ស៊ីរី៖ តួកគីគំរាមវាយប្រហារគ្រប់ទីកន្លែង បើកងទ័ពរដ្ឋាភិបាលស៊ីរីហ៊ានវាយបក
ចុះផ្សាយនៅថ្ងៃ៖
ស្តាប់ - ០៦:៤១
នៅស៊ីរី ចាប់តាំងពីដើមខែកុម្ភៈមក សមរភូមិប្រយុទ្ធបានផ្ទុះឡើង រវាងកងទ័ពតួកគី និងកងទ័ពរដ្ឋាភិបាលបាឆា អាល់អាសាដ នៅភាគខាងជើងឆៀងខាងលិច ក្បែរក្រុងអ៊ីដឡិប។ ក្រោយស្លាប់ទាហានតួកគី៥នាក់ កាលពីថ្ងៃអង្គារ លោកប្រធានាធិបតីតួកគី បានគំរាមខ្លាំងៗថា បើកងទ័ពស៊ីរី ហ៊ានធ្វើការវាយប្រហារណាមួយ មកលើទីតាំងកងទ័ពតួកគីទៀត នោះតួកគីនឹងវាយបកទៅលើស៊ីរីវិញ ដោយមិនរើសទីតាំងជាដាច់ខាត។ មានការព្រួយបារម្ភជាខ្លាំង ដល់សន្តិសុខរបស់ប្រជាជនស៊ីរី នៅតំបន់នោះ បើការវាយប្រហារគ្នារវាងកងទ័ពតួកគី និងកងទ័ពស៊ីរី មិនបញ្ឈប់។ តែយ៉ាងណា ក៏ដោយ គេសង្ឃឹមថា នឹងមានការចរចាគ្នាណាមួយ រវាងតួកគី និងរុស្ស៊ី ព្រោះថាគឺរុស្ស៊ី ដែលជាអ្នកចេញមុខការពារ រដ្ឋាភិបាលរបស់លោកបាឆា អាល់អាសាដ។
ការប្រយុទ្ធគ្នា បានចាប់ផ្តើមកាលពីដើមខែកុម្ភៈ។ ភាគីម្ខាងៗចោទគ្នាទៅវិញទៅមក។ នៅតំបន់ភាគខាងជើងឆៀងខាងលិចស៊ីរីនេះ មានទីក្រុងធំៗ២ គឺក្រុងអ៊ីដឡិប និងក្រុងអាឡិប។ ក្រុង២នេះ ស្ថិតក្នុងដៃរបស់ក្រុមប្រឆាំងនឹងរដ្ឋាភិបាលបាស្ហា អាល់អាសាដ។ ហើយក្រុមនេះ មានតួកគីជួយគាំទ្រ។ តំបន់នេះ ស្ថិតនៅជាប់នឹងព្រំដែនតួកគីតែម្តង។
កាលពីខែកញ្ញា ឆ្នាំ២០១៨ តួកគីនិងរុស្ស៊ី បានចេញមុខធ្វើកិច្ចព្រមព្រៀងមួយ ដើម្បីកំណត់តំបន់ភាគខាងជើងស៊ីរី នៅជាប់តាមបណ្តោយព្រំដែនតួកគី គឺជាតំបន់ទំលាក់អាវុធ។ ក្នុងន័យនេះ តួកគីបានបញ្ជូនទ័ពខ្លួន ចូលមកតំបន់ក្បែរក្រុងអ៊ីដឡិប ដើម្បីគ្រប់គ្រងជាបណ្តោះអាសន្ន និងដកហូតអាវុធ ពីក្រុមប្រឆាំងរដ្ឋាភិបាលស៊ីរី។ ប៉ុន្តែអ្វីដែលគេសង្កេតឃើញ គឺប្រមាណជាង១ឆ្នាំមកហើយ ធ្វើមិនទាន់ចេញទេ។
ចលាចល ម្នាក់ៗឆក់ឱកាសរុលទៅមុខ
បើតាមការចោទប្រកាន់ មកពីខាងរដ្ឋាភិបាលបាស្ហា អាល់អាសាដ គឺក្រុមឧទ្ទាមប្រឆាំងរដ្ឋាភិបាល ដែលជាអ្នកបើកសមរភូមិមុន កាលពីដើមខែកុម្ភៈនេះ។ កងទ័ពរដ្ឋាភិបាលស៊ីរី ក៏បានឆក់ឱកាស វាយសង្រ្គប់ ដណ្តើមយកក្រុងអ៊ីតឡិបមកវិញ ដោយមានអន្តរាគមន៍ជួយ ពីកងទ័ពរុស្ស៊ីផង។ បើគិតមកត្រឹមថ្ងៃពុធទី១២កុម្ភៈនេះ កងទ័ពបាស្ហា អាល់អាសាដ បានវាយគ្រប់គ្រងផ្លូវជាតិមួយខ្សែដ៏សំខាន់ ដែលតភ្ជាប់ពីភាគខាងត្បូងកាត់តាមរដ្ឋធានីដាម៉ាស ទៅទីក្រុងអាឡិប នៅខាងជើង។
កាលពីថ្ងៃអង្គារ ឧត្ថម្ភាគចក្ររបស់កងទ័ពស៊ីរី ត្រូវបានកងទ័ពតួកគីវាយកំទេច ស្លាប់អ្នកបើកបរ២នាក់។ ចំណែកការប្លោងគ្រាប់របស់កងទ័ពស៊ីរីវិញ ក៏បានសម្លាប់ទាហានតួកគីសរុប ១៣នាក់។ ទាំងសងខាង បានបាញ់ប្លោងដាក់គ្នាទៅវិញទៅមក។ ក្រុមឧទ្ទាមប្រឆាំងរដ្ឋាភិបាលស៊ីរី ក៏បានឆក់ឱកាស វាយដណ្តើមទីតាំងខ្លះៗដែរ។ លោកប្រធានាធិបតីតួកគី បាននិយាយខ្លាំងៗ ថានិងវាយស៊ីរី ឲ្យស្គាល់ថ្នាំខ្លាំង បើស៊ីរីនៅតែហ៊ានវាយ បកមកលើទីតាំងរបស់កងទ័ពតួកគី។
ប្រមាណជាង២ខែមកនេះ មានប្រជាជនប្រមាណ៧សែននាក់ បានភៀសខ្លួនចេញពីតំបន់នេះ។ នេះបើផ្អែកតាមតួលេខរបស់អង្គការឃ្លាំមើលសិទ្ធិមនុស្សនៅស៊ីរី។ ចំនួនមនុស្សភៀសខ្លួននេះច្រើនណាស់ សម្រាប់រយៈពេលដ៏ខ្លីនេះ។
តួកគី និងរុស្ស៊ី ប្តេជ្ញាការពារកិច្ចព្រមព្រៀងក្រុងសុតឈី
គេមិនអាចដោះស្រាយបញ្ហានេះបានទេ បើសិនជាគ្មានភ្លើងខៀវពីរុស្ស៊ី។ និយាយឲ្យចំទៅ គឺរុស្ស៊ីជាអ្នកសម្រេចជួស រដ្ឋាភិបាលស៊ីរី។ ចំណែកតួកគី វិញ ថ្វីបើលោកប្រធានាធិបតីអ៊ែរដូហ្កាន មានសម្តីគម្រាមខ្លាំងៗមែន តែតួកគីនៅតែខ្លាចចិត្តរុស្ស៊ីដែរទេ។ ហេតុដូច្នេះហើយ បានប្រមាណ១សប្តាហ៍ចុងក្រោយនេះ យើងឃើញតួកគី ព្យាយាមហៅរុស្ស៊ីឲ្យមកចរចាគ្នា។ កាលពីថ្ងៃសៅរ៍អាទិត្យ ចុងសប្តាហ៍កន្លងទៅនេះ រុស្ស៊ីបានបញ្ជូនគណៈប្រតិភូមួយ ទៅក្រុងអង់ការ៉ា ដើម្បីចរចាជាមួយតួកគី តែមិនបានលទ្ធផលទេ។
បញ្ហាគឺថា ភាគីនីមួយៗ សុទ្ធតែមិនអាចគ្រប់គ្រងកូនចៅខ្លួនឯងបានទាំងស្រុង។ តួកគី មិនអាចគ្រប់គ្រងក្រុមឧទ្ទាម កុំឲ្យផ្ទុះអាវុធ ឯរុស្ស៊ីវិញ ក៏មិនអាចហាមឃាត់កងទ័ពបាស្ហា អាល់អាសាដ បានទាំងស្រុងដែរ។ ត្រង់ចំណុចនេះហើយ ដែលកិច្ចព្រមព្រៀងទីក្រុងសុតឈី ស្ថិតនៅទ្រឹងមួយកន្លែង គ្មានអានុភាពអ្វី។ តែយ៉ាងណា នៅថ្ងៃពុធ ទី១២កុម្ភៈ លោកអ៊ែរដូហ្កាន បានទូរស័ព្ទ ទៅកាន់លោកពូទីន។ មេដឹកនាំទាំងពីរ បានសន្យារួមគ្នា ថាត្រូវតែគោរពកិច្ចព្រមព្រៀងសុតឈីឲ្យបាន មានន័យត្រូវតែបិទបញ្ចប់ការផ្ទុះអាវុធ នៅតំបន់ភាគខាងជើងស៊ីរី ដែលបានសន្យាគ្នារួចហើយ។
សហរដ្ឋអាមេរិក ប្រឹងប្រជ្រៀតខ្លួន ប្រកាសថាគាំទ្រតួកគី
កាលពីថ្ងៃអង្គារ ទី១១កុម្ភៈ លោកម៉ៃ ប៉ុមប៉េអូ រដ្ឋមន្ត្រីការបរទេសអាមេរិក បាននិយាយដោយត្រង់តែម្តង ថាអាមេរិកគាំទ្រតួកគី ដែលបើកការប្រយុទ្ធ តទល់ជាមួយកងទ័ពបាស្ហា អាល់អាសាដ។ ហើយនៅល្ងាចថ្ងៃដដែល ប្រេសិតពិសេសរបស់អាមេរិក ទទួលបន្ទុកកិច្ចការស៊ីរី ឈ្មោះ James Jeffrey បានទៅដល់ទីក្រុងអង់ការ៉ា តែម្តង ដើម្បីនិយាយជាមួយតួកគី ថាតើអាចឲ្យមេរិកជួយអី្វបានខ្លះ។ តំណាងអាមេរិករូបនេះ និយាយថា អាមេរិកចង់ជួយ តួកគី ឲ្យអស់ពីសមត្ថភាព។
តួកគី ជាសមាជិកអូតង់ គ្រប់គ្រងដោយអាមេរិកពិត ក៏ប៉ុន្តែ តួកគី គឺជាដៃគូរបស់រុស្ស៊ី ក្នុងសំណុំរឿងជាច្រើន។ នៅក្នុងបញ្ហាស៊ីរីនេះ ថ្វីបើតួកគី និងរុស្ស៊ី គាំទ្រ ភាគី២ផ្សេងគ្នាមែន តែតួកគី និងរុស្ស៊ី បានព្យាយាមរកចំណុចត្រូវគ្នា ដើម្បីដោះស្រាយបញ្ហាមួយចំណុចម្តងៗ។ តួកគី មិនទុកចិត្តរដ្ឋាភិបាលបាស្ហា អាល់អាសាដ ទាក់ទិននឹងសំណុំរឿងក្រុមគួឌីស្ថាន។ ដូច្នេះ រុស្ស៊ីកំពុងតែព្យាយាមដោះស្រាយចំណុចនេះ ដើម្បីឲ្យតួកគីទុកចិត្ត។ ហើយបើតាមការវិភាគ តួកគីក៏មិនត្រូវការ ឲ្យមានការផ្ទុះអាវុធថ្មីទៀតដែរ ព្រោះតួកគីជាអ្នករងថ្មបាក់ ដោយសារតែលំហូរជនភៀសខ្លួនស៊ីរី។ នៅតួកគីបច្ចុប្បន្ននេះ មានជនភៀសខ្លួនស៊ីរី ជិត៤លាននាក់រួចទៅហើយ។ តួកគីមិនអាចទទួលបន្ថែមបានទេ។
ការបារម្ភថា តួកគី អាចនឹងប្រយុទ្ធជាមួយរុស្ស៊ី ក្នុងទឹកដីស៊ីរី គឺមិនអាចទៅរួចច្រើនជាង។ ចង់មិនចង់ ទោះមានឬគ្មានអាមេរិកនៅពីក្រោយ ក៏តួកគី មិនល្ងង់យករុស្ស៊ីជាសត្រូវដែរ។ រុស្ស៊ីនិងតួកគី មានចំណងសហប្រតិបត្តិការនឹងគ្នាច្រើនណាស់ ប៉ុន្មានឆ្នាំចុងក្រោយនេះ។ តួយ៉ាង គម្រោងបំពង់បង្ហូរឧស្ម័នហ្កាសរុស្ស៊ី ក្រោមសមុទ្រខ្មៅ និងគម្រោងទិញប្រព័ន្ធខែលមីស៊ីល S400 ជាដើម។ ការប្រកាសគាំទ្រតួកគី ពីសំណាក់អាមេរិក ក្នុងសំណុំរឿងស៊ីរីនេះ គឺគ្រាន់តែជាចេតនា ចង់បំបែកតួកគី ចេញពីរុស្ស៊ី តែតួកគី មិនប្រាកដជាល្ងង់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ