ដែនដីរបស់ចិននិងសហរដ្ឋអាមេរិក ប្រឈមខ្លាំងជាងគេនឹងហានិភ័យវិបត្តិអាកាសធាតុ
ចុះផ្សាយនៅថ្ងៃ៖
ស្តាប់ - ០៦:៥៩
ហានិភ័យបង្កឡើងដោយវិបត្តិអាកាសធាតុសកល គឺជាក្តីព្រួយបារម្ភធំឡើងៗ ដែលរបាយការណ៍ស្រាវជ្រាវវិទ្យាសាស្រ្តកាន់តែច្រើន បានសន្និដ្ឋាន។ គ្រោះទឹកជំនន់ ការបាក់រមៀលដី ភ្លើងឆេះព្រៃ ខ្យល់ព្យុះជាដើម។ល។ ដែលកាន់តែមានភាពសាហាវធ្ងន់ធ្ងរ ដោយសារតែបម្រែបម្រួលអាកាសធាតុសកល បង្កឡើងដោយការកើនឡើងកំដៅផែនដី។ យើងតាមរបាយការណ៍មួយ ចេញផ្សាយនៅថ្ងៃចន្ទទី២០កុម្ភៈ គឺដែនដីតំបន់មួយចំនួននៅប្រទេសចិន និងនៅសហរដ្ឋអាមេរិក មានការប្រឈមខ្លាំងបំផុត ទៅនឹងហានិភ័យអាកាសធាតុទាំងនេះ បើប្រៀបធៀបទៅនឹងប្រទេសផ្សេងៗទៀត។ ជាហានិភ័យប្រឈម ដែលអាចធ្វើឲ្យតំបន់ទាំងនេះ បាត់បង់នូវសក្តានុពលសេដ្ឋកិច្ច ព្រមទាំងប៉ះពាល់ដល់អាយុជីវិតរបស់ប្រជាជនផងដែរ។
៨០%នៃតំបន់ដែប្រឈមហានិភ័យខ្លាំង គឺស្ថិតនៅចិន អាមេរិក និងឥណ្ឌា
វិបត្តិអាកាសធាតុកំពុងតែគំរាមខ្លាំងបំផុតទូទាំងសកលលោក ក៏ប៉ុន្តែវដែនដី តំបន់នីមួយៗ មានកម្រិតប្រឈមតិចឬខ្សោយ មិនដូចគ្នាទេ។ ជារួម តំបន់ភាគច្រើនដែលប្រឈមខ្លាំងបំផុត នឹងហានិភ័យអាកាសធាតុ គ្រោះធម្មជាតិ គឺមាននៅប្រទេសចិននិងនៅសហរដ្ឋអាមេរិក។ របាយការណ៍សិក្សាស្រាវជ្រាវនេះ គឺធ្វើឡើងដោយ ក្រុមហ៊ុន XDI មានមូលដ្ឋាននៅអូស្ត្រាលី ហើយដែលមានជំនាញ វិភាគវាយតម្លៃហានិភ័យផ្នែកអាកាសធាតុ សម្រាប់បណ្តាក្រុមហ៊ុនអ្នកវិនិយោគ និងអ្នកវិភាគហិរញ្ញវត្ថុ។
អ្នកជំនាញរបស់ XDI បានពិនិត្យលម្អិត លើដែនដីតំបន់ចំនួនជាង២៦០០ នៅទូទាំងពិភពលោក ដើម្បីចាត់ចំណាត់ថ្នាក់ ថាតំបន់នីមួយៗ មានកម្រិតប្រឈមហានិភ័យខ្លាំងប៉ុណ្ណា ពីនេះដល់ឆ្នាំ២០៥០។ យោងតាម លោក Karl Mallon ប្រធានក្រុមការងារវិទ្យាសាស្ត្ររបស់ XDI អ្វីដែលយើងអាចកត់សំគាល់បាន គឺខេត្តមួយចំនួនរបស់ចិន រដ្ឋមួយចំនួនរបស់សហរដ្ឋអាមេរិក និងនៅឥណ្ឌា គឺស្ថិតនៅលំដាប់ជួរមុខ ដែលប្រឈមហានិភ័យខ្លាំង។
ក្នុងចំណោមតំបន់ទាំង៥០ដែលប្រឈមហានិភ័យវិបត្តិអាកាសធាតុខ្លាំងបំផុត គឺ៨០% មាននៅតាមប្រទេសធំៗទាំង៣នេះ។ ហើយក្នុងចំណោមតំបន់១០ ដែលនៅលេខរៀងជួរមុខគេ ប្រឈមខ្លាំងបំផុតនោះ គឺមាន៩ទៅហើយ ដែលជាខេត្តរបស់ចិន តួយ៉ាង ខេត្ត Jiangsu ខេត្តShandong និងខេត្តHebei ជាដើម។ សម្រាប់សហរដ្ឋអាមេរិកវិញ រដ្ឋផ្លរីដា ស្ថិតនៅលេខរៀងទី១០ រដ្ឋកាលីហ្វ័រញ៉ា លេខរៀងទី១៩ រដ្ឋតិចសាស់ លេខរៀងទី២០ បន្តបន្ទាប់មកទៀត មានរដ្ឋមួយចំនួននៅឥណ្ឌា នៅប្រេស៊ីល និងនៅឥណ្ឌូណេស៊ីជាដើម ដែលសុទ្ធតែប្រឈមខ្លាំងនឹងវិបត្តិអាកាសធាតុ គ្រោះធម្មជាតិ។ ដោយឡែកនៅអឺរ៉ុបវិញ តំបន់ Basse-Saxe ភាគខាងលិចអាល្លឺម៉ង់ មានកម្រិតប្រឈមខ្លាំង លេខរៀងទី៥៦ ខណៈតំបន់ Hauts de France ភាគខាងជើងស្រុកបារាំង ស្ថិតនៅលេខរៀងទី១២១។
ហានិភ័យគ្រោះធម្មជាតិ បង្កឡើងដោយបម្រែបម្រួលអាកាសធាតុ
នីតិវិធីនៃការស្រាវជ្រាវធ្វើរបាយការណ៍នេះ គឺអ្នកជំនាញរបស់ XDI ផ្តោតសំខាន់ទៅលើ ហានិភ័យប្រឈមនៃសំណង់អាគារ ហេដ្ឋារចនាសម្ព័ន្ធ ដែលអាចប្រឈមនឹងការខូចខាត។ ហានិភ័យដែលមានចំនួន៨ទម្រង់ធំៗ ហើយដែលជាផលអវិជ្ជមានជាក់ស្តែង បង្កឡើងដោយការកើនឡើងកំដៅផែនដីនេះឯង។ ក្នុងនោះគឺមាន ករណីគ្រោះទឹកជំនន់តាមដងទន្លេ ទឹកជំនន់លើតំបន់វាលទំនាប និងគ្រោះទឹកជំនន់តាមតំបន់មាត់ឆ្នេរ។ ក្រៅពីនេះ គឺមានហានិភ័យប្រឈម ដោយសីតុណ្ហភាពក្តៅខ្លាំង ករណីភ្លើងឆេះព្រៃ ករណីនបាក់រមៀលដី ករណីខ្យល់បក់គួចខ្លាំង ព្រមទាំងករណីសីតុណ្ហភាពចុះត្រជាក់កក ឬក្តៅរលាយមួយរំពេច។
របាយការណ៍នេះ គឺត្រូវបានធ្វើឡើង ដោយផ្អែកមួយផ្នែកធំ ទៅលើការសន្និដ្ឋានរបស់ក្រុមអ្នកជំនាញអាកាសធាតុ នៃអង្គការសហប្រជាជាតិ ហៅកាត់ថា GIEC ដែលលើកឡើងពីសេណារីយ៉ូ ដែលផែនដីយើង នឹងឡើងកំដៅចំនួន៣°c បន្ថែមទៀត នៅដំណាច់សតវត្សទី២១។ ការកើនឡើងសីតុណ្ហភាព ដែលបង្កឡើងដោយកម្រិតឧស្ម័នផ្ទះកញ្ចក់នៅក្នុងបរិយាកាស។
លោក Rohan Hamdan អគ្គនាយកក្រុមហ៊ុន XDI បានបញ្ជាក់ថា គឺក្រុមហ៊ុនវិនិយោគ និងហិរញ្ញវត្ថុ ដែលត្រូវការចង់បានទិន្នន័យ និងការសន្និដ្ឋាន ស្តីពីហានិភ័យអាកាសធាតុ នៅតាមដែនដីតំបន់នីមួយៗទូទាំងពិភពលោក ដើម្បីឲ្យគេងាយស្រួល នៅក្នុងការពិចារណា វាយតម្លៃបញ្ហាប្រឈមនានា មុននឹងបោះទុនវិនិយោគ។ សំណង់អាគារ ហេដ្ឋារចនាសម្ព័ន្ធ គឺវាផ្សារភ្ជាប់ជាមួយកម្រិតសកម្មភាពសេដ្ឋកិច្ចតិចឬខ្លាំង នៃតំបន់ដែនដីនីមួយៗ ហើយដែលញ៉ាំងឲ្យមានកម្រិតបោះទុនហិរញ្ញវត្ថុវិនិយោគ។ ដូច្នេះវាជារឿងចាំបាច់ ដែលគេត្រូវតែវិភាគវាយតម្លៃ ទៅលើតំបន់នីមួយៗ ថាអាចប្រឈមហានិភ័យជាក់ស្តែងកម្រិតណា ដោយសារតែកត្តាវិបត្តិអាកាសធាតុ និងគ្រោះធម្មជាតិ។
បាត់បង់សក្តានុពលសេដ្ឋកិច្ច
គ្មានអ្នកវិនិយោគណា ចង់ទៅរកស៊ីបោះទុន ធ្វើរោងចក្រ ឬរៀបចំបណ្តាញផ្គត់ផ្គង់ នៅតានមតំបន់ដែលប្រឈមបញ្ហាអាកាសធាតុ គ្រោះធម្មជាតិខ្លាំងនោះទេ។ លោកKarl Mallon បានពន្យល់ថា តារាងវាយតម្លៃហានិភ័យនៃតំបន់នីមួយៗនេះ ប្រាកដជាញ៉ាំងឲ្យមានផលវិបាក ផ្នែកហិរញ្ញវត្ថុ ឧទាហរណ៍ ដូចជាការប៉ះពាល់ទៅលើតម្លៃភាគហ៊ុនមួយចំនួន ព្រមទាំងអាចធ្វើឲ្យប្រែប្រួល ដល់ការគិតពិចារណា របស់មនុស្សគ្រប់គ្នា ដែលមានចំណែកក្នុសកម្មភាពសេដ្ឋកិច្ច។
តំបន់ដែលប្រឈមខ្លាំងនឹងហានិភ័យ ត្រូវតែរិះរកវិធានការទាក់ទាញអ្នកវិនិយោគ ដូចជាតាមរយៈការផ្តល់អត្ថប្រយោជន៍ប៉ះប៉ូវហានិភ័យ ដល់អ្នកវិនិយោគ ឬពុំដូច្នោះទេ អ្នកវិនិយោគហិរញ្ញវត្ថុ នឹងនាំគ្នាចេញអស់មិនខានទេ។ តែទន្ទឹមគ្នានេះ ការវាយតម្លៃកម្រិតប្រឈមហានិភ័យ នៅតាមតំបន់ទាំងនេះ ក៏អាចជំរុញឲ្យរដ្ឋាភិបាលអាជ្ញាធរ ប្រឹងប្រែងកាន់តែខ្លាំងឡើង ដើម្បីចូលរួម កាត់បន្ថយការបញ្ចេញឧស្ម័នកាបូនិក ឧស្ម័នផ្ទះកញ្ចក់ ដែលជាកត្តាចំបង បង្កឲ្យផែនដីឡើងកំដៅ។ ផែនដីឡើងកំដៅ ធ្វើឲ្យប្រែប្រួលអាកាសធាតុ បង្កជាគ្រោះមហន្តរាយនានា ហើយធ្វើឲ្យប៉ះពាល់ធ្ងន់ធ្ងរ ដល់សក្តានុពលសេដ្ឋកិច្ចរបស់តំបន់និងប្រទេសរបស់ខ្លួន។
ដូច្នេះ ការគិតគូរ ផ្តល់អាទិភាពលើកត្តាអាកាសធាតុ កាត់បន្ថយការបញ្ចេញឧស្ម័នពុលនេះ វាមិនមែនគ្រាន់តែជាការការពារបរិស្ថាន ខ្យល់អាកាសបរិសុទ្ធ ឬការពារធនធានធម្មជាតិតែប៉ុណ្ណោះទេ តែវាគឺជាការវិនិយោគយូរអង្វែង នៅក្នុងវិស័យសេដ្ឋកិច្ច និងសង្គម ហើយទន្ទឹមគ្នានេះ គឺវាជាទស្សនវិស័យអភិវឌ្ឍន៍ ដែលលើកកំពស់សុខមាលភាព អាយុជីវិតរបស់ប្រជាពលរដ្ឋ ដែលជាកម្លាំងចលករសេដ្ឋកិច្ចមិនអាចខ្វះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ