ថៃ៖ លោក ភិថា លីមចារើនរ៉ាត់ បរាជ័យ មិនអាចទទួលបានសំឡេងឆ្នោតគាំទ្រគ្រប់គ្រាន់ក្លាយជានាយករដ្ឋមន្ត្រី
ចុះផ្សាយនៅថ្ងៃ៖
ថ្ងៃព្រហស្បតិ៍ទី ១៣កក្កដានេះ ប្រទេសថៃទាំងមូល ត្រូវទប់ដង្ហើម រងចាំលទ្ធផលបោះឆ្នោតនៅសភា ដែលនឹងតែងតាំងនាយករដ្ឋមន្រ្តីថ្មី។ សមាជិកសភាថៃទាំង២អង្គ ត្រូវបោះឆ្នោតលើបេក្ខភាពនាយករដ្ឋមន្ត្រី របស់លោក ភិថា លីមចារើនរ៉ាត់ ប្រធានគណបក្សកាវក្លៃ ដែលបានសំឡេងឆ្នោតនាំមុខគេ កាលពីពេលបោះឆ្នោត នៅខែឧសភាកន្លងទៅ។ ដូចការព្រួយបារម្ភពិតមែន លទ្ធផលបោះឆ្នោតថ្ងៃព្រសហ្បតិ៍ ទី១៣កក្កដា បានបង្ហាញថា បេក្ខភាពនាយករដ្ឋមន្ត្រីរបស់លោកភិថា លីមចារើនរ៉ាត់ គឺមិនបានសំឡេងឆ្នោតគាំទ្រគ្រប់គ្រាន់តែ។ តែយ៉ាងណា លោកភិថា បានប្រាកាសសន្យាថា លោកនឹងមិនបោះបង់សេចក្តីសង្ឃឹមទេ។
ត្រូវការសំឡេងឆ្នោតគាំទ្រ ចំនួន៣៧៥
សម័យប្រជុំដ៏ពិសេស នៃសភាទាំង២អង្គរបស់ថៃ បានចាប់ផ្តើមនៅម៉ោង ៩ និង៣០នាទី ព្រឹកថ្ងៃព្រហស្បតិ៍ទី១៣កក្កដា។ សភាទាំង២ ត្រូវបោះឆ្នោតសម្រេច លើបក្ខជននាយករដ្ឋមន្ត្រីដែលមានតែម្នាក់ទេ ដែលបានដាក់ឈ្មោះស្នើមក គឺលោក ភិថា លីមចារើនរ៉ាត់ ប្រធានគណបក្សកាវក្លៃ ដែលបានសម្លេងឆ្នោតនាំមុខ កាលពីពេលបោះឆ្នោតខែឧសភា។ នៅខាងក្រៅជុំវិញវិមានរដ្ឋសភា ប្រព័ន្ធការពារសន្តិសុខ ត្រូវបានដាក់ហ៊ុំព័ទ្ធយ៉ាងតឹងតែងបំផុត ដើម្បីបង្ការការផ្ទុះបាតុកម្មតវ៉ាណាមួយ នៅក្រោយការប្រកាសលទ្ធផលឆ្នោត។
សមាជិកសភាទាំង២អង្គ មានសរុប៧៥០នាក់ តែកាលពីថ្ងៃពុធម្សិលមិញ មានសមាជិកព្រឹទ្ធសភាម្នាក់ បានលាឈប់ពីមុខតំណែង។ ដូច្នេះ នៅសល់តែ ៧៤៩នាក់ទេ។ មានន័យថា លោក ភិថា លីម ចារើនរ៉ាត់ ត្រូវការសំឡេងគាំទ្រ ចំនួន ៣៧៥សំឡេង ដើម្បីអាចក្លាយជានាយករដ្ឋមន្ត្រី ដោយយោងតាមមាត្រា ១៧២នៃរដ្ឋធម្មនុញ្ញថៃ។ ជាចំនួនដ៏ច្រើន ដែលមតិជាច្រើនបានបង្ហាញការព្រួយបារម្ភ ថាពិបាកនឹងទទួលបាន ព្រោះថាសមាជិកព្រឹទ្ធិសភាច្រើននាក់ណាស់ ដែលបានប្រកាសថាមិនគាំទ្រ ឲ្យលោកភិថា លីមចារើនរ៉ាត់ ក្លាយជានាយករដ្ឋមន្ត្រីនោះទេ។
តែយ៉ាងណា មុននឹងចូលក្នុងសភា លោកភិថា បានប្រាប់អ្នកកាសែតថា លោកមានទំនុកចិត្ត នៅក្នុងការទទួលបាននូវលទ្ធភាព ឈានទៅធ្វើការ ដឹកនាំប្រទេស ដោយប្រើប្រាស់សមត្ថភាពទាំងអស់របស់លោក ដើម្បីឆ្លើយតបទៅនឹងសេចក្តីសង្ឃឹមរបស់ប្រជាពលរដ្ឋថៃ ក៏ដូចជាឆ្លើយតបចំពោះការគាំទ្ររបស់ពួកគេ។ នៅក្នុងអង្គសភាមុននឹងបើកការបោះឆ្នោត លោកភិថា លីមចារើនរ៉ាត់ បានថ្លែងថាលោកចង់នាំប្រទេសថៃដើរឆ្ពោះលើមាគ៌ាលិទ្ធិប្រជាធិបតេយ្យ និងការរីកចម្រើន ដោយអនុឡោមទៅតាមលទ្ធផលសន្លឹកឆ្នោត ដែលប្រជាជនថៃបានសម្តែងមតិកាលពីខែឧសភា។
សូមរំលឹកថា លោកភិថា លីមចារើនរ៉ាត់ ប្រធានបក្សកាវក្លៃ បានបង្កើតសម្ព័ន្ធគណបក្សដើម្បីរៀបចំធ្វើរដ្ឋាភិបាលចម្រុះ ជាមួយគណបក្សផ្សេងៗទៀត ក្នុងនោះមានបក្សភឿថៃ ដែលធ្លាប់ជាបក្សដ៏ធំមួយនៅថៃ។ សម្ព័ន្ធគណបក្សចម្រុះដឹកនាំដោយលោកភិថានេះ មានចំនួនអាសនៈសរុបក្នុងសភាជាតិ ៣១២អាសនៈ ក្នុងចំណោម៥០០។ ដើម្បីអាចក្លាយជានាយករដ្ឋមន្ត្រីបាន គឺលោកភិថា ត្រូវការសំឡេងឆ្នោតគាំទ្រពីព្រឹទ្ធសភា ចំនួន៦៣ទៀត ដើម្បីបានគ្រប់ ៣៧៥។
៣២៤សំឡេងគាំទ្រ
ការបោះឆ្នោតបានចាប់ផ្តើម នៅវេលាម៉ោង ប្រមាណជា៤រសៀល បន្ទាប់ពីលោកភិថា បេក្ខជននាយករដ្ឋមន្ត្រី ប្រធានបក្សធំៗ ព្រមទាំងលោកប្រធានសភា បានថ្លែងសុន្ទរកថាចប់សព្វគ្រប់។ ការបោះឆ្នោតបានប្រព្រឹត្តិទៅ ដោយមានមនុស្សម្នាក់ ហៅឈ្មោះសមាជិកសភា និងសមាជិកព្រឹទ្ធសភា ម្តងម្នាក់ៗ ទៅតាមលេខរៀងតួអក្សរ។ បន្ទាប់មក សមាជិកសភាម្នាក់ៗ ដែលបានឮឈ្មោះ ត្រូវប្រកាសសំឡេងតាមមីក្រូហ្វូនតែម្តង ថា គាំទ្រ មិនគាំទ្រ ឬមួយក៏អនុវប្បវាទ ពោលគឺមិនបញ្ចេញមតិ។
គិតត្រឹមម៉ោង៦ល្ងាច ម៉ោងនៅបាងកក គឺការបោះឆ្នោតបានចប់ហើយ ក៏ប៉ុន្តែនៅមិនទាន់មានការប្រកាសលទ្ធផលផ្លូវការទេ ព្រោះថាគេកំពុងតែជជែកគ្នាបន្តទៀត ដោយសារតែមានសមាជិកខ្លះ បានដូរចិត្តចុះឡើង។ យ៉ាងណាមិញ សមាជិកសភាបក្សភឿថៃម្នាក់ មកពីខេត្តឆៀងម៉ៃ បានឡើងថ្លែង សុំឲ្យប្រធានសភា រិះរកវិធីយ៉ាងណា កុំឲ្យមានការប្តូរចិត្តចុះឡើងបែបនេះ។
លទ្ធផលបឋមបានបង្ហាញថា លោកភិថា លីមចារើនរ៉ាត់ បានទទួលសំឡេងឆ្នោតគាំទ្រ ចំនួន ៣២៤សំឡេង ក្នុងនោះ មាន៣១១មកពីសភាជាតិ ឬសភាជាន់ទាប និង១៣សំឡេង មកពីព្រឹទ្ធសភា។ ចំណែកសំឡេងឆ្នោតមិនគាំទ្រវិញ គឺមាន ១៨២សំឡេង ៣៤មកពីព្រឹទ្ធសភា ១៤៨មកពីសភា។ ដោយឡែក សំឡេងឆ្នោតអនុប្បវាទ មានច្រើនខ្លាំងណាស់ គឺ១៩៩សំឡេង ដែលក្នុងនោះ ១៥៩មកពីព្រឹទ្ធសភា ៤០សំឡេងមកពីសភា។
ជាសរុប យើងឃើញថា បេក្ខភាពលោកភិថា លីមចារើនរ៉ាត់ គឺមិនបានទទួលសំឡេងឆ្នោតគាំទ្រ គ្រប់៣៧៥ទេ។ នេះជាឧបសគ្គ ដែលត្រូវបានគេព្រួយបារម្ភច្រើនថ្ងៃមកហើយ ព្រោះថាក្រុមអ្នកនយោបាយចាស់វស្សាថៃ ដែលមានទំនោរអភិរក្សនិយម រាជានិយម គាំទ្រកងទ័ព គឺមិនពេញចិត្តចំពោះគំនិតនយោបាយសម័យទំនើប បែបចំរើននិយមរបស់លោក ភិថា លីមចារើនរ៉ាត់នេះទេ។
កងទ័ពអន្តរាគមន៍ ឬដូរបេក្ខជននាយករដ្ឋមន្ត្រី?
តាមធម្មតា សភាទាំង២អង្គ នឹងបើកសម័យប្រជុំម្តងទៀត ពោលគឺពុំមានចំនួនកំណត់ទេ ដើម្បីបោះឆ្នោតជាថ្មី។ តែក៏មានន័យថា ប្រទេសថៃ ក៏កំពុងតែឈានជើងចូលក្នុងវិបត្តិនយោបាយ យូរខែដែរ ព្រោះថាមើលទៅ គឺមិនអាចជ្រើសរើសនាយករដ្ឋមន្ត្រី បង្កើតរដ្ឋាភិបាលថ្មីបានដោយងាយទេ។ លោកភិថា លីមចារើនរ៉ាត់ ត្រូវតែព្យាយាម បញ្ចុញបញ្ចូលសមាជិកសភា និងព្រឹទ្ធសភា យ៉ាងហោច ៥១នាក់ទៀត ដែលបានបោះឆ្នោតអនុវប្បវាទ ឲ្យងាកមកគាំទ្រលោក។
បើនៅតែមិនមានលទ្ធផល យូរថ្ងៃទៅមុខ អ្នកវិភាគខ្លះបានលើកឡើងថា គឺអាចមានការចរចាគ្នា ដើម្បីផ្លាស់ប្តូរបេក្ខជននាយករដ្ឋមន្ត្រី។ គណបក្សភឿថៃ ដែលស្ថិតនៅក្នុងគម្រោងរដ្ឋាភិបាលចម្រុះដែរនោះ អាចនឹងស្នើបេក្ខភាព លោកស្រី ភែថងថាន ស៊ីណាវ៉ាត្រ កូនស្រីលោកថាក់ស៊ីន។ តាមការវិភាគ លោកស្រី ភែថងថាន មានទំនោរទន់ជាងលោកភិថា ជាពិសេសទាក់ទិននឹងការធ្វើកំណែទម្រង់ដ៏រសើបមួយចំនួន ដែលអាចប៉ះពាល់ដល់ស្ថាប័នព្រះមហាក្សត្រ។
អ្នកវិភាគខ្លះទៀត ក៏នៅតែបង្ហាញការព្រួយបារម្ភដែរ ថាក្រុមយោធាអាចនឹងរកលេស ចូលអន្តរាគមន៍ គ្រប់គ្រងប្រទេសឡើងវិញ ប្រសិនជាប់គាំងយូរខែទៅមុខ គ្មាននាយករដ្ឋមន្ត្រី គ្មានរដ្ឋាភិបាល។ ប្រជាជនដែលបានបោះឆ្នោតគាំទ្រលោកភិថា លីមចារើនរ៉ាត់ ភ្លូកទឹកភ្លូកដីកាលពីខែឧសភា ក៏អាចនឹងចុះផ្លូវធ្វើបាតុកម្មតវ៉ាវដែរ។ ពោលគឺមានន័យថា សេណារីយូវិបត្តិធ្ងន់ធ្ងរ អាចឈានដល់ផ្ទុះអំពើហិង្សា កំពុងរងចាំប្រទេសថៃនៅថ្ងៃខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ