លោក វ៉ាត់ ចំរើន៖ ពហុកីឡដ្ឋានថ្មីនេះ មានសារៈសំខាន់ណាស់នៅក្នុងវិស័យសេដ្ឋកិច្ចសង្គម និងការទូត លើឆាកអន្តរជាតិ
ចុះផ្សាយនៅថ្ងៃ៖
ស្តាប់ - ០៨:៥៣
ប្រទេសកម្ពុជានឹងសម្ពោធពហុកីឡដ្ឋានដ៏ទំនើបមួយនៅថ្ងៃសៅរ៍ស្អែកនេះ ដែលជាជំនួយរបស់ប្រទេសចិនអស់ទឹកប្រាក់ប្រមាណ ១៦០លានដុល្លារ។ ពិធីសម្ពោធនេះ ធ្វើឡើងក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន និងឯកអគ្គរដ្ឋទូតចិនប្រចាំកម្ពុជា ដោយមានការចូលរួមពីពលរដ្ឋខ្មែរជាង ១៧ ០០០ នាក់។ កម្មវិធីសំខាន់ៗនៅថ្ងៃស្អែកនេះ មានចំនួន៣គឺ ការដាក់ឲ្យប្រើប្រាស់ជាផ្លូវការពហុកីឡដ្ឋានថ្មីផង ការរាប់ថយក្រោយ៥០២ថ្ងៃឆ្ពោះទៅស៊ីហ្គេមផង និងជាយុទ្ធនាការជាតិផ្សព្វផ្សាយស៊ីហ្គេមឆ្នាំ២០២៣ផង។ លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ថ្លែងឲ្យដឹងថាពហុកីឡដ្ឋានថ្មីនេះ នឹងផ្តល់ផលចំណេញធំធេងដល់កម្ពុជាទាំងសេដ្ឋកិច្ចសង្គម និងនយោបាយលើឆាកអន្តរជាតិ។
