អ៊ីស្រាអែល និង អេមីរ៉ាតអារ៉ាប់រួម យល់ព្រមចុះកិច្ចព្រមព្រៀងចងស្ពានមេត្រីជាប្រវតិ្តសាស្ត្រ
ចុះផ្សាយនៅថ្ងៃ៖
ស្តាប់ - ០៧:២៣
ដំណឹងដ៏ធំមួយ ត្រូវបានរដ្ឋាភិបាលសហរដ្ឋអាមេរិក ប្រកាសឲ្យដឹង កាលពីល្ងាចថ្ងៃព្រហស្បតិ៍ទី១៣សីហា នោះគឺ អ៊ីស្រាអែល និង អេមីរ៉ាតអារ៉ាប់រួម បានសុខចិត្តយល់ព្រមចុះហត្ថលេខា ចងស្ពានមេត្រី កសាងសន្តិភាពជាមួយគ្នា។ នេះគឺជាការត្រូវរ៉ូវគ្នា ជាប្រវត្តិសាស្ត្រ រវាងអ៊ីស្រាអែល ជាមួយនឹងប្រទេសអារ៉ាប់ ក្នុងតំបន់ដើមបូព៌ា។ វាគឺជាដំណឹងល្អ សម្រាប់អ្នកខ្លះ តែវាក៏ជាដំណឹងមិនល្អ និងគួរឲ្យសោកស្តាយដែរ សម្រាប់ភាគីមួយចំនួនផ្សេងទៀត
ដំណឹងនេះ បានធ្វើឲ្យគ្រប់គ្នាមានការភ្ញាក់ផ្អើលខ្លាំងណាស់។ ភ្ញាក់ផ្អើលដោយសារ វាជារឿងជាប្រវត្តិសាស្ត្រ ព្រោះថា អ៊ីស្រាអ៊ែល ដែលស្ថិតនៅតំបន់ដើមបូព៌ា គឺសឹងតែក្បាលមួយតែម្នាក់ឯង មិនមានប្រទេសអារ៉ាប់ណាគាំទ្រ និងទទួលស្គាល់ជាផ្លូវការទេ។ បញ្ហានេះគឺវាជាប់ពាក់ព័ន្ធ ទៅនឹងដែនដីប៉ាឡេស្ទីន។ ក្នុងតំបន់នេះ មានតែអេហ្ស៊ីបនិងហ្សកដានីទេ ដែលមានសន្ធិសញ្ញាសន្តិភាពជាមួយអ៊ីស្រាអែល ព្រោះប្រទេសទាំង២នេះ សុទ្ធតែធ្លាប់ធ្វើសង្រ្គាមជាមួយអ៊ីស្រាអែល។ ដោយឡែក អេមៀរ៉ាត់អារ៉ាប់រួម មិនធ្លាប់ធ្វើសង្រ្គាម ជាមួយអ៊ីស្រាអែលទេ។ ដូច្នេះ បើនិយាយថា ជាសន្ធិសញ្ញាសន្តិភាព ក៏វាហាក់ដូចជាមិនត្រូវដែរ។
ដំណឹងនៃការត្រូវរ៉ូវគ្នា រវាងអ៊ីស្រាអែល និង អេមៀរ៉ាត់អារ៉ាប់រួមនេះ គឺរដ្ឋាភិបាលអាមេរិក ជាអ្នកចេញលិខិតប្រកាសកាលពីថ្ងៃទី១៣សីហា។ នៅក្នុងលិខិតប្រកាសនេះ សេតវិមានអាមេរិក បានលើកឡើងថា ភាគីទាំង២ បានព្រមព្រៀងគ្នា បើកស្ថានទូតទាំងសងខាង ក្នុងពេលដ៏ឆាប់ និងធ្វើការចុះហត្ថលេខា លើកិច្ចព្រមព្រៀង ចំណងសហប្រតិបត្តិការសំខាន់ៗ ក្នុងវិស័យជាច្រើន មានទាំងកងទ័ព សន្តិសុខ ថាមពល សុខាភិបាល វប្បធម៌ និងការដឹកជញ្ជូនផ្លូវអាកាសជាដើម។
កិច្ចព្រមព្រៀងចាប់ដៃកសាងសន្តិភាពជាផ្លូវការ រវាងអ៊ីស្រាអែល និងអេមៀរ៉ាត់អារ៉ាប់រួម នេះ ត្រូវបានសហរដ្ឋអាមេរិក ស្នើដាក់ឈ្មោះហៅថា កិច្ចព្រមព្រៀងអាប្រាហាំ ហើយលោកដូណាល់ត្រាំ បានប្រកាសថា ភាគីទាំងពីរនឹងមកចុះហត្ថលេខា នៅទីក្រុងវ៉ាស៊ីនតោន ក្នុងរវាង៣សប្តាហ៍ទៀត។
សត្រូវរួមតែមួយ ឈ្មោះអ៊ីរ៉ង់
យើងឃើញថា កិច្ចព្រមព្រៀងនេះ គឺរដ្ឋាភិបាលរបស់លោកដូណាល់ ត្រាំ បានដើរតួយ៉ាងសំខាន់ណាស់។ សម្រាប់សហរដ្ឋអាមេរិក វាគឺជាយុទ្ធសាស្រ្ត ប្រមូលសម្ព័ន្ធមិត្តរបស់ខ្លួនទាំងអស់ ឲ្យត្រូវរ៉ូវគ្នា។ ត្រូវរ៉ូវគ្នា ទីមួយគឺដើម្បីឲ្យសហរដ្ឋអាមេរិក អាចដកកម្លាំង ដកការចំណាយ ចេញពីតំបន់នេះ ទុកឲ្យគ្នាគេដែលត្រូវគ្នាចាត់ចែងម្តង។
យ៉ាងណាមិញ លោកដូណាល់ ត្រាំ ក៏បាននិយាយដែរ ថាលោកសង្ឃឹមថា ប្រទេសផ្សេងទៀត នឹងយកគំរូតាមអេមៀរ៉ាត់អារ៉ាប់រួម ចាប់ដៃជាមួយអ៊ីស្រាអែលដែរ។ សំដីនេះ គឺសំដៅដល់មហាអំណាចអារ៉ាប់មួយទៀត នោះគឺ អារ៉ាប៊ីសាអូឌីត។ សម្ព័ន្ធមិត្តទាំងរបស់អាមេរិកត្រូវរ៉ូវគ្នា ក៏គឺជាយុទ្ធសាស្ត្ររបស់អាមេរិកដែរ ដើម្បីធ្វើឲ្យអ៊ីរ៉ង់ កាន់តែភ័យខ្លួន ថាប្រទេសក្នុងតំបន់ គេរួមកម្លាំងគ្នាជាមួយអាមេរិក និងអ៊ីស្រាអែល ដើម្បីទប់ទល់ជាមួយអ៊ីរ៉ង់។
ស្នាដៃលោកណេតាន់យ៉ាហ៊ូ
សម្រាប់អ៊ីស្រាអែល ដឹកនាំដោយរដ្ឋាភិបាលលោកណេតាន់យ៉ាហ៊ូ វាគឺជាកិត្តិនាមស្នាដៃមួយយ៉ាងសំខាន់ ដែលអ៊ីស្រាអែលកសាងសន្តិភាព ជាមួយប្រទេសផ្សេងទៀតក្នុងតំបន់។ អ៊ីស្រាអែលមានសត្រូវជុំទិសក្នុងតំបន់អារ៉ាប់នេះ។ មានកិច្ចព្រមព្រៀងសន្តិភាពជាមួយប្រទេសអារ៉ាប់ ដូចជាអេមៀរ៉ាត់អារ៉ាប់រួមនេះ គឺវាមានន័យថា អ៊ីស្រាអែលកាន់តែថយសត្រូវ។ ដូច្នេះលោកណាតាន់យ៉ាហ៊ូ នឹងជាប់ស្នាដៃក្នុងប្រវត្តិសាស្ត្រ ដូចលោក Yitzhak Rabin ដែលនាំកិច្ចព្រមព្រៀងសន្តិភាពជាមួយអេហ្ស៊ីបនៅឆ្នាំ១៩៧៩ និងលោក Menahem Begin ដែលនាំសន្តិភាពជាមួយហ្សកដានី នៅឆ្នាំ១៩៩៤។
អ៊ីស្រាអែល កាន់តែអស់សត្រូវ ហើយអ៊ីស្រាអែលប្រមូលមិត្តក្នុងតំបន់ ដើម្បីរួមកម្លាំងគ្នា ទប់ទល់ជាមួយអ៊ីរ៉ង់។ សេដ្ឋកិច្ចពាណិជ្ជកម្មក៏ជាកម្មវត្ថុធំដែរសម្រាប់អ៊ីស្រាអែល។ បើស្តាប់សំដីលោកណេតាន់យ៉ាហ៊ូ កាលពីថ្ងៃម្សិលមិញ គឺគាត់លើកឡើងអំពីចំណងសហការផ្នែកសេដ្ឋកិច្ច ដែលជាមូលដ្ឋាននៃកិច្ចព្រមព្រៀងជាមួយអេមៀរ៉ាត់អារ៉ាប់រួមនេះ។ លោកថា សន្តិភាពយូរអង្វែង គឺវាកើតចេញពីកម្លាំង និងអំណាចសេដ្ឋកិច្ចនេះឯង។
អាមីរ៉ាតអារ៉ាប់រួម ចង់ធ្វើជាស្នូលនៃតំបន់ដើមបូព៌ា
សម្រាប់អាមីរ៉ាតអារ៉ាប់រួមវិញ វាគឺជាជោគជ័យមួយដ៏ធំ របស់ព្រះអង្គម្ចាស់ រាជទាហាទ Mohammed Ben Zayed។ អាមីរ៉ាតអារ៉ាប់រួម មានមហិច្ឆិតាធំណាស់ ចង់ឲ្យខ្លួនដើរតួសំខាន់ ក្នុងការចាត់ចែងកិច្ចការតំបន់ដើមបូព៌ា។ អេមៀរ៉ាត់អារ៉ាប់រួម ចង់ប្រជែងឥទ្ធិពលជាមួយតួកគី ហើយចង់រកកម្លាំង ដើម្បីទប់ជាមួយតួកគីផង ជាមួយអ៊ីរ៉ង់ផង។ យ៉ាងណាមិញ យើងឃើញហើយ ថាអាមីរ៉ាតអារ៉ាប់រួម បានចូលធ្វើអន្តរាគមន៍នៅលីប៊ី គាំទ្រក្រុមខាងកើត ដើម្បីវាយដណ្តើមអំណាចជាមួយក្រុមខាងលិច ដែលមានតួកគីនៅពីក្រោយ។
មិនត្រឹមតែប៉ុណ្ណោះ ព្រះអង្គម្ចាស់ រាជទាហាទ Mohammed Ben Zayed ចង់ធ្វើឲ្យអេមៀរ៉ាតអារ៉ាប់រួម ក្លាយជាស្នូលសេដ្ឋកិច្ច វប្បធម៌ និងបច្ចេកវិទ្យាទំនើបក្នុងតំបន់តែម្តង។ តួយ៉ាង ថ្មីៗនេះ អាមីរ៉ាតអារ៉ាប់រួម បានបើកសម្ភោធស្ថានីយផលិតថាមពល ដើរដោយប្រព័ន្ធនុយក្លេអ៊ែរ មុនគេនៅតំបន់ឈូងសមុទ្រពែក្ស ហើយបានបង្ហោះយានអវកាស ទៅកាន់ភពព្រះអង្គារទៀត។ ឥឡូវមកថែម កិច្ចព្រមព្រៀងសន្តិភាព ជាប្រវត្តិតសាស្ត្រជាមួយអ៊ីស្រាអែលមួយទៀត។
“ក្បត់នឹងការតស៊ូរបស់ប៉ាឡេស្ទីន”
បើយើងនិយាយឲ្យខ្លី គឺប៉ាឡេស្ទីន ហាក់ដូចជាត្រូវបានគេបំភ្លេចចោល នៅក្នុងរឿងនេះ។ វាសនាអនាគតរបស់ដែនដីប៉ាឡេស្ទីន គឺនៅតែស្រពេចស្រពិលដដែល។ តាំងតែពីដើមមក ក្រុមប្រទេសអារ៉ាប់ ធ្លាប់បានប្រកាសរួមគ្នាថា គេអាចចាប់ដៃទទួលស្គាល់អ៊ីស្រាអែលបាន ល្គិកណាប៉ាឡេស្ទីន បានឯករាជ្យពេញលេញ។ ក៏ប៉ុន្តែពេលនេះ ការសន្យានេះ បានរលាយបណ្តើរៗហើយ។ ប្រធានាធិបតីតួកគី បានចេញប្រតិកម្មថា អាមីរ៉ាតអារ៉ាប់រួម យល់ព្រមចុះកិច្ចព្រមព្រៀងសន្តិភាពជាមួយអ៊ីស្រាអែល វាគឺជាទង្វើក្បត់ ក្បត់នឹងប្រជាជនក៏ដូចជាដែនដីប៉ាឡេស្ទីន។
ចំណែកក្រុមហាម៉ាស ប៉ាឡេស្ទីនវិញ បានប្រតិកម្មថា កិច្ចព្រមព្រៀងនេះ គឺវាហាក់ដូចជាអាមីរ៉ាតអារ៉ាប់រួម បានដកកាំបិតចាក់ខ្នងប៉ាឡេស្ទីនពីក្រោយ។ ប៉ុន្មានម៉ោងក្រោយមក រដ្ឋបាលកណ្តាលប៉ាឡេស្ទីន នៅក្រុងរ៉ាម៉ាឡា បានចេញលិខិតប្រកាស ដោយចាត់ទុកកិច្ចព្រមព្រៀងនេះ ថាជាអំពើក្បត់ នឹងការតស៊ូរបស់ប៉ាឡេស្ទីន។ ប្រមុខដឹកនាំប៉ាឡេស្ទីន បានស្នើសុំឲ្យក្រុមសម្ព័ន្ធអារ៉ាប់ ត្រូវបើកការប្រជុំជាបន្ទាន់។
តែយ៉ាងណា កិច្ចព្រមព្រៀងសន្តិភាពរវាងអ៊ីស្រាអែល និងអាមីរ៉ាតអារ៉ាប់រួម នេះវាមានចំណុចវិជ្ជមានតូចមួយដែរ សម្រាប់ប៉ាឡេស្ទីន នោះគឺ អ៊ីស្រាអែល បានសុខចិត្តព្យួរ ការអនុវត្តផែនការច្បាមយកដែនដីនៅតំបន់ស៊ីសហ្សកដានី មកជារបស់អ៊ីស្រាអែល។ បើតាមស្មាន នេះគឺជាការទាមទារ របស់អាមីរ៉ាតអារ៉ាប់រួម ហើយដែលលោកដូណាល់ ត្រាំ បានបញ្ចុះបញ្ចូលឲ្យអ៊ីស្រាអែលយល់ព្រម។ តែយ៉ាងណា លោកណេតាន់យ៉ាហ៊ូ បានបញ្ជាក់ថា វាជាការព្យួរសិន មិនមែនលប់ចោលទេ។
យ៉ាងណាក៏ដោយ មហាអំណាចអឺរ៉ុប មានបារាំង និងអង់គ្លេសជាដើម អបអរចំពោះការខិតចាប់ដៃគ្នារវាងប្រទេស២នេះ។ លោកម៉ាក្រុង និងលោកបូរីស ចនសុន សុទ្ធតែបានលើកឡើងថា គេសង្ឃឹមថា អ៊ីស្រាអែលនឹងប្តូរចិត្ត លប់ចោលផែនការច្បាមយកដែនដីស៊ីសហ្សកដានី មកធ្វើជារបស់ខ្លួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ