បារាំង៖ មហាបាតុកម្មទូទាំងប្រទេស ប្រឆាំងនឹងគម្រោងកំណែទម្រង់ប្រព័ន្ធចូលនិវត្តន៍
ចុះផ្សាយនៅថ្ងៃ៖
ស្តាប់ - ០៧:២៧
នៅប្រទេសបារាំង ថ្ងៃព្រហស្បតិ៍ទី១៩មករា មានចលនាបាតុកម្មដ៏ធំនៅទូទាំងប្រទេសតែម្តង។ សហជីពព្រមទាំងប្រជាពលរដ្ឋបារាំង ប្រកាសចុះផ្លូវតវ៉ា ប្រឆាំងនឹងគម្រោងរបស់រដ្ឋាភិបាលបារាំង ដែលចង់ធ្វើកំណែទម្រង់ប្រព័ន្ធចូលនិវត្តន៍ តាមរយៈការដំឡើងអាយុចូលនិវត្តន៍ ពី៦២ឆ្នាំ ដល់៦៤ឆ្នាំ។ ក្រៅពីបាតុកម្មនៅតាមដងផ្លូវ បុគ្គលិកនៅក្នុងវិស័យសំខាន់ៗជាច្រើន ដូចជាវិស័យដឹកជញ្ជូន វិស័យអបរំ និងវិស័យថាមពលជាដើម បានប្រកាសចូលរួមបាតុកម្ម ធ្វើឲ្យដំណើរការសេវាកម្មការងារទាំងអស់ ត្រូវបិទខ្ទប់ រាំងស្ទះនៅទូទាំងប្រទេសតែម្តង។
ចូលនិវត្តន៍អាយុ៦៤ឆ្នាំ
ប្រព័ន្ធចូលនិវត្តន៍បារាំងបច្ចុប្បន្ននេះ គឺបុគ្គលិកត្រូវធ្វើការរហូតដល់អាយុ៦២ឆ្នាំ ទើបអាចទទួលបាន នូវប្រាក់សោធន់និវត្តន៍ប្រចាំខែ ពេញលេញគ្រប់ចំនួន ឬដែលយើងហៅថា « ប្រាក់រឺត្រែត » នោះ។ នេះជាលក្ខខណ្ឌទូទៅ ដែលជាក់ស្តែង គឺវាមានករណីពិសេសផ្សេងៗទៀត ទៅតាមប្រភេទការងារ ដែលនឿយហត់ ប្រើកម្លាំងខ្លាំង ឬក៏បុគ្គលិកដែលបានចាប់ផ្តើមធ្វើការតាំងតែពីអាយុ១៤ ១៦ឆ្នាំជាដើម។
គម្រោងថ្មីរបស់រដ្ឋាភិបាលបារាំង ដឹកនាំដោយលោកប្រធានាធិបតីម៉ាក្រុង និងលោកស្រីនាយករដ្ឋមន្ត្រី អាលីហ្សាបែត ប៊ន នាពេលនេះ គឺចង់ដំឡើងអាយុចូលនិវត្តន៍នេះ ដល់៦៤ឆ្នាំជាទូទៅ ចាប់ពីឆ្នាំ២០៣០ទៅ។ មានន័យថា បុគ្គលិកត្រូវធ្វើការថែម២ឆ្នាំទៀត ទើបអាចទទួលបានប្រាក់រឺត្រែតពេញគ្រប់។ លក្ខខណ្ឌមួយទៀត ដែលនឹងប្រែប្រួលដែរ គឺរយៈពេលនេះនៃចូលរួមវិភាគទាន ដែលបុគ្គលិកម្នាក់ ត្រូវជួយចូលរួមបង់ប្រាក់ក្នុងប្រព័ន្ធចូលនិវត្តន៍នេះ ដែលនឹងឡើងពី៤២ឆ្នាំ ដល់៤៣ឆ្នាំ ហើយចូលជាធរមាន ចាប់ពីឆ្នាំ២០២៧ទៅ។
និយាយជារួម និងជាទូទៅ គឺបុគ្គលិកត្រូវធ្វើការដល់អាយុ៦៤ឆ្នាំ ហើយត្រូវបានចូលរួមបង់ប្រាក់ចូលក្នុងប្រព័ន្ធចូលនិវត្តន៍ ចំនួនយ៉ាងហោច៤៣ឆ្នាំ ទើបអាចទទួលប្រាក់រឺត្រែតបានពេញគ្រប់។ គម្រោងកំណែទម្រង់ថ្មីនេះ ក៏បានកំណត់ផងដែរ នូវប្រាក់រឺត្រែតអប្បរមា ចំនួន១២០០អឺរ៉ូ យ៉ាងហោចក្នុងមួយខែ ប្រសិនបើបុគ្គលិកនោះបានបំពេញលក្ខខណ្ឌគ្រប់។
សង្គ្រោះប្រព័ន្ធចូលនិវត្តន៍បារាំង កុំឲ្យដួលរលំ
ហេតុផលធំ ដែលលោកម៉ាក្រុងធ្លាប់បានលើកឡើងថា គឺថាប្រព័ន្ធចូលនិវត្តន៍បារាំងបច្ចុប្បន្ននេះ ស្ថិតនៅក្នុងកាលៈទេសៈមួយគ្រោះថ្នាក់ ព្រោះមានឱនភាពថវិកា ចំណូលនិងចំណាយ។ និយាយឲ្យងាយស្តាប់ ធម្មតារដ្ឋដកប្រាក់បន្តិចៗ ពីក្នុងប្រាក់ខែរបស់បុគ្គលិកម្នាក់ៗ ដែលយើងហៅថា ជាប្រាក់វិភាគទានរបស់បុគ្គលិក ដើម្បីចិញ្ចឹមប្រព័ន្ធចូលនិវត្តន៍។ រដ្ឋយកប្រាក់ទាំងនេះ ទៅចំណាយលើប្រាក់ខែរឺត្រែត ដល់អ្នកដែលកំពុងចូលនិវត្តន៍។
បញ្ហាចំណោទ គឺថាបច្ចុប្បន្ននេះ មនុស្សចាស់ សុខភាពកាន់តែល្អ អាយុកាន់តែវែង ដែលមានន័យថា រដ្ឋត្រូវបន្តបង់ប្រាក់រឺត្រែតឲ្យរហូត ដរាបណាពួកគាត់មិនទាន់ស្លាប់។ ដូច្នេះការចំណាយរបស់រដ្ឋក្នុងវិស័យនេះ វាកាន់តែកើនដែរ។ ផ្ទុយទៅវិញ ការប្រមូលប្រាក់ចូលរួមពីបុគ្គលិកដែលកំពុងធ្វើការវិញ គឺបានចុះថយច្រើន ព្រោះមានបុគ្គលិកកាន់តែច្រើនបានឈប់ធ្វើការមុនអាយុចូលនិវត្តន៍។ មានន័យថាចំណូលក្នុងប្រព័ន្ធចូលនិវត្តន៍នេះ វាតិចជាងការចំណាយ ហើយបើបន្តបែបនេះទៀត យូរៗទៅរដ្ឋនឹងគ្មានប្រាក់បង់ឲ្យអ្នកចូលនិវត្តន៍ទេ។
ដូច្នេះ តាមរយៈការដំឡើងអាយុចូលនិវត្តន៍ដល់៦៤ឆ្នាំ មានន័យថាបុគ្គលិកម្នាក់ៗ នឹងត្រូវបន្តធ្វើការ បង់ប្រាក់វិភាគទាន ចូលទៅក្នុងប្រព័ន្ធចូលនិវត្តន៍ បន្ថែម២ឆ្នាំមទៀតសិន មុននឹងអាចឈប់ធ្វើការ ហើយបានទទួលប្រាក់រឺត្រែតពីរដ្ឋវិញ។ លោកស្រីនាយករដ្ឋមន្ត្រីបារាំង អេលីហ្សាបែត ប៊ន អះអាងថា វាគឺជាវិធីដើម្បីធានាឲ្យមានតុល្យភាពចំណូលចំណាយ ចាប់ពីឆ្នាំ២០៣០ទៅ។
មហាបាតុកម្មប្រឆាំងការដំឡើងអាយុចូលនិវត្តន៍
សហជីពធំៗរបស់បារាំង លើកនេះ បានរួមកម្លាំងគ្នាជាឯកច្ឆ័ន្ទតែម្តង ដើម្បីប្រកូកប្រកាសឲ្យប្រជាពលរដ្ឋ ចូលរួមធ្វើបាតុកម្ម ប្រឆាំងនឹងគ្រោងកំណែទម្រង់របស់រដ្ឋាភិបាល។ ជាការធ្វើកំណែទម្រង់ ដែលពួកគេចោទថាអយុត្តិធម៌ សម្រាប់បុគ្គលិកមួយចំនួន ក្នុងវិស័យការងារខ្លះ ដែលត្រូវធ្វើការប្រើកម្លាំង មានជម្ងឺប្រចាំកាយផង ហើយត្រូវបង្ខំធ្វើការទាល់តែអាយុ៦៤ឆ្នាំ ទើបបានទទួលប្រាក់រឺត្រែត។ អ្នកខ្លះ ខំបង់ប្រាក់វិភាគទានចូលក្នុងប្រព័ន្ធចូលនិវត្តន៍ជាង៤០ឆ្នាំ មិនទាន់ទាំងបានប្រាក់រឺត្រែតចាយវិញផង ស្រាប់តែឈឺស្លាប់។
ចំណុចទាំងអស់នេះហើយ ដែលញ៉ាំងឲ្យមានបាតុកម្មប្រឆាំងដ៏ធំមហិមាក្នុងពេលនេះ។ យោងតាមការស្ទាបស្ទង់មតិចុងក្រោយបំផុត ធ្វើឡើងដោយវិទ្យាស្ថានមតិសាធារណៈបារាំង IFOP គឺក្នុងចំណោមប្រជាជនបារាំង មានតែ២៨%ប៉ុណ្ណោះ ដែលមិនប្រឆាំងនឹងគម្រោងធ្វើកំណែទម្រង់ប្រព័ន្ធចូលនិវត្តន៍នេះ។
ប្រធានសហជីពធំៗ បានប្តេជ្ញាថា នឹងប្រើប្រាស់មហាបាតុកម្មទូទាំងប្រទេស ដើម្បីជាអំណាច ជាកម្លាំងប្រាប់ទៅរដ្ឋាភិបាល ថាប្រជាជនមិនសុខចិត្ត។ តាមការរំពឹងទុក នៅថ្ងៃព្រហស្បតិ៍នេះ អាចនឹងមានមនុស្សខ្ទង់ដល់លាននាក់ ដែលនឹងចុះផ្លូវធ្វើបាតុកម្ម នៅតាមទីក្រុងធំៗ ទូទាំងប្រទេសបារាំង។ កម្លាំងសមត្ថកិច្ចចំនួន១ម៉ឺននាក់ ត្រូវបានដាក់ពង្រាយការពារសន្តិសុខ ទប់ស្កាត់ការផ្ទុះអំពើហិង្សា។
ស្ថាប័នការងាររដ្ឋនឹងឯកជន សឹងតែគ្រប់វិស័យទាំងអស់ នៅថ្ងៃនេះ គឺបុគ្គលិកប្រកាសធ្វើបាតុកម្មទាំងអស់។ វិស័យដឹកជញ្ជូនសាធារណៈ រថភ្លើង រថយន្តក្រុងជាដើម គឺត្រូវបិទខ្ទប់សឹងទាំងស្រុង។ ៧០% នៃគ្រូបង្រៀនតាមសាលា ក៏មិនមកធ្វើការដែរ ដើម្បីចូលរួមជាមួយបាតុកម្ម។ អ្វីដែលជាការព្រួយបារម្ភមួយទៀតនោះ គឺបាតុកម្មរបស់ក្រុមបុគ្គលិកធ្វើការក្នុងវិស័យថាមពល។ បុគ្គលិករោងចក្រផលិតអគ្គិសនីមិនមកធ្វើការ បង្កឲ្យមានការបារម្ភថាអាចនឹងដាច់ចរន្តអគ្គិសនី នៅតាមតំបន់ខ្លះ។ ហើយបុគ្គលិករោងចក្រចម្រាញ់ប្រេងឥន្ធនៈធំៗ ក៏ធ្វើបាតុកម្មដែរ ដែលបានបង្កឲ្យមានមនុស្សផ្អើលឈូរដណ្តើមគ្នាទៅចាក់ប្រេងឥន្ធនៈ។
រដ្ឋាភិបាលនឹងដកថយ?
ការដាក់សំពាធលើរដ្ឋាភិបាល បានលទ្ធផលឬមិនបានគឺវាអាស្រ័យថា តើការបិទខ្ទប់រាំងស្ទះដំណើរការទូទាំងប្រទេសនេះ នឹងមានរយៈពេលប៉ុន្មាន។ កាលពីឆ្នាំ១៩៩៥ រដ្ឋាភិបាលបារាំង មានគម្រោងធ្វើកំណែទម្រង់ប្រព័ន្ធចូលនិវត្តនេះដែរ ហើយក៏ផ្ទុះបាតុកម្មតវាទូទាំងប្រទេស មានរយៈពេល២ខែឯណោះ ធ្វើឲ្យរដ្ឋាភិបាលដកថយវិញ។ ចាប់តាំងពីឆ្នាំ២០០៦មក ដែលរដ្ឋាភិបាលបារាំងបានដកថយ ព្រមចុះចាញ់ក្បួនមហាបាតុកម្ម ទាក់ទិននឹងកំណែទម្រង់ទីផ្សារការងារយុវជន ក្រោយៗមក គឺបាតុកម្មមិនដែលបានធ្វើឲ្យរដ្ឋាភិបាលដកថយទេ។
នៅឆ្នាំ២០១០ រដ្ឋាភិបាលលោកសាកូហ្ស៊ី បានសម្រេចធ្វើកំណែទម្រង់ដំឡើងអាយុចូលនិវត្តន៍ដល់៦២ឆ្នាំ ទោះបីប្រជាជនធ្វើកម្មខ្លាំងក្លាក៏ដោយ។ ហើយនៅលើកនេះ យោងតាមការធ្វើប្រជាមតិ គឺប្រជាជនបារាំង ប្រមាណ៧៩%គិតថា រដ្ឋាភិបាលនឹងមិនដកថយទេ គឺនឹងមានៈធ្វើកំណែទម្រង់នេះឲ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ