អំពើហិង្សានៅប្រេស៊ីល ៖ តុលាការចេញដីកាចាប់ខ្លួនមនុស្សស្និទ្ធនឹងលោកបុលសូណារ៉ូ
ចុះផ្សាយនៅថ្ងៃ៖
ស្តាប់ - ០៦:២៨
អាជ្ញាធរប្រេស៊ីលបានបង្កើនកិច្ចខំប្រឹងប្រែងស្វែងរកចាប់ខ្លួនអ្នករៀបចំផែនការលុកលុយចូលអគារស្ថាប័នកំពូលរដ្ឋកាលពីថ្ងៃអាទិត្យទី ៨ មករា២០២៣។ នៅថ្ងៃអង្គារម្សិលមិញតុលាការប្រេស៊ីលចេញដីកាចាប់ខ្លួនអតីតអ្នកទទួលខុសត្រូវពីររូប ក្នុងនោះម្នាក់គឺជាអតីតរដ្ឋមន្រ្តីក្រសួងយុត្តិធម៌របស់លោកបុលសូណារ៉ូ។ អតីតរដ្ឋមន្រ្តីក្រសួងយុត្តិធម៌នេះ ក៏ដូចជាអតីតប្រធានាធិបតីប្រេស៊ីលលោកបុលសូណារ៉ូផ្ទាល់ កំពុងស្ថិតនៅក្នុងទឹកដីសហរដ្ឋអាមេរិក។
ក្រោយហេតុការណ៍ចលាចលចូលទន្ទ្រានស្ថាប័នកំពូលរដ្ឋទាំងបី យ៉ាងហិង្សា នៅថ្ងៃអាទិត្យទី ៨មករាមក អាជ្ញាធរប្រេស៊ីលបានប្រកាសឃាត់ខ្លួនសកម្មជនគាំទ្រលោកអតីតប្រធានានាធិបតីបុលសូណារ៉ូ ប្រមាណ១៥០០នាក់ និងឃុំឃាំងជនសង្ស័យចំនួន ៥២៧នាក់។ ប៉ុន្តែនៅថ្ងៃអង្គារម្សិលមិញ ប៉ូលិសប្រេស៊ីលបានប្រកាសដោះលែងមនុស្សចំនួន៥៩៩នាក់ ដោយហេតុផលមនុស្សធម៌។ គេឃើញប៉ូលិសបញ្ជូនជនទាំងនោះ ចេញពីទីលានកីឡាប៉ូលិសជាតិទៅចំណតឡានក្រុង ដើម្បីឱ្យពួកគេធ្វើដំណើរត្រលប់ទៅផ្ទះសម្បែងវិញរៀងខ្លួនៗ។ តែក៏មានដែរការបញ្ជូនជនចាប់ខ្លួនបានទៅកាន់ប៉ុស្តិ៍ប៉ូលិស ដើម្បីរៀបចំបែបបទបញ្ជូនទៅពន្ធនាគារ។
ដីកាចាប់ខ្លួនជំនិតលោកបុលសូណារ៉ូ
ទន្ទឹមពេលជាមួយគ្នានេះ តុលាការប្រេស៊ីលបានចេញដីកាចាប់ខ្លួនអតីតមន្ត្រីជាន់ខ្ពស់ពីររូប ក្នុងនោះមានម្នាក់ ជាសម្ព័ន្ធមិត្តដ៏ស្និទ្ធរបស់អតីតប្រធានាធិបតីប្រេស៊ីលលោក បុលសូណារ៉ូ គឺ លោក Anderson Torres។ ជាអតីតរដ្ឋមន្ត្រីក្រសួងយុត្តិធម៌របស់លោកបុលសូណារ៉ូ និងកំពុងកាន់តំណែងជាមេសន្តិសុខប្រចាំរដ្ឋធានី ប្រាស៊ីលីយ៉ា លោក Anderson Torres ត្រូវបានតុលាការកំពូលដកពីតួនាទីភ្លាមក្រោយហេតុការណ៍ចលាចលហិង្សា។ លោក Anderson Torres ក៏ដូចជាលោកបុលសូណារ៉ូ បានចាកចេញពីប្រេស៊ីលតាំងពីពីរថ្ងៃមុនពិធីចូលកាន់តំណែងជាប្រមុខដឹកនាំប្រទេសរបស់លោកលូឡា ទៅទៀត។ ហើយពេលនេះ លោក តូរ៉េ និងលោកបុលសូណារ៉ូ កំពុងស្ថិតនៅលើទឹកដីអាមេរិក ទាំងពីរនាក់។ ពីសហរដ្ឋអាមេរិក លោក តូរ៉េ បានប្រកាសបដិសេធ តាមសារទ្វីត នៅថ្ងៃម្សិលមិញថា គ្មានពាក់ព័ន្ធនឹងហេតុការណ៍លុកលុយស្ថាប័នកំពូលរដ្ឋទេ លោកនឹងត្រលប់ចូលប្រទេសវិញដើម្បីស្វែងរកយុត្តិធម៌និងការពារខ្លួនលោក។
ក្រៅពីលោក តូរ៉េ ចៅក្រមតុលាការកំពូល ក៏បានចេញដីកាចាប់ខ្លួន មួយទៀតប្រឆាំងនឹងមេបញ្ជាការប៉ូលិសយោធានៅប្រាស៊ីលីយ៉ា លោក Fabion Augusto ដោយបានដកចេញពីតំណែងនិងដោយទំនងជាកំពុងជាប់ឃុំក្នុងពន្ធនាគារស្រេចទៅហើយ។ នេះបើតាមប្រព័ន្ធឃោសនាព័ត៌មាន។ តុលាការក៏បានដកតំណែងអភិបាលស្រុកប្រាស៊ីលីយ៉ាម្នាក់ទៀត ដែលបានសុំទោសប្រធានាធិបតីលូឡា ចំពោះកំហុសឆ្គងសន្តិសុខ។ ជាងនេះទៅទៀត នៅឆាប់ៗខាងមុខតុលាការនឹងចេញដីកាចាប់ខ្លួនប្រមាណ៥០ផ្សេងទៀត។ នេះបើតាមរដ្ឋមន្ត្រីក្រសួងយុត្តិធម៌ លោក Flavio Dino។
បើតាមប្រសាសន៍របស់រដ្ឋមន្ត្រីក្រសួងយុត្តិធម៌ ដីកាចាប់ខ្លួនក្រោយៗ មានដាក់ប្រឆាំងលើ អ្នកដែលបានចូលរួមចំណែកបំផ្លិចបំផ្លាញស្ថាប័នអំណាចរដ្ឋ តែមិនចាប់ខ្លួនមិនបានពេលកំពុងធ្វើសកម្មភាព និងដីកាខ្លះទៀត សំដៅចាប់ខ្លួនអ្នកដែលគ្មានរូបនៅក្រុងប្រាស៊ីលីយ៉ាទេ តែជាប់សង្ស័យជាអ្នកជួយរៀបចំ ឬជួយផ្តល់ហិរញ្ញវត្ថុ។
ប្រធានព្រឹទ្ធសភាបានបង្ហាញឆន្ទៈយល់ស្របនឹងគំនិតបើកឱ្យគណៈកម្មការសភាធ្វើអង្កេតរកហេតុផលដែលនាំឱ្យមានការរំលោភបំពានច្បាប់រដ្ឋបែបនេះ។
ផ្លរីដាទឹកដីជ្រកកោនរបស់មនុស្សខ្លាំង ?
ទីប្រឹក្សាសន្តិសុខជាតិរបស់សេតវិមាន លោក ជេក ស៊ុយលីវ៉ាន់ បានប្រកាសថាសហរដ្ឋអាមេរិកមិនទាន់បានទទួលសំណើអ្វីពីខាងប្រេស៊ីលទេ ទាក់ទងនឹងលោក បុលសូណារ៉ូ ប៉ុន្តែបើមានការស្នើ អាមេរិកនឹងសិក្សាសំណុំរឿងនោះយ៉ាងហ្មត់ចត់បំផុត។
ទោះបីលោកចូបៃដិន បានប្រកាសគាំទ្រដោយឥតងាករេប្រជាធិបតេយ្យនៅប្រេស៊ីលទៅកាន់លោកលូឡាក៏ដោយ ក៏មានសំឡេងជាច្រើនផ្សេងទៀត ស្រែកទាមទារឱ្យវ៉ាស៊ីនតោន បញ្ចេញសកម្មភាពខ្លាំងជាងនេះ ដោយបណ្តេញលោកបុលសូណារ៉ូចេញពីសហរដ្ឋអាមេរិកតែម្តង។ វត្តមានរបស់លោក តូរ៉េ អតីតរដ្ឋមន្ត្រីក្រសួងយុត្តិធម៌ ជាពិសេសវត្តមានរបស់លោកបុលសូណារ៉ូ អតីតប្រធានាធិបតីប្រេស៊ីល នៅរដ្ឋផ្លរីដា ចង់ឬមិនចង់ កំពុងធ្វើឱ្យអាមេរិកស្ថិតក្នុងស្ថានភាពដ៏លំបាកមួយ ព្រោះបានរំលេចនិងរឮកឱ្យឃើញថាអាមេរិកធ្លាប់បានទទួលមេដឹកនាំ ដ៏ចម្រូងចម្រាសមកពីតំបន់អាមេរិកឡាទីន។
ផ្លរីដា រដ្ឋភាគអាគ្នេយ៍របស់អាមេរិក ថ្មីៗនេះបានក្លាយជាបានក្លាយជាទីតាំងរបស់លោក ដូណាល់ ត្រាំ និងជាទឹកដីជ្រកកោនរបស់បុរសខ្លាំង ឬអតីតមេដឹកនាំផ្តាច់ការ តាំងពីជាច្រើនទសវត្សរ៍មកហើយ មានជាអាទិ៍អតីតប្រធានាធិបតីគុយបា កាលពីជិតមួយសតវត្សរ៍មុន Gerardo Machado។ នៅឆ្នាំ១៩៧៩ មេដឹកនាំផ្តាច់ការនីការ៉ាហ្គ័រ Anastasio Somoza Debayle បានភៀសខ្លួនមកជ្រកកោននៅទីនេះដែរ បន្ទាប់ពីត្រូវបានគេទម្លាក់ពីអំណាច។
ពេលនេះគឺរូបលោកបុលសូណារ៉ូ ដែលមកផ្លរីដាផ្លូវការគឺដោយបញ្ហាសុខភាព លោកបុលសូណារ៉ូ ទើបចេញពីមន្ទីរពេទ្យនៅល្ងាចមិញទេ តែក្នុងពេលដែលអតីតប្រធានាធិបតីកំពុងស្ថិតនៅក្នុងរដ្ឋផ្លរីដា ទឹកដីអាមេរិក នៅថ្ងៃទី ៨មករា សកម្មជនរបស់លោក បុលសូណារ៉ូ ធ្វើដូចសកម្មជនរបស់លោកត្រាំកាលពីថ្ងៃទី ៦ មករា ២០២១ បានសម្រុកចូលយ៉ាងហិង្សាបំផ្លាញស្ថាប័នកំពូលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ