លោកពូទីនប្រកាសឈប់បាញ់បណ្តោះអាសន្ន ខណៈសម្ព័ន្ធមិត្តលោកខាងលិចប្រកាសផ្តល់សព្វាវុធបន្ថែមឲ្យអ៊ុយក្រែន
ចុះផ្សាយនៅថ្ងៃ៖
ស្តាប់ - ០៨:១៩
លោកពូទីន បានប្រកាសកាលពីល្ងាចថ្ងៃទី៥មករា ថាកងទ័ពរុស្ស៊ីនៅសមរភូមិអ៊ុយក្រែន នឹងត្រូវឈប់បាញ់បណ្តោះអាសន្នរយៈពេល៣៦ម៉ោង ក្នុងឱកាសបុណ្យណូអែល តាមប្រពៃណីសាសនាកាតូលីកអកតូដុក្ស។ លោកពូទីនបានអំពាវនាវ ឲ្យភាគីអ៊ុយក្រែនត្រូវតែធ្វើតាមដែរ។ តែយ៉ាងណា ទន្ទឹមគ្នានេះ ក្រុមប្រទេសសម្ព័ន្ធមិត្តលោកខាងលិច មិនត្រឹមតែមិនជឿចំពោះបទឈប់បាញ់បណ្តោះអាសន្នរបស់រុស្ស៊ីនេះទេ តែថែមទាំងបានប្រកាសផ្តល់ជំនួយគ្រឿងសព្វាវុធបន្ថែមទៀត ទៅឲ្យអ៊ុយក្រែនដើម្បីប្រយុទ្ធយកឈ្នះរុស្ស៊ី។
បទឈប់បាញ់បណ្តោះអាសន្ន ដើម្បីប្រារព្ធបុណ្យណូអែលអកតូដុក្ស
កន្លងមក គឺធ្លាប់មានការប្រកាស ផ្អាកឈប់បាញ់មួយរយៈ នៅតាមតំបន់ផ្សេងៗគ្នា ដើម្បីបើកផ្លូវឲ្យប្រជាជនស៊ីវីល ធ្វើដំណើរចាកចេញ រកទីសុវត្ថិភាពអីជាដើម។ តែលើកនេះ វាជាលើកទីមួយហើយ ដែលលោកពូទីន បានចេញបញ្ជាឲ្យកងទ័ពរុស្ស៊ីទាំងអស់ ដែលកំពុងតែឈរជើងនៅសមរភូមិអ៊ុយក្រែន ត្រូវតែផ្អាក ឈប់បាញ់បណ្តោះអាសន្ន។
គួរបញ្ជាក់ដែរថា ការប្រកាសឈប់បាញ់បណ្តោះអាសន្ននេះ គឺធ្វើឡើងបន្ទាប់ពីកងទ័ពរុស្ស៊ី កំពុងតែត្រូវបានប្រជាជនរិះគន់ខ្លាំងណាស់ ដោយសារតែបានធ្វេសប្រហែល បណ្តាលឲ្យស្លាប់ទាហាន៨៩នាក់ ក្នុងពេលតែមួយយប់ ដោយការបាញ់ប្រហាររបស់កងទ័ពអ៊ុយក្រែន នៅយប់ថ្ងៃឆ្លងឆ្នាំ។ ហើយបើតាមការអះអាងរបស់អ៊ុយក្រែន គឺទាហានរុស្ស៊ីអាចមានស្លាប់ដល់ទី៤០០នាក់ឯណោះ។
ការសម្រេចឈប់បាញ់បណ្តោះអាសន្ននេះ ត្រូវបានធ្វើឡើង បន្ទាប់ពីលោកពូទីន បាននិយាយទូរស័ព្ទជាមួយលោកអ៊ែរដូហ្កាន់ ប្រធានាធិបតីតួកគី កាលពីរសៀលថ្ងៃព្រហស្បតិ៍ម្សិលមិញ។ លោកអ៊ែរដូហ្កាន់ បានស្នើគំនិតនេះ ដើម្បីជួយជំរុញដល់ការទំលាក់អាវុធជាស្ថាពរ ឈានទៅរកការចរចាសន្តិភាព។ បទឈប់បាញ់បណ្តោះអាសន្ន ដែលភាគីរុស្ស៊ីធ្វើតែម្នាក់ឯងនេះ គឺមានរយៈពេល៣៦ម៉ោង ចូលជាធរមានពីម៉ោង១២ថ្ងៃត្រង់ថ្ងៃសុក្រទី៦មករា រហូតដល់យប់ថ្ងៃសៅរ៍ម៉ោង១២រំលងអាធ្រាត្រ ម៉ោងនៅរុស្ស៊ី។ លោកពូទីន អះអាងថា បទឈប់បាញ់បណ្តោះអាសន្ននេះ គឺដើម្បីអនុញ្ញាតឲ្យប្រជាជនរុស្ស៊ី ក៏ដូចជាប្រជាជនអ៊ុយក្រែន ប្រារព្ធពិធីបុណ្យណូអែល តាមប្រពៃណីសាសនាកាតូលិកនិកាយអកតូដុក្ស។ ហើយលោកពូទីន ក៏បានហៅឲ្យកងទ័ពអ៊ុយក្រែន ឈប់បាញ់ដែរ។
“ពុតត្បុត”
លោក Mykhaïlo Podoliak អ្នកនាំពាក្យប្រធានាធិបតីអ៊ុយក្រែន បានសរសេរលើTwitter ថា សូមរុស្ស៊ីទុកទង្វើបោកប្រាស់ដ៏មានពុតត្បុតនេះវិញទៅ គ្រប់គ្នាគេស្គាល់ក្រយ៉ៅហើយ មិនបាច់មកបោកគេទេ។ ចំណែក លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានចាត់ទុកការប្រកាសឈប់បាញ់បណ្តោះអាសន្ន ដែលលោកពូទីនទើបតែប្រកាសនេះ ថាគឺជាចេតនាចង់ចំណេញពេលវេលាតែប៉ុណ្ណោះ។ លោកហ្សេឡេនស្គីបន្ថែមថា កម្មវត្ថុរបស់ពូទីន គឺចង់រារាំងកុំឲ្យកងទ័ពអ៊ុយក្រែនរុលទៅមុខថែមទៀត ហើយយកពេលនេះ ដើម្បីឲ្យកងទ័ពរុស្ស៊ី ដឹកជញ្ជូនស្បៀង ជញ្ជូនគ្រាប់គ្រឿងសព្វាវុធ និងកម្លាំងទាហានយកទៅបន្ថែមតែប៉ុណ្ណោះ។ ដូច្នេះសួរថាតើលទ្ធផលចុងក្រោយគឺជាអ្វី ? គឺមានតែការស្លាប់មនុស្សកាន់តែច្រើន។
ដូចគ្នាដែរ លោកចូ បៃដិន បានលើកឡើងថា លោកពូទីន កំពុងតែរកផ្លូវ ឲ្យកងទ័ពរុស្ស៊ីអាចដកដង្ហើមបានបន្តិចបន្ទាប់ពីបរាជ័យនៅសមរភូមិជាបន្តបន្ទាប់។ លោក ចូ បៃដិនបានចំអកថា លោកពូទីននិយាយដូចខ្លួនមានចិត្តបុណ្យចង់ឲ្យប្រជាជនស៊ីវីលប្រារព្ធពិធីបុណ្យណូអែលអកតូដុក្ស តែធាតុពិតកាលពីថ្ងៃទី២៥ធ្នូ ដែលជាបុណ្យណូអែលកាតូលិកទូទៅ និងនៅថ្ងៃបុណ្យឆ្លងឆ្នាំសកល លោកពូទីនមិនបានញញើតសូម្បីបន្តិច ក្នុងការបាញ់ប្លោងគ្រាប់មីស៊ីល ទៅលើមន្ទីរពេទ្យ ទៅលើសាលារៀន និងវិហារកាតូលិកជាដើមនៅអ៊ុយក្រែន។
លោក James Cleverly រដ្ឋមន្ត្រីការបរទេសអង់គ្លេស ក៏បានអះអាងដែរថា បទឈប់បាញ់បណ្តោះអាសន្នពីខាងរុស្ស៊ីនេះ នឹងគ្មានលទ្ធផលអ្វីជាក់ស្តែង ចំពោះដំណើរការស្វែងរកសន្តិភាពនោះទេ។ លោកបានហៅឲ្យភាគីរុស្ស៊ី ត្រូវតែដកទ័ពចេញពីដែនដីអ៊ុយក្រែនទាំងស្រុង ប្រសិនបើចង់ឈប់បាញ់ឈប់ប្រយុទ្ធមែន។ ពីខាងរដ្ឋាភិបាលអាល្លឺម៉ង់វិញ រដ្ឋមន្រ្តីការបរទេសក៏បានលើកឡើងដែរថា បទឈប់បាញ់ក្លែងក្លាយនេះ នឹងមិនអាចធ្វើឲ្យមានសេរីភាព និងសន្តិសុខឡើងវិញ សម្រាប់ប្រជាជនអ៊ុយក្រែននោះទេ។
រុស្ស៊ីព្រមចរចា តែអ៊ុយក្រែនត្រូវព្រមសុខចិត្តទទួលស្គាល់ថាបានបង់ទឹកដី
នៅក្នុងការសន្ទនាតាមទូរស័ព្ទជាមួយលោកអ៊ែរដូហ្កាន់ កាលពីថ្ងៃទី៥មករា លោកពូទីន បានអះអាងថារុស្ស៊ីត្រៀមខ្លួនរួចហើយ ក្នុងការបើកផ្លូវចរចាជាមួយអ៊ុយក្រែន ក៏ប៉ុន្តែល្គឹកណា ទាល់តែអ៊ុយក្រែន សុខចិត្តទទួលស្គាល់តថៈភាពជាក់ស្តែងនាពេលបច្ចុប្បន្ន ទាក់ទិននឹងទំហំទឹកដីរបស់ខ្លួន។ មានន័យថា គឺទាល់តែអ៊ុយក្រែន សុខចិត្តទទួលស្គាល់ថា ដែនដីទាំងអស់ដែលកងទ័ពរុស្ស៊ីបានចូលកាន់កាប់ ទាំងអម្បាលម៉ាន គឺជារបស់រុស្ស៊ីហើយចាប់ពីពេលនេះទៅ មិនមែនជារបស់អ៊ុយក្រែនទៀតទេ។
លក្ខខណ្ឌដែលអ៊ុយក្រែន មិនទទួលស្គាល់ជាដាច់ខាត។ អ៊ុយក្រែនមិនព្រមបាត់បង់ទឹកដីសូម្បីតែមួយចង្អាម មិនថាដែនដីដែលកងទ័ពរុស្ស៊ីបានចូលមកឈ្លានពាន ក្រោយថ្ងៃទី២៤កុម្ភៈ ឬក៏តំបន់គ្រីម៉េនោះទេ។ លោកប្រធានាធិបតីអ៊ុយក្រែន បានអះអាងជាច្រើនលើកច្រើនសារហើយ ថាអ៊ុយក្រែនព្រមចរចា គឺទាល់តែរុស្ស៊ី ព្រមដកទ័ពចេញទាំងស្រុង ហើយអ៊ុយក្រែនបានបូរណភាពដែនដីមកវិញទាំងស្រុង ដោយរាប់ទាំងតំបន់គ្រីម៉េផង។ ពុំនោះទេ អ៊ុយក្រែននឹងតស៊ូប្រយុទ្ធ ប្រើកម្លាំង ដើម្បីយកទឹកដីខ្លួនមកវិញឲ្យបានទាំងអស់។
សព្វាវុធទំនើបផលិតដោយបច្ចេកវិទ្យាលោកខាងលិច
កាលពីល្ងាចថ្ងៃពុធ ទី៤មករា លោកប្រធានាធិបតីបារាំង បានប្រកាសផ្តល់រថពាសដែកធុនស្រាល AMX-10 RC បំពាក់ដោយកាណុង១០៥មីលីម៉ែត្រ ទៅឲ្យអ៊ុយក្រែន។ នេះជាលើកទីមួយហើយ ដែលគេផ្តល់គ្រឿងយន្តសព្វាវុធ ផលិតដោយបច្ចេកវិទ្យាប្រទេសលោកខាងលិចទៅឲ្យអ៊ុយក្រែន។ ហើយកាយវិការរបស់បារាំងនេះ គឺចង់ជំរុញឲ្យប្រទេសសម្ព័ន្ធមិត្តឯទៀតធ្វើតាមដែរ ដើម្បីសំរុកជួយកងទ័ពអ៊ុយក្រែនឲ្យយកឈ្នះឲ្យបានឆាប់។
ដូចការរំពឹងទុក កាលពីថ្ងៃព្រហស្បតិ៍ លោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ បានទូរស័ព្ទនិយាយជាមួយលោកចូ បៃដិន ដើម្បីពិភាក្សាគ្នា សម្រេចប្រគល់សព្វាវុធទំនើបឲ្យអ៊ុយក្រែន។ ទីបំផុត ភាគីអាមេរិក បានប្រកាសថា និងផ្តល់ទៅឲ្យអ៊ុយក្រែននូវ រថក្រោះប្រភេទ Bradley ចំណែកភាគីអាល្លឺម៉ង់វិញ បានសន្យាប្រគល់រថក្រោះប្រភេទ Marder ព្រមទាំងបានសន្យាប្រគល់ប្រព័ន្ធខែលមីស៊ីល Patriot មួយគ្រឿងដែរ។ មានន័យថា អំណេះតទៅ ក្រុមប្រទេសសម្ព័ន្ធមិត្តលោកខាង បានបោះជំហានឈានចូលដំណាក់កាលថ្មីមួយទៀតហើយ តាមរយៈការប្រគល់គ្រឿងសព្វាវុធទំនើប ធុនធ្ងន់ ផលិតដោយបច្ចេកវិទ្យាលោកខាងលិច មិនមែនប្រគល់ត្រឹមគ្រឿងសព្វាវុធធុនស្រាល ឬក៏ជាត្រឹមជារបស់ចាស់ៗសល់ពីជំនាន់សូវៀតនោះទេ។
រថក្រោះMarder របស់អាល្លឺម៉ង់ ជារថក្រោះធុនស្រាលសម្រាប់ដឹកកម្លាំងទ័ព តែក៏មានបំពាក់កាណុងតូចដែរ មានទំហំគ្រាប់២០មីលីម៉ែត្រ។ រីឯរថក្រោះBradley របស់អាមេរិក ក៏ជាប្រភេទរថក្រោះដឹកកម្លាំងទ័ពដែរ ដោយមានបំពាក់ដោយកាណុងទំហំ២៥មីលីម៉ែត្រ ព្រមទាំងកាណុងបាញ់មីស៊ីលកំទេចរថក្រោះ។ យោងតាមលោក មេបញ្ជាការ Pat Ryder អ្នកនាំពាក្យក្រសួងការពារជាតិអាមេរិក គឺ រថក្រោះ Bradley មិនមែនជារថក្រោះប្រយុទ្ធទេ បើទោះបីជាវាមានសមត្ថភាពបាញ់គ្រាប់បន្តិចបន្តួចមែន។ ចំនួនប៉ុន្មានគ្រឿង គឺមិនទាន់មានការបញ្ជាក់ទេ។ ភាគីទាំងសងខាង នឹងនិយាយគ្នាបន្តទៀត ដើម្បីរៀបចំបង្វឹកទាហានអ៊ុយក្រែន ឲ្យចេះប្រើរថក្រោះទាំងនេះ។
យ៉ាងណាក៏ដោយ ភាគីអ៊ុយក្រែន បានបន្តសំណូមពរ ចង់បានរថក្រោះប្រយុទ្ធរបស់អាល្លឺម៉ង់ ឈ្មោះ Leopard-2 និងរថក្រោះប្រយុទ្ធរបស់អាមេរិក ឈ្មោះ Abrams ដែលមានសមត្ថភាពសំរុកប្រយុទ្ធខ្លាំងក្លា។ ក៏ប៉ុន្តែ លោក Pat Ryder បានអះអាងថា រថក្រោះដែលអាមេរិកនិងអាល្លឺម៉ង់ បានសម្រេចផ្តល់ឲ្យអ៊ុយក្រែននាពេលនេះ គឺគេជឿងនឹងជួយអ៊ុយក្រែនបានច្រើនណាស់ ក្នុងការចល័តកម្លាំងទ័ព នៅលើសមរភូមិ រុលទៅមុខកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ