ចនឃែរីទាមទារឲ្យប្រទេសធំៗចូលរួមជួយកម្ចាត់មេរោគអេបូឡា
លោកប្រមុខការទូតអាមេរិក ចនឃែរីបានថ្លែងក្នុងឱកាសសន្និសីទកាសែតមួយ នៅក្រុងវ៉ាស៊ីនតោនថា ដើម្បីប្រយុទ្ធប្រឆាំងនឹងមេរោគអេបូឡាដោយប្រសិទ្ធិភាព ប្រទេសធំៗទាំងអស់ ត្រូវតែចូលរួមឲ្យបានច្រើនជាងនេះ មិនមែននៅឈរ ឱបដៃមើលនោះទេ។ ទោះបីជាមិនបានចង្អុលចំៗ ថាប្រទេសណាមួយ គ្រប់គ្នាដឹងយ៉ាងច្បាស់ថា លោកចនឃែរីមានចេតនាសំដៅលើប្រទេសអឺរ៉ុបមួយចំនួន ដែលធ្លាប់ដាក់អាណានិគមន៍នៅអាហ្រ្វិក ហើយមិនបានចូលរួមថវិកា ក្នុងការប្រយុទ្ធនឹងមេរោគអេបូឡា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
មេរោគអេបូឡាដែលកំពុងតែយាយីអាយុជីវិតប្រជាជន នៅទ្វីបអាហ្រ្វិកភាគខាងលិច បានឆក់យកជីវិតមនុស្សប្រមាណជា៣៥០០នាក់ហើយ។ ប្រទេសប្រាំដែលរងការគម្រាមកំហែងជាងគេ គឺ ហ្គីណេ សេរ៉ាឡេអូន លីបេរីយ៉ា នីហ្សេរីយ៉ា និងសេណេហ្គាល់។ ប្រទេសទាំងនេះសុទ្ធសឹងជាប្រទេសក្រីក្របំផុត ដែលគ្មានលទ្ធភាពឯណា នឹងទប់ស្កាត់ការរីករាលដាល របស់មេរោគដ៏កាចសាហាវនេះបានទេ។ សហគមន៏អន្តរជាតិ កំពុងតែមានការព្រួយបារម្ភ អំពីការរីករាលដាលរបស់មេរោគនេះ ទៅកាន់ប្រទេសផ្សេងៗទៀត ទូទាំងពិភពលោក។
ក្រសួងការបរទេសអាមេរិក បានរៀបចំសន្និសីទកាសែតបន្ទាន់មួយ កាលពីថ្ងៃពុធ ម្សិលមិញ ដើម្បីអំពាវនាវឲ្យប្រទេសធំៗទាំងអស់ ឲ្យចូលរួមឲ្យបានសកម្មជាងនេះ ក្នុងការកម្ចាត់មេរោគអេបូឡា។ លោកចនឃែរីបានថ្លែងថា ប្រទេសធំៗ ដែលមានលទ្ធភាព និងសមត្ថភាព គួរណាស់តែចូលរួមឲ្យបានខ្លាំងជាងនេះ មិនមែនបានត្រឹមតែនិយាយ តែមិននាំគ្នាធ្វើនោះទេ។
សូមបញ្ជាក់ថា យុទ្ធនាការកម្ចាត់មេរោគអេបូឡា ត្រូវការថវិកាយ៉ាងសន្ធឹកសន្ធាប់។ អង្គការសហប្រជាជាតិបានអំពាវនាវឲ្យប្រទេសទាំងអស់ ផ្តល់វិភាគទានសរុបឲ្យបាន៩៩៨លានដុល្លារ។ ប៉ុន្តែទឹកប្រាក់ដែលប្រមូលបាន មានចំនូនតែជាង៦០០លានដុល្លារប៉ុណ្ណោះ។ សហរដ្ឋអាមេរិក បានផ្តល់ឲ្យចំនួន១១៤លានដុល្លារ សហភាពអឺរ៉ុបចំនួន៥៥លាន ៥សែនដុល្លារ និងចក្រភពអង់គ្លេសចំនួនជិត៨លានដុល្លារ។ នៅក្នុងតារាងតួលេខ ដែលប្រសួងការបរទេសអាមេរិកបានចេញផ្សាយ គេមិនឃើញមានការចូលរួមវិភាគទាន របស់ប្រទេសអឺរ៉ុបមួយចំនួន ដូចជាបារំាង អេស្ប៉ាញ និងព័រទុយហ្គាល់ជាដើម។
លោកស្រី អ្នកនាំពាក្យក្រសួងការបរទេសអាមេរិក បាននិយាយបែបចំអកថា ប្រទេសអ្នកមានខ្លះ ដែលមានលទ្ធភាព ជួយបានបន្តិចបន្ទួចបំផុត ផ្ទុយទៅវិញ ប្រទេសតូចតាចវិញ ជួយបានច្រើនជាង។ លោកស្រីលើកឡើងនេះ សំដៅលើ ចិននិងឥណ្ឌាដែលបានចូលរូមផ្តល់ជាថវិកា ផ្ទុយគ្នាពីប្រទេសអឺរ៉ុបមួយចំនួន ដែលសុទ្ធសឹងតែធ្លាប់ទៅដាក់អាណានិគមន៍ នៅក្នុងទ្វីបអាហ្រ្វិក តែទីបំផុតបានតែមាត់។ លោកស្រីបន្តថា លោកស្រីមិនបាច់និយាយថាប្រទេសណាមួយនោះទេ ប្រទេសដែលមានខ្លួន គេដឹងខ្លួនឯងហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ