ហ្វីលីពីនអនុញ្ញាតឲ្យអាមេរិកចូលប្រើមូលដ្ឋានទ័ពរបស់ខ្លួន ចំនួន៤បន្ថែមទៀត
ចុះផ្សាយនៅថ្ងៃ៖
ស្តាប់ - ០៨:០៥
អាមេរិកទទួលបានសិទ្ធិចូលប្រើមូលដ្ឋានទ័ពរបស់ហ្វីលីពីន ចំនួន៤បន្ថែមទៀត នៅក្នុងបរិបទនៃភាពតានតឹងនៅសមុទ្រចិនខាងត្បូង និងនៅតៃវ៉ាន់។ នៅក្នុងអំឡុងទស្សនកិច្ចរបស់ប្រមុខការពារជាតិអាមេរិក នៅទីក្រុងម៉ានីល នៅថ្ងៃព្រហស្បតិ៍នេះ អាមេរិក និងហ្វីលីពីនបានប្រកាសរួមគ្នា ពីការពង្រីកកិច្ចព្រមព្រៀងស្តីពីសហប្រតិបត្តិការការពារជាតិ ហៅកាត់ EDCA ដែលហ្វីលីពីន និងអាមេរិកបានចុហត្ថលេខារួមគ្នា កាលពីឆ្នាំ ២០១៤។ ដោយពង្រីកកិច្ចព្រមព្រៀង EDCA អាមេរិកនឹងមានសិទ្ធិចូលប្រើប្រាស់មូលដ្ឋានទ័ពរបស់ហ្វីលីពីន សរុប ចំនួន ៩។ តើហ្វីលីពីនដែលយល់ព្រមឲ្យអាមេរិក ចូលប្រើប្រាស់មូលដ្ឋានទ័ពរបស់ខ្លួន នឹងទទួលបានប្រយោជន៍អ្វីដែរ?
នៅក្នុងសេចក្តីថ្លែងការណ៍រួមដែលធ្វើឡើងនៅក្រោយជំនួបរវាងរដ្ឋមន្រ្តីការពារជាតិអាមេរិក និងសមភាគីហ្វីលីពីន នៅថ្ងៃព្រហស្បតិ៍នេះ អាមេរិក និងហ្វីលីពីនបាននិយាយថា ពួកគេមានមោទនភាពបង្ហាញកិច្ចព្រមព្រៀងថ្មី ដែលនៅក្នុងនោះ ហ្វីលីពីននឹងអនុញ្ញាតឲ្យកងទ័ព អាមេរិកមានសិទ្ធិចូលប្រើប្រាស់មូលដ្ឋានទ័ពហ្វីលីពីនចំនួន ៤បន្ថែមទៀត។
អាមេរិកមានគំនិតចង់បានមូលដ្ឋានទ័ពហ្វីលីពីនសម្រាប់ប្រើប្រាស់ និងស្តុកទុកអាវុធ តាំងពីខែ តុលា ឆ្នាំមុនម្ល៉េះ ពោលគឺនៅមុនទស្សនកិច្ចរបស់អនុប្រធានាធិបតីអាមេរិកទៅហ្វីលីពីន ទៅទៀត។ ប៉ុន្តែ ទើបតែនៅក្នុងទស្សនកិច្ចរបស់ប្រមុខការពារជាតិអាមេរិក នៅទីក្រុងម៉ានីលនៅថ្ងៃព្រហស្បតិ៍នេះ ដែលអាមេរិកបានទទួលសិទ្ធិផ្លូវការឲ្យចូលប្រើប្រាស់មូលដ្ឋានទ័ពចំនួន ៤បន្ថែមទៀតរបស់ហ្វីលីពីន តាមរយៈ ការអនុវត្តពេញលេញ កិច្ចព្រមព្រៀងស្តីពីការពង្រឹងសហប្រតិបត្តិការយោធា ដែលហៅកាត់ថា EDCA។
ជាមួយការប្រកាសនៅថ្ងៃនេះ អាមេរិកទទួលបានសិទ្ធិចូលប្រើប្រាស់មូលដ្ឋានទ័ពសរុប ចំនួន ៩របស់ហ្វីលីពីន។ ដោយអាចចូលប្រើប្រាស់មូលដ្ឋានទ័ពចំនួន ៩របស់ហ្វីលីពីន អាមេរិកបានសម្រេចកសាង ខ្សែប្រយុទ្ធ របស់ខ្លួន ដើម្បីទប់ទល់ឥទ្ធិពលមហាអំណាចយោធាចិន។ ដើម្បីប្រឈមតទល់នឹងចិន នៅអាស៊ីប៉ាស៊ីហ្វិក អាមេរិកមានមូលដ្ឋានទ័ពនៅជប៉ុន នៅកូរ៉េខាងត្បូង និងបានពង្រឹងសម្ព័ន្ធភាពយោធាជាមួយអូស្ត្រាលីតាមរយៈកិច្ចព្រមព្រៀង Aukus។ ប៉ុន្តែ យុទ្ធសាស្រ្តយោធារបស់អាមេរិក ដែលមានរូបរាងកោងជាធ្នូ នៅជុំវិញ ចិន នៅតែមិនទាន់គ្រប់គ្រាន់ ពេញលេញ។ អាមេរិកត្រូវការជំនួយមូលដ្ឋានទ័ពហ្វីលីពីន បន្ថែមទៀត សម្រាប់ កសាងបញ្ចប់ សព្វគ្រប់ធ្នូយុទ្ធសាស្រ្តរបស់ខ្លួន នៅចំពោះមុខមហាអំណាចចិន។
នៅថ្ងៃព្រហស្បតិ៍នេះ រដ្ឋមន្រ្តីការពារជាតិហ្វីលីពីន អះអាងថា គេនៅមិនទាន់អាចបញ្ជាក់ពីឈ្មោះទីតាំងមូលដ្ឋានទ័ពថ្មីទាំង៤ ដែលអាមេរិកអាចចូលប្រើប្រាស់ ព្រោះរដ្ឋាភិបាលត្រូវការពិភាក្សាជាមួយមន្រ្តីថ្នាក់មូលដ្ឋានជាមុនសិន។
ប៉ុន្តែ តាមកាសែតក្នុងស្រុក មូលដ្ឋានទ័ពហ្វីលីពីនថ្មីភាគច្រើន ដែលអាមេរិកនឹងមានសិទ្ធិចូលទៅប្រើប្រាស់ ស្ថិតនៅលើកោះ Luzon ភាគខាងជើងហ្វីលីពីន ជាទីដែលអាមេរិកកំពុងប្រើមូលដ្ឋានទ័ពចំនួន ២រួចហើយ របស់ហ្វីលីពីន។
អាមេរិកទំនងនឹងចូលប្រើប្រាស់មូលដ្ឋានទ័ពមួយទៀតរបស់ហ្វីលីពីន នៅលើកោះ ប៉ាឡាវ៉ាន ដែលស្ថិតនៅទល់មុខនឹងប្រជុំកោះ Spratley ដែលហ្វីលីពីន កំពុងឈ្លោះដណ្តើមគ្នាជាមួយចិន នៅសមុទ្រចិនខាងត្បូង។ ទីតាំងមូលដ្ឋានទ័ពថ្មី ដែលអាមេរិកទើបទទួលបានការអនុញ្ញាតឲ្យចូលប្រើប្រាស់ នៅហ្វីលីពីន ស្ថិតនៅភាគខាងជើង ហ្វីលីពីន ទៅក្បែរកោះតៃវ៉ាន់ទាំងអស់។ សម្រាប់អ្នកជំនាញ នេះជាយុទ្ធសាស្រ្តរបស់អាមេរិក ដើម្បីតាមដានសកម្មភាពយោធារបស់ចិន នៅតៃវ៉ាន់។ ម្យ៉ាង ការចូលទៅប្រើប្រាស់មូលដ្ឋានទ័ពរបស់ហ្វីលីពីន នៅកោះ Luzon នឹងអាចជួយឲ្យអាមេរិក អាចប្រុងប្រៀបខ្លួន សម្រាប់អន្តរាគម ក្នុងករណីមានការរំលោភឈ្លានពានរបស់ចិន ទៅលើតៃវ៉ាន់។
កិច្ចព្រមព្រៀង ពង្រឹងសហប្រតិបត្តិការយោធា EDCA
កិច្ចព្រមព្រៀងពង្រឹងសហប្រតិបត្តិការយោធា ហៅកាត់ថា EDCAត្រូវបានបង្កើតឡើង នៅឆ្នាំ២០១៤ នៅក្នុងកាលៈទេសៈ ដែលហ្វីលីពីន និងអាមេរិកសង្កេតឃើញ ចិនចេះតែពង្រីកដែនឥទ្ធិពលយោធារបស់ខ្លួន តាមរយៈការសាងសង់កោះសិប្បនិម្មិត នៅសមុទ្រចិនខាងត្យូង។
ទៅតាមកិច្ចព្រមព្រៀង ពង្រឹងសហប្រតិបត្តិការយោធា កងទ័ពអាមេរិកអាចចូលប្រើប្រាស់មូលដ្ឋានទ័ពហ្វីលីពីនចំនួន ៥ ដើម្បីស្តុកទុកសព្វាវុធ និងសម្ភារៈយោធា។ កិច្ចព្រមព្រៀង EDCAអនុញ្ញាតផងដែរ ឲ្យមានការហ្វឹកហាត់រួមគ្នា រវាងកងទ័ពអាមេរិក និងហ្វីលីពីន ការសាងសង់ហេដ្ឋារចនាសម្ព័ន្ធ នៅក្នុងមូលដ្ឋានទ័ពហ្វីលីពីន ដូចជា ផ្លូវ កន្លែងស្នាក់នៅរបស់ទាហាន កន្លែងស្តុកទុកប្រេង។ នៅថ្ងៃនេះ អាមេរិក បានប្រកាសផ្តល់ថវិកា ៨២លានដុល្លារ សម្រាប់ជួសជុល ធ្វើទំនើបកម្មមូលដ្ឋានទ័ពហ្វីលីពីន ចំនួន៥ ដែលអាមេរិកបានចូលប្រើប្រាស់រហូតមក។
ជារួម កិច្ចព្រមព្រៀងEDCA មិនបាននិយាយពីការតាំងទី ប្រចាំការជាអចិន្ត្រៃយ៍ របស់កងទ័ពអាមេរិក នៅក្នុងមូលដ្ឋានទ័ពហ្វីលីពីន ដូចដែលអាមេរិកបានធ្វើនៅកូរ៉េខាងត្បូង និងជប៉ុន។ មកដល់ពេលនេះ កងទ័ពអាមេរិកមានសិទ្ធិត្រឹមតែចេញចូល ប្រើប្រាស់ មូលដ្ឋានទ័ព របស់ហ្វីលីពីនតែប៉ុណ្ណោះ។ ទាហានអាមេរិកប្រមាណ ៥០០នាក់ កំពុងចុះឡើង ស្នាក់នៅហ្វីលីពីន។
ហ្វីលីពីនបានខ្នងបង្អែករបស់អាមេរិក នៅចំពោះមុខចិន
កិច្ចព្រមព្រៀងសហប្រតិបត្តិការការពារជាតិ (EDCA) ធ្លាប់ជាប់គាំង នៅក្រោមអាណត្តិរបស់អតីតប្រធានាធិបតីលោក រ៉ូទ្រីហ្គោ ឌុយទែរតេ ដែលធ្លាប់មាននិន្នាការស្អប់ប្រឆាំងអាមេរិក និងងាកបែរទៅរកចិន។
ប៉ុន្តែ នៅក្រោមអាណត្តិដឹកនាំរបស់ប្រធានាធិបតី ថ្មី លោក ហ្វែរឌីណង់ ម៉ាកូស ជូញ័រ ដែលធ្លាប់រត់ទៅជ្រកកោននៅអាមេរិក ហ្វីលីពីនបានផ្តល់សន្ទុះថ្មី ដល់កិច្ចព្រមព្រៀងសហប្រតិបត្តិការយោធាជាមួយអាមេរិក។ ហ្វីលីពីនបានងាកទៅចងសម្ព័ន្ធមិត្តជាមួយ អាមេរិកដែលធ្លាប់ធ្វើអាណានិគមលើហ្វីលីពីន កាលពីអតីតកាល។
ខុសពីជប៉ុន ឬអូស្ត្រាលី ដែលចូលរួមជាមួយអាមេរិក ដើម្បីចេញមុខប្រឆាំងចិន ហ្វីលីពីន របស់ប្រធានាធិបតីម៉ាកូស ជូញ័រ មិនចង់ចេញមុខតតាំងដោយផ្ទាល់ជាមួយចិន ដើម្បីហេតុផលប្រយោជន៍សេដ្ឋកិច្ច។
ប៉ុន្តែ នៅចំពោះមុខការក្បត់សន្យាជាច្រើនលើក របស់ចិន ដែលថា ចិននឹងមិនបំពាក់អាវុធ កងទ័ពនៅលើកោះសិប្បនិម្មិត ដែលចិនសាងសង់ខុសច្បាប់នៅសមុទ្រចិនខាងត្បូង ហ្វីលីពីន គ្មានជម្រើសអ្វី ក្រៅតែពីរត់ទៅពឹងអាស្រ័យបារមីរបស់អាមេរិក។ ហ្វីលីពីនយល់ថា ខ្លួន គ្មានអំណាច គ្មានកម្លាំងយោធា ទាល់តែសោះនៅចំពោះមុខការឈ្លានពានរបស់ចិន ជាពិសេស ការផ្គើនសាងសង់កោះសិប្បនិម្មិតរបស់ចិន នៅក្នុង ដែនសមុទ្រដែលជាតំបន់សេដ្ឋកិច្ចរបស់ហ្វីលីពីន នៅប្រជុំកោះ Spratley។
ដូច្នេះ តាមរយៈការអនុវត្តពេញលេញ នូវកិច្ចព្រមព្រៀងស្តីពីសហប្រតិបត្តិការយោធា ហ្វីលីពីនសង្ឃឹមបានខ្នងបង្អែករបស់អាមេរិក ដែលបានសន្យាហើយថា នឹងជួយហ្វីលីពីនសម្រាប់ការពារដែនអធិបតេយ្យភាពរបស់ខ្លួន នៅចំពោះមុខការគំរាមកំហែងនៅសមុទ្រចិនខាងត្បូង។
ចិនតាមរយៈ អ្នកនាំពាក្យរបស់ក្រសួងការបរទេសបានប្រតិកម្មចាត់ទុក ការចូលប្រើប្រាស់មូលដ្ឋានទ័ពហ្វីលីពីន ពីសំណាក់កងទ័ពអាមេរិកថា ជាគំរាមកំហែងស្ថិរភាពក្នុងតំបន់ និងការញុះញង់ឲ្យមានភាពតានតឹង។ នៅត្រង់ចំណុចនេះ អ្នកនាំពាក្យរបស់ក្រសួងការបរទេសចិនបានអំពាវនាវឲ្យប្រទេសក្នុងតំបន់ ប្រុងប្រយ័ត្នកុំឲ្យធ្លាក់ខ្លួន ត្រូវអាមេរិកបង្វិលក្បាល។
ប្រជាជនហ្វីលីពីនប្រឆាំងមិនឲ្យអាមេរិកចូលប្រើមូលដ្ឋានទ័ពរបស់ហ្វីលីពីន
នៅអំឡុងទស្សនកិច្ចរបស់ប្រមុខការពារជាតិអាមេរិក ប្រជាជនហ្វីលីពីនបានធ្វើបាតុកម្មប្រឆាំងអាមេរិក នៅមុខមូលដ្ឋានទ័ពហ្វីលីពីន នៅទីក្រុងម៉ានីល តាមរយៈការដុតទង់ជាតិ និងស្រែកឲ្យកងទ័ពអាមេរិកចាកចេញពី ទឹកដីហ្វីលីពីន។
សម្រាប់អ្នកនយោបាយ ឆ្វេងនិយមហ្វីលីពីន ការផ្តល់មូលដ្ឋានទ័ព៤បន្ថែមទៀត ទៅឲ្យអាមេរិកចូលប្រើប្រាស់ នឹងធ្វើឲ្យហ្វីលីពីន ត្រូវគេអូសទាញ ធ្លាក់ចូលក្នុងជម្លោះ សង្រ្គាមតៃវ៉ាន់ ដែលមិនមែនជាសង្រ្គាមរបស់ហ្វីលីពីនទាល់តែសោះ។
មួយវិញទៀត ដោយអនុញ្ញាតឲ្យកងទ័ពអាមេរិកចូលប្រើប្រាស់មូលដ្ឋានទ័ពរបស់ហ្វីលីពីន គេកំពុងធ្វើឲ្យដំបៅចាស់ ផ្ទុះឈឺចាប់ ឡើងវិញ។ ក្នុងសម័យដែលទ័ពអាមេរិក ១៥០០០នាក់ បោះទីតាំង ប្រចាំការឈរជើងនៅមូលដ្ឋានទ័ពអាមេរិក កាលពីទសវត្សរ៍ឆ្នាំ ១៩៨០ ប្រជាជនហ្វីលីពីនរងគ្រោះ ដោយសារការចាប់រំលោភ ការជួញដូរផ្លូវភេទ និងសារធាតុគីមីពុលដែលបន្សល់ទុកដោយកងទ័ពអាមេរិក។ ម្យ៉ាង ការដកទ័ពអាមេរិក ចេញពីហ្វីលីពីន នៅឆ្នាំ ១៩៩២ បានបន្សល់ទុកនូវកូនកាត់ ហ្វីលីពីន អាមេរិក ១៥០០០នាក់ ដែលត្រូវបានឪពុកទាហានអាមេរិក បោះបង់ចោល ឲ្យរស់នៅ លំបាកវេទនាជាមួយម្តាយ ដែលជាបន្ទុកសង្គមធ្ងន់ធ្ងរមួយ សម្រាប់ហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ