ឆ្នាំថ្មី រុស្ស៊ី មិនលក់ប្រេងឲ្យប្រទេសណាជាប់ពាក់ព័ន្ធនឹងវិធានការកំណត់តម្លៃប្រេងរុស្ស៊ី
ចុះផ្សាយនៅថ្ងៃ៖
ស្តាប់ - ០៧:២០
នៅរុស្ស៊ី ប្រធានាធិបតី ពូទីន បានប្រតិកម្មវាយបកនឹងបស្ចិមលោកដែលបានកំណត់តម្លៃប្រេងរុស្ស៊ីត្រឹម ៦០ដុល្លារក្នុងមួយធុងបារីល។ នៅក្នុងប្រតិកម្មវាយបកដែលនឹងចូលជាធរមានពីថ្ងៃទី១ កុម្ភៈដល់ថ្ងៃទី១ កក្កដា ឆ្នាំ ២០២៣ ក្រឹត្យប្រធានាធិបតីរុស្ស៊ី ពូទីន នឹងមិនលក់ប្រេងរុស្ស៊ីទៅឲ្យប្រទេសណាដែលជាប់ពាក់ព័ន្ធនឹងវិធានការរបស់បស្ចិមលោកទេ។
ច្បាប់ជាធរមាននៅពេលឥលូវនេះ គឺហាមឃាត់ ចំនួន ៥ ខែ ជាដំបូងសិន។ ក៏ប៉ុន្តែ ក្រឹត្យប្រធានាធិបតីរុស្ស៊ី បានរក្សាទុកចន្លោះដែរ ថា ប្រសិនបើ រុស្ស៊ី ចង់លក់ឲ្យបណ្តាប្រទេសបច្ចិមលោកនោះ គឺមានតែប្រធានាធិបតី ពូទីន ប៉ុណ្ណោះ ជាអ្នកសម្រេច។
ដើមខែធ្នូនេះ ក្រុមប្រទេសបស្ចិមលោក ដូចជា សហភាពអឺរ៉ុប ក្រុមប្រទេសG7 អូស្រ្តាលី និងសហរដ្ឋអាមេរិក បានចរចាគ្នា និងកំណត់តម្លៃប្រេងរុស្ស៊ី ឲ្យត្រឹម ៦០ដុល្លារក្នុងមួយធុងបារីល ឬ ថោកជាងនេះ ព្រោះបស្ចិមប្រទេស ចង់ដាក់ទណ្ឌកម្មបន្ថែមលើសេដ្ឋកិច្ចរុស្ស៊ី ដែលយកប្រាក់ចំណេញទៅបង្កសង្គ្រាមឈ្លានពាននៅអ៊ុយក្រែន។
ការនាំប្រេងរុស្ស៊ីតាមផ្លូវសមុទ្រ ចូលកំពង់ផែអឺរ៉ុបនិងបច្ចិមប្រទេស គឺត្រូវឲ្យថោកជាង៦០ដុល្លារក្នុងមួយធុងបារីល។ តម្លៃថោកបែបនេះ គឺជាចំណោទបញ្ហាខ្លាំងណាស់ សម្រាប់ក្រុមហ៊ុនធានារ៉ាប់រងខាងដឹកជញ្ជូនប្រេង ដែល ៩០%ជាក្រុមហ៊ុនរបស់សហភាពអឺរ៉ុប និងប្រទេសលោកខាងលិច។ ក្នុងការដឹកជញ្ជូនប្រេងនេះ ប្រសិនបើគ្មានការធានារ៉ាប់រ៉ង់ទេ គឺលំបាកនឹងដឹកជញ្ជូនចរាចរណ៍ណាស់តាមផ្លូវសមុទ្រ ហើយសូម្បីតែ ប្រទេស តួកគី ក៏មិនទទួលឲ្យចុះចតនៅកំពង់ផែរបស់ខ្លួនដែរ បើនាវាដឹងប្រេងណា គ្មានការធានារ៉ាប់រងនោះ។
បន្ទាប់ពីការសម្រេចចិត្តកម្រិតវិធានការកំណត់តម្លៃប្រេងរុស្ស៊ី ពីសំណក់បស្ចិមលោកនេះ គឺធ្វើឲ្យ ការនាំចេញប្រេង បានធ្លាក់ចុះ ជាង ៥០% ស្រេចទៅហើយ។ នេះបើតាមការបញ្ជាក់របស់ ទីភ្នាក់ងារ Bloomberg។
អ្នកជំនាញថា កំណត់តម្លៃថោកទៅលើប្រេងរុស្ស៊ី គឺមិនធ្វើឲ្យប្រែប្រួលទីផ្សារប្រេងនិងឧស្ម័ន ធំដុំអ្វីទេ។
អ្នកវិភាគខ្លះ យល់ថា គ្មានអ្វីប្លែកទេ ព្រោះថា រុស្ស៊ី ច្បាស់ជាមិនសុខចិត្តខាត ហើយខាងប្រទេសលោកខាងលិច ក៏លំបាកទិញ ក្នុងបរិបទទណ្ឌកម្មសេដ្ឋកិច្ច។ ម្យ៉ាងទៀត រុស្ស៊ី ក៏ធ្លាប់បានបដិសេធមិនលក់ឧស្ម័នឲ្យ ប្រទេសហុងគ្រី និងប៉ូឡូញដែរ ដ្បិតមិនបង់លុយទូតទាត់ជារូបិយវត្ថុរុស្ស៊ី។
អ្នកជំនាញ លោក Math Smith នៃ ក្រុមហ៊ុនវិភាគទិដ្ឋន័យស្តីពីវត្ថុធនធានដើម បានប្រមើលមើលឃើញថា ការហាមឃាត់និងវាយបកគ្នាទៅវិញទៅមក រវាង រុស្ស៊ី និងបច្ចិមលោក គឺទំនងជាមិនជះឥទ្ធិពលច្រើនទេ ចំពោះរុស្ស៊ី ពីព្រោះថា រុស្ស៊ី សម្លឹងឃើញមហាយក្សពីរនៅអាស៊ី គឺ ចិន និង ឥណ្ឌា ដែលទទួលទិញប្រេងឆៅរុស្ស៊ី ដ៏ច្រើនសន្ធឹកជាងគេ។ ម្យ៉ាងទៀត ចិន និង ឥណ្ឌា គឺច្បាស់ជាមិនទិញបន្ថោកតម្លៃ តាមការកម្រិត៦០ដុល្លារក្នុងមួយធុងបារីល ដូចបច្ចិមលោកទេ។ ឥណ្ឌា និងចិន ច្បាស់ជាទិញប្រេងរុស្ស៊ី ក្នុងតម្លៃថ្លៃជាងវិធានការបច្ចិមលោក ជាមិនខាន។ ប៉ុន្តែ អ្នកជំនាញខ្លះ ក៏អះអាងផ្ទុយពីនេះដែរ។ ទោះម្តេចក្តី អាស៊ីជាទីផ្សារប្រេងថ្មី របស់រុស្ស៊ី ជាការជៀសមិនផុត។
ចិន ប្រកាសបើកប្រទេស ឈប់តម្រូវឲ្យធ្វើចត្តាឡីស័ក ចាប់ពីថ្ងៃទី៨មករាខាងមុខ និងអនុញ្ញាតឲ្យពលរដ្ឋខ្លួនចេញក្រៅបរទេសថែមទៀត។ ក្បាលម៉ាស៊ីនសេដ្ឋកិច្ចចិន ក៏នឹងត្រូវដំណើរច្រើនឡើងៗ។ ចិនក៏ត្រូវការប្រេងរុស្ស៊ីច្រើនដែរ ដើម្បីបំប៉នម៉ាស៊ីនសេដ្ឋកិច្ច។
ថ្ងៃសុក្រសប្តាហ៍មុន លោក Alexandre Novak អនុនាយករដ្ឋមន្ត្រីរុស្ស៊ី និងជាអតីតរដ្ឋមន្ត្រីថាមពលផង បានឲ្យដឹងថា ដើមឆ្នាំ២០២៣ រុស្ស៊ីអាចនឹងកាត់បន្ថយការផលិតប្រេង ចន្លោះពី ៥ សែន ទៅ ៧ សែន ធុងបារីល ក្នុងមួយថ្ងៃៗ ដើម្បីជាការឆ្លើយតបនឹងក្រុមប្រទេសលោកខាងលិច។ ការបន្ថយផលិតប្រេង គឺរុស្ស៊ីសង្ឃឹមឲ្យតម្លៃប្រេងឡើងថ្លៃ។
«ក្នុងបញ្ហាតែងតែមានឱកាស»
ការហាមឃាត់និងវាយបកគ្នាទៅវិញទៅមក រវាង រុស្ស៊ី និងបច្ចិមលោក គឺនាំឲ្យប្លក់ទាំងពីរចែកផ្លូវគ្នារកទីផ្សារថ្មីរៀងខ្លួន។ រុស្ស៊ី ក៏ងាកទៅទីផ្សារអាស៊ី។ ចំណែក ប្រទេសបច្ចិមលោក សហភាពអឺរ៉ុប អូស្ត្រាលី និងកាណាដា គឺងាកទៅរក អ្នកផ្គត់ផ្គង់ថ្មី នៅទ្វីបអាហ្វ្រិក សហរដ្ឋអាមេរិក និងដើមបូព៌ា ។
អ្នកតំណាងខាងក្រុមហ៊ុនផ្គត់ផ្គង់ប្រេងមួយ បាននិយាយក្នុងក្របខណ្ឌសុំលាក់អត្តសញ្ញាណ ប្រាប់កាសែតបារាំងថា ក្នុងរឿងកំណត់តម្លៃប្រេងរុស្ស៊ីនេះ មានប្រទេសខ្លះលេងល្បែង«ដើរខ្សែលើ» ដើម្បីកេងចំណេញផង និងគេចចេញពីទណ្ឌកម្មសេដ្ឋកិច្ចរបស់បច្ចិមលោកផង។ ឧទាហរណ៍ ប្រទេស អារ៉ាប៊ីសាអ៊ូឌីត ដែលបន្តទិញប្រេងរុស្ស៊ី ក្នុងតម្លៃ អាចថោកជាងធម្មតា និងសម្រាប់យកទៅប្រើប្រាស់ក្នុងស្រុករបស់ខ្លួន។ ទន្ទឹមនឹងគ្នានេះ រាជាណាចក្រ អារ៉ាប៊ីសាអ៊ូឌីត នៅតែបន្តលក់ប្រេងរបស់ខ្លួន ក្នុងតម្លៃថ្លៃដដែល។
ប្រទេសខ្លះទៀត អាចនឹងទិញប្រេងរុស្ស៊ី និងយកទៅលាយនឹងប្រេងប្រភពផ្សេងទៀត ហើយបន្តយកទៅលក់ឲ្យប្រទេសអឺរ៉ុបវិញ។ ទីបំផុត តិចឬច្រើន អឺរ៉ុប នៅតែប្រើប្រេងរុស្ស៊ី ដដែល គ្រាន់តែក្នុងទម្រង់ផ្សេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ