លោកអគ្គលេខាធិការ អ .ស.ប. បរិហារថា ពិភពលោកកំពុងតែឆ្កួតលីលាជាមួយនឹងអាវុធនុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៦:២៤
នៅក្នុងឱកាសកិច្ចប្រជុំពិសេសមួយ ក្នុងក្របខណ្ឌមហាសន្និបាទនៃអង្គការសហប្រជាជាតិ កាលពីថ្ងៃអង្គារទី២៦កញ្ញា លោកអគ្គលេខាធិការ អង់តូនីញ៉ូ ហ្គូតទែរស៍ បានថ្លែងសុន្ទរកថាដោយលោកបានលើកឡើងថា ពិភពលោកយើង កំពុងតែវក់វីនឹងភាពឆ្កួតលីលា ជាមួយនឹងអាវុធនុយក្លេអ៊ែរ។ ការប្រណាំងប្រជែងគ្នា នៃអាវុធមហាប្រល័យនេះ ត្រូវបានលោកអគ្គលេខាធិការអង្គការសហប្រជាជាតិ បរិហាថាគឺជាគ្រោះថ្នាក់ដ៏អាសន្នបំផុតសម្រាប់មនុស្សជាតិ។
ហេតុអ្វីលោកអង់តូនីញ៉ូ ហ្គូតទែរស៍ បារម្ភខ្លាំង?
នៅថ្ងៃទី២៦កញ្ញា ដែលជាទិវាអន្តរជាតិនៃការបំបាត់ចោលទាំងស្រុងនូវអាវុធនុយក្លេអ៊ែរ លោកអង់តូនីញ៉ូ ហ្គូតទែរស៍ បានលើកឡើងថា ជាលើកទី១ក្នុងរវាងច្រើនទសវត្សមកនេះ ចំនួនគ្រាប់នុយក្លេអ៊ែរ អាចនឹងកើនឡើងនៅទូទាំងពិភពលោក។ បញ្ហានេះគឺជាបញ្ហាអាសន្ន ព្រោះថាមហាអំណាចធំៗ កាន់តែប្រជែង ប្រណាំងគ្នាបង្កើនចំនួនអាវុធមហាប្រល័យនេះ តែរៀងៗខ្លួន។ ជាងនេះទៀត លោកអគ្គលេខាធិការអង្គការសហប្រជាជាតិ ថ្លែងការបារម្ភថា គ្រោងឆ្អឹងស្ថាប័នពិភពលោកដើម្បីទប់ស្កាត់ការរីកសាយភាពអាវុធនុយក្លេអ៊ែរ ត្រូវបានរុះរើ ឬរលំបាក់ជាបន្តបន្ទាប់។
លោកអគ្គលេខាធិការអង្គការសហប្រជាជាតិ បានសង្កត់ធ្ងន់ថា សព្វាវុធនុយក្លេអ៊ែរបច្ចុប្បន្ននេះ កាន់តែទំនើប កាន់តែលឿនរហ័ស កាន់តែបាញ់ចំគោលដៅច្បាស់ និងកាន់តែអាចបញ្ជាបានដោយងាយ។ ភាពឆ្កួតលីលានៃអាវុធនុយក្លេអ៊ែរនេះ វាបៀបបាននឹងជ្រោះមរណៈ ដែលដែលមនុស្សជាតិយើងត្រូវតែរួមគ្នាចាកចេញឲ្យផុត។ នៅក្នុងបរិបទនេះ លោកអង់តូនីញ៉ូ ហ្គូតទែរស៍ បានអំពាវនាវាហៅក្រុមប្រទេសមហាអំណាចនុយក្លេអ៊ែរទាំងអស់ ថាត្រូវតែធ្វើគម្រូល្អ បង្ហាញផ្លូវត្រឹមត្រូវ ហើយសន្យាថា ទោះជាកាលៈទេសៈណាក៏ដោយ គឺខ្លួនសន្យាថានឹងមិនប្រើអាវុធនុយក្លេអ៊ែរជាដាច់ខាត។
ក្នុងនាមលោកជាអគ្គលេខាធិការនៃអង្គការសហប្រជាជាតិ លោកសូមសន្យាថានឹងប្រឹងប្រែងធ្វើការ ឲ្យអស់ពីសមត្ថភាព ក្នុងការជួយជំរុញប្រមូលប្រទេសទាំងអស់ ដើម្បីឈានទៅរួមគ្នាលុបបំបាត់ឲ្យបាន នូវអាវុធប្រល័យលោកទាំងនេះឲ្យអស់ពីផែនដី ហើយធ្វើឲ្យក្លាយជាអតីតកាល ដែលមិនអាចរស់ឡើងវិញបាន ។
កូរ៉េខាងជើងចោទអាមេរិកថាជាអ្នកដុត “ភ្លើងសង្គ្រាមនុយក្លេអ៊ែរ”
ដោយឡែក នៅថ្ងៃទី២៦កញ្ញា នៅអង្គការសហប្រជាជាតិដែរ តំណាងរដ្ឋាភិបាលរបបផ្តាច់ការកូរ៉េខាងជើង បានឡើងថ្លែងសុន្ទរកថា ដោយបានលើកឡើងថា “ឧបទ្វីបកូរ៉េ កំពុងស្ថិតនៅមាត់ជ្រោះសង្គ្រាមនុយក្លេអ៊ែរ ហើយអ្នកដែលបង្កបញ្ហានេះ គឺគ្មាននរណាទេ ក្រៅពីសហរដ្ឋអាមេរិក”។
លោក គីម សុង អគ្គរដ្ឋទូតកូរ៉េខាងជើង ប្រចាំនៅអង្គការសហប្រជាជាតិ បានបរិហារថា គឺសកម្មភាពដែលគ្មានការពិចារណា និងពោរពេញដោយភាពកម្រោលចូលរបស់អាមេរិក ដែលកំពុងតែដុតភ្លើងសង្គ្រាមនុយក្លេអ៊ែរ នៅឧបទ្វីបកូរ៉េ។ មន្ត្រីកូរ៉េខាងជើងរូបនេះ បន្តថាអាមេរិកបានអុជអាលប្រទេសក្នុងតំបន់ក្បែរខាងកូរ៉េខាងជើង ឲ្យធ្វើតាមខ្លួន ពោលគឺវាជាយុទ្ធសាស្ត្រខ្វះការប្រុងប្រយ័ត្ន ដើម្បីតែបំពេញមហិច្ឆតា និងផលប្រយោជន៍របស់អាមេរិកតែប៉ុណ្ណោះ។
អស់ពីបរិហារអាមេរិក អគ្គរដ្ឋទូតកូរ៉េខាងជើង បានចោទថារដ្ឋាភិបាលកូរ៉េខាងត្បូង ក៏មានចំណែកខុសដែរ ក្នុងការធ្វើឲ្យឧបទ្វីបកូរ៉េត្រូវប្រឈមនឹងសង្គ្រាមនុយក្លេអ៊ែរ ព្រោះសេអ៊ូលព្រមឱនក្បាលធ្វើជាអាយ៉ងរបស់អាមេរិក ឈ្លក់វង្វេងចង់តែធ្វើសង្គ្រាមជាមួយបងប្អូនឯង។
មហាអំណាចប្រើអាវុធនុយក្លេអ៊ែរដើម្បីគំរាមគ្នាកាន់តែខ្លាំង
ទាក់ទិននឹងការគំរាមប្រើអាវុធនុយក្លេអ៊ែរ លោកអគ្គលេខាធិការអង្គការសហប្រជាជាតិ មិនបានបញ្ចេញឈ្មោះប្រទេសណាមួយឲ្យចំទេ។ តែបរិបទសង្គ្រាមនៅអ៊ុយក្រែន បានធ្វើឲ្យមានការព្រួយបារម្ភជាខ្លាំង អំពីលទ្ធភាពដែលរុស្ស៊ី អាចនឹងប្រើអាវុធនុយក្លេអ៊ែរតាក់ទិក។ យ៉ាងណាមិញ លទ្ធភាពនេះ ត្រូវបានភាគីរុស្ស៊ីលើកយកមកគ្រវីគំរាមជាញយដងមកហើយ។
សូមបញ្ជាក់ថា យោងតាមតួលេខរបស់ វិទ្យាស្ថានអន្តរជាតិស្រាវជ្រាវដើម្បីសន្តិភាព ហៅកាត់ថា SIPRI ដែលមានទីតាំងនៅក្រុងស្តុកខូលម៍ គឺដើមឆ្នាំ២០២៣ ពិភពលោកយើងមានក្បាលគ្រាប់នុយក្លេអ៊ែរ សរុបចំនួន ១២៥១២គ្រាប់។ ទំហំនេះបានថយចុះបន្តិច បើប្រៀបធៀបទៅឆ្នាំ២០២២ ដែលមានចំនួន ១២៧១០គ្រាប់។ តែយ៉ាងណា ស្ថិតក្នុងបរិបទនៃការប្រឈមមុខដាក់គ្នាកាន់តែខ្លាំង រវាងមហាអំណាចធំៗ អ្នកជំនាញបានថ្លែងការបារម្ភថា ចំនួនក្បាលគ្រាប់នុយក្លេអ៊ែរអាចនឹងកើនឡើង ចាប់ពីពេលនេះទៅ។ ពោលគេ សករាជនៃការថយចុះចំនួនក្បាលគ្រាប់នុយក្លេអ៊ែរ ទំនងជាបានដើរមកដល់ទីបញ្ចប់ហើយ។ អំណេះតទៅ ពិភពលោកនឹងឈានជើងចូលទៅកាន់ទំព័រថ្មីនៃការប្រណាំងប្រជែង ដំឡើងទំហំសព្វាវុធនុយក្លេអ៊ែរ ដើម្បីកំញើញគ្នាទៅវិញទៅមក។
គួរកត់សំគាល់ដែរថា បច្ចុប្បន្នមានប្រទេស៩ ដែលជាផ្លូវការត្រូវគេដឹងថាជាមហាអំណាច មានអាវុធបរមាណូ នោះគឺ សហរដ្ឋអាមេរិក បារាំង អង់គ្លេស រុស្ស៊ី ចិន ប៉ាគីស្ថាន ឥណ្ឌា អ៊ីស្រាអែល និងកូរ៉េខាងជើង។ យោងតាមតួលេខ សហព័ន្ធអ្នកវិទ្យាសាស្ត្រអាមេរិក (FAS) គឺរុស្ស៊ីមានក្បាលគ្រាប់នុយក្លែអ៊ែរច្រើនជាងគេ គឺចំនួន ៥៨៨៩គ្រាប់ ខណៈអាមេរិកមានចំនួន ៥២៤៤គ្រាប់។ រុស្ស៊ី និងអាមេរិក តែ២នាក់ មានក្បាលគ្រាប់នុយក្លេអ៊ែរ សរុបដល់ទៅ៩០%នៃទំហំរួមទូទាំងពិភពលោក។ ចិនវិញស្ថិតនៅលេខរៀងទី៣ មានចំនួន ៤១០គ្រាប់ បារាំងមាន២៩០គ្រាប់ អង់គ្លេសមាន ២២៥គ្រាប់ ប៉ាគីស្ថានមាន១៧០គ្រាប់ ឥណ្ឌាមាន ១៦៤គ្រាប់ អ៊ីស្រាអែលមាន៩០គ្រាប់ ហើយកូរ៉េខាងជើងមានប្រមាណ៣០គ្រាប់។
ក្រៅកូរ៉េខាងជើង ដែលកំពុងបង្កឲ្យមានការបារម្ភ អ៊ីរ៉ង់ក៏កំពុងធ្វើឲ្យអ្នកសង្កេតស្ថានការណ៍ តាមដានយកចិត្តទុកដាក់ខ្ពស់ដែរ។ កិច្ចព្រមព្រៀងគ្រប់គ្រងកម្មវិធីនុយក្លេអ៊ែរអ៊ីរ៉ង់ ស្ថិតនៅជាប់គាំង គ្មានដំណោះស្រាយ ខណៈការចម្រាញ់ធាតុអ៊ុយរ៉ានីញ៉ូម របស់អ៊ីរ៉ង់ បានកើនសកម្មភាពកាន់តែខ្លាំង។ យោងតាមប្រភពច្បាស់ការជាច្រើន គឺទំហំអ៊ុយរ៉ានីញ៉ូមចម្រើនធាតុរបស់អ៊ីរ៉ង់ បានលើសច្រើនទៅៗ នៃកម្រិតអនុញ្ញាត ដែលប្រការនេះអាចនឹងបើកផ្លូវឲ្យអ៊ីរ៉ង់ អាចផលិតក្បាលគ្រាប់នុយក្លេអ៊ែរបាន ក្នុងពេលដ៏ឆាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ