តើថ្នាក់ដឹកនាំគណបក្សសាធារណរដ្ឋអាចចុះសម្រុងគាំទ្រលោក ដូណាល់ ត្រាំ ដែរឬទេ?
ចុះផ្សាយនៅថ្ងៃ៖
ស្តាប់ - ០៤:២៩
កាលពីថ្ងៃព្រហស្បតិ៍ ទី១២ ឧសភាកន្លងទៅនេះ លោក ដូណាល់ ត្រាំ បានជួបសំណេះសំណាលជាមួយថ្នាក់ដឹកមួយចំនួនរបស់គណបក្សសាធារណរដ្ឋ នៅទីក្រុងវ៉ាស៊ីនតោន។ គោលបំណងនៃជំនួបនេះ គឺស្វែងរកសម្លេងគាំទ្រផ្លូវការពីថ្នាក់ដឹកនាំទាំងនោះ មុននឹងទទួលការតែងតាំងផ្លូវការ។ គណបក្សសាធារណរដ្ឋកំពុងឆ្លងកាត់ភាពប្រេះឆាបែកបាក់គ្នាជុំវិញបេក្ខភាពរបស់លោក Donald Trump។ មានថ្នាក់ដឹកនាំខ្លះនៅរារែកមិនទាន់ប្រកាសគាំទ្របេក្ខភាពលោក Trump ជាពិសេសចលនាក្រុមប្រឆាំង Trump នៅក្នុងជួរបក្សផ្ទាល់តែម្តង។
ក្នុងដំណើរទស្សនកិច្ចរយៈពេល ៤ ម៉ោងនៅរដ្ឋធានីវ៉ាស៊ីនតោន លោក Donald Trump បានចំណាយពេលជួបជាមួយថ្នាក់ដឹកនាំជាន់ខ្ពស់មួយចំនួនរបស់គណបក្សសាធារណរដ្ឋ។ ជំនួបនេះបានប្រព្រឹត្តទៅនៅទីស្នាក់ការគណបក្សសាធារណរដ្ឋតែម្តង។ ជាដំបូង លោក Donald Trump បានជួបសន្ទនាជាមួយលោក Paul Ryan ប្រធានសភាតំណាងរាស្រ្តអាមេរិក និងជាឥស្សរជនជាន់ខ្ពស់វ័យក្មេងដ៏មានឥទ្ធិពលម្នាក់នៅក្នុងបក្ស។ នេះជាលើកទីមួយហើយ ដែលបុរសទាំងពីរនាក់នេះជួបពិភាក្សាទល់មុខគ្នា។
ក្រោយពីជំនួបជាង ៤៥ នាទី លោក Donald Trump និងលោក Paul Ryan បានចេញសេចក្តីប្រកាសព័ត៌មានរួមគ្នាមួយដោយបានបញ្ជាក់ថា ពួកគេកំពុងតែបោះជំហានមួយប្រកបដោយភាពវិជ្ជមានឆ្ពោះទៅរកការបង្រួបបង្រួមគណបក្សសាធារណរដ្ឋ។ ខ្លឹមសារនៃសេចក្តីថ្លែងការណ៍នេះក៏បានពន្យល់ផងដែរថា អ្នកនយោបាយបក្សសាធារណរដ្ឋទាំងពីរបាននិយាយដោយស្មោះស្ម័គ្រជុំវិញចំនុចមិនឯកភាពគ្នាមួយចំនួន។ ប៉ុន្តែ ទោះបីជាយ៉ាងណាក៏អ្នកទាំងពីរមានចំនុចផ្សេងទៀតស្របគ្នាផងដែរ។
ឆ្លើយតបទៅនឹងសំណួរក្នុងការផ្សាយរបស់ស្ថានីយ៍ទូរទស្សន៍ Fox News លោក Paul Ryan បានថ្លែងថា ពួកគេបានពិភាក្សាគ្នាលើទស្សនៈនយោបាយមួយចំនួនដូចជា ការបែងចែកអំណាច ការបកស្រាយរដ្ឋធម្មនុញ្ញ ការពន្លូតកូន និងតួនាទីរបស់តុលាការកំពូល។ ទាំងអស់នេះគឺ ជាប្រធានបទសំខាន់ៗរបស់ក្រុមអ្នកអភិរក្សនិយមរបស់គណបក្សសាធារណរដ្ឋ។ ប៉ុន្តែ លោក Donald Trump ដែលមិនមែនជាអ្នកអភិរក្សនិយមពុំបានយល់ស្របចំពោះគោលការណ៍ទាំងនោះឡើយ។
សូមរំលឹកថា កាលពីពីរសប្តាហ៍កន្លងទៅនេះ ពោលគឺមុនជំនួបរវាងអ្នកទាំងពីរ លោក Paul Ryan ធ្លាប់បានប្រកាសហើយថា លោកមិនទាន់គាំទ្រលោក Donald Trump ជាបេក្ខជនផ្លូវការប្រចាំបក្សនៅឡើយទេ។ ហើយទោះបីជាក្រោយជំនួបនេះក៏ដោយ ក៏លោក Paul Ryan នៅតែរារែកមិនទាន់ប្រកាសគោលជំហរផ្ទាល់ខ្លួនឡើយ។ ភាពរារែកបែបនេះទំនងជាការចង់តថ្លៃកម្មវិធីនយោបាយមួយចំនួនជាមួយលោក Donald Trump។
គួរបញ្ជាក់ផងដែរថា លោក Paul Ryan គឺជាបុគ្គលម្នាក់ដ៏មានឥទ្ធិពលក្នុងចំណោមក្រុមអភិរក្សនិយមរបស់គណបក្សសាធារណរដ្ឋ។ ហើយលោកក៏ជាអ្នកដែលបានខិតខំផ្លាស់ប្តូរធ្វើកំណែរទម្រង់រូបភាពគណបក្សនយោបាយអាមេរិកដ៏ចំណាស់មួយនេះឲ្យកាន់តែទំនើបជាងមុន។ យោងតាមសារព័ត៌មានអាមេរិកនានា ជំហររារែកមិនទាន់គាំទ្រលោក Donald Trump ជាបេក្ខជនផ្លូវការប្រចាំបក្សសំរាប់ការបោះឆ្នោតប្រធានាធិបតីអាមេរិក គឺជាដំណឹងបង្ហាញពីការបែកបាក់ដ៏ធំធេងមួយនៅក្នុងគណបក្សសាធារណរដ្ឋ។ អ្វីដែលគេព្រួយបារម្ភថែមទៀតនោះ គឺលោក Paul Ryan នឹងត្រូវអញ្ជើញធ្វើជាគណៈអធិបតីក្នុងពិធីសមាជតែងតាំងបេក្ខជនផ្លូវការប្រចាំបក្ស។ គណបក្សសាធារណរដ្ឋនឹងរៀបចំសមាជនេះនៅទីក្រុង Cleveland រដ្ឋ Ohio ចន្លោះពីថ្ងៃទី១៨ ដល់២១ កក្កដាខាងមុខនេះ។
គេក៏គិតផងដែរថា លោក Paul Ryan ទំនងជាចង់អូសបន្លាយជំហរគាំទ្ររបស់ខ្លួនបែបនេះ ដើម្បីកុំអោយផ្ទៃក្នុងគណបក្សសាធារណរដ្ឋបែកបាក់គ្នារត់ទៅគាំទ្របក្សប្រជាធិបតេយ្យ។ ព្រោះឥស្សរជនជាន់ខ្ពស់ខ្លះរបស់បក្ស ដែលមានជាអាទិ៍ដូចជា អតីតប្រធានាធិបតីចំនួនពីរនាក់ សមាជិកព្រឹទ្ធសភា និងអភិបាលរដ្ឋកំពុងកាន់តំណែងមួយចំនួនបានប្រកាសមិនគាំទ្រលោក Donald Trump ជាបេក្ខជនសាធារណរដ្ឋឡើយ។ នេះជាលើកទីមួយហើយ ដែលផ្ទៃក្នុងគណបក្សនយោបាយអាមេរិកដ៏ធំមួយនេះប្រេះឆាគ្នាបែបនេះ។ ភាពប្រេះឆានេះក៏ជាលទ្ធផលនៃយុទ្ធនាការឃោសនាដ៏ចម្រូងចម្រាស់ ជាពិសេសពាក្យសំដីថ្លែងចេញពីមាត់របស់លោក Donald Trump តែម្តង។
ឥស្សរជនសាធារណរដ្ឋមួយចំនួនមិនពេញចិត្តសេចក្តីថ្លែងការណ៍កន្លងមករបស់លោក Trump។ ក្នុងនោះមានដូចជា កាជេរប្រមាថលើស្រ្តីភេទ ជនពិការ និងការចង់បិទព្រំដែនមិនអោយអ្នកកាន់សាសនាអ៊ីស្លាមចូលសហរដ្ឋអាមេរិកជាដើម។ ជាទិដ្ឋភាពរួម ជំនួបរវាងលោក Donald Trump និងលោក Paul Ryan ក៏សារមួយបង្ហាញដល់អ្នកគាំទ្របក្សសាធារណរដ្ឋ ពីជាការចង់បន្ថយភាពតានតឹង និងទស្សនៈផ្ទុយគ្នារវាងបុគ្គលទាំងពីរ។ ហើយក៏ជារយៈពេលអន្តរកាលមួយ ដើម្បីឲ្យក្រុមចលនាអ្នកប្រឆាំង Trump ស្ងប់ចិត្តបន្តិចម្តងៗមុននឹងអាចទទួលយកបេក្ខភាពរបស់លោក Trump ទាំងស្រុងតែម្តង។
បន្ទាប់ពីជំនួបនេះមក លោក Donald Trump បានធ្វើដំណើរទៅវិមានកាពីតូល ជាទីកន្លែងរបស់ព្រឹទ្ធសភាអាមេរិក ដើម្បីជួបលោក Mitch McConnel ដែលប្រធានតំណាងសម្លេងភាគច្រើនរបស់គណបក្សសាធារណរដ្ឋប្រចាំព្រឹទ្ធសភា។ លើសពីនេះ លោក Trump ក៏បានសន្ទនាជាមួយលោក Reince Priebus ប្រធានគណបក្សសាធារណរដ្ឋផងដែរ។ មុននឹងចាកចេញពីរដ្ឋធានីវ៉ាស៊ីនតោន លោក Trump បានប្រកាសតាមរយៈបណ្តាញសង្គម Twitter ថា ជំនួបនេះជាជោគជ័យមួយឈានទៅរកឯកភាពបក្ស ហើយលោកទទួលបានការគាំទ្រពេញទំហឹងពីបុគ្គលទាំងពីរ។
គណបក្សសាធារណរដ្ឋត្រូវការឯកភាពផ្ទៃក្នុងបក្ស ដើម្បីចៀសវាងបញ្ហាធំចំនួនពីរ។ ទីមួយ គឺបញ្ហាថវិកាដែលគណបក្សនេះត្រូវប្រមូលអោយបានរាប់រយលានដុល្លារ សំរាប់យុទ្ធនាការឃោសនាបោះឆ្នោតប្រធានាធិបតីអាមេរិកនាខែវិច្ឆិកាខាងមុខនេះ។ សម្បុរសជនដែលធ្លាប់ផ្តល់ជំនួយថវិកាដល់បក្សសាធារណរដ្ឋ ជាពិសេសមហាសេដ្ឋីបងប្អូនត្រកូល Koch ធ្លាប់បានគំរាមថាមិនបរិច្ចាកប្រាក់មួយសេនឡើយបើលោក Donald Trump ក្លាយបេក្ខជនផ្លូវការរបស់បក្ស។
ទីពីរ គឺបញ្ហាយុទ្ធសាស្រ្តនយោបាយ ដែលពួកសាធារណរដ្ឋខ្លាចក្រែងបាត់បង់សម្លេងភាគច្រើននៅសភាទាំងពីរថ្នាក់ ពោលគឺ សភាតំណាងរាស្រ្ត និងព្រឹទ្ធសភា។ ថ្នាក់ដឹកនាំបក្សសាធារណរដ្ឋបានយល់ស្របគ្នាថា គឺជាការខាតបង់ដ៏ធំធេងប្រសិនបើគេបន្តការបែកបាក់គ្នាបែបនេះទៀត។ ផលប្រយោជន៍នឹងធ្លាក់ទៅគណបក្សប្រជាធិបតេយ្យ ដែលអាចបន្តកាន់កាប់សេតវិមាន ៤ ឆ្នាំបន្តទៀត។ ដូចនេះ បើតាមទម្រង់ខាងក្រៅ គេត្រូវបង្ហាញពីឯកភាពផ្ទៃក្នុងដើម្បីស្រោចស្រង់មុខមាត់បក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ