ក្រុមអង្គការក្រៅរដ្ឋាភិបាលទាញសញ្ញាអាសន្នពីគ្រោះមហន្តរាយមនុស្សធម៌នៅស៊ីរី
ចុះផ្សាយនៅថ្ងៃ៖
ស្តាប់ - ០៨:០២
នៅថ្ងៃសៅរ៍ ទី២១ ធ្នូ ក្រុមអង្គការក្រៅរដ្ឋាភិបាលបានព្រមានពីគ្រោះមហន្តរាយមនុស្សធម៌ជាយថាហេតុនៅក្នុងប្រទេសស៊ីរី។ ការព្រមាននេះបានធ្វើឡើង មួយថ្ងៃក្រោយពីប្រទេសរុស្ស៊ី និងចិនបានប្រើសិទ្ធិវ៉េតូប្រឆាំងនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្រ ទី២០ ធ្នូ។ គឺជាសេចក្តីសម្រចដែលស្នើឲ្យពន្យារការផ្តល់ជំនួយមនុស្សធម៌ឆ្លងកាត់ព្រំដែនទៅឲ្យពលរដ្ឋស៊ីរីចំនួន ៤លាននាក់រយៈពេល ១ឆ្នាំបន្ថែមទៀត។ អាមេរិកតាមរយៈប្រមុខការទូតលោកម៉ៃ ប៉ុមប៉េអូបានបរិហារចាស់ដៃលើទង្វើរបស់ក្រុងមូស្គូ និងប៉េកាំង។ « អស់លោកមានឈាមនៅក្នុងដៃ » នេះជាសារដែលលោកប៉ុមប៉េអូបានផ្ញើទៅឲ្យរុស្ស៊ី និងចិន។
សេចក្តីសម្រេចដែលចិន និងរុស្ស៊ីបានប្រើសិទ្ធិវ៉េតូប្រឆាំងនៅក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្រ ទី២០ ធ្នូ គឺជាសំណើរបស់ប្រទេសអាល្លឺម៉ង់ បែលហ្ស៊ិក និងប្រទេសកូវ៉ែតដែលចង់ឲ្យមានការបន្តរយៈពេល ១ឆ្នាំទៀតនូវជំនួយមនុស្សធម៌ឆ្លងដែនទៅឲ្យប្រជាជនស៊ីរីចំនួន ៤លាននាក់។ ម្យ៉ាងទៀត ការផ្តោតសំខាន់តែលើប្រជាជនស៊ីរីចំនួន ៤លាននាក់ក៏ដោយសារតែតំបន់របស់ពួកគេមិនបានស្ថិតក្រោមការគ្រប់គ្រងរបស់រដ្ឋាភិបាលទីក្រុងដាម៉ាស់ទេ។ តំបន់ដែលពួកគេកំពុងរស់នៅបន្តស្ថិតក្នុងកណ្តាប់ដៃរបស់ពួកជីហាតនៃក្រុម Hayat Tahrir al-Cham ដែលជាសាខារបស់អង្គការភេរវនិយមអាល់កៃដា។
ក្រោមភ្នែក ច្រមុះរបស់សហគមន៍អន្តរជាតិក៏ដូចជាក្រុមអង្គការក្រៅរដ្ឋាភិបាល ពលរដ្ឋស៊ីរីទាំង ៤លាននាក់នោះកំពុងពឹងផ្អែកខ្លាំងលើជំនួយមនុស្សធម៌អន្តរជាតិ។ តែបើនិយាយសរុប មានពលរដ្ឋស៊ីរីដល់ទៅ ១១លាននាក់ដែលកំពុងទទួលបានជំនួយមនុស្សធម៌អន្តរជាតិ។ ប្រទេសរុស្ស៊ី និងចិនដែលបានគាំទ្ររបបក្រុងដាម៉ាស់ក៏បានយល់ឃើញដូចគ្នា តែពួកគេចង់ឲ្យបង្វែរជំនួយមនុស្សធម៌ទាំងនោះទៅឲ្យក្រុងដាម៉ាស់ជាអ្នកគ្រប់គ្រង ចាត់ចែងវិញ។ ក្រុងមូស្គូ និងប៉េកាំងបានលើកយកហេតុផលទៅពន្យល់ថា រដ្ឋអំណាចស៊ីរីរបស់ប្រធានាធិបតីអាសាដដណ្តើមបានវិញនូវដែនដីកាន់តែច្រើនមកគ្រប់គ្រងក្នុងដៃ។ ដូច្នេះ គេគួរតែទុកឲ្យរដ្ឋអំណាចស៊ីរីជាអ្នកគិតគូរលើជីវភាពរស់នៅរបស់ពលរដ្ឋខ្លួនឯង។
គួររម្លឹកថា តាំងពីស៊ីរីបានធ្លាក់ក្នុងជម្លោះផ្ទៃក្នុងនាឆ្នាំ ២០១១ មក រុស្ស៊ីបានប្រើសិទ្ធិវ៉េតូចំនួន ១៤ដងដើម្បីប្រឆាំងនឹងសេចក្តីសម្រេចផ្សេងៗរបស់ក្រុមប្រឹក្សាសន្តិសុខ ក្នុងនោះ មានចំនួន ៤ដងទាក់ទងនឹងរឿងជំនួយមនុស្សធម៌។
កិច្ចព្រមព្រៀងបច្ចុប្បន្ននឹងផុតកំណត់នៅថ្ងៃទី១០ មករា ឆ្នាំ ២០២០
ជំនួយមនុស្សធម៌ឆ្លងដែនសម្រាប់ប្រទេសស៊ីរីជាជំនួយអន្តរជាតិមួយដែលបានអនុម័តដោយក្រុមប្រឹក្សាសន្តិសុខ និងបានចូលជាធរមានតាំងពីឆ្នាំ ២០១៤។ កិច្ចព្រមព្រៀងមួយនេះនឹងត្រូវផុតកំណត់នៅថ្ងៃទី១០ មករា ឆ្នាំ ២០២០។ គេហៅជាជំនួយមនុស្សធម៌ឆ្លងដែន ព្រោះជំនួយនេះត្រូវបានអនុញ្ញាតឲ្យដឹកចូលស៊ីរីតាមច្រកព្រំដែនចំនួន ២កន្លែងជាមួយប្រទេសតួកគី និងច្រកព្រំដែនចំនួន ១កន្លែងជាមួយប្រទេសអ៊ីរ៉ាក់។ សំណើរបស់ប្រទេសអាល្លឺម៉ង់ បែលហ្ស៊ិក និងប្រទេសកូវ៉ែតបានសុំឲ្យបន្តកិច្ចព្រមព្រៀងដែលមានស្រាប់ចំនួន ១ឆ្នាំបន្ថែមទៀត។ នៅក្នុងជំហានដំបូង រុស្ស៊ីបានយល់ព្រមឲ្យបន្តតែ ៦ខែ និងបានទាមទារឲ្យទុកតែច្រកព្រំដែនជាមួយតួកគីដោយបិទច្រកព្រំដែនជាមួយអ៊ីរ៉ាក់។
តែដោយនិយាយមិនចុះសម្រុងគ្នា ក្រុងមូស្គូ រួមទាំងក្រុងប៉េកាំងក៏បានប្រើសិទ្ធិវ៉េតូប្រឆាំងនឹងសំណើរបស់ប្រទេសអាល្លឺម៉ង់ បែលហ្ស៊ិក និងប្រទេសកូវ៉ែត។ ទន្ទឹមគ្នានេះក្នុងថ្ងៃសុក្រ ទី២០ ធ្នូដដែល និងបន្ទាប់ពីបានប្រើសិទ្ធិវ៉េតូ រុស្ស៊ីក៏បានដាក់សំណើដាច់ដោយឡែករបស់ខ្លួន តែក៏ត្រូវបានសមាជិកផ្សេងមិនបោះឆ្នោតទទួលយកវិញ។ ចិនតាមរយៈឯកអគ្គរដ្ឋទូតប្រចាំអង្គការសហប្រជាជាតិលោក Zhang Jun បានបញ្ចេញប្រតិកម្មភ្លាមភ្លែតដោយចោទបស្ចិមលោកក្នុងបទគ្មានការទទួលខុសត្រូវ។ « បើអស់លោកពិតជាយកទុកដាក់ខ្លាំងចំពោះស៊ីរី ហេតុអ្វីមិនបោះឆ្នោតគាំទ្រសំណើរបស់រុស្ស៊ី? » នេះជាការថ្លែងរបស់លោក Zhang Jun។
ឃើញថាខណៈនេះ គឺមានតែសង្រ្គាមពាក្យសម្តី និងការចោទគ្នាទៅវិញ ទៅមក។ តែគ្រប់គ្នានៅតែសង្ឃឹមថា គេនៅសល់ពេលច្រើនគួរសមក្នុងការបន្តការចរចាដើម្បីអាចពន្យារកិច្ចព្រមព្រៀងចាស់ដែលនឹងត្រូវផុតកំណត់នៅថ្ងៃទី ១០ មករា ឆ្នាំ ២០២០។ « នៅមុនថ្ងៃទី១០ មករា គេមានពេលដើម្បីរកដំណោះស្រាយមួយ ប្រសិនបើគ្រប់គ្នាចង់បានដំណោះស្រាយមែននោះ » នេះជាចំណាប់អារម្មណ៍របស់ឯកអគ្គរាជទូតអង់គ្លេសប្រចាំអង្គការសហប្រជាជាតិ។
ជំនួយមនុស្សធម៌ឆ្លងកាត់ព្រំដែនជាយន្តការណ៍តែមួយគត់ដើម្បីជួយពលរដ្ឋស៊ីរី
សម្រាប់អង្គការក្រៅរដ្ឋាភិបាល Oxfam គ្រួសារស៊ីរីកំពុងពឹងផ្អែកខ្លាំងលើជំនួយមនុស្សធម៌អន្តរជាតិដែលបានបញ្ជូនតាមព្រំដែនជាមួយតួកគី ឬអ៊ីរ៉ាក់។ ចូរកុំភ្លេចថា ជម្លោះប្រដាប់អាវុធផ្ទៃក្នុងបានធ្វើឲ្យពលរដ្ឋស៊ីរីជាច្រើនពាន់លាននាក់រត់ភៀសខ្លួនពីតំបន់មួយទៅតំបន់មួយទៀត ហើយបើគ្មានជំនួយរបៀបនេះទេ ពួកគេក៏មិនដឹងពឹងអ្វីដើម្បីរស់ដែរ។ Oxfam បានបញ្ជាក់ថា គ្មានមធ្យោបាយអ្វីផ្សេងក្រៅពីជំនួយមនុស្សធម៌ឆ្លងកាត់ព្រំដែនដើម្បីអាចជួយផ្គត់ផ្គង់តម្រូវការរបស់ពលរដ្ឋស៊ីរីដែលទទួលរងអំពើហិង្សា និងការបម្លាស់ទីទេ។ ចំណែកអង្គការក្រៅរដ្ឋាភិបាលមួយទៀតឈ្មោះ Save the Children បានបរិហារលើជម្លោះរបស់ក្រុមប្រទេសសមាជិកក្រុមប្រឹក្សាសន្តិសុខដោយបញ្ជាក់ថា ពួកគេមិននាំគ្នាគិតគូរពីការបន្តផ្តល់ជំនួយចាំបាច់ដល់កុមារស៊ីរី តែបែរជាយកវេទិភាសហប្រជាជាតិដើម្បីចោទគ្នាទៅវិញ ទៅមកទៅវិញ។
Save the Children ក៏យល់ឃើញដូច Oxfam ដែលថា យន្តការណ៍ជំនួយមនុស្សធម៌ឆ្លងដែនបច្ចុប្បន្នជាមធ្យោបាយតែមួយគត់ដើម្បីជួយចិញ្ចឹមកុមារស៊ីរីមួយចំនួនធំ។ ទន្ទឹមគ្នានេះ បើគ្មានការពន្យារជំនួយមនុស្សធម៌ឆ្លងកាត់ព្រំដែនទេ ផលវិបាកក៏នឹងកើតមានចំពោះក្រុមអង្គការក្រៅរដ្ឋាភិបាលក្នុងស្រុកជាច្រើនដែរ ព្រោះពួកគេក៏បានរួមសហការណ៍ក្នុងការចែកចាយជំនួយមនុស្សធម៌។ អ្វីជាការកត់សម្គាល់ ភាពមិនចុះសម្រុងគ្នាក្នុងការពន្យារជំនួយមនុស្សធម៌ឆ្លងដែនបានកើតមានឡើង ខណៈដែលជម្លោះផ្ទៃក្នុងស៊ីរីបានឈានដល់ឆ្នាំទី៨។ សង្រ្គាមរយៈពេល ៨ឆ្នាំដែលបណ្តាលឲ្យមានមនុស្សស្លាប់ជាង ៣៧០ ០០០នាក់ មានជនបម្លាស់ទី និងជនភៀសខ្លួនជាច្រើនលាននាក់ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ