អ៊ីរ៉ង់បាញ់មីស៊ីលជាច្រើនគ្រាប់ លើមូលដ្ឋានទ័ពអាមេរិកនៅអ៊ីរ៉ាក់
ចុះផ្សាយនៅថ្ងៃ៖
ស្តាប់ - ០៧:៤០
នៅវេលាយប់ថ្ងៃអង្គារ ឈានចូលថ្ងៃពុធ ទី៨មករានេះ កងទ័ពអ៊ីរ៉ង់ បានបាញ់មីស៊ីល ជាច្រើនគ្រាប់ ទៅលើមូលដ្ឋានទ័ពរបស់អាមេរិក ចំនួនយ៉ាងហោច២កន្លែង នៅក្នុងទឹកដីអ៊ីរ៉ាក់។ អ៊ីរ៉ង់បានអះអាងថា នេះគឺជាការសងសឹក ទៅលើអាមេរិក ដែលបានសម្លាប់នាយឧត្តមសេនីយ៍អ៊ីរ៉ង់ដ៏សំខាន់ ឈ្មោះ កាសឹម សូឡីម៉ានី។ យ៉ាងណាក៏ដោយ ការបាញ់មីស៊ីលរបស់អ៊ីរ៉ង់ ទៅលើមូលដ្ឋានទ័ពអាមេរិកនេះ គឺវាបានរុញច្រានវិបត្តិនេះ ឲ្យចូលទៅក្នុងដំណាក់កាលថ្មីមួយទៀត ដែលគ្រប់គ្នាព្រួយបារម្ភបំផុត គឺការប្រឈមមុខដាក់គ្នាដោយអាវុធ និងដោយផ្ទាល់ រវាងអ៊ីរ៉ង់ និងអាមេរិក។
បាញ់ម៉ោងពេលដូចគ្នា នឹងពេលអាមេរិក សម្លាប់ឧត្តមសេនីយ៍កាសឹម សូឡីម៉ានី
នៅវេលាយប់ថ្ងៃអង្គារ ម៉ោងប្រមាណជា១និង៣០នាទីរំលងអាធ្រាត្រ កងទ័ពអ៊ីរ៉ង់ បានបាញ់មីស៊ីលប្រភេទបាលីស្ទិកជាច្រើនគ្រាប់ ទៅលើមូលដ្ឋានទ័ពអាមេរិកចំនួនយ៉ាងហោច ២កន្លែង នៅក្នុងទឹកដីអ៊ីរ៉ាក់។ មូលដ្ឋានទីមួយនៅតំបន់ Aïn al-Assad ភាគខាងលិចអ៊ីរ៉ាក់ និង មួយទៀតនៅតំបន់ Erbil ភាគខាងជើងអ៊ីរ៉ាក់។
ម៉ោង១និង៣០នាទីរំលងអាធ្រាត្រ គឺជាម៉ោងតែមួយ ដូចដែលពេលកងទ័ពអាមេរិក បាន បាញ់មីស៊ីលសម្លាប់នាយឧត្តមសេនីយ៍អ៊ីរ៉ង់ កាសឹម សូឡីម៉ានី។ ចំណែកភាគីអ៊ីរ៉ាក់ បានបង្ហើបឲ្យដឹងថា អ៊ីរ៉ង់បានប្រាប់មកខ្លួនឲ្យបានដឹងមុន នៅវេលាម៉ោងប្រមាណជា១២អាធ្រាត្រ ថាអ៊ីរ៉ង់នឹងបាញ់មីស៊ីលក្នុងពេលដ៏ឆាប់ តែមិនបានបញ្ជាក់ពីទីតាំងទេ។
នៅព្រឹកថ្ងៃពុធទី៨មករា បើផ្អែកតាមការលើកឡើង របស់កងទ័ពអ៊ីរ៉ាក់ គឺអ៊ីរ៉ង់បានបាញ់មីស៊ីលប្រមាណ២២គ្រាប់ ក្នុងរយៈពេលប្រមាណតែ៣០នាទីប៉ុណ្ណោះ។ ១៧គ្រាប់ធ្លាក់នៅមូលដ្ឋានទ័ព Aïn al-Assad និង៥គ្រាប់ ធ្លាក់នៅ Erbil។ តែបើផ្អែកតាមគេហទំព័រMashregh ដែលស្និទនឹងកងឆ្មាំបដិវដ្តអ៊ីរ៉ង់ គឺគេអះអាងថាកងទ័ពអ៊ីរ៉ង់ បានបាញ់មីស៊ីលបានលីស្ទិក ចំនួនជាង៣០គ្រាប់។
អ៊ីរ៉ង់អះអាងថា បានសម្លាប់ទាហានអាមេរិក៨០នាក់
ទូរទស្សន៍ជាតិអ៊ីរ៉ង់ បានផ្សព្វផ្សាយថា មីស៊ីលបាលីស្ទីកអ៊ីរ៉ង់ បានសម្លាប់ទាហាន ចំនួន៨០នាក់។ ក៏ប៉ុន្តែ លោកដូណាល់ ត្រាំ បានសរសេរលើទំព័រTwitter យ៉ាងសាមញ្ញថា មិនមានអ្វីបារម្ភទេពេលនេះ មន្ត្រីជំនាញរបស់កងទ័ពអាមេរិក កំពុងធ្វើការពិនិត្យការខូចខាត។ លោកដូណាល់ សរសេរបន្តថា លោកនឹងធ្វើសន្និសីទកាសែត នៅព្រឹកថ្ងៃពុធនេះ នៅឯក្រុងវ៉ាស៊ីនតោន។
សូមបញ្ជាក់ថា មូលដ្ឋានទ័ពអាមេរិក នៅ Aïn al-Assad គឺជាមូលដ្ឋានសំខាន់មួយរបស់កងទ័ពអាមេរិក ប្រចាំនៅអ៊ីរ៉ាក់ ដែលកាលពីឆ្នាំ២០១៧ មានទាហាន និងជនស៊ីវីលអាមេរិក ប្រចាំនៅទីនោះប្រមាណ៥០០នាក់។ គឺមូលដ្ឋាននេះហើយ ដែលលោកដូណាល់ត្រាំ បានទៅដល់ កាលពីចុងឆ្នាំ២០១៨។ ចំណែកមូលដ្ឋានទ័ព នៅ Erbil វិញ គឺជាមូលដ្ឋានទ័ព នៃប្រតិបត្តិការសម្ព័ន្ធមិត្តអន្តរជាតិបោសសំអាតក្រុមជីហាតអង្គការរដ្ឋអ៊ីស្លាម។ បើផ្អែកលើការចុះផ្សាយ លើគេហទំព័ររបស់មន្ទីរប៉ង់តាហ្គោន កាលពីខែកញ្ញា នៅបន្ទាយនេះ មានទាហាននិងជនស៊ីវីលចំនួនប្រមាណ៣៦០០នាក់ ដែលក្នុងនោះមានទាំងកងទ័ពអាមេរិក និងកងទ័ពប្រទេសចំនួន១៣ផ្សេងទៀត ដែលសហការក្នុងសម្ព័ន្ធមិត្តអន្តរជាតិ។
ដោយឡែកកងទ័ពអ៊ីរ៉ាក់ និងតំណាងកងទ័ពកាណាដា វិញ បានបញ្ជាក់ថា ខាងគេពុំមានទាហានណារងរបួស ឬស្លាប់ ដោយសារគ្រាប់មីស៊ីលរបស់អ៊ីរ៉ង់ឡើយ។
សង្រ្គាមចេញមុខរវាងអ៊ីរ៉ង់ និងអាមេរិក
ទោះជាយ៉ាងណា ការបាញ់ប្លោងមីស៊ីលបាលីស្ទិក ចេញពីដៅអ៊ីរ៉ង់ សំដៅលើមូលដ្ឋានទ័ពអាមេរិក នៅក្នុងទឹកដីអ៊ីរ៉ាក់នេះ គឺអាចចាត់ទុកថា ជាការឈានចូលដំណាក់កាលថ្មីមួយទៀត ពោលគឺវាការប្រឈមមុខដោយដោយអាវុធ និងដោយផ្ទាល់តែម្តង រវាងអ៊ីរ៉ង់ និងអាមេរិក។ តើមានន័យថា ចាប់ពីពេលនេះទៅ សង្រ្គាមចេញមុខរវាងអ៊ីរ៉ង់ និងអាមេរិក នឹងផ្ទុះឡើងហើយមែនទេ?
អ្វីៗវាអាស្រ័យថា តើអ៊ីរ៉ង់ឈប់ត្រឹមហ្នឹង ហើយអាមេរិក ឆ្លើយតបមកវិញ ឬមិនឆ្លើយតប។ ជាការពិត អ៊ីរ៉ង់អះអាងថា ការបាញ់មីស៊ីលរបស់ខ្លួនទៅលើបន្ទាយទាហានអាមេរិក ក្នុងទឹកដីអ៊ីរ៉ាក់ គឺជាការសងសឹង ចំពោះការដែលអាមេរិកបាញ់មីស៊ីល សម្លាប់នាយឧត្តមសេនីយ៍អ៊ីរ៉ង់ កាសឹម សូឡីម៉ានី។
នៅលើកញ្ចក់ទូរទេស្សន៍ជាតិអ៊ីរ៉ង់ អាយ៉ាតូឡា អាលីខាមឺណី បាននិយាយថា មីស៊ីលរបស់អ៊ីរ៉ង់ដែលបានធ្លាក់លើមូលដ្ឋានទ័ពអាមេរិក គឺប្រៀបដូចជា "ការទះកំផ្លៀងសងសឹកអាមេរិក"។ ក៏ប៉ុន្តែ អ៊ីរ៉ង់ធ្វើប៉ុណ្ណេះ នៅមិនទាន់គ្រប់គ្រាន់ទេ។ អាយ៉ាតូឡា អាលីខាមឺណីបន្តថា អ្វីដែលជាកម្មវត្ថុ និងជាកាតព្វកិច្ចរបស់អ៊ីរ៉ង់ គឺត្រូវបណ្តេញអាមេរិក ឲ្យដកទ័ពចេញឲ្យអស់ពីតំបន់ដើមបូព៌ា។ ដូច្នេះ វាអាចមានន័យថា អ៊ីរ៉ង់នៅមិនទាន់ស្ងប់ចិត្ត។
ចប់គ្នាត្រឹមនេះ?
ដោយឡែក បើយើងផ្អែកលើសំណេររបស់លោក ហាសាន់ រ៉ូហានី ប្រធានាធិបតីអ៊ីរ៉ង់ ដែលសរសេរនៅលើទំព័រ Twitter វិញ យើងឃើញថា គាត់មានជំហរត្រជាក់ជាងអាយ៉ាតូលីអាលីខាមឺណី។ លោកហាសាន់ រូហានី សរសេរថា មីស៊ីលរបស់អ៊ីរ៉ង់ គឺជាការសងសឹកដោយស័ក្តិសម ទៅនឹងអំពើឃាតកម្មរបស់អាមេរិក មកលើនាយឧត្តមសេនីយ៍ កាសឹម សូឡីម៉ានី។ អ្នកវិភាគមួយចំនួន យល់ថា សម្តីរបស់លោកហាសាន់ រូហានីនេះ គឺមានន័យថា ការសងសឹកនេះបានចប់ហើយ រវាងអាមេរិក និងអ៊ីរ៉ង់ គឺរួចគ្នាហើយ។ ដូច្នេះអ៊ីរ៉ង់ និងមិនបើកប្រតិបត្តិការវាយប្រហារណាថ្មីទៀតនោះទេ។
ប៉ុន្តែពេលនេះ សួរថាតើ លោកដូណាល់ ត្រាំ សុខចិត្តចប់ត្រឹមហ្នឹង ឬទេ? បើលោកដូណាល់ ត្រាំមិនសុខចិត្តចប់ទេ ហើយសម្រេចវាយបកទៅវិញ គឺមានន័យថា វានឹងរុញឲ្យអ៊ីរ៉ង់ បន្តវាយបកមកវិញដែរ។ ក្នុងករណីនេះ សង្រ្គាមដោយចំហរ និងផ្ទុះឡើង។ យើងមិនទាន់អាចស្មានចិត្តលោកដូណាល់ ត្រាំបានទេ តែយ៉ាងណា គាត់បានគំរាមរួចហើយ ២-៣ ថ្ងៃមុននេះ ថាបើអ៊ីរ៉ង់ ហ៊ានតែសងសឹក អាមេរិកនឹងវាយកម្ទេចទីតាំងសំខាន់ៗរបស់អ៊ីរ៉ង់ ចំនួន៥២កន្លែង រាប់ទាំងទីតាំងវប្បធម៌ផង។ ដូច្នេះ អ្វីៗគឺវាស្ថិតលើការសម្រេចទាំងស្រុង របស់លោកដូណាល់ ត្រាំ។
មហាអំណាចផ្សេងទៀត អំពាវនាវឲ្យភាគីទាំងសងខាងទប់កំហឹង
បណ្តាប្រទេសមហាអំណាចផ្សេងទៀត បានអំពាវនាវ ឲ្យភាគីទាំងសងខាង រក្សាការស្ងៀមស្ងាត់ ខំប្រឹងទប់ចិត្ត្តរៀងខ្លួន។ លោក Joseph Borrell មន្ត្រីទទួលបន្ទុកកិច្ចការបរទេសរបស់សហភាពអឺរ៉ុប បានលើកឡើងថា វាគ្មានអ្វីចំណេញសម្រាប់ភាគីណាទាំងអស់ បើសិនជានៅតែបន្តសងសឹកគ្នាទៅវិញទៅមក។ វិបត្តិនេះមិនមែនប៉ះពាល់តែអ៊ីរ៉ង់ អ៊ីរ៉ាក់ និងអាមេរិកទេ គឺប៉ះពាល់ទាំងអស់គ្នា។
ចំណែកបារាំងវិញ បារាំងបានប្រកាសថ្កោលទោសការបាញ់មីស៊ីលរបស់អ៊ីរ៉ង់ ទៅលើមូលដ្ឋានកងទ័ពសម្ព័ន្ធមិត្តអន្តរជាតិ ដែលក្នុងនោះក៏មានកងទ័ពបារាំងដែរ។ ក្រសួងការបរទេសបារាំង បានបញ្ជាក់ថា បារាំងបន្តគាំទ្រ និងសហការនៅក្នុងកងទ័ពសម្ព័ន្ធមិត្តអន្តរជាតិតទៅទៀត ហើយអំពាវនាវ ឲ្យអ៊ីរ៉ង់ ត្រូវបញ្ឈប់រាល់ការវាយបកទាំងអស់។ ដូចគ្នាដែរ រដ្ឋមន្ត្រីការពារជាតិអាល្លឺម៉ង់ ក៏បានថ្កោលទោស ការបាញ់មីស៊ីលរបស់អ៊ីរ៉ង់ដែរ។ រដ្ឋាភិបាលអាល្លឺម៉ង់ បានរន្ធាន់ឲ្យភាគីអ៊ីរ៉ង់ បញ្ឈប់ជាបន្ទាន់ នូវប្រតិបតិ្តការយោធាសកសឹក ដែលអាចធ្វើឲ្យស្ថានការណ៍ កាន់តែធ្លាក់ជ្រៅស្តារលែងរួច។ ចំណែកចិន វិញបានអំពាវនាវ ឲ្យភាគីទាំងសងខាង អាមេរិក និងអ៊ីរ៉ង់ ត្រូវខាំមាត់សង្កត់ចិត្ត ទប់កំហឹងរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ