តើអ្វីទៅដែលជំរុញឲ្យលោកស្ហ៊ីនហ្សូអាបេដាក់ចេញនូវនយោបាយជាតិនិយម?
ចុះផ្សាយនៅថ្ងៃ៖
ស្តាប់ - ០៤:២៩
ចាប់តាំងពីឡើងកាន់តំណែងជានាយករដ្ឋមន្រ្តីជប៉ុន កាលពីខែធ្នូឆ្នាំ២០១២មក លោកស្ហ៊ីនហ្សូ អាបេ បានបង្ហាញឲ្យឃើញទាំងតាមរយៈពាក្យសម្តី និងសកម្មភាព អំពីនយោបាយជាតិនិយម និងគោលបំណងចង់ទាញជប៉ុនឲ្យចេញពីចំណងនៃរដ្ឋធម្មនុញ្ញសន្តិភាពនិយម ដែលជប៉ុនត្រូវបង្ខំចិត្តទទួលយក ក្រោយពីបរាជ័យក្នុងសង្រ្គាមលោកលើកទី២។ តើមានមូលហេតុអ្វី ដែលជំរុញឲ្យលោកស្ហ៊ីនហ្សូ អាបេ ដើរចូលគន្លងផ្លូវជាតិនិយមខ្លាំងបែបនេះ?
ដើម្បីអាចយល់ច្បាស់អំពីនយោបាយជាតិនិយមរបស់លោកស្ហ៊ីនហ្សូ អាបេ នៅក្នុងពេលបច្ចុប្បន្ននេះ គេត្រូវស្វែងយល់អំពីចំណុចសំខាន់ពីរ៖ ទីមួយ ប្រវត្តិគ្រួសារ និងគោលគំនិតជាតិនិយមរបស់លោកស្ហ៊ីនហ្សូ អាបេ ផ្ទាល់ និងទីពីរ ចំណងសម្ព័ន្ធភាព រវាងជប៉ុន និងសហរដ្ឋអាមេរិក។
នៅក្រោយពេលដែលជប៉ុនចាញ់សង្រ្គាមលោកលើកទី២ នៅឆ្នាំ១៩៤៥ ជប៉ុនត្រូវបង្ខំចិត្តទទួលយកនូវរដ្ឋធម្មនុញ្ញសន្តិភាពនិយម ដែលដាក់កម្រិតជប៉ុនមិនឲ្យមានកម្លាំងទ័ព ដែលអាចធ្វើសង្រ្គាមទល់នឹងប្រទេសដទៃ។ ដើម្បីការពារខ្លួនពីការវាយប្រហារពីសំណាក់ប្រទេសដទៃ ជប៉ុនត្រូវពឹងផ្អែកស្ទើរតែទាំងស្រុង លើសហរដ្ឋអាមេរិក ដែលបានចុះសន្ធិសញ្ញាសម្ព័ន្ធភាពនឹងគ្នា កាលពីឆ្នាំ១៩៥២។
ក៏ប៉ុន្តែ នៅពេលនេះ លោកស្ហ៊ីនហ្សូ អាបេ ក៏ដូចជាអ្នកនយោបាយផ្សេងទៀត នៅក្នុងគណបក្សអភិរក្សនិយមជប៉ុន ចាប់ផ្តើមមានការបារម្ភកាន់តែខ្លាំង ខ្លាចក្រែងអាមេរិកលែងមានឆន្ទៈ ឬលែងមានសមត្ថភាពក្នុងការការពារជប៉ុនបានតទៅទៀត។
ក្តីបារម្ភរបស់ជប៉ុនកើតមានកាន់តែខ្លាំង នៅពេលដែលជប៉ុនមើលឃើញចិន ដែលជាគូសត្រូវដ៏ធំ ចេះតែបង្កើនការចំណាយផ្នែកការពារជាតិយ៉ាងច្រើនសន្ធឹកសន្ធាប់ជារៀងរាល់ឆ្នាំ ចំណែកឯសហរដ្ឋអាមេរិកដែលជាសម្ព័ន្ធមិត្តវិញកំពុងតែថមថយអំណាចពីមួយថ្ងៃទៅមួយថ្ងៃ។ កំណើនសេដ្ឋកិច្ចតិចតួច បំណុលសាធារណៈយ៉ាងច្រើនសន្ធឹកសន្ធាប់ បូករួមជាមួយនឹងបញ្ហានយោបាយក្នុងស្រុក ដែលធ្វើឲ្យរដ្ឋាភិបាលសហព័ន្ធអាមេរិកត្រូវជាប់គាំង ហើយប្រទេសជាតិត្រូវប្រឈមមុខនឹងការក្ស័យធនជាច្រើនលើកច្រើនសា គឺសុទ្ធសឹងជាសញ្ញាអវិជ្ជមាន ដែលធ្វើឲ្យជប៉ុនបាត់ទំនុកចិត្តលើសហរដ្ឋអាមេរិក។
កាលពីដើមខែកុម្ភៈកន្លងទៅនេះ មន្រ្តីម្នាក់ ដែលស្និទ្ធនឹងលោកស្ហ៊ីនហ្សូ អាបេ បានប្រាប់ទីភ្នាក់ងារព័ត៌មានរ៉យទ័រថា នៅក្នុងចក្ខុវិស័យយុទ្ធសាស្រ្តរយៈពេលវែង ជប៉ុនចាំបាច់ត្រូវតែចាប់ផ្តើមគិតគូរពីពេលនេះទៅ ដើម្បីប្រុងប្រៀបខ្លួន ក្នុងករណីដែលសហរដ្ឋអាមេរិកលែងអាចការពារជប៉ុនបានតទៅទៀត នៅថ្ងៃខាងមុខ។ មានន័យថា ជប៉ុនត្រូវតែចាប់ផ្តើមពិនិត្យមើលឡើងវិញ នូវតួនាទី បេសកកម្ម និងរចនាសម្ព័ន្ធកងទ័ព ព្រមទាំងគ្រឿងសព្វាវុធដែលខ្លួនមាន ឬមិនទាន់មាន ហើយដែលត្រូវមាន។
ក្រៅពីការពង្រឹងកម្លាំងទ័ពខ្លួនឯង ជប៉ុនក៏កំពុងតែស្វះស្វែងផងដែរ ក្នុងការពង្រឹងទំនាក់ទំនងជាមួយបណ្តាប្រទេសមួយចំនួនផ្សេងទៀតក្រៅពីអាមេរិក ដូចជា ជាមួយឥណ្ឌា អូស្រ្តាលី និងប្រទេសក្នុងតំបន់អាស៊ាន ជាដើម។ សូម្បីតែរុស្ស៊ី ដែលជាប្រទេសកំពុងជាប់ជម្លោះព្រំដែនជាមួយជប៉ុន ក៏រដ្ឋាភិបាលលោកស្ហ៊ីនហ្សូ អាបេ កំពុងតែព្យាយាមរឹតចំណងទាក់ទងជាមួយផងដែរ ដើម្បីអាចជាចន្ទល់មួយបន្ថែមទៀត ចៀសវាងកុំឲ្យពឹងផ្អែកលើសហរដ្ឋអាមេរិកតែមួយ។
ការធ្លាក់ចុះនៃអំណាចរបស់សហរដ្ឋអាមេរិក និងការបង្កើនកម្លាំងយោធារបស់ចិន គឺជាហេតុផលមួយ ក៏ប៉ុន្តែ គោលគំនិតជាតិនិយមរបស់លោកស្ហ៊ីនហ្សូ អាបេផ្ទាល់ ក៏ជាហេតុផលចម្បងមួយផងដែរ។ លោកស្ហ៊ីនហ្សូ អាបេ គឺជាអ្នកនយោបាយ ក្នុងត្រកូលអ្នកជាតិនិយមជាច្រើនតំណមកហើយ។
ជីតារបស់លោកស្ហ៊ីនហ្សូ អាបេ គឺលោកណូប៊ូស៊ូកេ គីស្ហ៊ី (Nobusuke Kishi) គឺជាអតីតរដ្ឋមន្រ្តីជប៉ុន នៅមុន និងក្នុងអំឡុងសង្រ្គាមលោកលើកទី២។ នៅក្រោយសង្រ្គាម លោកគីស្ហ៊ី ត្រូវបានតុលាការអន្តរជាតិក្រុងតូក្យូចាប់ឃុំខ្លួន ដោយសង្ស័យពីបទឧក្រិដ្ឋកម្មសង្រ្គាម ក៏ប៉ុន្តែ ក្រោយមក លោកត្រូវបានគេដោះលែងឲ្យមានសេរីភាពវិញ។
ក្រោយមកទៀត នៅក្នុងពេលកាន់តំណែងជានាយករដ្ឋមន្រ្តីជប៉ុន ចន្លោះពីឆ្នាំ១៩៥៧ ដល់ឆ្នាំ១៩៦០ លោកណូប៊ូស៊ូកេ គីស្ហ៊ី បានឲ្យគេរៀបចំទីសក្ការៈមួយ ដើម្បីឧទ្ទិសដល់អតីតមេទ័ពជប៉ុនក្នុងសម័យសង្រ្គាម ចំនួន ៧រូប ដោយចារឈ្មោះថាជា “វីរជនស្នេហាជាតិទាំង៧រូបដែលបូជាជីវិតដើម្បីប្រទេសជាតិ”។ អតីតមេទ័ពទាំង ៧រូបនេះ ស្ថិតក្នុងចំណោមមនុស្ស ១៤នាក់ ដែលត្រូវបានតុលាការអន្តរជាតិក្រុងតូក្យូកាត់ទោសប្រហារជីវិតពីបទឧក្រិដ្ឋម្មសង្រ្គាម។
លោកណូប៊ូស៊ូកេ គីស្ហ៊ី ត្រូវបានគេស្គាល់ជាទូទៅថាជាអ្នកដែលតែងតែប្រកាន់គំនិតគាំទ្រនយោបាយយោធានិយមរបស់ជប៉ុននៅមុន និងក្នុងអំឡុងសម័យសង្រ្គាមលោក ហើយតែងតែចង់ឃើញជប៉ុនរំដោះខ្លួនចេញពីរដ្ឋធម្មនុញ្ញសន្តិភាពនិយម។
ប្រមាណជា ៦០ឆ្នាំក្រោយមក លោកស្ហ៊ីនហ្សូ អាបេ ដែលជាចៅ ក្រោយពីបានឈ្នះឆ្នោត ឡើងកាន់អំណាចជានាយករដ្ឋមន្រ្តី កាលពីចុងឆ្នាំ២០១២ បានប្រកាសច្បាស់ៗថា លោកនឹងរៀបចំឲ្យមានការធ្វើវិសោធនកម្មរដ្ឋធម្មនុញ្ញសន្តិភាពនិយមរបស់ជប៉ុន ដើម្បីនាំជប៉ុនចេញឲ្យផុតពីរបបដឹកនាំ ដែលបន្សល់ទុកពីបរាជ័យនៃសង្រ្គាមលោកលើកទី២។
នៅក្នុងត្រកូលអ្នកជាតិនិយមរបស់លោកស្ហ៊ីនហ្សូ អាបេ គេតែងតែយល់ថា រដ្ឋធម្មនុញ្ញសន្តិភាពនិយម គឺជាគំនាបរបស់ប្រទេសឈ្នះសង្រ្គាម ដាក់មកលើអ្នកចាញ់ ហើយដោយសារតែចាញ់សង្រ្គាម ទើបជប៉ុនត្រូវបង្ខំចិត្តឱនក្បាលចំពោះប្រទេសជិតខាង ដូចជា ចិន និងកូរ៉េខាងត្បូង ជាដើម ដើម្បីសុំអភ័យទោសចំពោះសកម្មភាពពីក្នុងសម័យសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ