អង់គ្លេសនិងសហភាពអឺរ៉ុប រកបាននូវកិច្ចព្រមព្រៀងដោះស្រាយបញ្ហាតំបន់អៀរឡង់ខាងជើង
ចុះផ្សាយនៅថ្ងៃ៖
ស្តាប់ - ០៨:០៩
បន្ទាប់ពីប្រទេសអង់គ្លេស បានចាកចេញជាស្ថាពរពីសហភាពអឺរ៉ុប តំបន់អៀរឡង់ខាងជើងរបស់អង់គ្លេស គឺជាចំណុចខ្ទាស់មួយដ៏សំខាន់ បង្កឲ្យសឹងតែមានជម្លោះនឹងគ្នា រវាងសហភាពអឺរ៉ុបនិងអង់គ្លេស ដោយសារតែតំបន់នេះមានព្រំដែនគោក ជាប់ជាមួយសាធារណរដ្ឋអៀរឡង់ ដែលជាប្រទេសសមាជិកសហភាពអឺរ៉ុប។ បញ្ហាធំបំផុតនោះ គឺវាពាក់ព័ន្ធនឹងចរាចរណ៍ទំនិញ វិស័យពន្ធដារ ព្រមទាំងស្តង់ដារទំនិញគ្រប់ប្រភេទ នៃទីផ្សាររួមរបស់សហភាពអឺរ៉ុប។ ឆ្លងកាត់ការចរចាដ៏ស្វិតស្វាញ នៅទីបំផុតរដ្ឋាភិបាលអង់គ្លេស ដឹកនាំដោយលោក រីស៊ី ស៊ូណាក់ និងគណកម្មការអឺរ៉ុប បានសម្រេចបាននូវកិច្ចព្រមព្រៀងថ្មីមួយ ដើម្បីដោះស្រាយ គ្រប់គ្រងបញ្ហាតំបន់អៀរឡង់ខាងជើងនេះ។
រកមធ្យោបាយទប់ស្កាត់វិបត្តិនយោបាយនៅអៀរឡង់ខាងជើង
ដំណើរដើមទងនៃបញ្ហានេះ គឺវាផ្តើមចេញពី Brexit។ អង់គ្លេសបានសម្រេចចាកចេញ ឈប់នៅក្នុងសហភាពអឺរ៉ុបតទៅទៀត ពោលគឺឈប់គោរពច្បាប់អឺរ៉ុប ឈប់នៅក្នុងទីផ្សារសេដ្ឋកិច្ចរួមរបស់អឺរ៉ុប។ តំបន់អៀរឡង់ខាងជើង គឺជាផ្នែកមួយនៃដែនដីប្រទេសអង់គ្លេស មានន័យថាតាមធម្មតាតំបន់នេះ ក៏ត្រូវតែផ្តាច់ខ្លួនចេញពីសហភាពអឺរ៉ុបដែរ។ ក៏ប៉ុន្តែតំបន់អៀរឡង់ខាងជើងនេះ វាមានលក្ខណៈពិសេស ព្រោះជាស្ថិតនៅដាច់ពីដែនដីផ្សេងទៀតរបស់អងគ្លេស ដោយខណ្ឌចែកដោយសមុទ្រអៀរឡង់ ហើយវាមានព្រំដែនគោក ជាប់ជាមួយសាធារណរដ្ឋអៀរឡង់ ដែលជាសមាជិករបស់សហភាពអឺរ៉ុប។
មុននឹងក្លាយជាទឹកដីរបស់អង់គ្លេស តំបន់អៀរឡង់ខាងជើង ធ្លាប់ស្ថិតនៅក្នុងប្រទេសអៀរឡង់ទាំងមូលតែម្តង។ កាលពីក្នុងអំឡុងទសវត្សឆ្នាំ៧០សង្គ្រាមស៊ីវីល រវាងក្រុមអ្នកទាមទារឯករាជ និងក្រុមអ្នកចង់ភ្ជាប់ខ្លួនជាមួយប្រទេសអង់គ្លេស បានបង្កឲ្យមានមនុស្សស្លាប់ច្រើនណាស់ នៅតំបន់អៀរឡង់ខាងជើងនេះ។
ពេលអង់គ្លេសនៅជាសមាជិកអឺរ៉ុប គឺពុំមានព្រំដែនខណ្ឌចែករវាងប្រទេសអៀរឡង់ និងតំបន់អៀរឡង់ខាងជើងទេ ដែលមានន័យថា គឺវាហាក់ដូចជាដែនដីតែមួយទៅហើយ។ ចរាចរណ៍មនុស្ស និងទំនិញ គឺអាចចេញចូលដោយសេរី កាត់បន្ថយបញ្ហាបានច្រើនណាស់ ទាក់ទិននឹងចរន្តគំនិតជាតិនិយមចង់ផ្តាច់ខ្លួនមកអីជាដើម។ ក៏ប៉ុន្តែនៅពេលដែលអង់គ្លេសចេញពីសហភាពអឺរ៉ុប តាមធម្មតាគឺគេត្រូវតែដាក់ឲ្យមានព្រំដែនវិញ រវាងតំបន់អៀរឡង់ខាងជើង និងប្រទេសអៀរឡង់។
ដូច្នេះដើម្បីទប់ស្កាត់បញ្ហានយោបាយនៅតំបន់នេះ អតីតរដ្ឋាភិបាលលោកបូរីស ចនសុន បានចុះពិធីសារបណ្តោះអាសន្នមួយជាមួយសហភាពអឺរ៉ុបនៅឆ្នាំ២០២០ ដោយកំណត់ថា នឹងពុំមានព្រំដែនគោក រវាងប្រទេសអៀរឡង់និង តំបន់អៀរឡង់ខាងជើងទេ ហើយអង់គ្លេសសុខចិត្តឲ្យមានការត្រួតពិនិត្យទំនិញ ដែលដឹកចូលពីតំបន់ផ្សេងទៀតរបស់អង់គ្លេស ចូលមកកាន់តំបន់អៀរឡង់ខាងជើង។ ជាការត្រួតពិនិត្យឯកសារពន្ធដា និងស្តង់ដារគុណភាពជាដើម គឺអឺរ៉ុបទាមទារថា ត្រូវតែធ្វើពេលមកដល់កំពង់ផែអៀរឡង់ខាងជើងតែម្តង ព្រោះថាបើទំនិញទាំងនោះឡើងគោក គឺពិតជាអាចហូរចូលទៅទូទាំងទីផ្សារអឺរ៉ុបហើយ ដោយសារតែគ្មានព្រំដែនរវាងតំបន់អៀរឡង់ខាងជើងនិងប្រទេសអៀរឡង់។ ក៏ប៉ុន្តែចំណុចនេះ ត្រូវបានក្រុមអ្នកនយោបាយជាតិនិយមអង់គ្លេស ជំទាស់ខ្លាំងណាស់ ដោយគេទាមទារថាតំបន់អៀរឡង់ខាងជើងជាទឹកដីអង់គ្លេស រឿងអីអឺរ៉ុបមកដាក់កំហិតឲ្យគោរពច្បាប់អឺរ៉ុបនោះ!
ត្រួតពិនិត្យទំនិញដែលត្រូវនាំចេញទៅប្រទេសអៀរឡង់
កាលពីថ្ងៃចន្ទទី២៧កុម្ភៈ លោករីស៊ី ស៊ូណាក់ បានប្រកាសរួមគ្នាជាមួយលោកស្រី អៀរស៊ូឡា វុន ឌឹឡេយែន ប្រធានគណកម្មការអឺរ៉ុប ថាគេបានរកឃើញកិច្ចព្រមព្រៀងថ្មីមួយហើយ ដើម្បីគ្រប់គ្រងលក្ខខណ្ឌពិសេសនៃតំបន់អៀរឡង់ខាងជើងនេះ។ ភាគីទាំងសងខាងបានអះអាងថា វាគឺជាការបោះជំហានបើកទំព័រថ្មី បិទបញ្ចប់បញ្ហាវិវាទ ដែលនៅសាំញ៉ាំ រវាងអង់គ្លេសនិងសហភាពអឺរ៉ុប។
នៅក្នុងកិច្ចព្រមព្រៀងថ្មីនេះ គឺគេនៅតែរក្សាលក្ខខណ្ឌ គ្មានព្រំដែនគោក រវាងតំបន់អៀរឡង់ខាងជើង និងប្រទេសអៀរឡង់ដដែល។ ក៏ប៉ុន្តែ ពាក់ព័ន្ធនឹងការនាំចូលទំនិញ ពីតំបន់ផ្សេងទៀតនៃប្រទេសអង់គ្លេស ចូលមកដល់កំពង់ផែអៀរឡង់ខាងជើង គឺគេបានបែកចែកជា២ផ្លូវ។ ផ្លូវពណ៌បៃតង មានន័យថាជាប្រភេទទំនិញ ដែលអាចនាំចូលដោយសេរីទៅតំបន់អៀរឡង់ខាងជើង ដោយអនុឡោមតាមច្បាប់អង់គ្លេសតែមួយ។ ផ្លូវមួយទៀតគឺពណ៌ក្រហម សម្រាប់ទំនិញអាចត្រូវដឹកជញ្ជូនចូលទៅប្រទេសអៀរឡង់ ដែលមានន័យថាគឺក្នុងទីផ្សារអឺរ៉ុប។ ទំនិញប្រភេទនេះ គឺត្រូវតែត្រួតពិនិត្យឯកសារពន្ធដារ និងស្តង់ដារគុណភាព ដោយអនុឡោមទៅតាមច្បាប់ជាធរមាន របស់សហភាពអឺរ៉ុប។
កាលពីល្ងាចថ្ងៃចន្ទ លោករីស៊ី ស៊ូណាក់ បានអះអាងនៅមុខអង្គសភាអង់គ្លេសថា អំណេះតទៅ នឹងមិនមានព្រំដែនសមុទ្រ ខណ្ឌចែករវាងទឹកដីតំបន់អៀរឡង់ខាងជើង ជាមួយនឹងដែនដីផ្សេងទៀតរបស់អងគ្លេសទេ។ លោកអះអាងថា ស្តង់ដារទំនិញចំណីអាហារនិងឱសថជាដើម គឺតែមួយច្បាប់អង់គ្លេសកំណត់យ៉ាងណា នៅអៀរឡង់ខាងជើងគឺដូចគ្នាតែមួយ។
Stormont Brake
លោករីស៊ី ស៊ូណាក់ បានបញ្ជាក់ថា ជាមួយនឹងកិច្ចព្រមព្រៀងថ្មីនេះ វានៅសេសសល់យ៉ាងហោចច្បាប់អឺរ៉ុបចំនួនប្រមាណ៣% ដែលតំបន់អៀរឡង់ខាងជើង ត្រូវតែបន្តគោរព។ វាគឺជាលក្ខខណ្ឌពិសេស និងស្មុគស្មាញដោយមិនអាចដោះស្រាយចេញទេ ហើយត្រូវតែទទួលយក។ តែទន្ទឹមគ្នានេះ កិច្ចព្រមព្រៀងបានកំណត់យន្តការថ្មីមួយទៀត ដើម្បីការពារអធិបតេយ្យភាពអង់គ្លេស។ យន្តការនេះ គេដាក់ឈ្មោះហៅថា Stormont Brake ដោយបើកផ្លូវឲ្យសភាតំបន់អៀរឡង់ខាងជើង មានសិទ្ធិជំទាស់លើការអនុវត្តច្បាប់ថ្មីណាមួយ របស់អឺរ៉ុប ដែលនឹងមកគ្រប់គ្រងចរាចរណ៍ទំនិញគ្រប់ប្រភេទនៅអៀរឡង់ខាងជើង។ សមាជិកសភាចំនួន៣០នាក់ អាចកោះប្រជុំដើម្បីបោះឆ្នោតប្រឆាំងច្បាប់អឺរ៉ុបបាន។
ដោយឡែក តុលាការយុត្តិធម៌អឺរ៉ុប នៅតែមានអំណាចយុត្តាធិការ សម្រេចសាលក្រមអនុវត្តនៅលើដែនដីតំបន់អៀរឡង់ខាងជើងដដែល ក្នុងករណីដើម្បីការពារទីផ្សារសេដ្ឋកិច្ចរួមរបស់សហភាពអឺរ៉ុប។ នេះបើផ្អែកតាមការបញ្ជាក់របស់លោកស្រី អៀរស៊ូឡា វុន ឌឹឡេយែន ប្រធានគណកម្មការអឺរ៉ុប។ ក៏ប៉ុន្តែ សភាអង់គ្លេសក៏នៅតែមានសិទ្ធិ បោះឆ្នោតវ៉េតូដែរ នៅពេលណាដែលគេជំទាស់សេចក្តីសម្រេចណាមួយ របស់តុលាការយុត្តិធម៌អឺរ៉ុប។ តែយ៉ាងណាក៏ដោយ លោកស្រីប្រធានគណកម្មការអឺរ៉ុប បានអះអាងថា អឺរ៉ុបមានយន្តការច្រើនដំណាក់ ដើម្បីការពារបូរណភាពនៃទីផ្សារសេដ្ឋកិច្ចរួមរបស់ខ្លួន ហើយឈានទៅធ្វើឲ្យកិច្ចព្រមព្រៀងគ្រប់គ្រងតំបន់អៀរឡង់នេះ អាចត្រូវបានអនុវត្តទៅដោយរលូន។ យន្តការ Stormont Brake វាគឺជាយន្តការអាសន្នចុងក្រោយនៅពេលដែលគ្មានជម្រើស តែមុននឹងឈានដល់ដំណាក់ការបែបនេះ គឺគេនឹងមានការជជែកពិគ្រោះយោបល់គ្នា ដើម្បីចៀសវាងបញ្ហា។
សភាអង់គ្លេសត្រូវផ្តល់សច្ចាប័ន
កិច្ចព្រមព្រៀងនេះ ត្រូវតែឆ្លងកាត់ការអនុម័តផ្តល់សច្ចាប័នពីទាំងសងខាង គឺពីសមាជិកសហភាពអឺរ៉ុបទាំងមូល ព្រមទាំងពីសភាអង់គ្លេស។ នៅខាងអឺរ៉ុប បើតាមការលើកឡើងពីមន្ត្រីពាក់ព័ន្ធ គេអះអាងថា ប្រទេសអៀរឡង់ដែលជាអ្នកពាក់ព័ន្ធផ្ទាល់ធំជាងគេ មានគោលជំហរគាំទ្រកិច្ចព្រមព្រៀងនេះ។ ដូច្នេះ ប្រទេសទាំង២៦ផ្សេងទៀត នៃសមាជិកអឺរ៉ុប ក៏ប្រហែលជានឹងមិនមានអ្វីជំទាស់ដែរ។
ដោយឡែកចំណោទធំ គឺនៅសភាអង់គ្លេសឯណោះទេ។ ក្រុមសមាជិកសភាជាតិនិយមមួយចំនួន ជាពិសេសក្រុមអ្នកគាំទ្រលោកអតីតនាយករដ្ឋមន្ត្រីបូរីស ចនសុន ដែលមានជំហរឹងរូសនៅឡើយ មិនគាំទ្រកិច្ចព្រមព្រៀងនេះទេ ព្រោះគេចាត់ទុកថា អង់គ្លេសបាត់បង់អធិបតេយ្យភាព។ លោក រីស៊ី ស៊ូណាក់ កំពុងតែស្ថិតនៅក្នុងតំណាក់កាលមួយលំបាកដែរ ប្រសិនបើមិនទទួលបានការគាំទ្រនៅសភាទេនោះ។ លោករីស៊ី ស៊ីណាក់ សង្ឃឹមដោះស្រាយបញ្ហាអៀរឡង់ខាងជើងនេះឲ្យបាន ដើម្បីយកពេលនិងខួរក្បាលទៅគិតរឿងវិបត្តិសេដ្ឋកិច្ច និងសង្គមមួយរយជំពូកផ្សេងទៀត ដែលប្រទេសអង់គ្លេសកំពុងតែឆ្លងកាត់នាពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ