កិច្ចព្រមព្រៀងភ្ជាប់ទំនាក់ទំនងប្រក្រតីរវាងអ៊ីស្រាអែល និងអេមីរ៉ាតអារ៉ាប់រួមអាចជាគំរូសម្រាប់ប្រទេសអារ៉ាប់ផ្សេងទៀត?
ចុះផ្សាយនៅថ្ងៃ៖
ស្តាប់ - ០៥:១៧
កាលពីថ្ងៃទី១៣ សីហា ប្រទេសអ៊ីស្រាអែល និងអេមីរ៉ាតអារ៉ាប់រួមបានប្រកាសឲ្យពីការភ្ជាប់ទំនាក់ទំនងប្រក្រតីរវាងគ្នាតាមរយៈកិច្ចព្រមព្រៀងមួយក្រោមគំនិតផ្តួចផ្តើមរបស់សហរដ្ឋអាមេរិក។ កិច្ចព្រមព្រៀងមួយនេះត្រូវបានគេចាត់ទុកជាប្រវត្តិសាស្រ្ត ព្រោះរហូតមកដល់សព្វថ្ងៃ ទើបមានប្រទេសអារ៉ាប់ចំនួន ២ ប៉ុណ្ណោះដែលបានទទួលស្គាល់រដ្ឋអ៊ីស្រាអែលជាផ្លូវការ គឺប្រទេសហ្សកដានី និងអេហ្ស៊ីប។ តែក្រុមអ្នកវិភាគបានមើលឃើញថា កិច្ចព្រមព្រៀងភ្ជាប់ទំនាក់ទំនងប្រក្រតីរវាងអ៊ីស្រាអែល និងអេមីរ៉ាតអារ៉ាប់រួមអាចជាគំរូសម្រាប់ប្រទេសអារ៉ាប់ផ្សេងទៀតនៅក្នុងតំបន់។ តើអាចមានប្រទេសអារ៉ាប់ណាខ្លះដែលដើរតាមគន្លងរបស់អេមីរ៉ាតអារ៉ាប់រួម និងថា ហេតុអ្វីបានជាមានប្រទេសអារ៉ាប់ភាគច្រើនបន្តមិនទទួលស្គាល់រដ្ឋអ៊ីស្រាអែល?។
បន្ទាប់ពីប្រទេសអេហ្ស៊ីប និងប្រទេសហ្សកដានី អេមីរ៉ាតអារ៉ាប់រួមបានក្លាយជាប្រទេសអារ៉ាប់ទី៣ ដែលបានទទួលស្គាល់រដ្ឋអ៊ីស្រាអែលជាផ្លូវការ តាំងពីរដ្ឋជ្វីហ្វមួយនេះបានចាប់កំណើតក្នុងថ្ងៃទី១៥ ឧសភា ឆ្នាំ ១៩៤៨។ តែខុសពីអេហ្ស៊ីប និងហ្សកដានីដែលបានចុះកិច្ចព្រមព្រៀងសន្តិភាពជាមួយអ៊ីស្រាអែលក្នុងឆ្នាំ ១៩៧៩ និងឆ្នាំ ១៩៩៤ អេមីរ៉ាតអារ៉ាប់រួមមានត្រឹមជាកិច្ចព្រមព្រៀងភ្ជាប់ទំនាក់ទំនងប្រក្រតីប៉ុណ្ណោះ។ តែសម្រាប់អ៊ីស្រាអែល ទោះជាប្រភេទកិច្ចព្រមព្រៀងអ្វីក៏ដោយមិនសំខាន់ទេ អ្វីដែលសំខាន់ គឺការទទួលស្គាល់ខ្លួនជាផ្លូវការពីប្រទេសអារ៉ាប់ម្តងមួយៗនៅក្នុងតំបន់។ អ៊ីស្រាអែលសង្ឃឹមថាបន្ទាប់ពីអេមីរ៉ាតអារ៉ាប់រួម ខ្លួននឹងអាចចុះហត្ថលេខាលើកិច្ចព្រមព្រៀងភ្ជាប់ការទូតជាមួយប្រទេសអារ៉ាប់ផ្សេងទៀត។
តាមពិតទៅ គឺដើម្បីបុព្វហេតុប៉ាឡេស្ទីនដែលប្រទេសអារ៉ាប់ទាំងអស់បានពួតដៃ រួមកម្លាំងគ្នាប្រឆាំងអ៊ីស្រាអែលតាំងពីរដ្ឋអ៊ីស្រាអែលបានប្រសូត្រឡើងជាផ្លូវការក្នុងឆ្នាំ ១៩៤៨។ អ្វីដែលក្រុមប្រទេសអារ៉ាប់បន្តទាមទារចង់បាន និងចង់ឃើញតាំងពីដើមមកដល់បច្ចុប្បន្ន គឺការបង្កើតរដ្ឋប៉ាឡេស្ទីនឯករាជ្យមួយរស់ក្បែររដ្ឋអ៊ីស្រាអែល។ បុព្វហេតុមួយនេះត្រូវបានក្រុមប្រទេសអារ៉ាប់យកធ្វើជាមូលដ្ឋាន និងជាលក្ខខណ្ឌតែមួយគត់ដើម្បីអាចទទួលស្គាល់ និងភ្ជាប់ទំនាក់ទំនងផ្លូវទូតជាមួយអ៊ីស្រាអែល។ តែជាង ៧០ឆ្នាំក្រោយការបង្កើតរដ្ឋអ៊ីស្រាអែលមក ប៉ាឡេស្ទីនមិនត្រឹមតែនៅមិនទាន់មានរដ្ឋឯករាជ្យមួយប៉ុណ្ណោះទេ តែថែមទាំងកំពុងឃើញទំហំដីរបស់ខ្លួនរួញកាន់តែតូចទៅៗទៀតផង។
ទន្ទឹមគ្នានេះ មានប្រទេសអារ៉ាប់មួយចំនួនក៏ហាក់ផ្តើមមានទំនោរ និងមានសមានចិត្តចំពោះអ៊ីស្រាអែលជាងពេលមុន។ ឧទាហរណ៍ជាក់ស្តែងមិនអាចប្រកែកបាន គឺភាពល្អូតល្អឺនរវាងអេមីរ៉ាតអារ៉ាប់រួម និងអ៊ីស្រាអែល នោះបើទោះបីជាគេនៅមិនទាន់អាចនិយាយជារាត្រីទឹកឃ្មុំបាននៅឡើយក្តី។ តើកាយវិការរបស់អេមីរ៉ាតអារ៉ាប់រួមពេលនេះមិនមែនជាការបោះបង់ចោលនូវបុព្វហេតុប៉ាឡេស្ទីនដែលអេមីរ៉ាតអារ៉ាប់រួមបានចេញមុខគាំទ្រជាមួយប្រទេសអារ៉ាប់ផ្សេងតាំងពីដើមមកទេ ឬយ៉ាងណា?។ មិនមែនទេ ព្រោះនៅក្នុងកិច្ចព្រមព្រៀងនោះមានចែងពីការបិទបញ្ចប់ការកាត់ដីប៉ាឡេស្ទីនបន្ថែមពីសំណាក់អ៊ីស្រាអែល នេះជាចម្លើយបកស្រាយរបស់អេមីរ៉ាតអារ៉ាប់រួមកាលពីថ្ងៃទី១៤ សីហា។ តែបើតាមការបញ្ជាក់របស់នាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូ រឿងកាត់ដីគ្រាន់តែបានលើកពេល ហើយអ៊ីស្រាអែលមិនបានបោះបង់ចោលរឿងកាត់ដីនេះទេ។
បើគេស្តាប់មួយភ្លែតទៅ ចម្លើយបកស្រាយរបស់អេមីរ៉ាតអារ៉ាប់រួមពិតជាសមហេតុផល និងបានការពារបុព្វហេតុប៉ាឡេស្ទីន។ តែបើគេសម្លឹងមើលឲ្យបានឆ្ងាយបន្តិចទៅ ទង្វើរបស់អេមីរ៉ាតអារ៉ាប់រួមមានបង្កប់ជ្រៅដោយមហិច្ឆតាផ្ទាល់ខ្លួនជាងប្រយោជន៍ប៉ាឡេស្ទីន។ មានហេតុផលចំនួនពីរដែលបញ្ជាក់លើការអះអាងនេះ។ ហេតុផលទី១ អេមីរ៉ាតអារ៉ាប់រួមដែលបារម្ភពីកំណើនឥទ្ធិពលរបស់អ៊ីរ៉ង់នៅក្នុងតំបន់ត្រូវការបង្កើតកម្លាំងមួយរឹងមាំដើម្បីទប់ទល់នឹងអ៊ីរ៉ង់។ សម្រាប់អេមីរ៉ាតអារ៉ាប់រួម អ៊ីស្រាអែលពិតជាដៃគូមិនអាចខ្វះបានទេ ព្រោះអ៊ីស្រាអែលជាមហាអំណាចយោធាមួយ និងក៏ជាសត្រូវស៊ីសាច់ឈាមនឹងអ៊ីរ៉ង់។ ហេតុផលទី២ អេមីរ៉ាតអារ៉ាប់រួមដែលមានមហិច្ឆតាចង់ក្លាយជាប្រទេសមហាអំណាចបច្ចេកវិទ្យាមួយនៅក្នុងតំបន់ឈូងសមុទ្រពែក្សសរសើរមិនដាច់ពីមាត់លើសមត្ថភាពរបស់អ៊ីស្រាអែល ទោះក្នុងផ្នែកសន្តិសុខអ៊ីនធ័រនែត ឬឧបករណ៍សម្រាប់តាមឃ្លាំមើល។
ក្រុមអ្នកវិភាគបានមើលឃើញថា កិច្ចព្រមព្រៀងរវាងអេមីរ៉ាតអារ៉ាប់រួម និងអ៊ីស្រាអែលអាចនឹងធ្វើឲ្យប្រទេសអារ៉ាប់ផ្សេងទៀតយកគំរូតាមនាពេលខាងមុខ ដូចយ៉ាងប្រទេសបារ៉ែន អូម៉ង់ ស៊ូដង់ ឬម៉ារ៉ុក។ តែក្រុមអ្នកវិភាគដដែលបានទទួលស្គាល់ថា អារ៉ាប៊ីសាអូឌីតដែលជាប្រទេសមហាអំណាចសេដ្ឋកិច្ចទី១ នៃពិភពអារ៉ាប់មិនប្រាកដដើរតាមផ្លូវអេមីរ៉ាតអារ៉ាប់រួមភ្លាមៗទេ នោះបើគេដឹងថា អារ៉ាប៊ីសាអូឌីតធ្លាប់បានបង្ហាញចេញនូវសញ្ញារំកិលរកអ៊ីស្រាអែលនារយៈពេលប៉ុន្មានឆ្នាំចុងក្រោយនេះក៏ដោយ។ គួររម្លឹកថា ខណៈដែលប៉ាឡេស្ទីនបានចាត់ទុកទង្វើរបស់អេមីរ៉ាតអារ៉ាប់រួមជាទង្វើក្បត់ មានប្រទេសអារ៉ាប់ខ្លះបានសម្តែងការសាទរ។ ចំណែកអារ៉ាប៊ីសាអូឌីតបានបិទមាត់មិននិយាយអ្វីទាំងអស់ សូម្បីតែមួយម៉ាត់ក៏គ្មានដែរ។
ពិតណាស់ អារ៉ាប៊ីសាអូឌីតក៏ដូចអេមីរ៉ាតអារ៉ាប់រួម និងអ៊ីស្រាអែលមានជំហរប្រឆាំងនឹងអ៊ីរ៉ង់ដូចគ្នា។ តែអ្នកវិភាគម្នាក់នៅអាមេរិកលោក Hussein Ibish បានគូសបញ្ជាក់ថា ខុសពីអារ៉ាប៊ីសាអូឌីតដែលមើលឃើញតែការគំរាមកំហែងរបស់អ៊ីរ៉ង់នៅក្នុងតំបន់ អេមីរ៉ាតអារ៉ាប់រួម និងអ៊ីស្រាអែលបានសម្លឹងឃើញកម្រិតគំរាមកំហែងលើសពីអ៊ីរ៉ង់ទៅទៀត។ ការគំរាមកំហែងដែលលោក Ibish ចង់និយាយ គឺសម្ព័ន្ធមិត្តនៃក្រុមអ៊ីស្លាមនិកាយស៊ុយនីតដឹកនាំដោយប្រទេសតួកគី កាតារ ចលនាប៉ាឡេស្ទីនហាម៉ាស់ ចលនាភាតរៈអ៊ីស្លាម រដ្ឋាភិបាលលីប៊ី និងប្រទេសមួយចំនួនទៀត។ តែទោះក្រោមហេតុផលណាមួយក៏ដោយ កិច្ចព្រមព្រៀងរវាងអេមីរ៉ាតអារ៉ាប់រួម និងអ៊ីស្រាអែល គឺជាការវាយមួយព្រនូងយ៉ាងចាស់ដៃលើប៉ាឡេស្ទីន និងអាចធ្វើឲ្យប៉ះពាល់ដល់គ្រប់គំនិតផ្តួចផ្តើមសន្តិភាពរវាងអ៊ីស្រាអែល ប៉ាឡេស្ទីននាពេលកន្លងមកក៏ដូចទៅថ្ងៃខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ