លោកអូបាម៉ា៖ នៅមានគំនិតខ្វែងគ្នាច្រើន ក្នុងរឿងចរចានុយក្លេអ៊ែរអ៊ីរ៉ង់
កិច្ចចរចាអាមេរិក អ៊ីរ៉ង់ ស្តីពីកម្មវិធីនុយក្លេអ៊ែរអ៊ីរ៉ង់ នៅបន្តធ្វើ ដល់ថ្ងៃចន្ទទី ១០ វិច្ឆិកា បន្ទាប់ពី ការពិភាក្សាយ៉ាងតឹងតែង គ្មានចេញ លទ្ធផល រវាងប្រមុខការបរទេស អាមេរិក និងរដ្ឋមន្រ្តីការបរទេសអ៊ីរ៉ង់ កាលពីថ្ងៃអាទិត្យ។ នៅថ្ងៃអាទិត្យដដែល មុននឹងចេញដំណើរទៅចូលរួមក្នុងកិច្ចប្រជុំAPEC នៅប្រទេសចិន លោកប្រធានាធិបតីអាមេរិកបានពន្លយឲ្យដឹងរួចហើយថា ដោយសារនៅមានការខ្វែងគំនិតគ្នាច្រើន នៅក្នុងការចរចា គេប្រហែលមិនអាចសម្រេចបង្កើតបានកិច្ចព្រមព្រៀង តាមកាលកំណត់ នៅថ្ងៃទី ២៤វិច្ឆិកានេះទេ។
ចុះផ្សាយនៅថ្ងៃ៖
ស្តាប់ - ០២:២៥
លោកប្រធានាធិបតីអាមេរិក បារ៉ាក់ អូបាម៉ាហាក់គ្មានសុទិដ្ឋិនិយម ក្នុងរឿងចរចានុយក្លេអ៊ែរជាមួយអ៊ីរ៉ង់។ នៅក្នុងបទសម្ភាសន៍ជាមួយទូរទស្សន៍ អាមេរិក CBS កាលពីថ្ងៃអាទិត្យ ប្រមុខដឹកនាំអាមេរិកបានលើកឡើង ពីគម្លាតដ៏ធំមួយ ដែលជាឧបសគ្គ រារាំងមិនឲ្យគេអាចរកបានកិច្ចព្រមព្រៀងស្តីពីនុយក្លេអ៊ែរអ៊ីរ៉ង់ តាមកាលកំណត់ គឺនៅថ្ងៃ ទី ២៤វិច្ឆិកាខាងមុខ។ សម្រាប់លោកប្រធានាធិបតីអាមេរិក អ្វីដែលចោទនៅពេលនេះ គឺថា តើគេអាចកាត់បន្ថយភាពខ្វែងគំនិតគ្នា ដើម្បីបង្កើតកិច្ចព្រមព្រៀងមួយដែលធានាថា អ៊ីរ៉ង់នឹងមិនផលិតអាវុធនុយក្លេអ៊ែរ និងដើម្បីឲ្យគេអាចដកទណ្ឌកម្មសេដ្ឋកិច្ចបន្តិចម្តងៗពី អ៊ីរ៉ង់។
ថ្មីៗនេះ អាមេរិកបានសម្រុកបើកការចរចាទ្វេភាគី ជាមួយអ៊ីរ៉ង់ ដើម្បីឈានទៅកាត់បន្ថយចំណុចខ្វែងគំនិតគ្នា លើសំណុំរឿងនុយក្លេអ៊ែរអ៊ីរ៉ង់។ ជំនួបជាបន្តបន្ទាប់ រវាងប្រមុខ ការបរទេសអាមេរិក និងអ៊ីរ៉ង់ ធ្វើឡើង បន្ទាប់ពីមានដំណឹងដែលថា លោកប្រធានាធិបតីអាមេរិកបានសរសេរសំបុត្រមួយទៅអាលី ខាមេណី អគ្គមគ្គទេសក៍កំពូលរបស់អ៊ីរ៉ង់ ដែលជាអ្នកសម្រេចចិត្តក្នុងរឿងនុយក្លេអ៊ែរអ៊ីរ៉ង់។
ទាំងភាគីចរចាអ៊ីរ៉ង់ និងអាមេរិកសុទ្ធតែស្ថិតនៅសម្ពាធនយោបាយក្នុងស្រុក។ លោកប្រធានាធិបតីអាមេរិកដែលទើបបរាជ័យបាត់បង់សំឡេងភាគច្រើនរបស់គណបក្សរបស់លោក នៅព្រឹទ្ធសភា ប្រាថ្នាចង់ការចរចាឈានទៅដល់កិច្ចព្រមព្រៀងនៅមុនថ្ងៃទី ២៤វិច្ឆិកា ព្រោះថា បើសិនការចរចាលើកនេះជួបបរាជ័យ នោះ គណបក្សសាធារណរដ្ឋ ដែលពេលនេះ កំពុងកាន់កាប់ទាំងព្រឹទ្ធសភា និងសភាអ្នកតំណាងរាស្រ្ត នឹងបោះឆ្នោត ដើម្បីដាក់ទណ្ឌកម្មជាថ្មី ទៅលើអ៊ីរ៉ង់។ អ៊ីរ៉ង់ដែលប្រទេសលោកខាងលិចសង្ស័យថា កំពុងលួចលាក់ផលិតអាវុធនុយក្លេអ៊ែរ នៅក្រោម ស្លាកកម្មវិធីនុយក្លេអ៊ែរស៊ីវិល។
នៅអ៊ីរ៉ង់វិញ រដ្ឋាភិបាលកណ្តាលនិយមប្រឈមនឹងការដាក់សម្ពាធពីក្រុមអភិរក្សដែលទាមទារកុំឲ្យរដ្ឋាភិបាលធ្វើសម្បទានឲ្យសោះនៅក្នុងពេលចរចាជាមួយអាមេរិក។
សូមបញ្ជាក់ថា កាលពីខែកក្កដា កន្លងទៅ អ៊ីរ៉ង់ និងក្រុមប្រទេស ៥បូក១ បានយល់ព្រមពន្យារពេលចរចា រហូតដល់ថ្ងៃទី ២៤វិច្ឆិកា ដើម្បីកាត់ចោលឲ្យអស់ នូវគំនិតខ្វែងគ្នា ដែលនៅសេសសល់។ ប៉ុន្តែ រាល់ការចរចាបន្តបន្ទាប់មិនបានផ្តល់លទ្ធផលជាវិជ្ជមាន។ នៅក្នុងកិច្ចប្រជុំកាលពីថ្ងៃអាទិត្យ ភាគីចរចាអាមេរិក និងអ៊ីរ៉ង់ មិនបានធ្វើសេចក្តីថ្លែងការណ៍ណាមួយទេ ប៉ុន្តែ គេបានសន្យាថា នឹងបន្តពិភាក្សា នៅថ្ងៃចន្ទនេះទៀត។ លោកប្រមុខការបរទេសអ៊ីរ៉ង់ផ្ទាល់ បានបញ្ជាក់ប្រាប់កាសែតក្នុងស្រុកអ៊ីរ៉ង់ ពីការខ្វែងគំនិតគ្នាជាច្រើន រវាងភាគីចរចា ទៅលើសំណុំរឿងនុយក្លេអ៊ែរអ៊ីរ៉ង់។ តាមយោបល់រដ្ឋមន្រ្តីការបរទេសអ៊ីរ៉ង់ គេអាចសម្រេចបានកិច្ចព្រមព្រៀង ប្រសិនបើភាគីចរចាមានឆន្ទះនយោបាយពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ