លោក ជូង ជូងី៖ ការទារសំណងដ៏ច្រើនរបស់ដើមបណ្តឹង គឺជាការបំបាក់ជីវិតនយោបាយរបស់លោក សុន ឆ័យ
ចុះផ្សាយនៅថ្ងៃ៖
ស្តាប់ - ០៨:៣៩
សាលាដំបូងរាជធានីភ្នំពេញ នៅរសៀលថ្ងៃសុក្រនេះ បានប្រកាសសាលក្រមលើសំណុំរឿងបរិហារកេរ្តិ៍ជាសាធារណៈទាំង២ប្រឆាំងនឹងលោក លោក សុន ឆ័យ ដែលត្រូវបានប្តឹងដោយគណៈកម្មាធិការជាតិរៀបចំការបោះឆ្នោត(គ.ជ.ប) និងបណ្តឹង១ទៀតរបស់គណបក្សប្រជាជនកម្ពុជា។ សម្រាប់បណ្តឹង គ.ជ.ប តុលាការបានផ្តន្ទាទោស លោក សុន ឆ័យ ដោយពិន័យជាប្រាក់ចំនួន៩លានរៀល និងធ្វើលិខិតសុំទោសជាសាធារណៈ។ ដោយឡែកបណ្តឹងរបស់គណបក្សប្រជាជនវិញ តុលាការបង្គាប់ឲ្យសងជំងឺចិត្តទៅដើមបណ្ដឹងចំនួន ៣ពាន់លានរៀល និងបង់ចូលរដ្ឋ៨លានរៀលផងដែរ។ លោក ជូង ជូងី មេធាវីការពារសិទ្ធិលោក សុន ឆ័យ អនុប្រធានគណបក្សភ្លើងទៀន ថ្លែងថាសាលក្រមនេះអយុត្តិធម៌ ហើយលោកនឹងពិភាក្សាជាមួយកូនក្តីលោកបន្តទៅសាលាឧទ្ធរណ៍ក្នុងពេលឆាប់ៗនេះ។ លោកថា សាលក្រមផ្តន្ទាទោសលោក សុន ឆ័យ ដែលមានការទាមទារសំណងរហូតជិត១លានដុល្លារគឺមានបំណងចង់ឲ្យលោក សុន ឆ័យ ប្រឈមខ្លាំង និងជាការបំបាក់ជីវិតនយោបាយផងដែរ។