បារាំង៖ ផ្ទុះអំពើហិង្សា ក្រោយករណីនគរបាលបាញ់សម្លាប់ក្មេងជំទង់ម្នាក់ ដែលមិនព្រមឈប់រថយន្ត
ចុះផ្សាយនៅថ្ងៃ៖
ស្តាប់ - ០៨:១៧
នៅបារាំង ភាគខាងលិចជាយទីក្រុងប៉ារីស មានផ្ទុះនូវអំពើហិង្សាដុតរថយន្ត និងទ្រព្យសម្បត្តិសាធារណៈ កាលពីយប់ថ្ងៃអង្គារ ឈានចូលថ្ងៃពុធនេះ។ អំពើហិង្សា ដែលបានផ្ទុះឡើង បន្ទាប់ពីមានករណីនគរបាលបារាំង បានបាញ់ក្មេងជំទង់ម្នាក់បណ្តាលឲ្យស្លាប់ បន្ទាប់ពីក្មេងជំទង់នោះ បានបដិសេធមិនស្តាប់ការឃាត់រថយន្ត។ ករណីនេះ បានបណ្តាលឲ្យផ្ទុះមតិរិះគន់ ទៅលើកងសមត្ថកិច្ច ក៏ដូចជាស្ថាប័ននគរបាលបារាំងទាំងមូលតែម្តង ថាបាននិងកំពុងតែប្រើប្រាស់កម្លាំងហួសប្រមាណ ទៅលើប្រជាពលរដ្ឋ ក្នុងនាមខ្លួនជាអ្នករក្សាសន្តិសុខសុវត្ថិភាព។ បញ្ហា អំពើហិង្សារបស់នគរបាល តែងតែជាចំណុចរសើប បង្កឲ្យមានការជជែកតវ៉ា តឹងសរសៃក មិនថានៅលើឆាកនយោបាយ និងក្នុងសង្គមបារាំងជាទូទៅ។
ចាប់ពីល្ងាចថ្ងៃអង្គារ ឈានដល់យប់ជ្រៅ អំពើហិង្សាអនាធិបតេយ្យ បានផ្ទុះឡើង នៅតាមសង្កាត់ជាច្រើន ត្រង់នេះបន្តិច ត្រង់នោះបន្តិច នៅតំបន់ Nanterre ជាយក្រុងប៉ារីស ភាគខាងលិច ហើយបានរីកសាយភាយទៅកាន់ឃុំ សង្កាត់ផ្សេងៗទៀត ជាប់នោះដែរ។ ក្រុមបាតុករ ដែលភាគច្រើន ជាយុវជន បានដុតរថយន្ត ដុតជំរកស្ថានីយ៍រថយន្តក្រុង ជាច្រើនទីតាំង និងបានវាយបំផ្លាញទ្រព្យសម្បតិ្តសាធារណៈជាច្រើនផ្សេងទៀត។ អគ្គីភ័យបានឆាបឆេះសាលាតូរ្យតន្ត្រីមួយកន្លែងក្នុងសង្កាត់ ហើយក្រុមបាតុករបានដុតភ្លើង នៅតាមបណ្តោយផ្លូវរថភ្លើងថែមទៀត។ យ៉ាងហោចណាស់ បាតុករហិង្សា ចំនួន២០នាក់ត្រូវបានចាប់ខ្លួន កាលពីយប់ថ្ងៃអង្គារ។ គិតត្រឹមព្រឹកថ្ងៃពុធនេះ ស្ថានការណ៍បានស្ងប់បន្តិតទៅវិញហើយ តែមិនប្រាកដថាល្ងាចនេះ នឹងមិនផ្ទុះឡើងបន្តទៀតនោះទេ។
មិនឈប់រថយន្តតាមការបង្គាប់របស់នគរបាល
អំពើហិង្សា អនាធិបតេយ្យទាំងនេះ បានផ្ទុះឡើង គឺបន្ទាប់ពីមានករណីនគរបាលបានបាញ់បណ្តាលឲ្យស្លាប់យុវជនម្នាក់។ ហេតុការណ៍បានកើតឡើង នៅព្រឹកថ្ងៃអង្គារ នៅសង្កាត់ Nanterre ដែលជនរងគ្រោះស្លាប់ អាយុ១៧ឆ្នាំ កំពុងបើករថយន្តប្រណិតមួយ។ ពីដំបូង ប្រភពពីនគរបាលបារាំង អះអាងថា ជនរងគ្រោះបានបដិសេធមិនព្រមឈប់ ទៅតាមការឃាត់របស់នគរបាល២នាក់ ដែលជិះម៉ូតូ។ មិនស្តាប់ការឃាត់ហើយ ជនរងគ្រោះបានបើករថយន្តសំដៅចង់បុកនគរបាល ទើបធ្វើឲ្យនគរបាលម្នាក់ក្នុងចំណោម២នាក់នោះ ប្រើកាំភ្លើងបាញ់។
ដោយឡែក ស្រាប់តែនៅពេលរសៀលថ្ងៃអង្គារ មានវីដេអូខ្លីមួយ ដែលត្រូវបានគេចែកចាយពាសពេញបណ្តាញសង្គម នៅបារាំង។ ក្នុងវីដេអូនោះ គេឃើញថា រថយន្តប្រណិត Mercedes AMG ពណ៌លឿងបានឈប់ ហើយមាននគរបាល២នាក់ កំពុងឱននិយាយជាមួយអ្នកនៅក្នុងរថយន្ត ដោយមានម្នាក់កាន់កាំភ្លើងភ្ជង់ផង។ តាមរយៈវីដេអូនេះ គេឮសំឡេងបន្លឺជាភាសាបារាំងថា “Tu vas te prendre une balle dans la tête” ដែលប្រែមកថា “ហ្អែង ប្រយ័ត្នយើងបាញ់ចំកណ្ដាលក្បាល”។ ភ្លាមៗ រំពេចនោះ ស្រាប់តែរថយន្តបានបើកទៅមុខ ហើយក៏មានសំលេងផ្ទុះគ្រាប់កាំភ្លើងភ្លាមដែរ។ រថយន្តបានទៅបុកបង្គោលផ្លាកសញ្ញាចរាចរណ៍ ហើយយុវជនអាយុ១៧ឆ្នាំ ដែលជាអ្នកបើករថយន្ត ត្រូវគ្រាប់កាំភ្លើងចំទ្រូងក្បែរបេះដូង ក៏ស្លាប់ភ្លាមៗនៅនឹងកន្លែង។ ក្នុងរថយន្តនោះ មានមនុស្ស២នាក់ទៀត ម្នាក់ជាក្មេងជំទង់អនីតិជនដែរ ត្រូវបាននគរបាលឃាត់ខ្លួន ចំណែកម្នាក់ទៀត បានរត់គេចខ្លួន រកមិនទាន់ឃើញទេ។
មនុស្សឃាតដោយចេតនា
មានការស៊ើបអង្កេត២ ត្រូវបានគេបើក ទីមួយ គឺពាក់ព័ន្ធទៅលើជនរងគ្រោះ អំពី ករណីបដិសេធមិនសហការ មិនឈប់រថយន្តទៅតាមការឃាត់របស់សមត្ថកិច្ច។ ចំណែកករណីទី២ គឺករណីមនុស្សឃាតដោយចេតនា ធ្វើឡើងដោយបុគ្គល ដែលមានអំណាចសាធារណៈ គឺនគរបាលនេះឯង។ នគរបាល អាយុ៣៨ឆ្នាំ ដែលជាអ្នកបានបាញ់គ្រាប់កាំភ្លើង បណ្តាលឲ្យស្លាប់ក្មេងជំទង់នេះ ត្រូវបានគេឃាត់ខ្លួនហើយ ដោយប្រឈមនឹងបទចោទប្រកាន់ មនុស្សឃាតដោយចេតនា។
ការស៊ើបអង្កេតទី១ ត្រូវបានប្រគល់ទៅឲ្យ អយ្យការអមតុលាការក្រុង Nanterre។ ចំណែកការស៊ើបអង្កេតទី២ គឺត្រូវបានប្រគល់ទៅឲ្យ អគ្គស្នងការរដ្ឋានគរបាលជាតិបារាំង ដែលមានតួនាទីស៊ើបអង្កេតទៅលើបទល្មើស បង្កឡើងដោយសមត្ថកិច្ចនគរបាល។
ដោយឡែក ខាងក្រុមគ្រួសារជនរងគ្រោះវិញ នឹងដាក់ពាក្យបណ្តឹង២។ លោក Yassine Bouzrou ដែលជាមេធាវីតំណាងក្រុមគ្រួសារជនរងគ្រោះ បានបញ្ជាក់ថា បណ្តឹងទី១ គឺទាក់ទិននឹងករណីមនុស្សឃាតដោយចេតនា ដែលសំដៅទៅលើនគរបាលដែលជាខ្មាន់កាំភ្លើង និងករណីផ្សំគំនិត ដែលសំដៅទៅលើនគរបាលម្នាក់ទៀត ដែលមានវត្តមានក្នុងពេលកើតហេតុ។ ចំណែកបណ្តឹងទី២ គឺទាក់ទិននឹងការផ្សព្វផ្សាយជាសាធារណៈ ដែលប្រាសចាកពីការពិត។ បណ្តឹងនេះ គឺសំដៅលើស្ថាប័ននគរបាលតែម្តង ដែលបានលើកឡើងថា ហេតុការណ៍បានកើតឡើងដោយសារតែជនរងគ្រោះ បើករថយន្តប៉ុនប៉ងបង្កគ្រោះថ្នាក់ ទៅលើសមត្ថកិច្ចនគរបាល ទើបបណ្តាលឲ្យមានការបាញ់គ្រាប់កាំភ្លើង។ លោកមេធាវីការពារគ្រួសារជនរងគ្រោះ បានបញ្ជាក់ថា ការផ្សព្វផ្សាយរបស់នគរបាលខាងលើនេះ ត្រូវបានបកអាក្រាតយ៉ាងច្បាស់ថា មិនមែនជាការពិតទេ បន្ទាប់ពីគេបានឃើញវីដេអូ ថតផ្ទាល់នៃហេតុការណ៍នេះ។
នរគបាលបារាំងហិង្សា?
បញ្ហាអំពើហិង្សារបស់នរបាល គឺជាចំណុចរសើបខ្លាំងណាស់ ប៉ុន្មានឆ្នាំចុងក្រោយនេះ នៅបារាំង។ ក្រុមអ្នកនយោបាយប្រឆាំង តែងតែយកវាមកចោទ រិះគន់ការប្រើអំណាចរបស់អាជ្ញាធរ រដ្ឋាភិបាល ជាពិសេសនៅក្នុងពេលធ្វើបាតុកម្មតវ៉ាផ្សេងៗ ដែលមានការបង្ក្រាបធម៌ក្តៅ។ តែទន្ទឹមគ្នានេះ បាតុកម្មក៏វាកាន់តែហិង្សាដែរ។
ទាក់ទិននឹងករណី សមត្ថកិច្ចនគរបាល ប្រើប្រាស់កាំភ្លើងបាញ់បណ្តាលឲ្យស្លាប់ ទៅលើអ្នកបើកបរដែលមិនស្តាប់ការឃាត់រថយន្តនេះ គឺពិតជាបានកើនឡើងខ្លាំងពិតមែន។ ក្នុងឆ្នាំ២០២២កន្លងទៅ គឺមានស្លាប់មនុស្សចំនួន១៣នាក់ ពោលគឺជាតួលេខខ្ពស់បំផុតមិនធ្លាប់មានទេ។ សំណួរ សួរថា តើនគរបាលបារាំងកាន់តែហិង្សា ឬមួយក៏មកពីអ្នកបើកបរ ដែលកាន់តែលែងស្តាប់បញ្ជារបស់នគរបាល ? វាអាចមានកត្តាច្រើនណាស់ គួបផ្សំគ្នា ទីមួយ មនុស្សក្នុងសង្គមបារាំងអាចស្អប់នគរបាលកាន់តែខ្លាំង នគរបាលឃាត់មិនស្តាប់។ តែទន្ទឹមគ្នានេះ ករណីបទល្មើសចរាចរណ៍ ការជួញដូរគ្រឿងញៀន កាន់តែសំបូរ ហើយនៅពេលសមត្ថកិច្ចចុះអន្តរាគមន៍ឃាត់រថយន្ត អ្នកបើកបរដែលមានខ្លួន ដែលភ័យ ក៏គេចវេស ព្រមទាំងបើករថយន្តបំបុកសមត្ថកិច្ចនគរបាលថែមទៀត។ ធ្លាប់មានហើយ ករណីនគរបាលឈរឃាត់ ហើយត្រូវអ្នកបើកបរបើកបុកស្លាប់។
តាមច្បាប់ គឺសមត្ថកិច្ចនគរបាល មានសិទ្ធិការពារខ្លួន ក្នុងករណីមានការគំរាមកំហែងលើរូបរាងកាយ។ តែការការពារខ្លួនរបស់សមត្ថកិច្ចនេះ គឺត្រូវតែធ្វើដោយប៉ាន់ប្រមាណកម្លាំង ឲ្យត្រឹមត្រូវបំផុត មិនឲ្យហួសហេតុនោះទេ។ មុននឹងសម្រេចបាញ់ សមត្ថកិច្ចត្រូវតែថ្លឹងថ្លែង។ ក្រោយហេតុការណ៍កើតឡើងកាលពីម្សិលមិញនេះ អ្នកនយោបាយខ្លះ បានចេញមុខស្រែករិះគន់ថា “បារាំងគ្មានទោសប្រហារជីវិតទេ ហេតុអ្វីក៏នគរបាលបាញ់មនុស្សស្លាប់បែបនេះ”។ អ្នកខ្លះទៀត បានរិះគន់ថា ត្រឹមករណីមិនឈប់រថយន្ត ទៅតាមការឃាត់របស់នគរបាល មិនអាចបើកសិទ្ធិឲ្យនគរបាលនោះ បាញ់សម្លាប់មនុស្សនោះទេ។
តែយ៉ាងណា យើងមិនអាចនិយាយម៉ៃជាទូទៅ ថានគរបាលបារាំងសុទ្ធតែហិង្សា បាញ់សម្លាប់មនុស្សយ៉ាងអនាធិបតេយ្យនោះដែរ។ ទះដៃម្ខាងគឺមិនវាមិនឮទេ។ ក្នុងសង្គមមួយដែលកាន់តែហិង្សា កាន់តែសំបូរបទល្មើស ឧក្រិដ្ឋកម្មផ្សេងៗ គឺវាតែងតែមានការបង្ក្រាប ដែលពេលខ្លះវាជ្រុលដៃ ដោយចៀសមិនរួច។ ដូច្នេះគ្រប់ករណីទាំងអស់ គឺត្រូវតែឆ្លងកាត់ការស៊ើបអង្កេត ឲ្យបានស៊ីជម្រៅ ដោយប្រព័ន្ធតុលាការ។
លោកប្រធានាធិបតីម៉ាក្រុង បានមានប្រសាសន៍នៅព្រឹកមិញនេះ ថា ករណីស្លាប់យុវជនអាយុ១៧ឆ្នាំកាលពីថ្ងៃអង្គារ វាគឺជារឿងមួយមិនអាចអត់ឱនឲ្យបានទេ។ លោកស្រីនាយករដ្ឋមន្ត្រី ក៏ដូចជាលោករដ្ឋមន្ត្រីក្រសួងមហាផ្ទៃបារាំង ក៏បានប្តេជ្ញាដែរ ថាត្រូវតែវែករកការពិតឲ្យបាន ប្រគល់យុត្តិធម៌ជូនជនរងគ្រោះ និងក្រុមគ្រួសារ។ តែទន្ទឹមនឹងនេះ រដ្ឋាភិបាលបារាំង បានអំពាវនាវ សុំឲ្យរក្សាភាពស្ងៀមស្ងាត់ ទប់កំហឹង បញ្ឈប់រាល់អំពើហិង្សាអនាធិបតេយ្យ ដែលកាន់តែធ្វើឲ្យសង្គមជាតិបាក់បែកគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ