សន្និសីទសន្តិសុខក្រុងម៉ុយនិច គ្របដណ្តប់ដោយសំណុំរឿងអ៊ុយក្រែននិងទំនាក់ទំនងតានតឹងចិនអាមេរិក
ចុះផ្សាយនៅថ្ងៃ៖
ស្តាប់ - ០៧:១៦
សន្និសីទសន្តិសុខក្រុងម៉ុយនិច លើកទី៥៩ ត្រូវចាប់បើកនៅថ្ងៃសុក្រទី ១៧កុម្ភៈនេះ។ ក្នុងអំឡុងពេលបីថ្ងៃមេដឹកនាំនយោបាយ ប្រមាណ ១៥០ ប្រទេស ត្រូវមកជួបជុំគ្នា នៅប្រទេសអាល្លឺម៉ង់ ដើម្បីជជែក និងផ្តោះប្តូរយោបល់គ្នា ស្តីអំពីបញ្ហាសន្តិសុខពិភពលោក។ ប៉ុន្តែឆ្នាំនេះ របៀបវារៈនៃសន្និសីទទំនងជាផ្តោតទាំងស្រុងទៅលើបញ្ហាអ៊ុយក្រែន និងទំនាក់ទំនងដ៏តានតឹងរវាងចិននិងសហរដ្ឋអាមេរិក។
សន្និសីទសន្តិសុខក្រុងម៉ុយនិច ជាការណាត់ជួបគ្នាដ៏ចម្បង ដោយមានប្រមុខរដ្ឋ-រដ្ឋាភិបាលចំនួន៣០ប្រទេស និងរដ្ឋមន្ត្រីការបរទេសជាងមួយរយនាក់ មកពីជាង១៥០ប្រទេសនៅលើពិភពលោកចូលរួម មានជាអាទិ៍ អនុប្រធានាធិបតីអាមេរិក លោកស្រី កាម៉ាឡា ហារីស ប្រមុខរដ្ឋាភិបាលអាល្លឺម៉ង់ អូឡាហ្វ ស្ហុលស៍ ជាម្ចាស់ផ្ទះ ប្រធានាធិបតីបារាំងលោកអេម៉ានុយអែល ម៉ាក្រុង ឬលោកប្រមុខអង្គការអូតង់ យែន ស្តូលទែនប៊ែរ ដែលត្រូវបញ្ចប់អាណត្តិនៅចុងឆ្នាំនេះផង។ រដ្ឋមន្ត្រីការបរទេសចិន លោក វ៉ាង យី និងប្រមុខការទូតអាមេរិក លោក អង់តូនី ប្លីងកិន ក៏បង្ហាញវត្តមានដែរ។
សន្និសីទសន្តិសុខ ពេញណែនដោយវិបត្តិអ៊ុយក្រែន
តែគ្មានតំណាងរុស្ស៊ីណាម្នាក់បានទទួលការអញ្ជើញពីជំនួបថ្ងៃនេះទេ។ នៅឆ្នាំ២០២២ វេទិកាសន្តិសុខនេះ ប្រព្រឹត្តទៅនៅថ្ងៃទី ១៨កុម្ភៈ ពោលគឺតែប៉ុន្មានថ្ងៃមុនរុស្ស៊ីបើកប្រតិបត្តិការចូលឈ្លានពានអ៊ុយក្រែន។ មួយឆ្នាំក្រោយមក សន្និសីទត្រូវជួបជុំគ្នាដោះស្រាយផលវិបាក ដែលបង្កឡើងដោយ “ប្រតិបត្តិការយោធារុស្ស៊ី” ដែលបានក្លាយជាសង្គ្រាម ផ្តុំប្រយុទ្ធគ្នាយ៉ាងខ្លាំងនៅតំបន់ភាគខាងកើតអ៊ុយក្រែន ជាពិសេសនៅក្រុងបាក់ម៉ូត ដោយគ្មានសញ្ញា និងគ្មានពន្លឺនៃភាពធូរស្បើយសោះ។
ក្នុងបរិបទបែបនេះ រដ្ឋមន្ត្រីក្រសួងការបរទេសអ៊ុយក្រែន ដែលអញ្ជើញមកចូលរួមក្នុងសន្និសីទដែរ បានច្រានចោលដំណោះស្រាយបញ្ចប់ជម្លោះជាមួយរុស្ស៊ី តាមផ្លូវការទូត។ នៅយប់មិញ ក្នុងសុន្ទរកថាពេលយប់ ប្រធានាធិបតីអ៊ុយក្រែន លោក ហ្សេឡេនស្គី បានប្រកាសអាទិភាពចង់រុញកងកម្លាំងរុស្ស៊ីនិងវាយបកវិញ។ ហើយលោកនឹងថ្លែងទៅកាន់មេដឹកនាំពិភពលោក ក្នុងសន្និសីទសន្តិសុខ នៅល្ងាចថ្ងៃសុក្រនេះ តាមរយៈប្រព័ន្ធវីដេអូ។
ទណ្ឌកម្មថ្មី
ក្រុមបស្ចិមលោក និងប្រទេសដែលមកចូលរួមក្នុងសន្និសីទត្រូវបង្ហាញជាថ្មីឆន្ទៈគាំទ្ររដ្ឋាភិបាលអ៊ុយក្រែន និងធ្វើតុល្យការនៃជំនួយយោធា ព្រមទាំងជំនួយហិរញ្ញវត្ថុសម្រាប់កៀវ។ ជាមួយនឹងអាទិភាព ពន្លឿនការផ្គត់ផ្គង់អាវុធនិងគ្រាប់ ដូចដែលបានសន្យារួច។
បើតាមសំដីរបស់ប្រមុខអង្គការអូតង់ នៅថ្ងៃព្រហស្បតិ៍ម្សិលមិញ សង្គ្រាមនៅអ៊ុយក្រែន ត្រូវបន្តអូសបន្លាយពេលយូរឆ្នាំទៀតណាស់ ហើយរុស្ស៊ីនឹងបើកយុទ្ធនាការសម្រុកថ្មីនាពេលខាងមុខទៀត។ ដូច្នេះក្រុមបស្ចិមលោកត្រូវបន្តគាំទ្ររដ្ឋាភិបាលអ៊ុយក្រែនដោយបន្តបញ្ជូនអាវុធយុទ្ធភ័ណ្ឌឱ្យក្រុងកៀវ និងដាក់ទណ្ឌកម្មសេដ្ឋកិច្ចលើរុស្ស៊ី។ សហរដ្ឋអាមេរិក និងសម្ព័ន្ធមិត្ត កំពុងរៀបចំអនុម័តគម្រោងទណ្ឌកម្មថ្មីមួយ នៅម្តុំថ្ងៃទី ២៤កុម្ភៈ ថ្ងៃខួបមួយឆ្នាំនៃការចូលឈ្លានពានអ៊ុយក្រែន។ ជាទណ្ឌកម្មដៅលើបុគ្គលផង និងពង្រឹងការហាមឃាត់ធនាគារផង ព្រមទាំងសំដៅលើប្រទេសទីបីដែលរុស្ស៊ីតែងទាក់ទងជាមួយដើម្បីពង្វាងទណ្ឌកម្ម។ សំណុំរឿងនេះនឹងត្រូវក្រុមប្រទេសមហាឧស្សាហកម្មG៧ ឆ្លៀតពិភាក្សាលម្អិតនៅថ្ងៃសៅរ៍ស្អែក។
គ្រាប់រំសេវ
នៅបញ្ហាមួយទៀត ដែលជាអាទិភាពនិងជាបញ្ហាដែលក្រុមសម្ព័ន្ធមិត្តដោះស្រាយដែរនោះ គឺគ្រាប់កាំភ្លើង។ ឯការផ្តល់គ្រាប់រំសេវស្មុគស្មាញជាងការបញ្ជូនអាវុធនិងរថក្រោះ ឆ្ងាយណាស់ ! ជាមធ្យមតាំងពីផ្ទុះសង្គ្រាមមក ជាមធ្យមរុស្ស៊ីបានបាញ់គ្រាប់ផ្លោង ២ម៉ឺនគ្រាប់ក្នុងមួយថ្ងៃ ហើយខាងអ៊ុយក្រែន៥ពាន់។ នេះគ្រាន់តែជាមធ្យមភាគទេ ! អ៊ុយក្រែនបាញ់អស់តិចជាងរុស្ស៊ីមែន ប៉ុន្តែច្រើនជាងចំនួនគ្រាប់ដែលសម្ព័ន្ធមិត្តលោកខាងលិចមានសមត្ថភាពផលិតបានទៅទៀត។ ប្រមុខអូតង់បានពញ្ញាក់ស្មារតីប្រទេសជាសមាជិក តាំងពីដើមសប្តាហ៍មកម្ល៉េះ ថាស្តុក និងចង្វាក់ឧស្សាហកម្មអាវុធកំពុងរងសម្ពាធខ្លាំងណាស់។
ដោយភាពបន្ទាន់ សហរដ្ឋអាមេរិកបានដំឡើងសមត្ថភាពផលិតគ្រាប់កាំភ្លើងធំ ១៥៥មីល្លីម៉ែត្រដល់៩ម៉ឺនគ្រាប់ក្នុងមួយខែ តែអាចបំពេញតម្រូវការអ៊ុយក្រែនបានតែមួយភាគទេ។ បារាំងផលិតតែប៉ុន្មានម៉ឺនគ្រាប់ប៉ុណ្ណោះក្នុងមួយឆ្នាំ ហើយឧស្សាហកម្មអាវុធបារាំងមិនអាចបង្កើនល្បឿនបានលើសនេះឡើយ។ ដូច្នេះមានតែក្រុមហ៊ុនផលិតអាវុធជាតិអ៊ុយក្រែន ត្រូវប្រឹង។ ក្រុមហ៊ុនបានប្រកាសសហការផលិតជាមួយប្រទេសនៅអឺរ៉ុបកណ្តាលជាសមាជិកអូតង់ មិនដឹងថាជាប្រទេសណាមួយឱ្យប្រាកដទេ ដើម្បីផលិតគ្រាប់ និងឈានទៅអភិវឌ្ឍ ឬ ផលិតអាវុធព្រមទាំងសម្ភារៈយោធាផ្សេងទៀត។ ដូច្នេះសន្និសីទនេះក៏ជាឱកាសជជែកអំពីការពង្រឹងសមត្ថភាពយោធារបស់សហភាពអឺរ៉ុប និងការគាំទ្រមកពីខាងអាមេរិក។
ប្រមុខការទូតចិន-អាមេរិក ជួបនិយាយគ្នា នៅវេទិកាសន្តិសុខ ?
សន្និសីទសន្តិសុខ គ្មានទម្ងន់នយោបាយទេ ប៉ុន្តែតាមទម្លាប់ នេះជាឱកាសនៃជំនួបការទូតដ៏សំខាន់ៗ និងដោយស្ងាត់ៗ។ ប្រមុខការទូតអាមេរិកនិងសមភាគីចិន សុទ្ធតែមានវត្តមាននៅក្រុងម៉ុយនិចដូចគ្នា ប៉ុន្តែពុំមានសេចក្តីប្រកាសផ្លូវការណាមួយថាបុរសរដ្ឋទាំងពីរមានជំនួបទ្វេភាគីទេ។
តាំងពីហេតុការណ៍បាឡុងចារកិច្ចមក តំណាងការពារជាតិប្រទេសទាំងពីរអត់និយាយរកគ្នាទេ។ តែប្រទេសទាំងពីរនៅបន្តមានទំនាក់ទំនងការទូតនឹងគ្នា ហើយលោកប្រធានាធិបតីអាមេរិកចូបៃដិន ទើបបានប្រកាសឆន្ទៈចង់ជួបជាមួយសមភាគីចិន លោក ស៊ីជីនពីងទៀត។
ភាពតានតឹងរវាងអាមេរិកនិងចិននៅពេលនេះមិនអំណោយផលសោះសម្រាប់សង្គ្រាមអ៊ុយក្រែន។ សហភាពអឺរ៉ុប ជាពិសេសបារាំងនិងអាល្លឺម៉ង់ចង់បញ្ចុះបញ្ចូលចិន ដែលនៅតែមានទំនាក់ទំនងល្អជាមួយរុស្ស៊ី ជួយដាក់សម្ពាធលើលោកពូទីន ឱ្យបិទបញ្ចប់សង្គ្រាម។ កាលពីខែវិច្ឆិកា លោកនាយករដ្ឋមន្ត្រីអាល្លឺម៉ង់បានទៅប៉េកាំងដើម្បីជួបលោកស៊ីជីនពីង។ ប្រធានាធិបតីបារាំងដែលកំពុងរៀបគម្រោងទៅចិន ក្នុងពេលឆាប់ៗដែរ បានទទួលជួបរដ្ឋមន្ត្រីការបរទេសចិន លោក វ៉ាង យី ជាលក្ខណៈបុគ្គលផង កាលពីថ្ងៃពុធ។ បន្ទាប់ពីបំពេញទស្សនកិច្ចមួយជុំនៅអឺរ៉ុប លោកវ៉ាងយី ត្រូវបន្តដំណើរទៅម៉ូស្គូ។ ភាគីបារាំងសង្ឃឹមថាលោក វ៉ាងយី នឹងពាំនាំសារលើកទឹកចិត្តឱ្យរុស្ស៊ីចូលតុចរចា និងបញ្ឈប់ការផ្លោងគ្រាប់សម្លាប់ជនស៊ីវិល របស់ប្រធានាធិបតីបារាំងទៅប្រាប់មូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ