តុលាការភូមាបើកសវនាការចុងក្រោយ ផ្តន្ទាទោសលោកស្រីអ៊ុងសាន ស៊ូជី ឲ្យជាប់ពន្ធនាគារសរុប៣៣ឆ្នាំ
ចុះផ្សាយនៅថ្ងៃ៖
ស្តាប់ - ០៦:១៣
ថ្ងៃសុក្រទី៣០ធ្នូ តុលាការពិសេសភូមា នៅក្រុងណៃពិដាវ បានបើកសវនាការកាត់ទោសលោកស្រី អ៊ុងសាន ស៊ូជី ឲ្យជាប់ទោសពន្ធនាគារ៧ឆ្នាំបន្ថែមទៀត ពីបទប្រព្រឹត្តិអំពើពុករលួយ។ នេះគឺជាសវនាការចុងក្រោយហើយ ដែលរបបសិកភូមា រួមជាមួយប្រព័ន្ធតុលាការ បានរួមគ្នាដាក់បន្ទុកចោទប្រកាន់ទៅលើលោកស្រី អ៊ុងសាន ស៊ូជី ក្នុងបទចោទប្រកាន់ជាច្រើនសន្ធឹក។ គិតជាសរុប លោកស្រីអ៊ុងសាន ស៊ូជី នឹងត្រូវមានទោសជាប់ពន្ធនាគារចំនួន៣៣ឆ្នាំ។
“បទល្មើសពុករលួយដ៏គួរឲ្យអស់សំណើច”
តុលាការភូមាបានបើកសវនាការពិសេស នៅក្នុងមន្ទីរឃុំឃាំង ដែលគេបង្ឃាំងខ្លួនលោកស្រីអ៊ុងសាន ស៊ូជី តែម្តង ស្ថិតនៅក្នុងក្រុងណៃពិដាវ។ ជាសវនាការកាត់ទោសពាក់ព័ន្ធនឹងបទចោទប្រកាន់ ចំនួន៥ ថាលោកស្រី អ៊ុងសាន ស៊ូជី បានប្រព្រឹត្តិអំពើពុករលួយ។ អង្គហេតុ គឺតុលាការភូមាបានអះអាងថា លោកស្រីបានចំណាយប្រាក់រដ្ឋ ជួលឧត្ថម្ភាគចក្រ ឲ្យរដ្ឋមន្ត្រីរបស់ខ្លួនជិះ ដែលជាទង្វើខុសច្បាប់ ធ្វើឲ្យរដ្ឋខាតបង់ប្រាក់។
យោងតាមប្រភពពីមន្ត្រីតុលាការភូមា គឺលោកស្រីអ៊ុងសាន ស៊ូជី ត្រូវគេបញ្ជូនខ្លួន ឲ្យចូលមកស្តាប់អង្គសវនាការ ដែលគេអះអាងថា លោកស្រី មានសុខភាពមាំទាំធម្មតាទេ។ ចៅក្រមបានប្រកាសទោស ឲ្យលោកស្រីជាប់ពន្ធនាគារចំនួន៧ឆ្នាំ ក្នុងសំណុំរឿងចុងក្រោយនេះ។ ក្នុងសំណុំរឿងជាមួយគ្នានេះដែរ លោក Win Myint អតីតប្រធានាធិបតី ក៏ត្រូវតុលាការប្រកាសផ្តន្ទាទោស ឲ្យជាប់ពន្ធនាគារ៧ឆ្នាំដែរ។
លោក Htwe Htwe Thien សាស្ត្រាចារ្យម្នាក់នៅសកលវិទ្យាល័យ Curtin ប្រទេសអូស្ត្រាលី បានលើកឡើងថា ការចោទលោកស្រីអ៊ុងសាន ស៊ូជី ថាបានប្រព្រឹត្តិអំពើពុករលួយនេះ វាគឺជារឿងគួរឲ្យអស់សំណើចខ្លាំងណាស់។ លោកបន្ថែមថា សវនាការនេះ គឺជាឆាកល្ខោនរៀនចំដោយរបបសិកភូមា ព្រោះធាតុពិតគ្មានឡើយសូម្បីតែប៉ុនក្រចក នូវសញ្ញាថាលោកស្រីអ៊ុងសាន ស៊ូជី បានប្រព្រឹត្តិអំពើពុករលួយ មិនថាក្នុងការដឹកនាំប្រទេស ឬក៏ក្នុងជីវិតរស់នៅឯកជនប្រចាំថ្ងៃរបស់លោកស្រី។
សវនាការចុងក្រោយ សរុបទោស៣៣ឆ្នាំ
គិតចាប់ពីថ្ងៃទី១កុម្ភៈ២០២១មក នៅពេលកងទ័ពភូមាបានធ្វើរដ្ឋប្រហារ ផ្តួលរំលំរដ្ឋាភិបាលប្រជាធិបតេយ្យរបស់លោកស្រី អ៊ុងសាន ស៊ូជី គឺរបបសិក បានចោទប្រកាន់លោកស្រី ច្រើនសំណុំរឿងណាស់។ ចប់ពីសវនាការមួយ ចូលសវនាការមួយទៀត ដោយចោទពីបទពុករលួយ បទក្លែងបន្លំសន្លឹកឆ្នោត បទល្មើសបំពាននឹងកិច្ចការសម្ងាត់ជាតិ ឬក៏បំពាននឹងវិធានការបង្ការកូវីដ១៩ជាដើម។ល។
១៨ខែមកនេះ អង្គការសិទ្ធិមនុស្ស ក៏ដូចជាសហគមន៍អន្តរជាតិ បានត្រឹមតែមើលពីចម្ងាយ ចាត់ទុកសវនាការកាត់ទោសទាំងនេះ ថាជាឆាកល្ខោន ឆ្ពិនភ្នែក ដើម្បីកំចាយលោកស្រី ឲ្យស្ថិតនៅឆ្ងាយពីឆាកនយោបាយ។ ក្រុមប្រឹក្សាសន្តិសុខនៃអង្គការសហប្រជាជាតិ បានអនុម័តសេចក្តីសម្រេចចិត្តដ៏កម្រមួយ កាលពីពេលថ្មីៗនេះ ទាមទារឲ្យរបបសិកភូមា ត្រូវតែដោះលែងលោកស្រីអ៊ុងសាន ស៊ូជី។ ជាសេចក្តីសម្រេចដ៏កម្រ ក្នុងសំណុំរឿងភូមា ព្រោះថាកន្លងមក ក្រុមប្រឹក្សាសន្តិសុខមិនអាចសម្រេចអ្វីបានទេ ដោយសារតែចិននិងរុស្ស៊ី តែងតែបោះឆ្នោតប្រឆាំង ដើម្បីការពាររបបសិកភូមាជានិច្ច។ តែលើកនេះ ចិន និងរុស្ស៊ីបានសុខចិត្តបោះឆ្នោតអនុបវាទ។
សវនាការនៅថ្ងៃសុក្រទី៣០ធ្នូ ជាសវនាការចុងក្រោយហើយ។ ប្រភពពីមន្ត្រីតុលាការភូមា ដោយសុំមិនបញ្ចេញឈ្មោះ បានអះអាងថា រឿងក្តីក្តាំដែលពាក់ព័ន្ធនឹងលោកស្រីអ៊ុងសាន ស៊ូជី ត្រូវចប់ត្រឹមនេះហើយ។ ជាសរុប គឺលោកស្រី នឹងត្រូវជាប់ពន្ធនាគារចំនួន៣៣ឆ្នាំ។
ជាប់ឃុំរហូតដល់ថ្ងៃស្លាប់
បើតាមការលើកឡើង របស់លោក Phil Robertson តំណាងអង្គការ Human Rights Watch ប្រចាំអាស៊ី គឺលោកស្រីអ៊ុងសាន ស៊ូជី នឹងប្រាកដជាត្រូវជាប់ឃុំអស់មួយជីវិត រហូតទាល់ដល់ថ្ងៃស្លាប់ហើយ។ គ្រាន់តែថា យើងមិនដឹងថាតើ របបសិកភូមា នឹងយកលោកស្រីទៅដាក់ឃុំ ឲ្យនៅក្នុងផ្ទះ យាមកាមយ៉ាងជាប់ស្អិត ឬក៏យកទៅដាក់ក្នុងមន្ទីរឃុំឃាំងប៉ុណ្ណោះ។
ដោយឡែក លោក Richard Horsey អ្នកជំនាញម្នាក់នៅ International Crisis Group បានលើកឡើងថា លោកមិនជឿថា របបសិកនឹងយកលោកស្រីអ៊ុងសានស៊ូជី ទៅឃុំក្នុងផ្ទះ ហើយដោយអនុញ្ញាតឲ្យមានតំណាងប្រេសិតពីបរទេស ចូលទៅជួបម្តងម្កាលនោះឡើយ។
មានអាយុ៧៧ឆ្នាំ លោកស្រីអ៊ុងសាន ស៊ូជី មានវ័យកាន់តែចាស់ជរា។ កន្លងមកជិត២ឆ្នាំមកនេះ គេកម្របានឃើញលោកស្រីណាស់ ព្រោះរបបសិកភូមា បានយកលោកស្រីទៅឃុំទុកនៅទីកន្លែងសម្ងាត់ ដោយមិនឲ្យមានអ្នកកាសែតណាចូលទៅកៀកបានទេ។ យូរៗមានរូបថតមួយឬពីរប៉ុណ្ណោះ ដែលគេឃើញលោកស្រីអង្គុយនៅក្នុងសវនាការ តែម្នាក់ឯង រងចាំស្តាប់ការកាត់ទោសរបស់ចៅក្រម។ នៅក្នុងដួងចិត្តបេះដូងរបស់ប្រជាជនភូមា លោកស្រីអ៊ុងសាន ស៊ូជី គឺជាវីរៈជនកំពូលបំផុត ដែលបានបូជាពេញមួយជីវិត ដើម្បីលទ្ធិប្រជាធិបេតេយ្យ និងសិទ្ធិសេរីភាពនៅភូមា។
សវនការកាត់ទោសលោកស្រីអ៊ុងសាន ស៊ូជី ត្រូវបិទបញ្ចប់សព្វគ្រប់ត្រឹមពេលនេះហើយ។ អ្វីដែលគេកំពុងរងចាំតាមដានមើលបន្តទៅទៀតនោះ គឺថារបបសិកនឹងគោរពការសន្យារបស់ខ្លួនដែរឬទេ ទាក់ទិននឹងការរៀបចំការបោះឆ្នោតថ្មីមួយ ក្នុងឆ្នាំ២០២៣ខាងមុខ។ គិតត្រឹមពេលេនេះ វិបត្តិនយោបាយភូមា ស្ថិតនៅលើចំណុចទ័លច្រកនៅឡើយទេ។ ប្រមាណជិត២ឆ្នាំមកនេះ របបសិកភូមា បានសម្លាប់បាតុករតវ៉ា ជាង២៦០០នាក់ ព្រមទាំងបានវាយប្រហារ បាញ់ទំលាក់គ្រាប់ ដុតផ្ទះសំបែង ភូមិស្រុកប្រជាជនស្លូតត្រង់ ស្លាប់ប្រជាជនស៊ីវីលជាច្រើនពាន់នាក់ ដែលទាំងអស់នេះ អាចត្រូវបានចាត់ទុកថាជាឧក្រិដ្ឋកម្មសង្គ្រាម បង្កឡើងដោយកងទ័ពភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ