កូរ៉េខាងត្បូងប្រកាសគម្រោងសងជម្ងឺចិត្ត ជូនដល់ជនរងគ្រោះធ្វើការដោយបង្ខំ កាលជំនាន់អាណានិគមជប៉ុន
ចុះផ្សាយនៅថ្ងៃ៖
ស្តាប់ - ០៨:២៥
ថ្ងៃចន្ទ ទី៦មីនា រដ្ឋាភិបាលកូរ៉េខាងត្បូង បានប្រកាសនូវគម្រោងថ្មីមួយ ដើម្បីប៉ះប៉ូវសងជម្ងឺចិត្ត ជូនដល់ជនរងគ្រោះកូរ៉េខាងត្បូង ដែលត្រូវបានគេចាប់បង្ខំឲ្យធ្វើការ កាលពីក្នុងជំនាន់ជប៉ុនដាក់អាណានិគម រវាងពីឆ្នាំ១៩១០ ដល់ឆ្នាំ១៩៤៥។ ជាផែនការថ្មី ដែលរដ្ឋាភិបាលកូរ៉េខាងត្បូងបានអះអាងថា នឹងអាចបិទបញ្ចប់ទំព័រដ៏ឈឺចាប់ កាលពីអតីតកាល ហើយនឹងឈានទៅចាប់ផ្តើមកសាងទំនាក់ទំនងល្អប្រសើរ រវាងកូរ៉េខាងត្បូងនិងជប៉ុន។ តែយ៉ាងណាក៏ដោយ ផែនការសងជម្ងឺចិត្តដែលរដ្ឋកូរ៉េខាងត្បូងបានប្រកាសនេះ បានទទួលនូវការរិះគន់ជាខ្លាំង ពីសំណាក់សមាគមជនរងគ្រោះ ដោយគេលើកឡើងថា វាជារឿងមិនអាចទទួលយកបានទេ ដែលភាគីជប៉ុន មិនបានចូលរួមសុំទោស តាមរយៈការផ្តល់ជាថវិកាសងជម្ងឺចិត្តដោយផ្ទាល់ មកឲ្យជនរងគ្រោះ។
ជប៉ុនបានដាក់អាណានិគមលើឧបទ្វីបកូរ៉េ អស់រយៈពេល៣៥ឆ្នាំ ពីឆ្នាំ១៩១០ ដល់ឆ្នាំ១៩៤៥។ ជាទំព័រប្រវត្តិសាស្ត្រដ៏សែនឈឺចាប់ណាស់ សម្រាប់ប្រជាជនកូរ៉េ ដែលបានរងនូវអំពើជិះជាន់សង្កត់សង្កិន មើលងាយមើលថោកគ្រប់បែបយ៉ាង ពីសំណាក់អំណាចអាណានិគមជប៉ុន។ យោងតាម តួលេខផ្លូវការកូរ៉េខាងត្បូង គឺយ៉ាងហោចមានប្រជាជនកូរ៉េចំនួន ៧៨ម៉ឺននាក់ ដែលត្រូវបានជប៉ុនកេណ្ឌឲ្យធ្វើការដោយបង្ខំ ដើម្បីបំរើប្រយោជន៍សេដ្ឋកិច្ចនិងឧស្សាហកម្មជប៉ុន។ បន្ថែមពីនេះទៀត គឺនៅមានស្ត្រីកូរ៉េជាច្រើនម៉ឺននាក់ ដែលត្រូវបានគេចាប់បង្ខំឲ្យធ្វើជាទាសករបម្រើការសប្បាយផ្លូវភេទ របស់ពួកទាហានជប៉ុន កាលពីជំនាន់នោះ។
បង្កើតមូលនិធិ ទទួលប្រាក់វិភាគទានពីក្រុមហ៊ុនកូរ៉េខាងត្បូង
គម្រោងថ្មីដែលរដ្ឋកូរ៉េខាងត្បូងបានប្រកាសនៅពេលនេះ គឺគេនឹងសងជម្ងឺចិត្ត ជូនដល់ជនរងគ្រោះដោយការចាប់បង្ខំឲ្យធ្វើការ។ រដ្ឋាភិបាលកូរ៉េខាងត្បូងនឹងបង្កើតមូលនិធិថ្មីមួយ ដោយប្រគល់តួនាទី ជាអ្នកប្រមូលទទួលប្រាក់វិភាគទាន ពីសំណាក់ក្រុមហ៊ុនសហគ្រាសកូរ៉េខាងត្បូងទាំងអស់ ដែលបានទទួលសំណង ក៏ដូចជាអត្ថប្រយោជន៍ហិរញ្ញវត្ថុពីរដ្ឋាភិបាលជប៉ុន ដូចដែលមានចែងកំណត់ក្នុងកិច្ចព្រមព្រៀងឆ្នាំ១៩៦៥។
លោក Park Jin រដ្ឋមន្ត្រីក្រសួងការបរទេសកូរ៉េខាងត្បូង បានបញ្ជាក់ថា ក្នុងគម្រោងថ្មីនេះ គឺគេនឹងទៅជួបក្រុមគ្រួសារជនរងគ្រោះនីមួយៗ ដោយផ្ទាល់តែម្តង ដើម្បីនិយាយអំពីចំនួនទឹកប្រាក់សំណងជំងឺចិត្ត ដែលគេនឹងប្រគល់ជូន។
ផ្ទុះការរិះគន់ ថាហេតុអ្វីមិនមែនជាប្រាក់សំណងជំងឺចិត្តរបស់ជប៉ុន
ការពិតណាស់ ថវិកាដែលគេប្រមូល គឺនឹងបានមកពីក្រុមហ៊ុនសហគ្រាសកូរ៉េខាងត្បូង ដែលក្រុមហ៊ុនសហគ្រាសទាំងនោះ បានទទួលជាសំណង និងអត្ថប្រយោជន៍ហិរញ្ញវត្ថុរួចហើយពីភាគីជប៉ុន ដោយអនុឡោមទៅតាមកិច្ចព្រមព្រៀងឆ្នាំ១៩៦៥។ ត្រង់នេះហើយ ដែលក្រុមជនរងគ្រោះកូរ៉េគេមិនសុខចិត្ត ព្រោះថាវាមិនមែនជាលុយរបស់ជប៉ុនដោយផ្ទាល់នោះទេ។
លោក Lim Jae-Sung មេធាវីតំណាងក្រុមជនរងគ្រោះកូរ៉េ បានសរសេរលើទំព័រFacebook របស់លោកថា គម្រោងថ្មីនេះគឺវាហាក់ដូចជាមានន័យថា អតីតកាលដ៏ឈឺចាប់របស់ជនរងគ្រោះដោយអំពើចាប់បង្ខំឲ្យធ្វើការ ត្រូវគេយកទៅផ្អឹប កប់ចោលជាមួយនឹងប្រាក់សំណង ដែលជប៉ុនបានសងទៅកាន់សហគ្រាសកូរ៉េខាងត្បូងទៅវិញ។ ជនរងគ្រោះកូរ៉េមិនអាចទទួលយកបានទេ គឺគេត្រូវការឲ្យភាគីជប៉ុន រដ្ឋាភិបាលជប៉ុនឬសហគ្រាសជប៉ុន ជាអ្នកសងជម្ងឺចិត្តដោយផ្ទាល់មកឲ្យពួកគេ ដែលវាបញ្ជាក់ពីការសុំខមាលទោសដោយផ្ទាល់ និងស្មោះអស់ពីចិត្តពីសំណាក់ជប៉ុន។
យ៉ាងណាក៏ដោយ លោករដ្ឋមន្ត្រីក្រសួងការបរទេសកូរ៉េខាងត្បូង បានថ្លែងថា ជាការពិតក្នុងគម្រោងសងជម្ងឺចិត្តនេះ គឺមិនមានប្រាក់របស់ភាគីជប៉ុនដោយផ្ទាល់មែន។ ក៏ប៉ុន្តែលោកសង្ឃឹមថា ភាគីជប៉ុន នឹងបង្ហាញកាយវិការសុំទោស តាមរយៈការជួយចូលរួមថវិកា ដោយការស្ម័គ្រចិត្ត នៅថ្ងៃខាងមុខ ដើម្បីធ្វើយ៉ាងណាឲ្យជនរងគ្រោះបានស្ងប់ចិត្ត ហើយក៏ជាការចូលរួមស្តារទំនាក់ទំនងរវាងប្រទេសក្បែរខាងទាំង២ដែរ។
ជប៉ុនសុំខមាលទោសរួចរាល់អស់ហើយ
នៅថ្ងៃចន្ទនេះ លោក Yoshimasa Hayashi រដ្ឋមន្ត្រីក្រសួងការបរទេសជប៉ុន បានថ្លែងអបអរ ចំពោះគម្រោងសងជំងឺចិត្តជនរងគ្រោះ ដែលភាគីកូរ៉េខាងត្បូងបានប្រកាស ដោយលើកឡើងថា វានឹងជួយធ្វើឲ្យទំនាក់ទំនងរវាងប្រទេសទាំង២ បានល្អប្រសើរឡើង។ ក៏ប៉ុន្តែ លោករដ្ឋមន្ត្រីជប៉ុនរូបនេះ បាននិយាយក្នុងន័យដោយប្រយោលថា ជប៉ុននឹងមិនសុំខមាលទោសអ្វី ណាមួយបន្ថែមទៀត ទៅកាន់ភាគីកូរ៉េខាងត្បូងនោះឡើយ។
លោក Yoshimasa Hayashi បានរំលឹកថា កាលពីឆ្នាំ១៩៩៨ លោក Keizo Obuchi នាយករដ្ឋមន្ត្រីជប៉ុនកាលជំនាន់នោះ បានថ្លែងសារសុំខមាលទោស និងសម្តែងការសោកស្តាយយ៉ាងស្មោះអស់ពីចិត្តរួចហើយ ចំពោះទង្វើខុសឆ្គងទាំងឡាយដែលជប៉ុនបានបង្កឲ្យប្រជាជនកូរ៉េ ជួបទុក្ខលំបាក ឈឺចាប់រងគ្រោះ កាលពីអតីតកាល។ បន្ថែមពីនេះទៀត លោកបានរំលឹកថា កិច្ចព្រមព្រៀងឆ្នាំ១៩៦៥ ដែលជប៉ុនបានចុះជាមួយកូរ៉េខាងត្បូង ដើម្បីចាប់ផ្តើមស្តារទំនាក់ទំនងជាមួយគ្នានោះ គឺជប៉ុនបានចំណាយប្រាក់ អស់ជាច្រើនរយលានដុល្លាររួចទៅហើយ តាមរយៈជំនួយហិរញ្ញវត្ថុ និងកម្ចីការប្រាក់ទាបទៅឲ្យភាគីកូរ៉េខាងត្បូង។
ដូច្នេះជារួម បើយើងក្តាប់ន័យទៅ គឺខាងជប៉ុនគេគិតថា គេមិនអាចអង្គុយតែសុំទោសរហូតនោះទេ។ គេបានធ្វើរួចហើយ ហើយក៏បានចំណាយប្រាក់សងជម្ងឺចិត្ត ទៅឲ្យកូរ៉េខាងត្បូងរួចរាល់ដែរ។ ដូច្នេះអំណេះតទៅ គឺគួរតែបិទទំព័រប្រវត្តិសាស្ត្រដ៏ឈឺចាប់នេះ ឲ្យវាចប់ ហើយកាន់ដៃគ្នាដើរទៅមុខទៀត វាប្រសើរជាង។
ដំបៅប្រវត្តិសាស្ត្រ ដែលរំខានទំនាក់ទំនងល្អរវាងប្រទេសទាំង២
ដោយឡែក ក្នុងសំណុំរឿង សំណងជំងឺចិត្តជូនទៅដល់ស្ត្រីរងគ្រោះកូរ៉េខាងត្បូង ដែលត្រូវបានកងទ័ពជប៉ុនចាប់បង្ខំឲ្យធ្វើជាទាសករផ្លូវភេទនោះ គឺនៅតែជាបញ្ហាវិវាទមើលមុខគ្នាមិនត្រង់ដដែល រវាងប្រទេសទាំង២នេះ។ បើផ្អែកតាមតួលេខរបស់អ្នកស្រាវជ្រាវប្រវត្តិសាស្ត្រ គឺយ៉ាងហោចមានស្ត្រីចំនួនមិនតិចជាង២សែននាក់ទេ ដែលត្រូវបានកងទ័ពជប៉ុន ចាប់បង្ខំឲ្យធ្វើជាទាសករបម្រើផ្លូវភេទ ក្នុងពេលដែលជប៉ុនដាក់អាណានិគមនៅឧបទ្វីបកូរ៉េនិងនៅចិន។ ក្នុងចំណោមស្ត្រីរងគ្រោះទាំងនេះ គឺមានភាគច្រើនជាស្ត្រីកូរ៉េ។
ទាក់ទិននឹងសំណុំរឿងសងជម្ងឺចិត្តជូនស្ត្រីកូរ៉េនេះ គឺកាលពីឆ្នាំ២០១៥ ជប៉ុននិងកូរ៉េខាងត្បូង បានចុះកិច្ចព្រមព្រៀងជាមួយគ្នាមួយ ដោយជប៉ុនបានសុំខមាលទោសជាផ្លូវការ ហើយបានបង្កើតមូលនិធិមួយមានទឹកប្រាក់ចំនួន ១ពាន់លានយ៉េន ដើម្បីសងជំងឺចិត្តទៅដល់ក្រុមគ្រួសារជនរងគ្រោះ។ តែទីបំផុត គឺភាគីកូរ៉េខាងត្បូង ជាអ្នកដកថយ ដោយសារតែគ្មានការយល់ព្រម ពីសំណាក់ក្រុមជនរងគ្រោះ។
ហើយក្រោយមកទៀត នៅឆ្នាំ២០១៨ តុលាការកំពូលកូរ៉េខាងត្បូង បានចេញសាលក្រមជាប្រវត្តិសាស្ត្រមួយ ដោយបានបង្គាប់ឲ្យក្រុមហ៊ុនជប៉ុនរាប់រយក្រុមហ៊ុន ត្រូវតែបង់ប្រាក់សងជំងឺចិត្តមកឲ្យជនរងគ្រោះកូរ៉េ។ បញ្ហានេះ វាបានធ្វើឲ្យកម្រើកឡើងវិញកាន់តែខ្លាំង នូវជម្លោះការទូត រវាងប្រទេសទាំង២នេះ។ ឆ្នាំ២០១៩ ជប៉ុនបានបិទខ្ទប់ការនាំចេញទំនិញសារធាតុគីមីមួយចំនួន ទៅកាន់កូរ៉េខាងត្បូងថែមទៀតផង ដើម្បីបង្ហាញពីការខឹងសម្បាររបស់ខ្លួន។
តែយ៉ាងណាប៉ុន្មានឆ្នាំមកនេះ យើងសង្កេតឃើញថា ភាគីរដ្ឋាភិបាលទាំងសងខាងប្រឹងប្រែងរំងាប់កំហឹងរៀងៗខ្លួន។ ការចរចាគ្នាបានចាប់ផ្តើម ដើម្បីបើកការនាំចេញទំនិញទាំងស្រុងឡើងវិញ ហើយភាគីកូរ៉េខាងត្បូង ក៏បានសុខចិត្ត ដកចេញពាក្យបណ្តឹងនៅអង្គការពាណិជ្ជកម្មពិភពលោកដែរ ដើម្បីបង្ហាញថាខ្លួនចង់ជានាជាមួយជប៉ុន។ ជាមួយនឹងផែនការថ្មីនៅពេលនេះ ដែលកូរ៉េខាងត្បូងបានផ្តួចផ្តើមតែម្នាក់ឯង ដើម្បីសងជំងឺចិត្តជូនជនរងគ្រោះខ្លួន ក៏វាជាកាយវិការមួយបង្ហាញថា រដ្ឋាភិបាលកូរ៉េខាងត្បូង ចង់បិទបញ្ចប់ជម្លោះប្រវត្តិសាស្ត្រនេះជាមួយជប៉ុន។
យ៉ាងណាមិញ កាយវិការនេះ ត្រូវបានលោកចូ បៃដិន ថ្លែងកោតសរសើរខ្លាំងណាស់ ថាវាគឺជាការបោះជំហាន បើកទំព័រប្រវត្តិសាស្ត្រថ្មី រវាងប្រទេសទាំង២ ដែលសុទ្ធតែជាសម្ព័ន្ធមិត្តរបស់អាមេរិក។ លោកអង់តូនី ប្លិងកិន ក៏បានកោតសរសើរដែរ ចំពោះសេចក្តីក្លាហានរបស់រដ្ឋាភិបាលកូរ៉េខាងត្បូង ដែលមានទស្សនវិស័យវែងឆ្ងាយ។ ជាការពិតភារៈ កាលៈទេសៈពេលនេះ វាគឺជាផលប្រយោជន៍អាមេរិក ដែលកូរ៉េខាងត្បូង និងជប៉ុនត្រូវតែបំភ្លេចចោលជម្លោះប្រវត្តិសាស្ត្រ ហើយងាកមកចាប់ដៃគ្នា រួមសហការគ្នាឲ្យបានគ្រប់វិស័យ ទាំងសេដ្ឋកិច្ចនិងយោធា នៅក្នុងបរិបទដែលអាមេរិកត្រូវការកម្លាំងសហការរួមគ្នា ដើម្បីទប់ទល់ជាមួយចិននិងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ