ប្រឈមនឹងចិនដែលកាន់តែគំរាម ជប៉ុននិងសហរដ្ឋអាមេរិក ពង្រឹងសម្ព័ន្ធភាពយុទ្ធសាស្ត្រនិងសន្តិសុខ
ចុះផ្សាយនៅថ្ងៃ៖
ស្តាប់ - ០៦:៥៩
លោកនាយករដ្ឋមន្ត្រីជប៉ុន ហ្វ៊ូមីអូ គីស៊ីដា ទើបតែបានបិទបញ្ចប់ដំណើរទស្សនកិច្ចនៅក្រៅប្រទេស ដែលលោកបានធ្វើដំណើរទៅអឺរ៉ុប និងមកកាន់អាមេរិកខាងជើង។ នៅទីក្រុងវ៉ាស៊ីនតោនសហរដ្ឋអាមេរិក កាលពីល្ងាចថ្ងៃសុក្រទី១៣មករា លោក ចូ បៃដិន បានថ្លែងទៅកាន់លោកគីស៊ីដា ថាសម្ព័ន្ធភាពរវាងជប៉ុន និងអាមេរិក គឺជាសម្ព័ន្ធភាពដ៏រឹងមាំ។ គួរបញ្ជាក់ថា តាមរយៈទស្សនកិច្ចនៅតាមបណ្តាប្រទេសមហាអំណាចលោកខាងលិច លោកនាយករដ្ឋមន្ត្រីជប៉ុន មានបំណង ពង្រឹងសម្ព័ន្ធភាពយុទ្ធសាស្ត្រ កងទ័ពនិងសន្តិសុខ ឲ្យកាន់តែរឹងមាំ ខណៈស្ថិរភាពតំបន់អាស៊ីប៉ាស៊ីហ្វិក កំពុងតែប្រឈមនឹងការគំរាមរបស់ចិន។
សម្ព័ន្ធភាពដ៏រឹងមាំ រវាងអាមេរិកនិងជប៉ុន
នៅក្នុងទស្សនកិច្ចលើកទី១នៅទីក្រុងវ៉ាស៊ីនតោន លោក ហ្វ៊ូមីអូ គីស៊ីដា នាយករដ្ឋមន្ត្រីជប៉ុន បានជួបជាមួយលោក ចូ បៃដិន នៅឯសេតវិមាន កាលពីរសៀលថ្ងៃសុក្រទី១៣មករា។ នៅក្នុងឱកាសនោះ លោក ចូ បៃដិនបានថ្លែងថា សម្ព័ន្ធភាពរវាងជប៉ុននិងសហរដ្ឋអាមេរិក គឺរឹងមាំល្អណាស់ ហើយលោកសន្យាប្តេជ្ញា នឹងបន្តការពារសម្ព័ន្ធភាពនេះ ឲ្យកាន់តែរឹងមាំទៀត។ លោក ចូ បៃដិនបន្ថែមថា សហរដ្ឋអាមេរិក ទាំងចិត្តទាំងកាយ គឺស្មោះស្ម័គ្រប្តូរផ្តាច់ ការពារសម្ព័ន្ធភាពយុទ្ធសាស្ត្រនេះ។
ចំណែក លោក ហ្វ៊ូមីអូ គីស៊ីដាវិញ បានថ្លែងថា បច្ចុប្បន្ននេះ អាមេរិក ក៏ដូចជប៉ុន គឺកំពុងប្រឈមមនឹង បរិបទបរិយាកាសស្មុគស្មាញខ្លាំងណាស់ ទាក់ទិននឹងបញ្ហាសន្តិសុខស្ថិរភាព។ ហើយក្នុងនាមរដ្ឋាភិបាលជប៉ុន លោក សូមថ្លែងអំណរគុណ ចំពោះ ការចូលរួមដ៏សស្រាក់សស្រាំងរបស់សហរដ្ឋអាមេរិក នៅក្នុងកិច្ចការសន្តិសុខ ការពារស្ថិរភាពតំបន់។
បរិយាកាសសន្តិសុខដ៏លំបាកស្មុគស្មាញ ដែលលោកនាយករដ្ឋមន្ត្រីជប៉ុន បានលើកឡើងនោះ គឺចង់សំដៅដល់ចិន។ ចិន គឺជាមហាយក្ស ដែលកំពុងតែធ្វើឲ្យជប៉ុនព្រួយបារម្ភខ្លាំងណាស់ អំពីសន្តិសុខខ្លួន។ ចិនបង្ហាញសាច់ដុំ បង្អួតគ្រឿងសព្វាវុធកងទ័ព ទាំងផ្លូវអាកាស ផ្លូវគោក និងជាពិសេសផ្លូវទឹក កាន់តែខ្លាំង ដែលធ្វើឲ្យជប៉ុន ដែលស្ថិតនៅទល់មុខ មានការបារម្ភ។
បើបណ្តោយ អ្វីដែលកើតឡើងនៅអ៊ុយក្រែន អាចនឹងកើតឡើងនៅអាស៊ី!
នៅទីក្រុងវ៉ាស៊ីនតោន កាលពីថ្ងៃសុក្រទី១៣មករា ក្នុងពេលថ្លែងសុន្ទរកថា នៅសកលវិទ្យាល័យ Johns Hopkins លោក ហ្វ៊ូមីអូ គីស៊ីដា បានថ្លែងថា “អ្វីដែលពិភពលោកយើងកំពុងតែមើលឃើញ នៅអ៊ុយក្រែន វាគឺជាមេរៀនមួយដ៏ធំ និងសំខាន់ខ្លាំងណាស់។ ប្រទេសមួយប្រើកម្លាំង វាយប្រហារ ធ្វើសង្គ្រាមដោយអត្តនោម័តតែម្នាក់ឯង ឈ្លានពានទៅលើប្រទេសឯករាជមួយផ្សេងទៀត ដោយមិនគោរពច្បាប់អន្តរជាតិ ឬក៏ទទួលស្គាល់រួមរបស់សហគមន៍អន្តរជាតិ។ ប្រសិនបើពិភពលោកយើង បណ្តោយឲ្យទង្វើឈ្លានពានបែបនេះ អាចធ្វើទៅបានដោយគ្មានការថ្កោលទោស ឬដាក់ទណ្ឌកម្ម នោះហេតុការណ៍បែបនេះ បា្រកដជានឹងអាចកើតមានឡើង នៅទីកន្លែងផ្សេងទៀត ដោយរាប់ទាំងនៅអាស៊ីផង”។
សំដីនេះ ទោះលោកហ្វ៊ូមីអូ គីស៊ីដា មិនបញ្ចេញឈ្មោះ ក៏យើងស្តាប់យល់ដែរ ថាលោកចង់សំដៅទៅលើចិន ដែលគំរាមលើកទ័ពច្បាមយកកោះតៃវ៉ាន់មកគ្រប់គ្រង។ កោះតៃវ៉ាន់ស្ថិតនៅក្បែរជប៉ុន ហើយបើផ្ទុះសង្គ្រាម គឺវានឹងប៉ះពាល់យ៉ាងខ្លាំង ដល់សន្តិសុខ ក៏ដូចជាចរាចរណ៍នាវាដឹកទំនិញរបស់ជប៉ុន។ ជាងនេះទៀត ជប៉ុននឹងចិន ក៏មានជម្លោះនឹងគ្នាដែរ ទាក់ទិននឹងដែនកោះ Senkaku ដែលចិនទាមទារថាជារបស់ខ្លួន។ ដូច្នេះ បើចិនវាយយកតៃវ៉ាន់បាននៅថ្ងៃណាមួយ ចិនក៏អាចសម្រេចចិត្តវាយជប៉ុនយកកោះSenkaku ដែរ។
ហើយក្រៅពីការគំរាមវាតទីរបស់ចិន នៅអាស៊ីប៉ាស៊ីហ្វិក បញ្ហាកូរ៉េខាងជើង ក៏ជាចំណុចធំមួយ ធ្វើឲ្យជប៉ុនព្រួយបារម្ភដែរ ពីកត្តាសន្តិសុខរបស់ខ្លួន។ ត្រង់នេះហើយ បានជាជប៉ុន បានផ្លាស់ប្តូរយុទ្ធសាស្ត្រការពារជាតិជាតិទាំងស្រុង ដោយមិនចង់ពឹងផ្អែក ចាំឲ្យតែអាមេរិកការពារខ្លួននោះទេ តែគឺជប៉ុនខ្លួនឯង ដែលត្រូវតែមានសមត្ថភាពការពារខ្លួនឯង។
ជប៉ុនព្យាយាមពង្រឹងសម្ព័ន្ធភាពសន្តិសុខ
អ្វីដែលរដ្ឋភិបាលលោក ហ្វ៊ូមីអូ គីស៊ីដា កំពុងតែធ្វើ គឺជាការវេញខ្សែចាក់ស្រែសសំណាញ់សម្ព័ន្ធភាព ជាមួយសម្ព័ន្ធមិត្តលោកខាងលិច និងប្រទេសធំៗមួយចំនួនទៀត។ ការគំរាមរបស់ចិន និងកូរ៉េខាងជើង ហើយបូកបន្ថែមនឹងអ្វីដែលបានកើតឡើងនៅអ៊ុយក្រែន គឺវាបានធ្វើឲ្យប្រែប្រួលទាំងស្រុងដល់យុទ្ធសាស្ត្រការពារជាតិរបស់ជប៉ុន។ លោកស្រី Amy King អ្នកវិភាគនៅមជ្ឈមណ្ឌល សិក្សាយុទ្ធសាស្ត្រ នៃសកលវិទ្យាល័យជាតិអូស្ត្រាលី បានលើកឡើងថា ជប៉ុនចង់ពង្រឹងតួនាទីខ្លួន ដែលជាមហាអំណាចសេដ្ឋកិច្ចដ៏ធំមួយនៅអាស៊ី តាមរយៈការបង្កើត និងពង្រឹងសម្ព័ន្ធភាពយុទ្ធសាស្ត្រ ការពារជាតិ សន្តិសុខ ជាមួយបណ្តាមហាអំណាចប្រជាធិបតេយ្យផ្សេងទៀត។
លោក Mitsuru Fukuda សាស្ត្រាចារ្យនៅសកលវិទ្យាល័យ Nihon ក្រុងតូក្យូ បានលើកឡើងថា ពីមុនមក ជប៉ុនសិនសូវចង់យកបញ្ហានយោបាយការបរទេស មកលាយឡំនឹងសេដ្ឋកិច្ចទេ។ ជប៉ុនសប្បាយរីករាយ ធ្វើពាណិជ្ជកម្មជាមួយចិន ជាមួយរុស្ស៊ីជាដើម ហើយទន្ទឹមនឹងនេះ ជប៉ុនក៏ពេញចិត្ត ទុកឲ្យវិស័យការពារសន្តិសុខរបស់ខ្លួន ស្ថិតនៅក្នុងដៃរបស់សហរដ្ឋអាមេរិក។ ក៏ប៉ុន្តែកាលៈទេសៈនេះ បានប្រែប្រួលហើយ។ ពោលគឺជប៉ុនបានភ្លឺភ្នែក ស្វាងចែសតែម្តង។ រដ្ឋធម្មនុញ្ញសន្តិនិយមរបស់ជប៉ុន ដែលហាមមិនឲ្យជប៉ុនប្រើកម្លាំងទ័ពធ្វើសង្គ្រាមនោះ គឺត្រូវបានកែប្រែហើយ ព្រោះជប៉ុនពេលនេះ កំពុងតែប្រឹងប្រែង ពង្រឹងសមត្ថភាពកងទ័ពរបស់ខ្លួន។
សមត្ថភាពការពារខ្លួន ដោយខ្លួនឯង
កាលពីខែធ្នូកន្លងទៅ រដ្ឋាភិបាលលោក ហ្វ៊ូមីអូ គីស៊ីដា បានបង្ហាញគម្រោងផែនការទ្រឹស្តីការពារជាតិថ្មី ដែលនឹងមកពង្រឹងកម្លាំងការពារខ្លួនរបស់ជប៉ុន។ ជប៉ុននឹងបន្ថែមថវិកាចំណាយលើវិស័យការពារជាតិ សឹងតែមួយគុណជាពីរ ឲ្យស្មើនឹង ២% នៃPIB របស់ជប៉ុន ពីនេះដល់ឆ្នាំ២០២៧។ ជប៉ុននឹងទិញគ្រឿងសព្វាវុធទំនើបបន្ថែម ចំនួនទឹកប្រាក់សរុប ប្រមាណ ៣២០ពាន់លានដុល្លារ។
នៅទីក្រុងឡុងដ៍ លោក ហ្វ៊ូមីអូ គីស៊ីដា បានចុះហត្ថលេខា លើកិច្ចព្រមព្រៀងសម្ព័ន្ធភាពកងទ័ព ជាមួយអង់គ្លេស ដែលនឹងញ៉ាំងឲ្យកងទ័ពទាំង២ អង់គ្លេសជប៉ុន សហការធ្វើសមយុទ្ធរួមគ្នា បែកចែកព័ត៌មានគ្នា។ កិច្ចព្រមព្រៀងស្រដៀងគ្នានេះ ជប៉ុនក៏បានចុះជាមួយអូស្ត្រាលី និងហ្វីលីពីនដែរ។ ជប៉ុន អង់គ្លេស និងអ៊ីតាលី នឹងរួមគ្នាផលិតយន្តហោះចម្បាំងទំនើបប្រភេទថ្មីមួយទៀត។
នៅវ៉ាស៊ីនតោន កាលពីថ្ងៃព្រហស្បតិ៍ មុនពេលលោកមីអូ គីស៊ីដា ទៅដល់វ៉ាស៊ីនតោន លោករដ្ឋមន្រ្តីការពារជាតិជប៉ុន និងអាមេរិក បានចុះកិច្ចព្រមព្រៀង ពង្រាយកម្លាំងកុម្ម៉ង់ដូពិសេសរបស់អាមេរិក នៅលើកោះ Okinawa ដែលស្ថិតនៅកៀកចិន និងតៃវ៉ាន់បំផុត។ បន្ថែមពីនេះ ជប៉ុននឹងទិញមីស៊ីលចម្ងាយឆ្ងាយ ប្រភេទ Tomahawk ដើម្បីបំពេញបន្ថែម ពង្រឹងសមត្ថភាពប្រយុទ្ធការពារខ្លួន។ លោក Daisuke Kawai អ្នកស្រាវជា្រវម្នាក់នៅ វិទ្យាស្ថានកិច្ចការអន្តរជាតិក្រុងតូក្យូ បានលើកឡើងថា គ្មាននរណាចង់ឲ្យសង្គ្រាមកើតឡើងទេ ទាំងជប៉ុនខ្លួនឯង។ “អ្វីដែលជប៉ុនកំពុងព្យាយាមធ្វើ តាមរយៈការពង្រឹងសមត្ថភាពកងទ័ពខ្លួន និងការពង្រឹងសម្ព័ន្ធភាពយុទ្ធសាស្ត្រ ជាមួយបណ្តាមហាអំណាចផ្សេងទៀតនេះ គឺដើម្បីញាំងឲ្យចិន ពិចារណាឲ្យច្បាស់លាស់ មុននឹងគិតដើរខុសមួយជំហាន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ