សហភាពអាហ្វ្រិក ចង់ពន្លឿនកិច្ចចរចាពីតំបន់សេដ្ឋកិច្ចពាណិជ្ជកម្មសេរី?
ចុះផ្សាយនៅថ្ងៃ៖
ស្តាប់ - ០៧:៣៥
សហភាពអាហ្រ្វិក បើកកិច្ចប្រជុំកំពូល លើកទី៣៦ ក្នុងទីក្រុង អាឌីស អាបេបា ប្រទេសអេត្យូពី។ សហភាពអាហ្វ្រិក ផ្តួចផ្តើមបង្កើតពីដំបូងឡើយនៅឆ្នាំ១៩៦៣ ហើយក្នុងឆ្នាំ២០១៧ បានសម្រេចចងសម្ព័ន្ធគ្នានិងធ្វើកំណែទម្រង់ស្ថាប័ន ជាផ្លូវការ ដោយឲ្យឈ្មោះថា «សហភាពអាហ្វ្រិក»។ ចាប់ពីឆ្នាំ២០១៧មក សហភាពអាហ្វ្រិក បានប្រមូលផ្តុំគ្នា ចំនួន ៥៥ ប្រទេសសមាជិក។ បើគិតពីទំហំប្រជាជន មាន ១,៣ ពាន់លាននាក់។ នេះជាទីផ្សារលំដាប់ លេខ ១ លើពិភពលោក។ សូម្បីសហរដ្ឋអាមេរិក ចិន រុស្ស៊ី និងសហភាពអឺរ៉ុប គឺគ្រប់គ្នាចែចង់តំបន់អាហ្វ្រិក និងសម្រុកទៅរកស៊ីវិនិយោគនៅទីនោះ។
បញ្ហាតំបន់និងអន្តរជាតិ
បើតាមប្រភពពី រដ្ឋាភិបាលអេត្យូពី ជាម្ចាស់ផ្ទះនៃជំនួបកំពូល គឺនឹងមានប្រធានាធិបតីអាហ្វ្រិកចំនួន ៣៦ប្រទេស ហើយនិងនាយករដ្ឋមន្ត្រី ៤ ប្រទេសទៀត ដែលបានបញ្ជាក់វត្តមានចូលរួម ហើយក៏មានដែរ អគ្គលេខាធិការអង្គការសហប្រជាជាតិ និងអាជ្ញាធរថ្នាក់ដឹកនាំប៉ាឡេស្ទីន។
តាមរបៀបវរៈ សម្រាប់ប្រជុំ២ថ្ងៃ នៅថ្ងៃសៅរ៍-អាទិត្យ ទី១៧-១៨កុម្ភៈ សហភាពអាហ្វ្រិក នឹងផ្តល់តម្លៃកិច្ចពិភាក្សាទៅលើ បញ្ហាហិង្សានៅក្នុងតំបន់ ពិសេសករណីការបង្ហូរឈាមនៅក្នុងតំបន់សាហែល និងជម្លោះនៅសាធារណរដ្ឋប្រជាធិបតីកុងហ្គោ ដែលទាស់ទែងគ្នាជាមួយប្រទេស រ៉វ៉ាន់ដា។ សំណុំរឿងផ្ទៃក្នុងដែរ គឺបញ្ហារដ្ឋប្រហារយោធា និងហិង្សានៅប្រទេស ម៉ាលី បួកគីណាហ្វាសូ និង ហ្គេណេ។ ប្រទេសបីនេះ ត្រូវសហភាពអាហ្វ្រិក ថ្កោលទោស និងផ្អាកសិទ្ធិ មិនអនុញ្ញាតឲ្យអ្នកតំណាងនយោបាយមកប្រជុំទេ។ សំណុំរឿងដ៏សំខាន់មួយទៀត គឺកំណែទម្រង់លើកគម្រោងផ្លាស់ប្តូរពាណិជ្ជកម្មសេរី។
«តំបន់សេដ្ឋកិច្ចពាណិជ្ជកម្មសេរីរួមគ្នា»
ពាណិជ្ជកម្មនៅក្នុងតំបន់ រវាងបណ្តារដ្ឋអាហ្វ្រិកជាមួយគ្នានោះ មានតែ ១៥%តែប៉ុណ្ណោះ។ ត្រង់ចំណុចនេះហើយ ដែលបណ្តារដ្ឋអាហ្វ្រិកខ្លះ ចង់ឲ្យជំរុញកិច្ចសហការរកស៊ីរួមគ្នា គឺពិសេសកែទម្រង់ស្ថាប័នសហភាពអាហ្វ្រិក ឲ្យរឹងមាំផង ព្រោះរាល់ថ្ងៃនេះ សហភាពអាហ្វ្រិក នៅទន់ខ្សោយ និងនៅពឹងផ្អែកជំនួយអន្តរជាតិច្រើននៅឡើយ។ ពោលគឺតាមរយៈការបង្កើត«តំបន់សេដ្ឋកិច្ចពាណិជ្ជកម្មសេរីរួមគ្នា»។
បណ្តារដ្ឋសមាជិក និងអ្នកជំនាញអន្តរជាតិ មួយចំនួន ឲ្យយោបល់ថា ត្រូវរៀបចំបើកចំហធ្វើពាណិជ្ជកម្មសេរី រំលាយរណាំងពន្ធគយ និង ដាក់ឲ្យចរាចរមនុស្សដោយសេរី រវាងបណ្តាប្រទេសក្នុងតំបន់។
បណ្តាប្រទេសអាហ្វ្រិក តស៊ូមតិ ជជែកពិភាក្សាគ្នាច្រើនឆ្នាំណាស់មកហើយ នៅមិនទាន់រកឃើញចំណុចឯកភាពគ្នាទេ។ ប្រទេសសមាជិកមួយចំនួន មិនព្រមឡើយ ក្នុងការបើកចំហច្រកព្រំដែនទទួលលំហូរមនុស្សដោយសេរីពីប្រទេសជិតខាងនិងពីប្រទេសក្នុងតំបន់អាហ្វ្រិក ព្រោះគេបារម្ភខ្លាចក្រែងទប់ទល់មិនឈ្នះ លំហូរជនភៀសខ្លួន។ មួយទៀត ប្រទេសដែលក្រីក្រខ្លាំង ក៏បារម្ភខ្លាចខាតបង់រឹតតែច្រើនចំពោះការរំលាយរណាំពន្ធគយ ដ្បិតគ្មានអ្វីសម្រាប់នាំចេញនឹងគេ។
បើតាមធនាគារពិភពលោក ប្រសិនបើជា សហភាពអាហ្វ្រិក យល់ព្រមទៅលើការផ្លាស់ប្តូរពាណិជ្ជកម្មសេរីនេះ គឺនឹងបង្កើតការងារធ្វើឆាប់រហ័ស ១៨លានកន្លែង ចាប់ពេលនេះដល់២០៣៥ ហើយនិងជួយស្រោចស្រង់មនុស្ស រហូតដល់ ៥០លាននាក់ឲ្យចាកចេញពីភាពក្រីក្រ។ អង្គការសហប្រជាជាតិ ក៏រពឹងដែរថា បើធ្វើដូច្នេះបាន ទំហំចំណូលក្នុងស្រុកសរុប សម្រាប់សហភាពអាហ្វ្រិក នឹងលោតដល់ ៣ ៤០០ ពាន់លានដុល្លារ។
អាហ្វ្រិកខាងត្បូង ធ្វើសមយុទ្ធយោធា ជាមួយ រុស្ស៊ី និង ចិន។
អាហ្វ្រិកខាងត្បូង បានប្រកាសតាំងតែពីខែមុនមកម្ល៉េះ ពីការសមយុទ្ធយោធារួមគ្នា ជាមួយ រុស្ស៊ី និង ចិន ដែល គ្រោងនឹងចាប់ផ្តើមពីថ្ងៃទី២២ ដល់ទៅ២៧សប្តាហ៍ខាងមុខ។ អាហ្វ្រិកខាងត្បូង បានរៀបចំឲ្យស្រេច កន្លែងត្រូវត្រៀមធ្វើសមយុទ្ធ តាំងពីថ្ងៃសុក្រម្ល៉េះ។ សមយុទ្ធដ៏ចម្រូងចម្រាស់នេះ ត្រូវសហរដ្ឋអាមេរិក ប្រទេសលោកខាងលិច ហើយសូម្បីតែអ្នននយោបាយនិងពលរដ្ឋក្នុងស្រុក មួយចំនួនក៏បានរិះគន់ព្រមទាំងសម្តែងមតិជំទាស់ដែរ។
ចំពោះសំណុំរឿងសង្គ្រាមឈ្លានពានរុស្ស៊ីនៅអ៊ុយក្រែនវិញ គឺ ពេញមួយឆ្នាំ អាហ្វ្រិកខាងត្បូង បានអះអាងតាំងខ្លួននៅអព្យាក្រឹត ហើយនិងបញ្ជាក់ថា ការធ្វើសមយុទ្ធជាមួយ ចិន និងរុស្ស៊ីលើកនេះ គឺឋិតក្នុងបំណងចែករំលែកសមត្ថភាពនិងចំណេះដឹងយោធាក្នុងប្រតិបត្តិការសឹក។
ជំហររបស់សហភាពអាហ្វ្រិកចំពោះសង្គ្រាមឈ្លានភាពរុស្ស៊ីទៅអ៊ុយក្រែន?
ជំហរ របស់ប្រទេសទាំង៥៥ នៃសហភាពអាហ្វ្រិក គឺពុំមានមូលមាត់ក្នុងសំឡេងតែមួយទេ។ ប្រទេសចំនួនច្រើនផង នៅពឹងពាក់លើរុស្ស៊ី ទាំងវិស័យអាវុធយោធា និងសេដ្ឋកិច្ច ពិសេសស្បៀងអាហារ។ ប្រធានាធិបតីអ៊ុយក្រែន ហ្សេឡិនស្គី ក៏ធ្លាប់លើកឡើងដែរថា រុស្ស៊ី បានយក«អាហ្វ្រិក»ធ្វើជាចំណាប់ខ្មាំង។ ថ្មីៗនេះ ប្រទេសក្នុងតំបន់សាហែល បានដេញកងទ័ពបារាំងនិងទ័ពរបស់អឺរ៉ុប ឲ្យចេញ និងស្រវាចាប់យកទ័ពរុស្ស៊ី។ កាលពីផ្ទុះសង្គ្រាមប៉ុន្មានខែដំបូង និងមិនទាន់មានអន្តរាគមន៍ពីតួកគីនិងអង្គការសហប្រជាជាតិ ដើម្បីនាំស្បៀងនិងគ្រាប់ធញ្ញជាតិ ចេញពីកំពង់ផែរបស់រុស្ស៊ីនិងរបស់អ៊ុយក្រែន គឺគ្រានោះ ប្រទេសដែលរងគ្រោះខ្លាំងនិងឋិតក្នុងក្តីព្រួយ ក្រុមប្រទេសអាហ្វ្រិកនេះឯង។
ខែតុលា ឆ្នាំ២០២២ នៅពេលអង្គការសហប្រជាជាតិ រៀបចំអនុម័តសេចក្តីសម្រេចដាក់ទោសទណ្ឌកម្មលើរុស្ស៊ី សមាជិកសហព័ន្ធអាហ្រ្វិក ១៧ប្រទេស អវត្តមាន ហើយប្រទេសខ្លះទៀត មិនបោះឆ្នោតគាំទ្រសេចក្តីសម្រេចទេ ។ ប្រទេសសេណេហ្គាល់ ជាប្រធានសហភាព បានបោះឆ្នោតគាំទ្រ ឲ្យថ្កោលទោសរុស្ស៊ី កាលពីឆ្នាំទៅមិញ។ ឆ្នាំថ្មីនេះ សហភាពអាហ្វ្រិក ផ្លាស់ប្តូរវេនប្រធានដឹកនាំ គឺ Comores ជាប្រទេសកោះ មានប្រជាជនជាង ៨៥ ម៉ឺននាក់ និងទំនងជាមិនសូវមានទឹកមាត់ប្រៃ វិស័យការទូតប៉ុន្មានទេ ដែលត្រូវរំពឹងលើរដ្ឋសមាជិកជាច្រើនទៀតជួយជ្រោមជ្រែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ