ហេតុអ្វីបានជារថក្រោះអាល្លឺម៉ង់ Leopard 2 ដែលអ៊ុយក្រែនចង់បាន មានសារៈសំខាន់ខ្លាំង?
ចុះផ្សាយនៅថ្ងៃ៖
ស្តាប់ - ០៨:២៤
ឆ្លងកាត់ការប្រជុំកាលពីថ្ងៃសុក្រទី២០មករា នៅឯមូលដ្ឋានទ័ពអាមេរិកក្នុងទឹកដីអាល្លឺម៉ង់ Ramstein ក្រុមប្រទេសសម្ព័ន្ធមិត្តលោកខាងលិច បានសន្យាផ្តល់គ្រឿងសព្វាវុធបន្ថែមទៀត ទៅឲ្យអ៊ុយក្រែន ដើម្បីប្រយុទ្ធយកឈ្នះ។ ក៏ប៉ុន្តែ ទន្ទឹមគ្នានេះ អ៊ុយក្រែនបានបន្តទទូចស្នើសុំរថក្រោះប្រយុទ្ធធុនធ្ងន់ ដែលអ៊ុយក្រែនអះអាងថា គឺជាមធ្យោបាយមិនអាចខ្វះបាន ដើម្បីយកឈ្នះលើរុស្ស៊ី។ សំពាធត្រូវបានដាក់កាន់តែខ្លាំង ទៅលើរដ្ឋាភិបាលអាល្លឺម៉ង់ ដែលបន្តបដិសេធ មិនព្រមប្រគល់រថក្រោះប្រយុទ្ធ Leopard 2 របស់ខ្លួនទៅឲ្យអ៊ុយក្រែន។
បន្ថែមជំនួយសព្វាវុធ
ឆ្លងកាត់ការប្រជុំនៅ មូលដ្ឋានទ័ព Ramstein កាលពីថ្ងៃសុក្រទី២០មករា ជំនួយសព្វាវុធធំៗ ដែលយើងអាចលើកមកនិយាយបាន គឺការប្រកាសរបស់សហរដ្ឋអាមេរិក ផ្តល់ជំនួយយោធាចំនួន ២,៥ពាន់លានដុល្លារ។ ក្នុងនោះ អាមេរិក នឹងប្រគល់ទៅឲ្យអ៊ុយក្រែន នូវរថពាសដែកដឹកកម្លាំងទ័ព Stryker ចំនួន៩០គ្រឿង ព្រមទាំងរថពាសដែកធុនស្រាលបំពាក់កាណុង Bradley ចំនួន៥៩គ្រឿងបន្ថែម ពីលើ៥០គ្រឿងដែលបានសន្យារួចហើយកាលពីពេលថ្មីៗនេះ។
អាល្លឺម៉ង់វិញ នឹងប្រគល់រថពាសដែកធុនស្រាល ប្រភេទ Marder ចំនួន៤០គ្រឿង ។ ដូចគ្នាដែរ បារាំងនឹងប្រគល់រថពាសដែកធុនស្រាលបំពាក់កាណុង AMX-10RC ទៅឲ្យអ៊ុយក្រែនដែរ តែមិនទាន់ដឹងចំនួនប៉ុន្មានទេ។ ដាណឺម៉ាក នឹងប្រមូល កាណុងបាញ់មីស៊ីល Caesar ទាំងអស់១៩គ្រឿងដែលខ្លួនមាន ទៅឲ្យអ៊ុយក្រែន។ ស៊ុយអែត សន្យាប្រគល់កាណុងអូតូម៉ូទ័រ ចំងាយឆ្ងាយ ប្រភេទ Archer។ ចំណែកហូឡង់ សន្យាប្រគល់ប្រព័ន្ធខែលមីស៊ីល Patriot ចំនួន២គ្រឿងព្រមទាំងគ្រាប់មីស៊ីលមួយចំនួនផង។ ហើយ អេស្តូនី សន្យា ប្រគល់គ្រាប់កាំភ្លើងធំនិងតូចមួយចំនួនទៀត ទៅឲ្យអ៊ុយក្រែន។
គិតមកទល់ពេលនេះ គឺមានតែអង់គ្លេសទេ ដែលបានសម្រេចប្រគល់ រថក្រោះប្រយុទ្ធធុនធ្ងន់ ប្រភេទ Challenger 2 ចំនួន១៤គ្រឿង ទៅឲ្យអ៊ុយក្រែន។ ហើយកាលពីក្នុងពេលប្រជុំថ្ងៃម្សិលមិញ រដ្ឋមន្ត្រីការពារជាតិអង់គ្លេស បានប្រកាសបន្ថែម គ្រាប់មីស៊ីល Brimstone ចំនួន៦០០គ្រាប់ទៀត។
អ៊ុយក្រែន ទទូចស្នើសុំរថក្រោះប្រយុទ្ធធុនធ្ងន់ ប្រភេទេ Leopard 2
ហេតុផលទី១ ដែលឲ្យអ៊ុយក្រែន ទទូចស្នើសុំរថក្រោះធុនធ្ងន់ គឺជាហេតុផលយូរអង្វែង។ រថក្រោះប្រយុទ្ធធុនធ្ងន់ដែលអ៊ុយក្រែនមាន ជាប្រទេសរថក្រោះចាស់ៗ សល់តាំងពីសម័យសូវៀត ហើយមួយចំនួនធំ គឺត្រូវរុស្ស៊ីបាញ់កម្ទេចសឹងទាំងអស់ហើយ តាំងតែពីពេលសង្គ្រាមចាប់ផ្តើមម្លេះ។ គ្រឿងបន្លាស់ជួសជុលអី គឺទាល់តែទៅរកពីខាងរុស្ស៊ី។ ដូច្នេះអំណេះតទៅ សព្វាវុធទាំងនេះ គឺត្រូវអ៊ុយក្រែនបោះបង់ចោលហើយ។ ទៅថ្ងៃអនាគត អ៊ុយក្រែនត្រូវតែងាកទៅរកសព្វាវុធទំនើបធុនធ្ងន់ ពីខាងប្រទេសលោកខាងលិចវិញ ទើបមានគ្រឿងបន្លាស់ មានបច្ចេកវិទ្យាទំនើបថែមទៀត។ ណាមួយទៀត ចង់បានរថក្រោះធុនធ្ងន់រាប់រយគ្រឿង យកមកបំពាក់ឲ្យកងទ័ព មិនមែនដូចយើងទៅផ្សារទិញផ្លែឈើឯណា គឺត្រូវចំណាយពេលវេលាច្រើនខែ ឬឈានដល់ឆ្នាំ ទំរាំគេផលិតបាន ហើយធ្វើការហ្វឹកហាត់ទាហានឲ្យចេះប្រើប្រាស់ជាដើម។
បច្ចុប្បន្ននេះ រថក្រោះប្រយុទ្ធធុនធ្ងន់ ដែលជាបច្ចេកវិទ្យារបស់ប្រទេសលោកខាងលិច គឺមានតែ៤ប្រភេទទេ ។ ទីមួយគឺរថក្រោះ Abrams របស់អាមេរិក រថក្រោះ Challenger 2 របស់អង់គ្លេស រថក្រោះ Leclerc របស់បារាំង និងរថក្រោះ Leopard 2 របស់អាល្លឺម៉ង់។ តែបញ្ហាចោទ គឺថា រថក្រោះ Challenger 2 របស់អង់គ្លេស និងរថក្រោះ Leclerc របស់បារាំង គឺគេឈប់ផលិតហើយ។ ដូច្នេះ វាមិនមែនជាដំណោះស្រាយយូរអង្វែងសម្រាប់អ៊ុយក្រែនទេ។
ម្លោះហើយ គឺមានសល់តែ២ទេ គឺ រថក្រោះ Abrams របស់អាមេរិក និងរថក្រោះ Leopard 2 របស់អាល្លឺម៉ង់ នេះឯង។ តែបញ្ហាចោទ គឺភាគីអាមេរិក មិនបដិសេធមិនអាចប្រគល់រថក្រោះ Abrams បានទេ ដោយលើកឡើងពីហេតុផលមួយចំនួន ទាក់ទិននឹងបញ្ហាជួសជុល និងការហ្វឹកហាត់ឲ្យចេះប្រើ។ ដូច្នេះ គឺវានៅសល់តែរថក្រោះ Leopard 2 របស់អាល្លឺម៉ង់ទេ ដែលគេមើលទៅអាចជួយអ៊ុយក្រែនបាន ដែលវាឆ្លើយតបទៅនឹងដំណោះស្រាយរយៈពេលយូរអង្វែងផង និងក្នុងរយៈពេលបន្ទាន់នាពេលនេះផង ដែលកងទ័ពអ៊ុយក្រែនត្រូវការវាខ្លាំង ដើម្បីប្រយុទ្ធយកឈ្នះ។
បើលូកដៃជ្រៅ លូកទាំងអស់គ្នា!
ក្រុមប្រទេសសម្ព័ន្ធមិត្តលោកខាងលិច បានព្យាយាមនិយាយបញ្ចុះបញ្ចូលរដ្ឋាភិបាលអាល្លឺម៉ង់ ខ្លាំងសម្បើមណាស់ កាលពីថ្ងៃម្សិលមិញ។ តែខាងភាគីអាល្លឺម៉ង់ នៅតែមិនទាន់យល់ព្រមទេ។ គេថាគេត្រូវការពេលវេលាគិតឲ្យបានល្អិតល្អន់បន្តិច។ ប្រភពពីមន្ត្រីរដ្ឋាភិបាលអាល្លឺម៉ង់ លើកឡើងថា អាល្លឺម៉ង់អាចប្រគល់រថក្រោះ Leopard 2 បាន ល្គឹកណាអាមេរិក ប្រគល់ រថក្រោះ Abrams ដែរ។ ពោលគឺអាល្លឺម៉ង់ មិនចង់ធ្វើតែម្នាក់ឯងទេ ព្រោះ រថក្រោះប្រយុទ្ធធុនធ្ងន់ វាមានតម្លៃនិម្មិតរូបខ្លាំងណាស់។ រថក្រោះប្រយុទ្ធធុនធ្ងន់របស់អាល្លឺម៉ង់ ត្រូវអ៊ុយក្រែនយកទៅប្រើក្នុងសមរភូមិធ្វើសង្គ្រាមតទល់នឹងរុស្ស៊ី វាមិនមែនជារឿងលេងសើចទេ។ ទៅថ្ងៃខាងមុខ ពេលចប់ សង្គ្រាម បញ្ហានេះនឹងអាចជាឧបសគ្គ ដល់ការស្តារទំនាក់ទំនង រវាងរុស្ស៊ី និងអាល្លឺម៉ង់។ អញ្ចឹងហើយបានជាអាល្លឺម៉ង់ ចង់អូសអាមេរិកឲ្យទៅជាមួយខ្លួនដែរ ថាជ្រុលលូកដៃជ្រៅ លូកទាំងអស់គ្នា។
តែពេលនេះ សំពាធកំពុងតែមានខ្លាំង ទៅលើរដ្ឋាភិបាលអាល្លឺម៉ង់ ព្រោះថាមានតែអាល្លឺម៉ង់គឺជាកូនសោរ ដែលអាចចាកដោះស្រាយបញ្ហានេះបាន។ បច្ចុប្បន្ន មានប្រទេសអឺរ៉ុបជាង១០ប្រទេស ដែលមានរថក្រោះប្រភេទ Leopard 2 របស់អាល្លឺម៉ង់ នៅក្នុងស្តុក។ អ៊ុយក្រែនត្រូវការចង់បាន យ៉ាងហោច៣០០គ្រឿងឯណោះ។ គំនិតគេស្នើមក គឺប្រទេសនីមួយៗដែលមាន រថក្រោះ Léopard ជួយបញ្ជូនម្នាក់ក្នុងចំនួនតូច ដើម្បីកុំឲ្យមានបញ្ហាខ្វះស្តុកនៅតាមប្រទេសរៀងៗខ្លួន។ ប្រទេសខ្លះដូចជា ប៉ូឡូញ ហ្វាំងឡង់ ជាដើមបានអះអាងរួចហើយ ថាគេសុខចិត្តផ្តល់ទៅឲ្យអ៊ុយក្រែន។ ក៏ប៉ុន្តែគឺទាល់តែមានការអនុញ្ញាតពីរដ្ឋាភិបាលអាល្លឺម៉ង់ ព្រោះអាល្លឺម៉ង់ជាប្រទេសផលិតវា ហើយមានសិទ្ធិព្រមឬមិនព្រម ឲ្យរថក្រោះដែលខ្លួនលក់ទៅឲ្យប្រទេសមួយ អាចត្រូវបញ្ជូនទៅឲ្យប្រទេសមួយទៀតបាន។ ត្រង់នេះហើយ បានជាបច្ចុប្បន្ននេះ មានសំពាធខ្លាំងណាស់ ទៅលើរដ្ឋាភិបាលអាល្លឺម៉ង់។
រថក្រោះប្រយុទ្ធធុនធ្ងន់ ចាំបាច់បំផុតនៅសមរភូមិក្នុងពេលនេះ
នៅក្នុងពេលប្រជុំម្សិលមិញ លោករដ្ឋមន្ត្រីការពារជាតិអាមេរិក បានលើកឡើងថា បើពិនិត្យលើស្ថានការណ៍ជាក់ស្តែង គឺប្រហែលជាពិបាកយកឈ្នះ ដេញកងទ័ពរុស្ស៊ីឲ្យចេញអស់ពីទឹកដីអ៊ុយក្រែន ក្នុងឆ្នាំ២០២៣នេះណាស់។ តែយ៉ាងណា លោក Lloyd Austin បានបន្ថែមថា លោកសង្ឃឹមថា ក្នុងរដូវស្លឹកឈើលាស់ ខាងមុខនេះ ជាឧកាសអំណោយផលមួយ ដែលកងទ័ពអ៊ុយក្រែនអាចបើកសំរុកប្រយុទ្ធ ដើម្បីរុញកងទ័ពរុស្ស៊ីឲ្យដកថយ។
បើតាមការលើកឡើង របស់លោក Colin Kahl មន្ត្រីជាន់ខ្ពស់ម្នាក់នៅក្រសួងការពារជាតិអាមេរិក គឺថារថក្រោះប្រយុទ្ធធុនធ្ងន់ ដូចយ៉ាងប្រភេទ Leopard នេះ គឺពិតជាអាចជួយបានខ្លាំងណាស់។ លោកពន្យល់ថា បច្ចុប្បន្ននេះ នៅតាមខ្សែបណ្តោយជួរមុខ កងទ័ពរុស្ស៊ីបានជីករណ្តៅខ្សែការពារ ដាក់គ្រាប់មីន និងសាងសង់ឧបសគ្គជាច្រើប ទប់កុំឲ្យកងទ័ពអ៊ុយក្រែនរុលចូល។ ដូច្នេះកងទ័ពអ៊ុយក្រែន ត្រូវការរថក្រោះទំនើប ដែលមានកម្លាំងប្រយុទ្ធ ដើម្បីបាញ់ប្លោងគ្រាប់ផង បើកសំរុកចូលផង ឆ្លងកាត់ឧបសគ្គទាំងអស់នេះ។ កងទ័ពថ្មើរជើង ឬត្រឹមរថពាសដែកស្រាលៗ មិនអាចរុលចូលបានទេ។ សម្រុកចូលបានហើយ ទើបអាចបញ្ជូនរថពាសដែកធុនស្រាល ដឹកកម្លាំងទ័ព ចូលទៅគ្រប់គ្រងដែនដីដែលដណ្តើមបាន។ ដូច្នេះសន្ទុះរុលទៅមុខ របស់កងទ័ពអ៊ុយក្រែននាពេលនេះ គឺពឹងផ្អែកសឹងទាំងស្រុង ទៅលើរថក្រោះប្រយុទ្ធធុនធ្ងន់។
ក្នុងពេលប្រជុំនៅ Ramstein លោកហ្សេឡេនស្គី បានថ្លែងរន្ធាន់ថា សូមឈប់រុញរា គិតយូរទៀតទៅ ពេលនេះជាពេលដែលត្រូវតែសម្រេចធ្វើ ដើម្បីសំរុកជួយអ៊ុយក្រែន។ រថក្រោះប្រយុទ្ធធុនធ្ងន់ គឺជាជម្រើសតែមួយគត់ ដើម្បីយកឈ្នះ។ ព្រឹកថ្ងៃសៅរ៍ ទី២១មករា លោក Mikhaïlo Podoliak ទីប្រឹក្សាលោកហ្សេឡេនស្គី បានសរសេរ លើTwitter “កាន់តែស្ទាក់ស្ទើ កាន់តែរារែក ប្រជាជនអ៊ុយក្រែនស្លាប់កាន់តែច្រើន ពីមួយថ្ងៃទៅមួយថ្ងៃ !”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ