កិច្ចព្រមព្រៀងលើកម្មវិធីនុយក្លេអ៊ែរអ៊ីរ៉ង់អាចមានសង្ឃឹមរឺយ៉ាងណា?
នៅសល់ពេលមិនដល់ពីរថ្ងៃទៀតទេ ដែលថ្ងៃកំណត់នៃការចរចា ៧ភាគី ស្តីពីកម្មវិធីនុយក្លេអ៊ែរអ៊ីរ៉ង នឹងត្រូវបញ្ចប់។ សេចក្តីសង្ឃឹមចាប់ផ្តើមមានពន្លក កាន់តែធំព្រោះថា នេះជាលើកទីមួយហើយដែលភាគី ទាំងអស់ បានត្រូវរូវគ្នា រហូតមកដល់ចំនុចនេះ។ នេះជាឱកាស ដ៏ល្អសម្រាប់អ៊ីរ៉ង់ ដើម្បីរួចខ្លួនចេញពីទណ្ឌកម្មសេដ្ឋកិច្ច ដែលសហគមន៍អន្តរជាតិ បានដាក់លើអ៊ីរ៉ង់ ជាច្រើនឆ្នាំកន្លងមកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
អស់រយៈពេលជាច្រើនខែមកហើយ ដែលប្រទេស៧ បានចរចារគ្នាស្តីពីការគ្រប់គ្រងកម្មវិធីនុយក្លេអ៊ែររបស់អ៊ីរ៉ង់ ក្នុងនោះរួមមាន៖ សហរដ្ឋអាមេរិក បារាំង អង់គ្លេស រុស្ស៊ី ចិន អាល្លឺម៉ង់ និងអ៊ីរ៉ងផ្ទាល់។ កិច្ចចរចាដែលបានប្រព្រឹត្តិទៅនៅទីក្រុងវីយែន ប្រទេសអូទ្រីស កាលពីម្សិលមិញ មានការចូលរួមពី រដ្ឋមន្រ្តី ក្រសួងការបរទេសរបស់ប្រទេសទាំង៧។ អ្នកដែលមានទឹកមាត់ប្រៃក្នុងការចរចានេះ គឺសហរដ្ឋអាមេរិក និងអ៊ីរ៉ង់។
មានសញ្ញាវិជ្ជមានជាច្រើន បន្ទាប់ពីមានការជួបប្រាស្រ័យដាច់ដោយឡែកជាច្រើនលើក រវាងរដ្ឋមន្ត្រីក្រសួងការបរទេសអាមេរិក នឹងអ៊ីរ៉ង់។ នេះជាលើកទីមួយហើយ ដែលភាគីទាំងពីរបានបង្ហាញភាពល្អូកល្អើន ដែលនេះអាចជះផលវិជ្ជមាន ដល់លទ្ធផលនៃការស្វែងរកដំណោះស្រាយ ដែលបានរាំងស្ទះអស់ជាច្រើនឆ្នាំមកហើយ។
ទោះបីជាយ៉ាងណា នៅមានចំណុចសំខាន់ពីរដែល ភាគីទាំងពីរនៅតែខ្វែងគំនិតគ្នា។ ចំនុចទីមួយ គឺភាគីទាំង៦ ប្រាថ្នាចង់ឲ្យអ៊ីរ៉ង់ បន្ថយការចំរាញ់ធាតុអ៊ុយរ៉ានីញ៉ូមបន្តិចម្តងៗ រហូតទាល់តែបញ្ឈប់ទាំងស្រុងតែម្តង ដើម្បីធានាថា អ៊ីរ៉ង់នឹងគ្មានលទ្ធភាពទៅបង្កើតគ្រាប់បែបបរមាណូ។ ប៉ុន្តែអ៊ីរ៉ង់វិញ មិនព្រមទទួលយកលក្ខខណ្ឌនេះទេ។ ផ្ទុយទៅវិញ អ៊ីរ៉ង់ទាមទារចង់បន្ថែមការផលិតជាតិអ៊ុយរ៉ានីញ៉ូមបន្ថែមទៀត ព្រោះខ្លួនត្រូវការវា យកទៅដំនើរការរោងចក្រផលិតអគ្គីសនី ដើរដោយថាមពលនុយក្លេអ៊ែរ។
ប្រមុខការទូតរុស្ស៊ី ដែលមានវត្តមានក្នុងការចរចា បានសម្តែងសុទិដ្ឋិនិយមថា លើកនេះភាគីទាំងអស់អាចនឹងមានឱកាសព្រមព្រៀងគ្នា។ ពេលវេលាមិនអាចទន្ទឹងចាំបានទៀតទេ។ ប៉ុន្តែលើកនេះបើសិនជានៅតែបរជ័យ គេមិនដឹងថាពេលណា អាចនឹងមានឱកាសវិលមករកតុចរចាជាថ្មីនោះទេ។ មួយវិញទៀត ចាប់ពីខែមករាឆ្នាំ២០១៥ទៅ គណបក្សសាធារណៈរដ្ឋនឹងចូលកាន់កាប់សភាអាមេរិក ដូច្នេះ លោកប្រធានាធិបតីអូបាម៉ា លែងមានកម្លាំងគាំទ្រទៀតហើយ។ អ៊ីរ៉ង់គួរតែចាប់យកឱកាសនេះ ដើម្បីបញ្ចប់ទណ្ឌកម្មសេដ្ឋកិច្ច ដែលគ្រប់គ្នាគេបានដាក់ទៅលើខ្លួន។
សូមបញ្ជាក់ថា អស់រយៈពេលជាច្រើនឆ្នាំមកហើយដែល សេដ្ឋកិច្ចអ៊ីរ៉ង់ត្រូវបានរាំងខ្ទប់ ដោយសាទណ្ឌកម្មអន្តរជាតិ។ ដ៏រាបណាអ៊ីរ៉ង់មិនបញ្ឈប់កម្មវិធីចំរាញ់ជាតិអ៊ុយរ៉ាណីញ៉ូម អាមេរិក និងប្រទេសធំៗទាំងអស់ នឹងនៅតែបន្តដាក់ទណ្ឌកម្មលើអ៊ីរ៉ង់។ ប្រជាជនអ៊ីរ៉ង់បានត្អូញត្អែរអំពីការលំបាក ក្នុងការធ្វើជំនួញ រកស៊ី ព្រោះដោយសា តែទណ្ឌកម្ម អ៊ីរ៉ង់ស្ទើរតែបិទទ្វាទាំងស្រុង គ្មានទំនាក់ទំនងជាមួយប្រទេសមហាអំណាចធំៗឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ