ជប៉ុនផ្តល់ជំនួយជាថ្នូរនឹងកៅអីនៅក្រុមប្រឹក្សាសន្តិសុខរបស់អសប?
ចុះផ្សាយនៅថ្ងៃ៖
ស្តាប់ - ០៥:៣២
នាយករដ្ឋមន្រ្តីជប៉ុន លោកស៊ីនហ្សូ អាបេបានបញ្ចប់ទស្សនកិច្ចផ្លូវរដ្ឋ ក្នុងតំបន់អាស៊ីខាងត្បូង កាលពីថ្ងៃចន្ទ ទី ៨កញ្ញា។ ទស្សនកិច្ចរយៈពេលបីថ្ងៃរបស់លោកអាបេនៅក្នុងប្រទេសបង់ក្លាដែស និងស្រីលង្កាបាននាំលទ្ធផលផ្លែផ្កាជាច្រើនដល់ប្រទេសជប៉ុន។ ក្រៅតែពីពង្រីកទីផ្សារវិនិយោគរបស់ជប៉ុននៅក្នុងប្រទេសទាំងពីរ នាយករដ្ឋមន្រ្តីជប៉ុនបានទទួលផងដែរការគាំទ្រពីប្រទេសបង់ក្លាដែស ដើម្បីជប៉ុនក្លាយជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខរបស់អង្គការសហប្រជាជាតិ។
លោកស៊ីនហ្សូ អាបេបានក្លាយជានាយករដ្ឋមន្រ្តីជប៉ុនទីមួយ ដែលបានធ្វើដំណើរទស្សនកិច្ចផ្លូវរដ្ឋ នៅក្នុងប្រទេសស្រីលង្ការ នៅក្នុងរយៈពេល២៤ឆ្នាំចុងក្រោយនេះ។ កាលពីថ្ងៃអាទិត្យ លោកនាយករដ្ឋមន្រ្តីជប៉ុនបានទទួលការរាក់ទាក់ពីលោកប្រធានាធិបតីស្រីលង្កានៅព្រលានយន្តហោះអន្តរជាតិ ជាទីដែលអគារចុះចតយន្តហោះមួយទៀត នឹងត្រូវសាងសង់ជាមួយនឹងទឹកប្រាក់កម្ចីពីជប៉ុនចំនួន ៣៣០លានដុល្លារ។
នាយករដ្ឋមន្រ្តីជប៉ុនបានប្រកាសពីការពង្រឹងសហប្រតិបត្តិការជាមួយប្រទេសស្រីលង្កា ក្នុងវិស័យគមនាគមន៍ជើងទឹក ប៉ុន្តែ ដំណើរទស្សនកិច្ចរបស់ប្រមុខរដ្ឋាភិបាលជប៉ុននៅស្រីលង្កាត្រូវបានគេមើលឃើញថា ជានយោបាយយុទ្ធសាស្រ្តរបស់ជប៉ុន ដើម្បីទប់ទល់នឹងឥទ្ធិពលរបស់ចិន នៅអាស៊ីខាងត្បូង។
កាលពីថ្ងៃចន្ទ លោកប្រធានាធិបតីស្រីលង្កាបានសុំឲ្យជប៉ុនវិនិយោគលើការសាងសង់កំពង់ផែនៅក្នុងប្រទេសស្រីលង្កា ប៉ុន្តែ ជប៉ុនបានដើរយឺតច្រើនជំហាន ក្រោយចិន។ គឺនៅស្រីលង្ការនេះឯង ដែលកំពង់ផែដ៏ធំ លេចរូបរាងឡើង ដោយសារទឹកប្រាក់ជំនួយ៥០០លានដុល្លារ របស់ប្រទេសចិន។ ចិនដែលតែងតែមិនលូកដៃចូលក្នុងនយោបាយផ្ទៃក្នុងរបស់ប្រទេសដទៃ (នោះបើទោះជារដ្ឋាភិបាលស្រីលង្កាជាប់ពាក់ព័ន្ធនឹងឧក្រិដ្ឋកម្មនៅក្នុងសង្រ្គាមស៊ីវិលជាមួយពួកតាមីល) បានវិនិយោគទឹកប្រាក់សន្ធឹកសន្ធាប់នៅក្នុងប្រទេសស្រីលង្កា នៅប៉ុន្មានឆ្នាំចុងក្រោយនេះ បន្ទាប់ពីមើលឃើញប្រយោជន៍ពីទីតាំងភូមិសាស្រ្តរបស់ប្រទេសនេះ។ កំពង់ផែដែលចិនសាងសង់ឲ្យស្រីលង្កា និងទើបត្រូវសម្ពោធដាក់ឲ្យដំណើរការ កាលពីពេលថ្មីៗនេះ បានកា្លយជាកំពង់ផែដ៏សំខាន់មួយសម្រាប់ដំណើរចេញចូលរបស់កប៉ាល់អន្តរជាតិ នៅក្នុងមហាសមុទ្រឥណ្ឌា។
ចិនគ្រប់គ្រងកំពង់ផែនេះចំនួន៨៥ភាគរយ។ ចំណែកដែលនៅសល់គឺស្ថិតនៅក្រោមការគ្រប់គ្រងរបស់រដ្ឋាភិបាលស្រីលង្កា។ ជប៉ុនដែលត្រូវការដឹកប្រេងពីតំបន់ដើមបូព៌ា ឆ្លងកាត់មហាសមុទ្រឥណ្ឌា ក៏ត្រូវការចុះចតនៅត្រឹមកំពង់ផែនៅស្រីលង្កា មុននឹងធ្វើដំណើរបន្តទៅជប៉ុន។ ដូច្នេះ ការពង្រឹងសហប្រតិបត្តិការផ្នែកជើងទឹករវាងប្រទេសទាំងពីរនឹងអាចធ្វើឲ្យជប៉ុនទទួលបានប្រយោជន៍ចុះចត នៅស្រីលង្កា ដោយមិនចាំបាច់ឱនលំទោនសុំសិទ្ធិពីចិន ដែលជាម្ចាស់ស្ទើរដាច់មុខនៅកំពង់ផែរនៅស្រីលង្កា។ នៅស្រីលង្កា លោកនាយករដ្ឋមន្រ្តីជប៉ុនមិនបានប្រកាសពីជំនួយ ឬប្រាក់កម្ចីបន្ថែមទេ ប៉ុន្តែ លោកគ្រាន់តែប្រកាសផ្តល់កប៉ាល់ល្បាតដល់ឆ្មាំសមុទ្រស្រីលង្កាតែប៉ុណ្ណោះ។ មើលទៅ នាយករដ្ឋមន្រ្តីជប៉ុនគ្រាន់តែចង់វិនិយោគសមល្មម ដើម្បីគ្រាន់តែអាចទប់ទល់កុំឲ្យចិនមានឥទ្ធិពលផ្តាច់មុខនៅស្រីលង្កាតែប៉ុណ្ណោះ។
មួយវិញទៀត នៅក្នុងដំណើរទស្សនកិច្ចនៅក្នុងបណ្តាប្រទេសអាស៊ីខាងត្បូង មហិច្ឆតាធំមួយទៀតរបស់លោកស៊ីនហ្សូ អាបេគឺនៅក្នុងប្រទេសបង់ក្លាដែស។ នៅបង់ក្លាដែស កាលពីថ្ងៃសៅរ៍ លោកនាយករដ្ឋមន្រ្តីជប៉ុនបានបញ្ជាក់ទឹកប្រាក់ជំនួយ និងប្រាក់កម្ចីសរុបជិត៦ពាន់លានដុល្លារ សម្រាប់អភិវឌ្ឍន៍ហេដ្ឋារចនាសម្ព័ន្ធរបស់ប្រទេសបង់ក្លាដែស។ លោកស៊ីនហ្សូ អាបេក៏បានបញ្ជាក់ទៅលោកស្រីប្រធានាធិបតីបង់ក្លាដែសដែរថា ជប៉ុននឹងយល់ព្រមផ្តល់ប្រាក់កម្ចីជាង៤ពាន់លានដុល្លារទៀត សម្រាប់ការសាងសង់រោងចក្រថាមពលដើរដោយធ្យូងថ្ម និងការសាងសង់កំពង់ផែទឹកជ្រៅនៅបង់ក្លាដែស។
ខុសពីប្រទេសស្រីលង្កា ជប៉ុនបានបោះទុនវិនិយោគច្រើនពាន់លានដុល្លារ នៅប្រទេសបង់ក្លាដែស។ និយាយស្រួលយល់ គឺប្រទេសនេះ មិនសូវស្ថិតនៅក្រោមឥទ្ធិពលរបស់ចិន ដូចស្រីលង្កា។ ប៉ុន្តែ អ្វីដែលសំខាន់ជាងនេះ គឺជប៉ុនចង់បានការគំាទ្រពី ប្រទេសបង់ក្លាដែស ដើម្បីអាចក្លាយជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ។ ប្រទេសបង់ក្លាដែស ធ្លាប់ជាគូប្រជែង ជាមួយជប៉ុន ក្នុងការដាក់បេក្ខភាពសុំជាសមាជិករបស់ក្រុមប្រឹក្សាសន្តិសុខ។ ប៉ុន្តែ កាលពីឆ្នាំមុន លោកស្រីប្រធានាធិបតីបង់ក្លាដែស ដែលបានទៅទស្សនកិច្ចនៅទីក្រុងតូក្យូបានអះអាងថា បង់ក្លាដែសនឹងបោះចោលសិទ្ធិរបស់ខ្លួន ក្នុងការសុំចូលសមាជិករបស់ក្រុមប្រឹក្សាសន្តិសុខអង្គការសហប្រជាជាតិ ប្រសិនបើជប៉ុនយល់ព្រមចូលរួមអភិវឌ្ឍហេដ្ឋារចនាសម្ព័ន្ធរបស់បង់ក្លាដែស។ ដើម្បីជម្រុះគូប្រកួតប្រជែង ជប៉ុនបានយល់ព្រមលើកិច្ចព្រមព្រៀងផ្តល់ជំនួយ និងវិនិយោគរាប់ពាន់លានដុល្លារជាមួយបង់ក្លាដែស។ ជប៉ុនពេលនេះជាបេក្ខជនតែមួយពីអាស៊ីប៉ាស៊ីហ្វិកសម្រាប់កៅអីនៅក្រុមប្រឹក្សាសន្តិសុខ។
ជប៉ុនក្នុងអាណត្តិដឹកនាំរបស់លោកស៊ីនហ្សូ អាបេ ខំប្រឹងទំាងនយោបាយការទូត និងទឹកលុយដើម្បីបានតំណែងជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ នៅឆ្នាំក្រោយទៅ។ ជប៉ុនធ្លាប់ធ្វើជាសមាជិកមិនអចិន្រ្តៃយ៍នៅក្រុមប្រឹក្សាសន្តិសុខ១០លើកមកហើយ។ ប៉ុន្តែ ការចូលជាធ្វើជាសមាជិកមិនអចិន្ត្រៃយ៍របស់ជប៉ុនលើកនេះ អាចខុសពីលើកមុនៗ ដោយសារនាយករដ្ឋមន្រ្តីជប៉ុនធ្លាប់បានបញ្ជាក់ថា ជប៉ុននឹងចលនាទាមទារឲ្យគេធ្វើកំណែទម្រង់នៅក្នុងក្រុមប្រឹក្សាសន្តិសុខ ពោលគឺ គេត្រូវបញ្ចូលជប៉ុន ឥណ្ឌា ប្រេស៊ីល និងអាល្លឺម៉ង់ចូលក្នុងបញ្ជីសមាជិកអចិន្ត្រៃយ៍របស់ក្រុមប្រឹក្សាសន្តិសុខ ដែលរហូតមកដល់ពេលនេះមានតែ៥ប្រទេស។ ចង់មិនចង់ កំណែទម្រង់នៅក្នុងក្រុមប្រឹក្សាសន្តិសុខអាចនឹងជួបឧបសគ្គ ដោយសារតែចិនដែលជាសមាជិកអចិន្ត្រៃយ៍ ច្បាស់ជាប្រឆាំងដាច់ខាតមិនឲ្យជប៉ុនចូលមកខ្ពស់មុខមាត់ស្មើនឹងខ្លួនបាន។
យ៉ាងណាក៏ដោយ បើទោះបីជាជប៉ុនមិនអាចទាមទារបានសម្រេចដើម្បីបានក្លាយជាសមាជិកអចិន្រ្តៃយ៍របស់ក្រុមប្រឹក្សាសន្តិសុខ ប៉ុន្តែ ការណ៍ដែលក្លាយជាសមាជិកមិនអចិន្ត្រៃយ៍ ដែលមានអាណត្តិតែពីរឆ្នាំនោះ ក៏នឹងអាចផ្តល់ប្រយោជន៍មិនតិចដែរដល់ជប៉ុន។ ជប៉ុនអាចឆ្លៀតយកតួនាទីរបស់ខ្លួននៅក្នុងក្រុមប្រឹក្សាសន្តិសុខ ដើម្បីលើកនិយាយពីបញ្ហាដែនសមុទ្រ ដែលចិនកំពុងមានជម្លោះជាមួយប្រទេសនៅអាស៊ី ដែលរាប់ចូលទាំងជប៉ុនផង និងអាចរំលឹកទាមទារឲ្យចិនគោរព ឈប់រំលោភដែនទឹកអន្តរជាតិ។ មួយវិញទៀត ជប៉ុនអាចទទួលដឹងរាល់សំណុំរឿងពិភពលោកសំខាន់ៗ ដឹងពីជំហរនយោបាយ ឬការសម្រេចរបស់ថ្នាក់ដឹកនាំធំៗ បើសិនជាជប៉ុនក្លាយជាសមាជិកមួយក្នុងចំណោមសមាជិកទាំង២០របស់ក្រុមប្រឹក្សាសន្តិសុខអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ