កងទ័ពអ៊ីស្រាអែលបន្តចូលទៅក្នុងហ្កាហ្សា ខណៈរុស្សីជួបតំណាងក្រុមហាម៉ាសនិងអ៊ីរ៉ង់នៅម៉ូស្គូ
ចុះផ្សាយនៅថ្ងៃ៖
ស្តាប់ - ០៨:០៩
វេលាទៀបភ្លឺថ្ងៃសុក្រទី២៧តុលា កងទ័ពអ៊ីស្រាអែល បានចូលទៅក្នុងតំបន់ហ្កាហ្សាជាលើកទី២ ដើម្បីបើកប្រតិបត្តិការកំទេចទីតាំងរបស់ក្រុមហាម៉ាស។ នៅឯទីក្រុងម៉ូស្គូឯណោះ កាលពីថ្ងៃព្រសហ្បតិ៍ ក្រុមហាម៉ាសបាននាំគណៈប្រតិភូទៅជួបប្រជុំជាមួយភាគីរុស្ស៊ី ខណៈអនុរដ្ឋមន្ត្រីក្រសួងការបរទេសអ៊ីរ៉ង់ ក៏មានវត្តមាននៅម៉ូស្គូដែរ។
កងទ័ពអ៊ីស្រាអែលចូលទៅតំបន់ភាគកណ្តាលហ្កាហ្សា
បន្ទាប់ពីបានចាប់ផ្តើមប្រតិបត្តិការ ចូលទៅភាគខាងជើងតំបន់ហ្កាហ្សា កាលពីថ្ងៃព្រហស្បតិ៍ទី២៦តុលា កងទ័ពអ៊ីស្រាអែលបានឲ្យដឹងថា គេបានបន្តសំរុកចូលជាថ្មីម្តងទៀត នៅវេលាទៀបភ្លឺថ្ងៃសុក្រ ទី២៧តុលា។ ប្រតិបត្តិការថ្មីនេះ បានធ្វើនៅតំបន់ភាគកណ្តាល នៃតំបន់ហ្កាហ្សា ដោយកងទ័ពអ៊ីស្រាអែល បានប្រើប្រាស់កម្លាំងរថក្រោះ ជាច្រើនគ្រឿង និងបានត្រូវបានការពារពីលើអាកាស ដោយយន្តហោះចម្បាំង និងយានដ្រូនថែមទៀត។ ទន្ទឹមគ្នានេះ កងទ័ពអ៊ីស្រាអែល ក៏បានបាញ់ប្លោងមីស៊ីលជាច្រើនគ្រាប់ ទៅលើទីតាំងរបស់ក្រុមហាម៉ាស នៅភាគកណ្តាលហ្កាហ្សាដែរ នៅវេលាយប់ថ្ងៃសុក្រ ទី២៦តុលា។
លិខិតប្រកាសរបស់កងទ័ពអ៊ីស្រាអែល ដែលបានចេញផ្សាយនៅព្រឹកថ្ងៃសុក្រ បានឲ្យដឹងថា កងទ័ពអ៊ីស្រាអែលបានចេញពីតំបន់ហ្កាហ្សាមកវិញហើយ បន្ទាប់់ពីបានសម្រេចកម្មវត្ថុនៃបេសកកម្ម។ កម្មវត្ថុដែលគេសម្រេចបាន គឺបានកំទេចជើងទម្របាញ់គ្រាប់រ៉ូកែត របស់ក្រុមហាម៉ាស ជាច្រើនកន្លែង កំទេចទីបញ្ជាការដ្ឋានរបស់ក្រុមហាម៉ាស ហើយបានសម្លាប់សមាជិកក្រុមហាម៉ាសជាច្រើននាក់ទៀត។ លិខិតប្រកាសរបស់កងទ័ពអ៊ីស្រាអែលនេះ មិនបានបញ្ជាក់ទេ ថាខាងអ៊ីស្រាអែលមានរបួសឬស្លាប់ប៉ុន្មាននាក់ នៅក្នុងប្រតិបត្តិការលុកចូលហ្កាហ្សានេះ។
គួរបញ្ជាក់ថា នេះគឺជាលើកទី២ហើយ ដែលកងទ័ពអ៊ីស្រាអ៊ែល សំរុកចូលទៅក្នុងតំបន់ហ្កាហ្សាដោយផ្ទាល់។ ប្រតិបត្តិការលើកទី១បានធ្វើកាលយប់ថ្ងៃពុធ ឈានចូលថ្ងៃព្រហស្បតិ៍ទី២៦តុលា នៅភាគខាងជើងហ្កាហ្សា។ តាមការសង្កេត ប្រតិបត្តិការរបស់កងទ័ពអ៊ីស្រាអែល គឺប្រើប្រាស់រថក្រោះ រថពាសដែកចូលទៅហ្កាហ្សា ដើម្បី “វាយប្រហារដោយចំពោះ” ទៅលើទីតាំងមុខសញ្ញាណាមួយរបស់ក្រុមហាម៉ាស ដែលគេបានកំណត់គោលដៅទុក។ សម្រេចហើយ គេដកថយមកខាងអ៊ីស្រាអែលវិញ មុននឹងមានប្រតិបត្តិការថ្មី ចូលទៅម្តងទៀត។ រដ្ឋមន្ត្រីក្រសួងការពារជាតិអ៊ីស្រាអែល ធ្លាប់បានសន្យាហើយថានឹងសម្លាប់សមាជិកក្រុមហាម៉ាសម្តងមួយៗ រហូតទាល់តែអស់។
គួរបញ្ជាក់ដែរថា តាមរយៈរូបភាពវីដេអូបង្ហាញពីប្រតិបត្តិការចូលទៅហ្កាហ្សា ដែលខាងភាគីកងទ័ពអ៊ីស្រាអែលបានផ្សព្វផ្សាយ គឺភាគីអ៊ីស្រាអែលចង់បង្ហាញប្រាប់មតិមហាជនទូទាំងពិភពលោក ថាកងទ័ពអ៊ីស្រាអែលមានការប្រុងប្រយ័ត្ន និងមានការទទួលខុសត្រូវខ្ពស់ណាស់ មិនមែនចូលទៅវាយប្រហារដោយឥតរើសមុខនៅក្នុងតំបន់ហ្កាហ្សាទេ។ ពោលគឺគេទៅកម្ទេច តែទីតាំងនិងហេដ្ឋារចនាសម្ព័ន្ធ របស់ក្រុមភេរវកម្មហាម៉ាសតែប៉ុណ្ណោះ។
រុស្ស៊ីហៅតំណាងក្រុមហាម៉ាស និងអ៊ីរ៉ង់ ទៅប្រជុំនៅម៉ូស្គូ?
ស្របពេលដែលអ៊ីស្រាអែលបើកប្រតិបត្តិការចូលក្នុងហ្កាហ្សា ដើម្បីកំទេចក្រុមហាម៉ាស នៅម៉ូស្គូឯណោះ រុស្ស៊ីបានជួបជាមួយតំណាងក្រុមហាម៉ាស និងតំណាងរដ្ឋាភិបាលអ៊ីរ៉ង់ កាលពីថ្ងៃព្រហស្បតិ៍ ទី២៦តុលា។ លោកស្រី Maria Zakharova អ្នកនាំពាក្យក្រសួងការបរទេសរុស្ស៊ី បានបញ្ជាក់ឲ្យដឹងថា តំណាងក្រុមហាម៉ាសប៉ាឡេស្ទីន តំណាងរដ្ឋាភិបាលអ៊ីរ៉ង់ ពិតជាមានវត្តមាននៅក្រុងម៉ូស្គូពិតមែន។ តែយ៉ាងណា មិនមានការបញ្ជាក់ឲ្យច្បាស់ ថាភាគីទាំង៣ជួបប្រជុំគ្នា ក្នុងពេលតែមួយ ឬក៏ជាជំនួបដាច់ដោយឡែកពីគ្នានោះទេ។
ក្រោយដឹងដំណឹងនេះភ្លាម ក្រសួងការបរទេសអ៊ីស្រាអែល បានប្រតិកម្មយ៉ាងខ្លាំង ដោយបានបរិហារបន្ទោសរុស្ស៊ី ថាមិនត្រូវទទួលជួបជាមួយក្រុមភេរវកម្មហាម៉ាសបែបនេះទេ។ លិខិតក្រសួងការបរទេសអ៊ីស្រាអែល បានលើកឡើងថា ក្រុមហាម៉ាសជាក្រុមភេរវកម្មសាហាវព្រៃផ្សៃ សឹងតែជាងក្រុមជីហាតអង្គការរដ្ឋអ៊ីស្លាមទៅទៀត។ ក្រុមហាម៉ាសជាក្រុមដែលមានបាតដៃប្រឡាក់ឈាម។ កាលពីថ្ងៃទី៧តុលា ជនស៊ីវីលចំនួនប្រមាណ១៤០០ នៅក្នុងទឹកដីអ៊ីស្រាអែល ត្រូវបានក្រុមហាម៉ាសសម្លាប់យ៉ាងសាហាវបំផុត ខ្លះត្រូវពួកវាបាញ់សម្លាប់ ខ្លះដុតទាំងរស់ និងបានចាប់ចំណាប់ខ្មាំងទាំងកុមារ ទាំងមនុស្សចាស់ជរា សរុបជាង២២០នាក់ថែមទៀត។
ផ្អែកតាមទីភ្នាក់ងារព័ត៌មានរដ្ឋរុស្ស៊ី ដែលស្រង់ប្រភពពីមន្ត្រីការទូត គឺគណៈប្រតិភូក្រុមហាម៉ាសទៅម៉ូស្គូ ដឹកនាំដោយមេក្រុមហាម៉ាសម្នាក់ ឈ្មោះ Moussa Abou Marzouk។ ផ្អែកតាមប្រភពនេះ ការជជែកគ្នារវាងរុស្ស៊ីនិងក្រុមហាម៉ាស គឺបានផ្តោតសំខាន់ ទៅលើបញ្ហាចំណាប់ខ្មាំងដែលកំពុងស្ថិតក្នុងដៃក្រុមហាម៉ាស។ បណ្តាញព័ត៌មានរុស្ស៊ី អះអាងថាភាគីរុស្ស៊ី បានទាមទារយ៉ាងទទូច ឲ្យក្រុមហាម៉ាស ត្រូវតែពិចារណា ដោះលែងចំណាប់ខ្មាំងជាជនជាតិបរទេសទាំងអស់។ បន្ថែមពីនេះ ភាគីរុស្ស៊ីបានលើកឡើងអំពីការជម្លៀសជនជាតិរុស្ស៊ី និងជនបរទេសដែលជាប់នៅក្នុងតំបន់ហ្កាហ្សា។
ដោយឡែក នៅព្រឹកថ្ងៃសុក្រទី២៧តុលា បណ្តាញព័ត៌មានរុស្ស៊ី Kommersant បានចុះផ្សាយថា តំណាង ក្រុមហាម៉ាសម្នាក់ ឈ្មោះ Abou Hamid ដែលមានវត្តមាននៅម៉ូស្គូ បានអះអាងប្រាប់ថា ក្រុមហាម៉ាសនឹងមិនអាចដោះលែងចំណាប់ខ្មាំងជាដាច់ខាត ដរាបណាគ្មានបទឈប់បាញ់ទេនោះ។ តំណាងក្រុមហាម៉ាសរូបនេះ បន្ថែមថា ពួកគេត្រូវការពេលវេលា ដើម្បីប្រមូលព័ត៌មាននិងកំណត់ទីតាំង ថាចំណាប់ខ្មាំងស្ថិតនៅត្រង់ទីតាំងណាខ្លះ។ ប្រភពដដែលនេះ បានអះអាងទៀតថា គិតត្រឹមពេលនេះ យ៉ាងហោចមានចំណាប់ខ្មាំងជិត៥០នាក់ហើយ ដែលបានស្លាប់ដោយការបាញ់ប្លោងមីស៊ីលរបស់អ៊ីស្រាអែល។
ប្រភពពីក្រសួងការបរទេសរុស្ស៊ីវិញ បានឲ្យដឹងថា លោកអនុរដ្ឋមន្ត្រីក្រសួងការបរទេសអ៊ីរ៉ង់ Ali Bagheri Kani ដែលមានវត្តមាននៅម៉ូស្គូ បានជួបប្រជុំជាមួយលោកអនុរដ្ឋមន្ត្រីការបរទេសរុស្ស៊ី Mikhail Bogdanov កាលពីថ្ងៃព្រហស្បតិ៍។ អ្នកទាំង២ បាននិយាយគ្នា អំពីភាពចាំបាច់នៅក្នុងការឈានទៅបញ្ឈប់ការផ្ទុះអាវុធនៅហ្កាហ្សា និងតំបន់ជុំវិញ ហើយនិងការបញ្ជូនជំនួយមនុស្សធម៌ ទៅជួយប្រជាជនប៉ាឡេស្ទីន ឲ្យបានឆាប់ជាទីបំផុត។ ភាគីទាំង២ សន្យាថានឹងបន្តសហការគ្នា ប្រឹងប្រែងការពារស្ថិរភាពតំបន់ដើមបូព៌ា។
លោក ចូ បៃដិន ផ្ញើសារទៅគំរាមមេដឹកនាំអ៊ីរ៉ង់
គួរកត់សំគាល់ថា ស្ថិរភាពតំបន់ដើមបូព៌ា កំពុងតែស្ថិតក្នុងគ្រោះថ្នាក់ដ៏ធំ ដោយគេបារម្ភថាសង្គ្រាមរវាងក្រុមហាម៉ាស និងអ៊ីស្រាអែល អាចនឹងឆាបឆេះរាលដាលពាសពេញតំបន់តំបន់។ អ្វីដែលគេបារម្ភបំផុត គឺការចូលលូកដៃ របស់អ៊ីរ៉ង់ នៅក្នុងសង្គ្រាមនេះ។ យ៉ាងណាមិញ ដើម្បីបង្ការកំញើញទៅលើអ៊ីរ៉ង់ ឲ្យប្រុងប្រយ័ត្ន អាមេរិកបានបន្ថែមកម្លាំងទៅក្បែរអ៊ីស្រាអែល។
នៅថ្ងៃសុក្រទី២៧តុលា ក្រសួងការពារជាតិអាមេរិក បានឲ្យដឹងថា គេបានបើកប្រតិបត្តិការវាយប្រហារ ទៅលើទីតាំង២កន្លែង ដែលក្រុមប្រដាប់អាវុធជាកូនចៅអ៊ីរ៉ង់ប្រើប្រាស់ ស្ថិតនៅភាគខាងកើតស៊ីរី។ លោក Lloyd Austin បានឲ្យដឹង ការវាយប្រហាររបស់កងទ័ពអាមេរិកនេះ គឺជាការវាយប្រហារការពារខ្លួនដ៏ស្របច្បាប់ ឆ្លើយតបវាយបកទៅវិញ បន្ទាប់់ពីក្រុមប្រដាប់អាវុធកូនចៅអ៊ីរ៉ង់ បានវាយប្រហារជាច្រើនដង មកលើទីតាំងរបស់កងទ័ពអាមេរិក ប្រចាំនៅស៊ីរីនិងនៅអ៊ីរ៉ាក់ គិតចាប់ពិថ្ងៃទី១៧តុលាមក។
កាលពីល្ងាចថ្ងៃព្រហស្បតិ៍ទី២៦តុលា លោក John Kirby អ្នកនាំពាក្យសេតវិមានបានបញ្ជាក់ឲ្យដឹងថា លោក ប្រធានាធិបតី ចូ បៃដិន បានផ្ញើសារដោយផ្ទាល់ ទៅកាន់ប្រមុខដឹកនាំអ៊ីរ៉ង់ អាយ៉ាតូឡា អាលី ខាមឺណី ដោយបានក្រើនរំឭកឲ្យអ៊ីរ៉ង់ ត្រូវតែបញ្ឈប់ការវាយប្រហារមកលើកងទ័ពអាមេរិក ដែលប្រចាំនៅតំបន់ដើមបូព៌ា។ លោក ចូ បៃដិនបានគំរាមដោយត្រង់ៗថា អ៊ីរ៉ង់ត្រូវតែស្ថិតនៅឲ្យឆ្ងាយ កុំចង់មកលូកដៃ ពង្រីកសង្គ្រាមរវាងក្រុមហាម៉ាស និងអ៊ីស្រាអែល ឲ្យរីករាលដាលធំឲ្យសោះ។
ជាការពិតណាស់ ប៉ុន្មានថ្ងៃចុងក្រោយនេះ ភាគីអាមេរិកបានឲ្យដឹងថា ក្រុមប្រដាប់អាវុធកូនចៅអ៊ីរ៉ង់ជាច្រើនក្រុម បានបាញ់មីស៊ីល និងបានបញ្ជាយានដ្រូន មកវាយប្រហារមកលើទីតាំងរបស់កងទ័ពអាមេរិក ដែលប្រចាំការនៅស៊ីរី និងនៅអ៊ីរ៉ាក់។ គិតត្រឹមថ្ងៃទី២៧តុលា ការវាយប្រហាររបៀបនេះ មានចំនួនប្រមាណ១៦ដង នៅអ៊ីរ៉ាក់១២ដង នៅស៊ីរី៤ដង។ តែភាគច្រើននៃការវាយប្រហារនេះ គឺមិនបានជោគជ័យទេ ដោយគ្រាន់តែបានបណ្តាលឲ្យបុគ្គលិកអាមេរិក របួសស្រាលជាង២០នាក់។ យ៉ាងណាក៏ដោយ លោករដ្ឋមន្ត្រីក្រសួងការពារជាតិអាមេរិក បានសង្កត់ធ្ងន់ថាការវាយបកវិញរបស់អាមេរិក ទៅលើក្រុមប្រដាប់អាវុធអ៊ីរ៉ង់ គឺវាស្ថិតនៅដាច់ដោយឡែក ពីសង្គ្រាមដែលកំពុងកើតឡើងនៅហ្កាហ្សា ហើយគោលជំហរអាមេរិក ទាក់ទិននឹងសង្គ្រាមនេះ គឺនៅដដែលមិនប្រែប្រួលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ