លោកម៉ាក្រុងទៅទស្សនកិច្ចនៅចិន និយាយរឿងអ៊ុយក្រែន សេដ្ឋកិច្ច និងស្ថិរភាពតំបន់ឥណ្ឌូប៉ាស៊ីហ្វិក
ចុះផ្សាយនៅថ្ងៃ៖
លោកអេម៉ានុយអែល ម៉ាក្រុង ប្រធានាធិបតីបារាំង បានធ្វើដំណើរទៅដល់ទីក្រុងប៉េកាំង នៅថ្ងៃពុធទី៥មេសា។ យោងតាមវិមានប្រធានាធិបតីបារាំង ក្នុងដំណើរទស្សនកិច្ចរយៈពេល៣ថ្ងៃនេះ លោកម៉ាក្រុងនឹងជួបជាមួយលោកប្រធានាធិបតីចិន ស៊ី ជីនពីង ដើម្បីនិយាយពីសំណុំរឿងជាច្រើន រួមទាំងទំនាក់ទំនងវប្បធម៌ សេដ្ឋកិច្ច ពាណិជ្ជកម្ម និងជាពិសេសនោះ គឺសំណុំរឿងសង្គ្រាមនៅអ៊ុយក្រែន។ បារាំង ក៏ដូចជាសហភាពអឺរ៉ុប មានបំណងចង់បញ្ចុះបញ្ចូល ឲ្យចិនដើរតួនាទីសំខាន់ ក្នុងការអូទាញឲ្យរុស្ស៊ី យល់ព្រមបិទបញ្ចប់សង្គ្រាមនេះ ឲ្យបានឆាប់បំផុត។
ផ្សារភ្ជាប់ទំនាក់ទំនងចិន-បារាំងឡើងវិញ
ប្រមាណជាង៣ឆ្នាំមកនេះ ទំនាក់ទំនងរវាងបារាំង នឹងចិន បានឃ្លាតឆ្ងាយ មិនសូវផ្អែមល្អែមទេ ដោយសារតែបញ្ហាវិបត្តិជម្ងឺឆ្លងកូវីដ១៩។ ដូចយើងបានដឹងហើយ រដ្ឋអំណាចចិន បានបិទទ្វារប្រទេសទាំងស្រុង អស់ជាង២ឆ្នាំ ហើយបានបង្កទំនាក់ទំនងទ្វេភាគី រវាងចិននិងបារាំងក្នុងច្រើនវិស័យណាស់។ ប្រជាជនបារាំង ដែលរស់នៅ និងធ្វើការនៅក្នុងប្រទេសចិន នៅក្នុងអំឡុងពេលនោះ បានទទួលរងនូវផលវិបាកជាច្រើន ដោយសារតែវិធានការបិទខ្ទប់យ៉ាងខ្លាំងក្លា របស់អាជ្ញាធរចិន។ រដ្ឋបារាំង ព្យាយាមជួយយ៉ាងណា ក៏មិនអាចទៅរួចបានដែរ ព្រោះវាទើសនឹងភាពរឹងរូសរបស់រដ្ឋអំណាចចិន។
តាមរយៈទស្សនកិច្ចនៅប៉េកាំង ក្នុងពេលនេះ គឺរដ្ឋាភិបាលបារាំង សង្ឃឹមផ្សារភ្ជាប់ទំនាក់ទំនងជាមួយចិនឡើងវិញ ឲ្យបានល្អប្រសើរគ្រប់វិស័យ និងគ្រប់កម្រឹតជាន់ថ្នាក់។ បារាំង មានបំណងផ្តល់អាទិភាព ដល់ការផ្សារភ្ជាប់ទំនាក់ទំនងមនុស្ស ក្នុងវិស័យអប់រំ និងវប្បធម៌។ បារាំង ចង់ជំរុញឲ្យកម្មវិធីផ្លាស់ប្តូរនិស្សិតទៅវិញទៅមក មានសន្ទុះល្អប្រសើរឡើងវិញ ព្រោះចំណុចនេះសំខាន់ណាស់នៅក្នុងការឆ្វេងយល់ពីគ្នា រាប់អានគ្នាគោរពគ្នាទៅវិញទៅមក។
គឺក្នុងក្របខណ្ឌនេះហើយ បានជាបារាំងបានរៀបចំផ្តួចផ្តើម មហោស្រពវប្បធម៌ចិន-បារាំង មួយដ៏ធំ នៅទីក្រុងប៉េកាំង ដែលមានឈ្មោះថា មហោស្រព “Croissement » ប្រែថា ការជួបប្រទាក់គ្នា។ ថ្ងៃពុធនេះ ពេលទៅដល់ប៉េកាំង លោកម៉ាក្រុងនឹងទៅបើកសម្ពោធមហោស្រពដ៏ធំនេះ ដោយមានការចូលរួមពីតារា សិល្បៈករល្បីៗរបស់បារាំងនិងចិនចូលរួមជាច្រើននាក់។
នៅថ្ងៃព្រហស្បតិ៍ទី៦មេសា លោកម៉ាក្រុងនឹងចូលទៅជួបលោកប្រធានាធិបតីចិន ស៊ី ជីនពីង ពិភាក្សាការងារ និងមានពិធីលាងសាយភោគរួមគ្នា។ បន្ទាប់មកទៀត ថ្ងៃសុក្រ លោកម៉ាក្រុងនឹងបន្តដំណើរទៅខេត្តគ័ងតុង ដែលលោកនឹងទៅជួបជាមួយនិស្សិតចិននៅទីនោះ ហើយលោកស៊ី ជីនពីង ក៏នឹងស្កាត់ទៅពិសារបាយល្ងាយតែពីរនាក់ ជាមួយលោកម៉ាក្រុងនៅទីនោះដែរ។ នេះបើផ្អែកតាមប្រភពពីមន្ត្រីវិមានប្រធានាធិបតីបារាំង។
បញ្ចុះបញ្ចូលចិនឲ្យជួយជំរុញរុស្ស៊ី ដើម្បីបញ្ចប់សង្គ្រាម
សំណុំរឿងអ៊ុយក្រែន គឺជាប្រធានបទធំមួយ នៅក្នុងកម្មវត្ថុនៃទស្សនកិច្ចរបស់លោកម៉ាក្រុងនៅចិន នាពេលនេះ។ មិនថាបារាំង អាមេរិក ឬសហភាពអឺរ៉ុបទេ គឺគេដឹងយ៉ាងច្បាស់ថា ចិនមានទំងន់កម្រិតណា ទៅលើរុស្ស៊ី។ មានតែលោកស៊ី ជីនពីងទេ ដែលអាចនិយាយជាមួយលោកពូទីនបាន។ មន្ត្រីវិមានរដ្ឋាភិបាលបារាំង បានលើកឡើងថា ចិនតែមួយ អាចធ្វើឲ្យប្រែប្រួលទាំងស្រុង ដល់សង្គ្រាមនៅអ៊ុយក្រែន។ គោលជំហរ ឬការសម្រេចចិត្តរបស់ចិន គឺវាអាចធ្វើឲ្យសង្គ្រាមនេះចប់ ឬអាចធ្វើឲ្យសង្គ្រាមនេះកាន់តែធ្ងន់ធ្ងរខ្លាំង។ អ្វីដែលគេបារម្ភ គឺខ្លាចចិន ជ្រើសរើស ក្លាយជាផ្នែកមួយនៃការបន្តសង្គ្រាម តាមរយៈការជួយផ្គត់ផ្គង់អាវុធឲ្យរុស្ស៊ី។
មុនពេលឡើងយន្តហោះទៅប៉េកាំង កាលពីល្ងាចម្សិលមិញ លោកម៉ាក្រុង បានទូរស័ព្ទទៅនិយាយជាមួយលោកចូ បៃដិន។ ប្រធានាធិបតីទាំង២បាននិយាយអំពីបំណងដូចគ្នា ក្នុងការធ្វើយ៉ាងណា ប្រឹងប្រែងជំរុញឲ្យចិន ជួយចូលរួមដើម្បីបិទបញ្ចប់សង្គ្រាមនៅអ៊ុយក្រែន កសាងសន្តិភាពឲ្យមានលក្ខណៈយូរអង្វែងនៅក្នុងតំបន់។ លោកប្រធានាធិបតីបារាំង និងព្យាយាមបញ្ចុះបញ្ចូលលោកស៊ី ជីនពីង ថាត្រូវតែប្រកាន់ជំហរ ការពារ ស្ថិរភាព និង ការរីកចម្រើនលូតលាស់ ពោលគឺសុទ្ធតែជាពាក្យស្លោកដែលភាគីចិន តែងតែប្រកាសជានិច្ច។ ក្នុងន័យនេះ គឺចិនត្រូវតែជួយចូលរួម បញ្ចុះបញ្ចូលភាគីរុស្ស៊ី ឲ្យងាកមកបញ្ចប់សង្គ្រាម ឈានចូលការចរចាដោយសន្តិវិធី។
ប្រភពពីវិមានប្រធានាធិបតីបារាំង ក៏បានឲ្យដឹងដែរថា លោកម៉ាក្រុង ចង់បញ្ចុះបញ្ចូលឲ្យលោកស៊ី ជីនពីង ទទួលទូរស័ព្ទរបស់លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី។ លោកហ្សេឡេនស្គី បានអំពាវនាវ ច្រើនដងហើយ ថាលោកចង់និយាយជាមួយលោកស៊ី ជីនពីងដោយផ្ទាល់ តែរហូតមកទល់ពេលនេះ ភាគីចិនមិនដែលឆ្លើយយល់ព្រមទេ។ ខុសពីគោលជំហររបស់លោកចូ បៃដិន ដែលបន្ទោស និងដាក់សំពាធខ្លាំងទៅលើចិន លោកម៉ាក្រុងវិញ ព្យាយាមបន្តថ្នមចិត្តចិន មិនបន្ទោសលោកស៊ី ជីនពីងធ្ងន់ៗទេ ពាក់ព័ន្ធនឹងទំនោរងាកទៅរករុស្ស៊ីរបស់គាត់។ ជាយុទ្ធសាស្ត្រ មិនចង់រុញចិនឲ្យបែរខ្នងខឹងកាន់តែខ្លាំង ព្រោះលោកម៉ាក្រុងជឿថា ថ្ងៃណាមួយក្រុមប្រទេសលោកខាងលិច នឹងនៅតែត្រូវការលោកស៊ីជីនពីង ដើម្បីនិយាយបញ្ចុះបញ្ចូលលោកពូទីន។
សង្គ្រាមអូសបន្លាយ ចិនក៏ខាតបង់ប្រយោជន៍
អាវុធចុងក្រោយរបស់លោកម៉ាក្រុង គឺទំនាក់ទំនងសេដ្ឋកិច្ចពាណិជ្ជកម្ម រវាងចិននិងអឺរ៉ុប។ យ៉ាងណាមិញ នៅពេល ជួបលោកប្រធានាធិបតីចិន នៅក្រុងប៉េកាំងស្អែកនេះ គឺលោកម៉ាក្រុង មិនមែនទៅតែម្នាក់ឯងទេ។ លោកស្រីប្រធានគណកម្មការអឺរ៉ុប អៀរស៊ូឡា វុនឌឺឡេយេន នឹងមានវត្តមានចូលរួមដែរ។ មានន័យថា បារាំងរួមគ្នាជាមួយសហភាពអឺរ៉ុបទាំងមូលតែម្តង ដែលចង់និយាយជាមួយចិនឲ្យទាក់ទិននឹងការចូលរួមជួយបិទបញ្ចប់សង្គ្រាមនេះ។
បើចិននៅតែមិនជួយចូលរួមទេនោះ ចិនខ្លួនឯងក៏នឹងខាតបង់ធ្ងន់ដែរ នៅក្នុងវិស័យសេដ្ឋកិច្ចពាណិជ្ជកម្ម ល្គិកណាសង្គ្រាមនេះកាន់តែអូសបន្លាយ។ ចូរកុំភ្លេចថា អឺរ៉ុបគឺជាដៃគូរពាណិជ្ជកម្មដ៏ធំមួយរបស់ចិន។ អមដំណើរលោកម៉ាក្រុងទៅប៉េកាំងលើកនេះ គឺមានតំណាងក្រុមហ៊ុនឧស្សាហកម្មអឺរ៉ុបធំៗប្រមាណជាង៥០ក្រុមហ៊ុនឯណោះ។ ចិន មិនអាចព្រងើយ បណ្តោយឲ្យខាតបង់ផលប្រយោជន៍សេដ្ឋកិច្ចខ្លួនទេ ខណៈពេលនេះ ទីផ្សារកាន់តែរួមតូចចង្អៀត ដោយសារតែមានប្រទេសផ្សេងមកប្រកួតប្រជែង តួយ៉ាង ឥណ្ឌា និងវៀតណាមជាដើម។
លោកស្រីប្រធានគណកម្មការអឺរ៉ុបបានលើកឡើងថា ចិនបច្ចុប្បន្ននេះ កំពុងតែព្យាយាមប្រើឥទ្ធិពលធ្វើឲ្យប្រែប្រួលដល់សណ្ដាប់ធ្នាប់សកលលោក ដែលកន្លងមកគឺអាមេរិកនិងក្រុមប្រទេសលោកខាងលិចជាអ្នកចាត់ចែង។ ពេលនេះចិនចង់ឲ្យគេធ្វើតាមទស្សនវិស័យខ្លួនម្តង តាមរយៈការចូលរួមលូកដៃ នៅក្នុងសំណុំរឿងសំខាន់ៗមួយចំនួន។ ទស្សនវិស័យចិន វាអាចមកខ្ទាស់ជាមួយនឹងទស្សនវិស័យរបស់ភាគីអឺរ៉ុប។ ដូច្នេះ អ្វីៗអាចប្រើប្រួលកំរិតណា គឺវាអាស្រ័យថា ចិនមានការតាំងចិត្តខ្លាំងកម្រិតណា ដើម្បីសម្រេចកម្មវត្ថុខ្លួន។ តែយ៉ាងណា លោកស្រី វុនឌឺឡេយេន បានអះអាងថា អឺរ៉ុបក៏មិនអាចផ្តាច់ទំនាក់ទំនងនយោបាយ សេដ្ឋកិច្ច និងសង្គម ទាំងស្រុងជាមួយចិននោះដែរ។ គ្មានអ្វីមួយ ស ឬ ខ្មៅទាំងស្រុងនោះឡើយ។ ដូច្នេះគឺត្រូវតែធ្វើការងាររួមគ្នា ដើម្បីកាត់បន្ថយហានិភ័យដែលអាចឈានទៅមានជម្លោះ។
តែទន្ទឹមគ្នានេះ លោកស្រីប្រធានគណកម្មការអឺរ៉ុបអះអាងថា អឺរ៉ុបនឹងប្រឹងប្រែង ពង្រឹងតុល្យភាពជាមួយចិនឡើងវិញ។ ដែលមានន័យថា អឺរ៉ុបមិនអាចផ្តេកផ្តួល ពឹងផ្អែកខ្លាំង ទៅលើទំនាក់ទំនងពាណិជ្ជកម្ម និងទីផ្សារចិននោះទេ។ អឺរ៉ុបត្រូវតែពង្រឹងឯករាជ្យភាព ស្វ័យភាពរបស់ខ្លួន ជាពិសេសក្នុងវិស័យយុទ្ធសាស្ត្រមួយចំនួន ដូចជាបច្ចេកវិទ្យាទំនើបជាដើម។
បារាំងចង់ដើរតួជាជម្រើសទី៣ នៅតំបន់ឥណ្ឌូប៉ាស៊ីហ្វិកវិញ
ទាក់ទិននឹងសំណុំរឿងសន្តិសុខស្ថិរភាពតំបន់ឥណ្ឌូប៉ាស៊ីហ្វិក គេឃើញថាបារាំងហាក់ដូចជាអវត្តមានខ្លាំង ទាំងដែលធាតុពិតបារាំង មិនមែនគ្មានភាពស្របច្បាប់ក្នុងការចូលរួមចាត់ចែង ឬការពារផលប្រយោជន៍ខ្លួន នោះទេ។ បារាំងមានអធិបតេយ្យភាពលើដែនទឹកធំជាងគេលំដាប់ទី២ បន្ទាប់ពីអាមេរិក ពោលគឺមានទំហំប្រមាណ ១១លានគីឡូម៉ែត្រក្រឡា។ នៅក្នុងតំបន់អាស៊ីប៉ាស៊ីហ្វិក បារាំងមានដែនដីច្រើន មានប្រជាជនរស់នៅប្រមាណ១លាន៦សែននាក់ ហើយមានទាហានបារាំងប្រមាណ៧០០នាក់ឈរជើងជាប្រចាំក្នុងតំបន់នេះ ដើម្បីការពារសន្តិសុខ។
យោងតាមលោក Cédric Perrin សមាជិកព្រឹទ្ធសភាបារាំងម្នាក់ គឺពេលនេះ បារាំងត្រូវតែបញ្ជាក់ជំហរឲ្យបានច្បាស់ប្រាប់ទៅចិន។ ជាទូទៅ គេគិតថាបារាំងជាសម្ព័ន្ធមិត្តរបស់អាមេរិកពិតមែន។ តែធាតុពិត បារាំង ក៏មានផលប្រយោជន៍ផ្សេង ខុសពីអាមេរិក ដែលត្រូវការពារដែរ។ ក្នុងន័យនេះបារាំងមិនអាចចេះតែត្រុកត្រុកតាមពីក្រោយអាមេរិកគ្រប់រឿងនោះទេ។
យោងតាមលោកស្រី Isabelle Saint-Mezard អ្នកស្រាវជ្រាវនៅវិទ្យាស្ថានទំនាក់ទំនងអន្តរជាតិបារាំង នៅក្នុងបញ្ហាតំបន់ឥណ្ឌូប៉ាស៊ីហ្វិក អ្វីដែលបារាំងអាចធ្វើបាន គឺស្ថិតនៅកណ្តាល ធ្វើជាជម្រើសទី៣។ មានន័យថា ប្រទេសក្នុងតំបន់ មិនមែនគ្មានជម្រើសផ្សេង ក្រៅតែពីនៅខាងចិន ឬនៅខាងអាមេរិកនោះទេ។ បារាំងអាចក្លាយជាជម្រើសកណ្តាល ឈរលើការសហការការពារសន្តិសុខ រួមបញ្ចូលគ្នា ច្រើនភាគី ដូចជាជាមួយឥណ្ឌា ឥណ្ឌូណេស៊ី ហ្វីលីពីន និងសិង្ហបុរីជាដើម។ បារាំងតំណាងឲ្យអឺរ៉ុបនៅតំបន់នេះ ហើយបារាំង មានសមត្ថភាពយោធាមិនអន់ណាស់ណាទេ។ លោក Jeremy Bachelier អតីតនាយទាហានជើងទឹកបារាំង បានលើកឡើងថា វត្តមានរបស់កងទ័ពបារាំងក្នុងតំបន់អាស៊ីប៉ាស៊ីហ្វិក គឺមិនមែនទៅបង្កបញ្ហាឲ្យកាន់តែរីកធំទេ តែគឺទៅចូលរួមផ្តល់សន្ទុះដល់ការនិយាយស្រុះស្រួលគ្នាដោយសន្តិវិធី ដើម្បីរក្សាStatu quo តួយ៉ាងដូចជាក្នុងសំណុំរឿងកោះតៃវ៉ាន់ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ