ឃាតកម្មបាញ់រះនៅកាលីហ្វ័រញ៉ា ៖ ជនសង្ស័យស្លាប់ ប៉ូលិសបន្តស្រាវជ្រាវរកមូលហេតុ
ចុះផ្សាយនៅថ្ងៃ៖
ស្តាប់ - ០៥:៥៨
កម្មវិធីបុណ្យចូលឆ្នាំថ្មីជាប្រពៃណីចិន នៅម៉ុងតេផាក ត្រូវបានលុបចោលទាំងអស់ ក្រោយហេតុការណ៍បាញ់រះសម្លាប់មនុស្សអស់១០នាក់ នៅក្នុងរង្គសាលដែលមនុស្សម្នាកំពុងជួបជុំគ្នាអបអរឆ្លងឆ្នាំ។ មួយថ្ងៃក្រោយហេតុការណ៍បាញ់រះ ដ៏សោកសៅ ចម្ងល់នៅតែបន្តចោទឡើងដដែលជុំវិញមូលហេតុដែលជំរុញឱ្យខ្មាន់កាំភ្លើងធ្វើសកម្មភាព។ ជនសង្ស័យដែលទំនងមានតែម្នាក់បានស្លាប់នៅក្នុងប្រតិបត្តិការតាមចាប់ខ្លួនរបស់ប៉ូលិស។
ជាច្រើនម៉ោងក្រោយហេតុការណ៍បាញ់រះ ប៉ូលិសបានជូនដំណឹងអំពីការស្លាប់របស់ជនសង្ស័យ។ បើតាមការរៀបរាប់របស់ស្ហេរីហ្វមូលដ្ឋាន លោក រ៉ូប៊ឺត លូណា Robert Luna ប្រតិបត្តិការស្វែងរកចាប់ខ្លួនបានបិទបញ្ចប់ ដោយខ្មាញ់កាំភ្លើងទំនងជាបានបាញ់សម្លាប់ខ្លួនឯង បន្ទាប់ពីមានការបាញ់តបតគ្នា ជាមួយភ្នាក់ងារប៉ូលិសមួយប្រាវ។
ខ្មាញ់កាំភ្លើងនោះគឺជនសង្ស័យតែម្នាក់គត់នៃឃាតកម្មបាញ់រះនៅក្នុងសង្កាត់អាស៊ីជាយក្រុងLos Angeles ក្នុងយប់ថ្ងៃបុណ្យឆ្លងឆ្នាំជាប្រពៃណីចិន។ បន្ទាប់ពីបានបាញ់រះនៅក្នុងរង្គសាលក្នុងសង្កាត់ម៉ុងតេរេផាក ដែលបានផ្តាច់ជីវិតមនុស្ស១០នាក់ ភាគច្រើនមានអាយុពី៥០ទៅ៦០ឆ្នាំ ជនសង្ស័យរូបនេះ បានប៉ុនប៉ងចូលទៅបាញ់ក្នុងរង្គសាលមួយទៀតជិតនោះ ប៉ុន្តែជាសំណាងល្អ មានមនុស្សពីរនាក់អាចឃាត់ចាប់ ទើបខ្មាន់កាំភ្លើងរត់គេចខ្លួនទៅ។ ប្រតិបត្តិការដេញតាមចាប់ខ្លួនមានថតផ្សាយបន្តផ្ទាល់ដោយបណ្តាញសារព័ត៌មានជាច្រើន។ គេឃើញប៉ូលិស អាចស្ទាក់ព័ទ្ធឡានរបស់ខ្មាន់កាំភ្លើងបាន នៅពេលទៅដល់សង្កាត់Torrance ស្ថិតនៅចម្ងាយប្រមាណ៤៥គីឡូម៉ែត្រពីកន្លែងកើតហេតុម៉ុងតេរ៉េផាក។
ស្ហេរីហ្វ រ៉ូប៊ឺត លូណា បានលម្អិតទៀតថា កាំភ្លើងដែលជនសង្ស័យប្រើមិនមែនជាកាំភ្លើងវែងស្វ័យប្រវត្តិទេ តែជាកាំភ្លើងខ្លីពាក់កណ្តាលស្វ័យប្រវត្តិ ដែលមានផ្គុំកៃបន្ថែមសម្រាប់បញ្ចូលគ្រាប់បានច្រើន ទើបអាចបង្កើនសមត្ថភាពបាញ់បានយូរ។
អាយុ៧២ឆ្នាំ ខ្មាន់កាំភ្លើងមានដើមកំណើតអាស៊ី ឈ្មោះHuu Can Tran។ តាមរូបភាពវីដេអូសុវត្ថិភាព ជនសង្ស័យនេះ មានពាក់វ៉ែនតាទៀត ប៉ុន្តែស្ហេរីហ្វ លូណា បានបញ្ជាក់ថា គេនៅពុំទាន់ដឹង និងពុំទាន់យល់អំពីមូលហេតុដែលជំរុញឱ្យខ្មាន់កាំភ្លើងដ៏ចំណាស់ទៅហើយប្រព្រឹត្តអំពើបែបឧក្រិដ្ឋឡើយ។ ប៉ូលិសកំពុងបន្តធ្វើការអង្កេតទាំងយប់ទាំងថ្ងៃ ដើម្បីអាចប្រមូលព័ត៌មានបន្ថែម ហើយកំណត់បានអំពីមូលហេតុនៃទង្វើដ៏សោកសៅនេះ។
បង្ហូតទង់ជាតិពាក់កណ្តាលដង
Monterey Park ជាសង្កាត់អាស៊ីមួយមានប្រជាជនរស់នៅប្រមាណ៦១០០០នាក់ ដែលស្ថិតនៅចម្ងាយប្រមាណតែ១៣គីឡូម៉ែត្រពីក្រុងLos Angeles និងល្បីថាជាសង្កាត់ដ៏ស្ងប់ស្ងាត់មានសុវត្ថិភាពណាស់។ ប៉ុន្តែថ្ងៃនេះ ប្រជាពលរដ្ឋអាមេរិកដើមកំណើតអាស៊ី បាននាំគ្នាសម្តែងភាពក្រៀមក្រំ។ អ្នកយាមដើមកំណើតម៉ាឡេស៊ីម្នាក់បានលាន់មាត់ដោយរន្ធត់ថា អំពើហិង្សាមានជាញឹកញយមែននៅអាមេរិក នៅឡូហ្សង់ហ្សឺឡេសមែន តែនេះជាលើកទីមួយដែលគេបានឃើញសហគមន៍របស់ខ្លួនបានរងគ្រោះដែរ។
នេះជាករណីឃាតកម្មបាញ់រះស្លាប់មនុស្សច្រើនគេបំផុតដែរ គិតចាប់តាំងពីហេតុការណ៍បាញ់រះស្លាប់មនុស្ស២១នាក់ កាលពីខែឧសភាឆ្នាំទៅ ក្នុងសាលាបឋមសិក្សា មួយក្នុងរដ្ឋតិចសាស់។ ដោយមិនបង្អង់ អភិបាលរដ្ឋ លោកស្រីអនុប្រធានាធិបតី និង ប្រធានាធិបតីអាមេរិកបានបញ្ចេញប្រតិកម្មជាបន្តបន្ទាប់។ លោកចូបៃដិន បានចេញសេចក្តីថ្លែងការណ៍ថា “គេនៅមិនទាន់ដឹងអំពីមូលហេតុនៃទង្វើដ៏អាក្រក់នេះមែនតែយើងបានដឹងអំពីទុក្ខសោករបស់គ្រួសាររងគ្រោះ និងសូមបន់ស្រន់ឱ្យក្រុមគ្រួសារឆាប់បានស្រាកស្រាន្ត”។ លោកប្រធានាធិបតីប្រកាសឱ្យស្ថាប័នរដ្ឋទូទាំងប្រទេសបង្ហូតទង់ជាតិពាក់កណ្តាលទង់ រហូតដល់ថ្ងៃទី ២៦មករា ដើម្បីឧទ្ទិសដល់វិញ្ញាណក្ខន្ធជនរងគ្រោះ។
បើតាមអ្នកឆ្លើយឆ្លងព័ត៌មានរបស់វិទ្យុបារាំង គិតចាប់តាំងពីថ្ងៃទី ១មករា២០២៣មក មានការបាញ់រះទ្រង់ទ្រាយធំចំនួនជាង៣០ករណី ដែលអាជ្ញាធរបានកត់ត្រាចុះបញ្ជី។ ក្នុងយប់ថ្ងៃសៅរ៍ទី ២១មករាដដែលនេះ មានការបាញ់រះមួយទៀត ក្នុងកន្លែងរាំឌីស្កូមួយនៅរដ្ឋLouisiane បណ្តាលឱ្យរបួសមនុស្ស១២នាក់។ នេះបើតាមសារព័ត៌មានក្នុងស្រុក ហើយនេះក៏ជាការឆ្លុះបញ្ចាំងឱ្យឃើញថា គ្មានកន្លែងណាមួយដែលជីវិតប្រចាំថ្ងៃរបស់អាមេរិកអាចមិនឮស្នូរកាំភ្លើងទេ។ ចំនួនមនុស្សស្លាប់ដោយគ្រាប់កាំភ្លើងបំបែកកំណាត់ត្រា ស្ទើរជារៀងរាល់ឆ្នាំ។ កាលពីឆ្នាំ២០២១ ករណីស្លាប់ដោយគ្រាប់កាំភ្លើងមានចំនួនប្រមាណ៤៩០០០នាក់ នៅទូទាំងសហរដ្ឋអាមេរិក ទល់នឹង៤៥០០០នាក់នៅឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ