ចិនថាគឺអាមេរិកដែលជាអ្នកធ្វើឲ្យសមុទ្រចិនខាងត្បូងក្លាយជាតំបន់កងទ័ព
នៅក្នុងរយៈពេលប៉ុន្មានថ្ងៃកន្លងទៅនេះ ចិនត្រូវទទួលរងនូវការរិះគន់ពីសំណាក់សហរដ្ឋអាមេរិក ទាក់ទងនឹងការដាក់តាំងបរិក្ខាយោធា រួមទាំងមីស៊ីលសម្រាប់បាញ់យន្តហោះផង នៅក្នុងតំបន់សមុទ្រចិនខាងត្បូង។ នៅថ្ងៃព្រហស្បតិ៍ ចិនបានវាយប្រហារតបទៅវិញ ដោយបានលើកឡើងថា គឺអាមេរិកទៅវិញទេ ដែលជាអ្នកកំពុងតែធ្វើឲ្យតំបន់សមុទ្រចិនខាងត្បូងនេះ ក្លាយជាតំបន់កងទ័ព។
ចុះផ្សាយនៅថ្ងៃ៖
ស្តាប់ - ០១:៣៩
ការបរិហាររិះគន់ធ្ងន់ៗរបស់ចិនត្រូវបានធ្វើឡើងតែមួយថ្ងៃប៉ុណ្ណោះ ក្រោយពីអាមេរិកបានប្រកាសថានឹងបង្កើនប្រតិបត្តិការល្បាតដែនសមុទ្រ នៅក្នុងតំបន់ជាប់ជម្លោះនៅសមុទ្រចិនខាងត្បូង។
ថ្លែងនៅចំពោះមុខសភា មេបញ្ជាការកងទ័ពជើងទឹកអាមេរិកប្រចាំតំបន់ប៉ាស៊ីហ្វិកបានលើកឡើងថា នាវាចម្បាំងរបស់អាមេរិកនឹងធ្វើដំណើរចូលទៅកាន់គ្រប់ទីកន្លែង ដែលអនុញ្ញាតដោយច្បាប់អន្តរជាតិ ហើយប្រតិបត្តិការល្បាតដែនសមុទ្រ ដើម្បីធានាសិទ្ធិសេរីភាពនាវាចរណ៍ក្នុងតំបន់សមុទ្រចិនខាងត្បូងនឹងនៅតែបន្តធ្វើ ហើយធ្វើកាន់តែខ្លាំងជាងមុនទៅទៀត បើទោះបីជាចិនបានបញ្ជូនយន្តហោះចម្បាំង និងប្រព័ន្ធមីស៊ីលទៅដំឡើងនៅក្នុងតំបន់នេះក៏ដោយ។
គួររំឭកឡើងវិញថា ចិនបានដំឡើងប្រព័ន្ធមីស៊ីលបាញ់យន្តហោះនៅក្នុងតំបន់ប្រជុំកោះប៉ារ៉ាសែល (Paracel) ព្រមទាំងប្រព័ន្ធរ៉ាដា នៅក្នុងតំបន់ប្រជុំកោះស្ប្រែតលី (Spratley) ដែលសុទ្ធជាតំបន់កំពុងជាប់ជម្លោះជាមួយនឹងប្រទេសនៅក្នុងតំបន់អាស៊ាន រួមមាន វៀតណាម ហ្វីលីពីន ម៉ាឡេស៊ី និងព្រុយណេ។ នៅពេលនោះ មន្រ្តីជាន់ខ្ពស់អាមេរិកទាំងយោធា និងស៊ីវិល ក្នុងនោះរួមមានទាំងលោកចន ឃែរី រដ្ឋមន្រ្តីការបរទេសអាមេរិកផង បានបរិហាររិះគន់យ៉ាងខ្លាំងៗថា ចិនកំពុងតែធ្វើឲ្យតំបន់សមុទ្រចិនខាងត្បូងនេះ ក្លាយជាតំបន់កងទ័ព។
ក៏ប៉ុន្តែ នៅថ្ងៃព្រហស្បតិ៍ មន្រ្តីអ្នកនាំពាក្យក្រសួងការពារជាតិចិនបានថ្លែងនៅចំពោះមុខអ្នកកាសែតថា គឺអាមេរិកទៅវិញទេទើបជាប្រទេសដែលកំពុងតែជំរុញឲ្យសមុទ្រចិនខាងត្បូងក្លាយជាតំបន់កងទ័ព តាមរយៈការបញ្ជូននាវាចម្បាំង និងយន្តហោះចម្បាំងឲ្យទៅធ្វើការល្បាតនៅក្នុងតំបន់នេះ។
មន្រ្តីអ្នកនាំពាក្យរូបនេះបានបញ្ជាក់សាជាថ្មីម្តងទៀតថា ទីតាំងដែលចិនដំឡើងប្រព័ន្ធរ៉ាដា និងមីស៊ីល គឺសុទ្ធតែស្ថិតនៅក្នុងដែនអធិបតេយ្យរបស់ចិន ដូច្នេះ វាជាសិទ្ធិរបស់ចិន នៅក្នុងការដំឡើងប្រព័ន្ធការពារដែនដីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ