ក្រោយការបង្រ្កាបនៅជំរំប៉ាឡេស្ទីន អ៊ីស្រាអែលរងគ្រោះផ្ទួនៗដោយការបាញ់ប្រហាររបស់ខ្មាន់កាំភ្លើង
ចុះផ្សាយនៅថ្ងៃ៖
រយៈពេល មិនដល់មួយថ្ងៃ អ៊ីស្រាអែលបានរងការវាយប្រហារ ដោយខ្មាន់កាំភ្លើង ពីរលើកជាប់ៗគ្នា។ នៅក្រោយការបាញ់ប្រហារ របស់យុវជនប៉ាឡេស្ទីន នៅខាងក្រៅវិហារជ្វីហ្វ នៅជេរូសាឡឹមខាងកើត ដែលបានសម្លាប់មនុស្ស ៧នាក់ កាលពីល្ងាចថ្ងៃសុក្រ ជនសង្ស័យប៉ាឡេស្ទីនម្នាក់ទៀត ត្រូវប៉ូលិសអ៊ីស្រាអែល ចាប់ខ្លួន នៅក្រោយបាញ់ មនុស្សពីរនាក់ឲ្យរបួស នៅព្រឹកថ្ងៃសៅរ៍ទី២៨មករា នៅជេរូសាឡឹមខាងកើតដដែល។ ការបាញ់ប្រហារទៅលើប្រជាជនអ៊ីស្រាអែល នៅជេរូសាឡឹមខាងកើត កើតឡើងនៅមួយថ្ងៃក្រោយ ប្រតិបត្តិការបង្រ្កាបដ៏ហិង្សារបស់កងទ័ពអ៊ីស្រាអែល នៅជំរំជនភៀសខ្លួនប៉ាឡេស្ទីន នៅហ្សេនីន ដែលបានសម្លាប់មនុស្ស ៩នាក់។
នៅថ្ងៃសុក្រ និងនៅថ្ងៃសៅរ៍នេះ អ៊ីស្រាអែល បានរងគ្រោះផ្ទួនៗគ្នា ដោយការបាញ់ប្រហារសម្លាប់មនុស្ស នៅជេរូសាឡឹមខាងកើត។ តាម ប៉ូលិសអ៊ីស្រាអែល ខ្មាន់កាំភ្លើងដែលបានបាញ់សម្លាប់មនុស្ស ៧នាក់ និងធ្វើឲ្យមនុស្សរបួសធ្ងន់ ៣នាក់ នៅជេរូសាឡឹមខាងកើត កាលពីយប់ថ្ងៃសុក្រម្សិលមិញ ធ្វើសកម្មភាពតែម្នាក់ គ្មានជាប់បណ្តាញនឹងក្រុមប្រដាប់អាវុធណាទេ។ ខ្មាន់កាំភ្លើង កាលពីយប់ថ្ងៃសុក្រ ដែលបាញ់រះ ទៅលើមនុស្សនៅខាងក្រៅ វិហារជ្វីហ្វ ជាយុវជនប៉ាឡេស្ទីន អាយុ ២១ឆ្នាំ ដែលរស់នៅក្នុងតំបន់ជេរូសាឡឹមខាងកើត ដែលអ៊ីស្រាអែលបានឈ្លានពានយកទៅកាន់កាប់ដោយខុសច្បាប់ តាំងពីឆ្នាំ ១៩៦៧។ តាមប៉ូលិសអ៊ីស្រាអែលដដែល ក្រោយបាញ់រះសម្លាប់មនុស្សដោយឥតរើសមុខ ខ្មាន់កាំភ្លើងបានបើកឡានគេចពីកន្លែងកើតហេតុ ប៉ុន្តែ ត្រូវស្លាប់ដោយគ្រាប់កាំភ្លើង នៅក្នុងពេលបាញ់តបតជាមួយប៉ូលិស។
នៅក្រោយការវាយប្រហារភេរវកម្ម ប៉ូលិសអ៊ីស្រាអែលបានចាប់ឃុំខ្លួន មនុស្ស៤២នាក់ ដែលភាគច្រើនជាសាច់ញាតិ គ្រួសារ និងអ្នកជិតខាងរបស់ខ្មាន់កាំភ្លើង។ ទោះ ខ្មាន់កាំភ្លើងគ្មានជាប់ពាក់ព័ន្ធនឹងចលនាប្រដាប់អាវុធប៉ាឡេស្ទីនណាមួយ ប៉ុន្តែ ប៉ូលិសអ៊ីស្រាអែល នៅបន្តស្រាវជ្រាវរកអ្នកផ្សំគំនិត ដែលជំរុញឲ្យមានការបាញ់ប្រហារសម្លាប់មនុស្សនៅវិហារជ្វីហ្វលើកនេះ។
និយាយពីខ្មាន់កាំភ្លើងទី២ ដែលបាញ់មនុស្សឲ្យរបួស នៅព្រឹកថ្ងៃសៅរ៍នេះ វិញ គឺជាយុវជនប៉ាឡេស្ទីន អាយុ ១៣ឆ្នាំ ដែលប៉ូលិសបានចាប់ឃាត់ខ្លួនភ្លាមៗ នៅក្រោយបាញ់មនុស្សឲ្យរបួសពីរនាក់ នៅសង្កាត់របស់ប៉ាឡេស្ទីន នៅជេរូសាឡឹមខាងកើត។ នៅក្រោយការបាញ់ប្រហារពីរលើកផ្ទួនៗគ្នា អ៊ីស្រាអែលបានប្រកាសពង្រឹងសន្តិសុខ តាមរយៈការបញ្ជូនកងពលមួយអង្គភាពបន្ថែមទៀតទៅប្រចាំការនៅជេរូសាឡឹមខាងកើត។ នៅពេលចុះទៅដល់កន្លែងកើតហេតុកាលពីយប់ថ្ងៃសុក្រម្សិលមិញ នាយករដ្ឋមន្រ្តីអ៊ីស្រាអែល លោកនេតាន់យ៉ាហ៊ូ បាននិយាយថា រដ្ឋាភិបាលអ៊ីស្រាអែលនឹងចាត់វិធានភ្លាមៗ ប៉ុន្តែ លោកមិនបានលម្អិត តើជាវិធានការបែបណាទេ។ រដ្ឋមន្រ្តីក្រសួងមហាផ្ទៃអ៊ីស្រាអែល លោក Itamar Ben-Gvir ដែលមានប្រភពមកពីគណបក្សស្តាំនិយមជ្រុល ជាតិ និយមជ្រុលរបស់អ៊ីស្រាអែលបានបន្លឺហើយថា រដ្ឋាភិបាលអ៊ីស្រាអែលត្រូវតែចាត់វិធានការតបតវិញ។
អ៊ីស្រាអែលក្រៀមក្រំ ដោយសារអំពើភេរវកម្ម ប៉ុន្តែ តំបន់ហ្កាហ្សាប៉ាឡេស្ទីនបាញ់កាំភ្លើងអបអរ
គិតមកត្រឹមព្រឹកថ្ងៃសៅរ៍ គ្មានក្រុមប៉ាឡេស្ទីនណាមួយចេញមុខទទួលខុសត្រូវលើការវាយប្រហារភេរវកម្មនៅជេរូសាឡឹមខាងកើត។ ទាំងក្រុមហាម៉ាសប៉ាឡេស្ទីនដែលគ្រប់គ្រងតំបន់ហ្កាហ្សា និងចលនាអ៊ីស្លាម ប៉ាឡេស្ទីនផ្សេងទៀត។ ប៉ុន្តែ ក្រុមប្រដាប់អាវុធ ប៉ាឡេស្ទីនខាងលើនេះ បានអបអរស្វាគម ការវាយប្រហារទៅលើផលប្រយោជន៍របស់អ៊ីស្រាអែល លើកនេះ។
សម្រាប់អ្នកនាំពាក្យរបស់ចលនាអ៊ីស្លាមប៉ាឡេស្ទីននៅហ្កាហ្សា ការវាយប្រហាររបស់ខ្មាន់កាំភ្លើងប៉ាឡេស្ទីនធ្វើឡើងដើម្បីឆ្លើយតបនឹងអំពើឧក្រិដ្ឋដែលទាហានអាណានិគមអ៊ីស្រាអែល បានប្រព្រឹត្តទៅលើជំរំជនភៀសខ្លួន ហ្សេនីន កាលពីថ្ងៃព្រហស្បតិ៍។ សម្រាប់អ្នកនាំពាក្យចលនាអ៊ីស្លាមប៉ាឡេស្ទីន វាជាចំលើយតបដ៏សក្តិសម និង ធម្មតាទៅនឹងសកម្មភាពឧក្រិដ្ឋកម្មរបស់អាណានិគមអ៊ីស្រាអែល។
អ្នកនាំពាក្យខាងលើចង់សំដៅដល់ប្រតិបត្តិការ យោធា ដ៏ហិង្សារបស់ទាហានអ៊ីស្រាអែលនៅជំរំប៉ាឡេស្ទីន នៅហ្សេនីន ដែលបានសម្លាប់មនុស្ស ៩នាក់។ នៅថ្ងៃព្រហស្បតិ៍ ការបង្រ្កាបរបស់ទាហានអ៊ីស្រាអែលបានសម្លាប់ប្រជាជនប៉ាឡេស្ទីន សរុប ១០នាក់។
កងទ័ពអ៊ីស្រាអែល វិញ បាននិយាយការពារប្រតិបត្តិការបង្រ្កាបរបស់ខ្លួន នៅជំរំហ្សេនីនថា ធ្វើឡើងដើម្បី ទប់ស្កាត់ កុំឲ្យក្រុមអ៊ីស្លាមជ្រុលនិយម អាចប្រមូលផ្តុំកម្លាំង ប្រដាប់អាវុធ នៅក្នុងជំរំហ្សេនីន សម្រាប់យកទៅវាយប្រហារអ៊ីស្រាអែលនៅថ្ងៃអនាគត។ ឧត្តមស្នងការសិទ្ធិមនុស្សបានបរិហារប្រតិបត្តិការយោធារបស់អ៊ីស្រាអែល ដែលបានសម្លាប់ប្រជាជនប៉ាឡេស្ទីន ក្នុងចំនួនដ៏ច្រើន ក្នុងរយៈពេលតែមួយថ្ងៃ។ តាមអង្គការសហប្រជាជាតិ ក្នុងរយៈពេលមិនដល់១ខែ នៅដើមឆ្នាំ ថ្មីនេះ ជនជាតិប៉ាឡេស្ទីន ៣០នាក់ ដែលភាគច្រើនជាប្រជាជនស៊ីវិល ស្ត្រី និងកុមារស្លាប់នៅក្នុងការវាយប្រហារ បាញ់បង្រ្កាបហិង្សារបស់ទាហាន អ៊ីស្រាអែល។
ចំណុចចាប់ផ្តើម នៃការផ្ទុះសង្រ្គាមចោលដុំថ្ម Intifada ឬការងើបបះបោររបស់ប្រជាជនប៉ាឡេស្ទីន ជាលើកទី៣?
នៅក្រោយការវាយប្រហារទៅលើវិហារជ្វីហ្វ កាលពីថ្ងៃសុក្រ ប្រតិកម្មថ្កោលទោស ពីសហគមន៍អន្តរជាតិបានធ្លាក់ចុះបន្តបន្ទាប់គ្នា នាំមុខដោយអគ្គលេខាធិការអង្គការសហប្រជាជាតិ និងមេដឹកនាំរបស់បារាំង អាមេរិក អាល្លឺម៉ង់ តួកគី និងសូម្បីប្រទេសអារ៉ាប់ ដូចជាហ្សកដានី អេមីរ៉ាតអារ៉ាប់រួមជាដើម ដែលធ្លាប់គាំទ្របុព្វហេតុប៉ាឡេស្ទីន។
សម្រាប់អគ្គលេខាធិការអង្គការសហប្រជាជាតិ ការបាញ់ប្រហារទៅលើវិហារជ្វីហ្វ ជារឿងដែលគេមិនអាចទទួលយកបានទេ ព្រោះវាកើតឡើង នៅចំថ្ងៃបុណ្យរំលឹកខួបការសម្លាប់រង្គាលជនជាតិជ្វីហ្វក្នុងសង្រ្គាមលោកលើកទី២។
ក្រៅពីថ្កោលទោស មេដឹកនាំបរទេស រួមទាំង អគ្គលេខាធិការអង្គការសហប្រជាជាតិកំពុងព្រួយបារម្ភខ្លាំងពីការផ្ទុះឡើងសាជាថ្មី ការប៉ះទង្គិចគ្នាដ៏ហិង្សារវាងអ៊ីស្រាអែល និងប៉ាឡេស្ទីន។ ទាំងអគ្គលេខាធិការអង្គការសហប្រជាជាតិ និងប្រធានាធិបតីបារាំង និងមេដឹកនាំហ្សកដានី តួកគី ជាដើម បានអំពាវនាវ ភាគីជម្លោះ ទាំងពីរប៉ាឡេស្ទីន អ៊ីស្រាអែល អត់ធ្មត់ និងកាត់បន្ថយភាពតានតឹងនឹងគ្នាឲ្យបានច្រើនបំផុត។
គេសង្កេតឃើញថា ការប៉ះទង្គិចគ្នា កាន់តែហិង្សារវាងទាហានអ៊ីស្រាអែល និងប្រជាជនប៉ាឡេស្ទីន កើតឡើងកាន់តែញឹកញយឡើង នៅក្រោយ អ៊ីស្រាអែលមានរដ្ឋាភិបាលស្តាំជាតិនិយមជ្រុលមិនធ្លាប់មាននៅក្នុងប្រវត្តិរបស់អ៊ីស្រាអែល។ ត្រូវដឹងថា លោកនេតាន់យ៉ាហ៊ូ ដែលចង់ក្លាយ ជានាយករដ្ឋមន្រ្តីអ៊ីស្រាអែល សុខចិត្តចាប់ដៃជាមួយ គណបក្សស្តាំនិយមជ្រុលខ្លាំងដើម្បី បង្កើតរដ្ឋាភិបាល។ ក្រុមស្តាំនិយមជ្រុល ជាអ្នកដែលរើសអើង និងទាមទារចង់ពង្រីកដែនអាណានិគមកិច្ចទៅលើទឹកដីប៉ាឡេស្ទីន។ ចាប់តាំងលោកនេតាន់យ៉ាហ៊ូត្រលប់មកមកកាន់អំណាច ក្រុមនេះ បានលេស ប្រព្រឹត្តអំពើហិង្សា បណ្តេញប្រជាជនប៉ាឡេស្ទីនពីផ្ទះសម្បែង ដើម្បីយកដីមកសង់ផ្ទះ សម្រាប់តំបន់អាណានិគមកិច្ចរបស់ខ្លួន។
សម្រាប់អ្នកជំនាញ ប្រជាជនប៉ាឡេស្ទីនដែលរស់នៅជាមួយការភ័យខ្លាច ដោយសារ ការរើសអើង ការបង្រ្កាបហិង្សា របស់ទាហាន និងក្រុមស្តាំនិយមជ្រុលអ៊ីស្រាអែល កំពុងដុះគំនិតខឹងសម្បារកាន់តែខ្លាំងឡើង ដែលនឹងអាចផ្ទុះទៅជាកំហឹងសងសឹក និងការងើបបះបោរប្រឆាំងអ៊ីស្រាអែលសាជាថ្មី។ ដោយបើកប្រតិបត្តិការបង្រ្កាបនៅជំរំហ្សេនីនរបស់ប៉ាឡេស្ទីន អ៊ីស្រាអែលអះអាងថា គេមានគោលដៅបង្ការទប់ស្កាត់។ ប៉ុន្តែ សម្រាប់អ្នកជំនាញ ប្រតិបត្តិការទប់ស្កាត់របស់ អ៊ីស្រាអែល នៅជំរំភៀសខ្លួនប៉ាឡេស្ទីននៅ ហ្សេនីន នឹងអាចជាអំបែងភ្លើងដែលនឹងទៅធើ្វឲ្យផ្ទុះឆេះសង្រ្គាមIntifada ឬសង្រ្គាមចោលដុំថ្ម លើកទី៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ