បស្ចិមលោក ដាក់សម្ពាធលើ ចិន តែក៏ជឿថា ចិន អាចប្រើឥទ្ធិពលជំរុញឲ្យ រុស្ស៊ី បញ្ឈប់សង្គ្រាមអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:២៦
ប្រមុខការទូតអាមេរិកលោក ប៊្លីនកិន និងសមភាគីចិនលោក វ៉ាង យី ជា នាយកការិយាល័យមជ្ឈិមកិច្ចការបរទេស និងជា អតីតរដ្ឋមន្ត្រីការបរទេស បានស្កាត់ជួបគ្នា នៅយប់ថ្ងៃសៅរ៍ នាឱកាសសន្និសីទស្តីពីសន្តិសុខ រៀបចំក្នុងទីក្រុងម៉ុយនិច ប្រទេសអាល្លឺម៉ង់។ នៅក្នុងជំនួបរយៈពេលជាង ១ ម៉ោង ភាគីទាំងពីរ បានជជែកគ្នា«ដោយផ្ទាល់ និងត្រង់ទៅត្រង់មក» លើសំណុំរឿងជាច្រើន រួមមានទំនាក់ទំនងទ្វេភាគី និងបញ្ហាសង្រ្គាមអ៊ុយក្រែន។
សំណុំរឿងទ្វេភាគី
បើតាមកាសែតផ្លូវរដ្ឋចិន ផ្សាយពីប៉េកាំងនៅព្រឹកថ្ងៃសៅរ៍ គឺលោក វ៉ាង យី ជា នាយកការិយាល័យមជ្ឈិមកិច្ចការបរទេស និងជា សមាជិកការិយាល័យនយោបាយគណបក្សកុម្មុយនិស្តចិន បានលើកឡើងជាថ្មី ពី«បាឡុងចិនដែលអាមេរិកបាញ់កម្ទេច» កាលពីថ្ងៃទី៤កុម្ភៈ។ អតីតរដ្ឋមន្ត្រីការបរទេសចិនរូបនេះ ចោទវាយបក ថា «ជាការរំលោភច្បាប់អន្តរជាតិ» និងថា «ទង្វើអាមេរិក គ្មានសមហេតុសមផល»។ លោក វ៉ាង យី ពន្យល់ទៀតថា «មានបាឡុងច្រើន និងជារបស់ប្រទេសច្រើនណាស់ ដែលហោះនៅពេញផ្ទៃអាកាស។ ហេតុម្តេច អាមេរិកមិនបាញ់កម្ទេចផងទៅ? ម្តេចក៏បាញ់តែបាឡុងរបស់ចិន?»។ ចំពោះលោក វ៉ាង យី ការណ៍ដែលអាមេរិបាញ់បាឡុងចិន ព្រោះតែចង់បង្វែរចំណាប់អារម្មណ៍ពលរដ្ឋអាមេរិក ចេញពីបញ្ហាក្នុងអាមេរិកខ្លួនឯង។ ថ្នាក់ដឹកនាំជាន់ខ្ពស់ចិនរូបនេះ ក៏នៅតែបន្តការពារថា បាឡុងចិនដែលត្រូវអាមេរិកបាញ់កម្ទេចចោលនោះ គឺហោះក្នុង«វត្ថុបំណងស្រាវជ្រាវពីអាកាសធាតុ និងហេតុផលស៊ីវិល»តែប៉ុណ្ណោះ។
ចំពោះប្រមុខការទូតអាមេរិក ករណីបង្ហោះបាឡុងចូលដែនដីអាមេរិកនេះ គឺ«មិនអាចអត់ឱនឲ្យបានសោះឡើយចំពោះការរំលោភបំពានដែនអធិបតេយ្យភាពរបស់ខ្លួន» ហើយលោក អង់តូនី ប្ល៊ីងកិន សង្កត់ធ្ងន់ថា« កុំឲ្យមានរឿងដូច្នេះទៀតឲ្យសោះ»។ នេះជាអ្វីដែលកាសែតបច្ចិមលោករាយការណ៍ឲ្យដឹង។ ក្នុងនោះដែរ គឺ ប្រមុខការទូតអាមេរិក បានបញ្ជាក់ទៅសមភាគីចិន ថារដ្ឋាភិបាលអាមេរិក «មិនចង់បង្កជម្លោះ និងមិនចង់បញ្ឆេះសង្គ្រាមត្រជាក់» ជាមួយចិនទេ ហើយអាមេរិកនឹង«នៅតែបើកទ្វារចំហជានិច្ច»សម្រាប់កិច្ចសន្ទនាចរចាគ្នា។
សំណុំរឿងសង្គ្រាមនៅអ៊ុយក្រែន
អ្នកតំណាងការទូតជាន់ខ្ពស់ចិន លោក វ៉ាង យី នាយកការិយាល័យមជ្ឈិមកិច្ចការបរទេស មានប្រសាសន៍ ពីពាក្យ«សន្តិភាព» ជាង«៣០»ដង។ នេះបើតាមការរបស់ពាក្យសម្តីក្នុងសុន្ទរកថារបស់លោក នៅសន្និសីទសន្តិសុខក្រុងម៉ុយនិច។ ក្នុងសំណុំរឿងអ៊ុយក្រែន ជំហរចិន គឺចិនចង់ឲ្យ អ៊ុយក្រែន និង រុស្ស៊ី ចូលតុចរចា។ នៅចំពោះមុខប្រទេសអឺរ៉ុប គឺ ចិនចង់ឃើញសន្តិភាព ក៏ប៉ុន្តែនៅជាមួយរុស្ស៊ី ចិនប្រហែលជានិយាយផ្សេង។
ក្រុមស៊ើបការណ៍សម្ងាត់របស់សហរដ្ឋអាមេរិក អះអាង«ចិនបានជួយផ្គត់ផ្គង់ជំនួយដល់រុស្ស៊ី ដើម្បីធ្វើសង្គ្រាមនៅអ៊ុយក្រែន»។ មន្ត្រីថ្នាក់ដឹកនាំជាន់ខ្ពស់អាមេរិក ឲ្យកាសែតបច្ចិមប្រទេសដឹងថា ចិន ជួយ រុស្ស៊ី ជាសម្ងាត់ គឺជួយផ្តល់សម្ភារៈផង ហើយនិងជួយផ្នែកខាងហិរញ្ញវត្ថុ ដើម្បីឲ្យរុស្ស៊ីគេចផុតពីទណ្ឌកម្មសេដ្ឋកិច្ច។ អនុប្រធានាធិបតីសហរដ្ឋអាមេរិក អ្នកស្រី កាំមីឡា ហារីស បានសង្ស័យពី«អព្យាក្រឹត្យភាពរបស់ចិនចំពោះសណុំរឿងសង្គ្រាមអ៊ុយក្រែន»ដែរ ហើយ រដ្ឋមន្ត្រីការបរទេសអាមេរិក បានចាត់ទុកថា ចិនជា«កាំបិតមុខពីរ» ហើយដាស់តឿនចិនឲ្យប្រុងប្រយ័ត្នពីផលវិបាក។
ចិន មានទឹកមាត់ប្រៃនិយាយជាមួយ រុស្ស៊ី
ប្រទេសជប៉ុន ដាក់គំនាបរដ្ឋាភិបាល ចិន ឲ្យគិតគូរករណីសង្គ្រាមអ៊ុយក្រែន។ នៅក្រុងម៉ុយនិច រដ្ឋមន្ត្រីការបរទេសជប៉ុន ថែមទាំងបានជំរុញឲ្យ ចិន ជួយអន្តរាគមន៍ដោះស្រាយប្រកបដោយការទទួលខុសត្រូវចំពោះសង្គ្រាមអ៊ុយក្រេន។
ក្រៅពីដាក់គំនាបលើចិន សហគមន៍អឺរ៉ុបនិងបច្ចិមប្រទេស ក៏ជឿជាក់ថា ចិន អាចនឹងប្រើឥទ្ធិពលរបស់ខ្លួន ដើម្បីជំរុញឲ្យ រដ្ឋបាលវិមានក្រិមឡាំងរបស់រុស្ស៊ី បញ្ចប់សង្គ្រាមនៅអ៊ុយក្រែន បាន។
ដូចគ្នានឹងប្រមុខការទូតជប៉ុនដែរ នាយករដ្ឋមន្ត្រីអង់គ្លេស លោក រីស៊ី ស៊ូណាក់ វាយតម្លៃថា «ចិនត្រូវដើរតួនាទីរបស់ខ្លួនប្រកបដោយការទទួលខុសត្រូវ»។ បារាំង អាល្លឺម៉ង់ និងប្រទេសជាច្រើនក្នុងរង្វង់សហភាពអឺរ៉ុប សុទ្ធតែសង្ឃឹមជឿជាក់ថា ចិន មានទឹកមាត់ប្រៃនិយាយបញ្ចុះបញ្ជូលរុស្ស៊ី របស់ លោក វ្ល៉ាឌីមៀរ ពូទីន។ គ្រប់គ្នាសង្ឃឹមដូច្នេះ ពីព្រោះថា លោក វ៉ាង យី នឹងធ្វើដំណើរ រដ្ឋធានីម៉ូស្កូ ក្នុងឆាប់ៗខាងមុខនេះ ដើម្បីរៀបចំដំណើរទស្សនកិច្ចផ្លូវការរបស់ប្រធានាធិបតីចិន ស៊ី ជីនពីង និងប្រមុខរដ្ឋរុស្ស៊ី វ្ល៉ាឌីមៀរ ពូទីន ដែលគ្រោងទំនងជាធ្វើឡើងនៅក្រោយខែមីនា បន្ទាប់ពីកិច្ចប្រជុំសភាប្រជាជនចិន។
ក្នុងជំនួបទ្វេភាគី ដាច់ដោយឡែក នៅថ្ងៃពុធ ប្រធានាធិបតីបារាំង បានផ្តាំផ្ញើឲ្យ លោក វ៉ាង យី នាំសារ ថា «ពលរដ្ឋបារាំងលើកទឹកចិត្តឲ្យរុស្ស៊ីវិលមកតុចរចា ហើយបញ្ឈប់ការបំផ្លោងគ្រាប់សម្លាប់ពលរដ្ឋស៊ីវិល»។
សហរដ្ឋអាមេរិក ចោទរុស្ស៊ី ថា «ប្រព្រឹត្តឧក្រិដ្ឋកម្មសង្គ្រាមប្រឆាំងមនុស្សជាតិ»។
ការចោទប្រកាន់ជាចំហនេះ គឺចេញពីសម្តីរបស់ អនុប្រធានាធិបតីសហរដ្ឋអាមេរិក ដែលអ្នកស្រី កាំមីឡា ហារីស។ នៅក្នុងឱកាសសន្និសីទក្រុងម៉ុយនិក ថ្នាក់ដឹកនាំអាមេរិក បានថ្កោលទោស រុស្ស៊ី ដែលបង្កសង្គ្រាមឈ្លានពាន ចំនួន ៣៦១ថ្ងៃ មកហើយ ទៅលើអ៊ុយក្រែន។ អ្នកស្រី កាំមីឡា ហារីស ដែលជា អតីតរដ្ឋអាជ្ញាសហរដ្ឋអាមេរិក ផង បានថ្លែងថា «យើងបានពិនិត្យភស្តុតាង និងចេះដឹងពីច្បាប់ច្បាស់លាស់ គឺ គ្មានអ្វីត្រូវសង្ស័យទៀតទេ ថា នេះជាឧក្រិដ្ឋកម្មប្រឆាំងនឹងមនុស្សជាតិ យ៉ាងពិតប្រាកដ»។
មន្ត្រីជាន់ខ្ពស់អាមេរិក បញ្ជាក់ថា បានប្រមូលភស្តុតាង ៣០ ៦០០ ករណី ស្តីពី ឧក្រិដកម្មរុស្ស៊ី គឺ មានការទម្លាក់គ្រាប់និងបំផ្លោងគ្រាប់បែក តម្រង់ទៅលើជនស៊ីវិលនិងហេដ្ឋារចនាសម្ព័ន្ធ ការធ្វើទារុណកម្ម រំលោភសេពសន្ធវៈ ការជម្លៀសចេញដោយបង្ខំ កូនក្មេង ផ្តាច់ពីគ្រួសារ ជាដើម។
ពីប្រទេសអាល្លឺម៉ង់ រដ្ឋមន្ត្រីការបរទេសអ៊ុយក្រែន បានស្វាគមន៍ចំពោះជំហរអាមេរិក ហើយ អ៊ុយក្រេន ក៏នៅតែបន្តចោទក្រុងម៉ូស្កូ ពីការប្រព្រឹត្តិអំពើប្រល័យពូជសាសន៍។ ក្រុងកៀវ ក៏គាំទ្រឲ្យបង្កើតតុលាការពិសេសកាត់ទោសរុស្ស៊ី ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ