុសៗអាហ្វាហ្កានីស្ថាន ដើម្បីសិទ្ធិស្ត្រីនិងក្មេងស្រី។ ទោះយ៉ាងណាក្តី ការជួបជុំសម្តែងមតិ ត្រូវកម្លាំងសមត្ថកិច្ចបំបែកដោយបាញ់កាំភ្លើងឡើងលើ ជាការគំរាម។ នេះបើតាមលោកគ្រូសាស្ត្រាចារ្យម្នាក់ ដែលប្រាប់ទីភ្នាក់ងារព័ត៌មានបារាំង AFP៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ