លោក Ted Cruz ជ្រើសរើសលោកស្រី Carly Fiorina ជាបេក្ខជនអនុប្រធានាធិបតីអាមេរិក
ចុះផ្សាយនៅថ្ងៃ៖
ស្តាប់ - ០៤:០៩
នៅសល់តែ ៦ សប្តាហ៍ទៀតប៉ុណ្ណោះ ការបោះឆ្នោតជ្រើសរើសបេក្ខជនប្រធានាធិបតីអាមេរិកប្រចាំបក្សនិមួយនឹងត្រូវបញ្ចប់។ ដើម្បីផ្តល់សន្ទុះយុទ្ធនាការឲ្យកាន់តែខ្លាំងថែមទៀត កាលពីសប្តាហ៍មុន លោក Ted Cruz បានប្រកាសដំណឹងដ៏គួរឲ្យភ្ញាក់ផ្អើលមួយ។ នោះ គឺការជ្រើសរើសយកលោកស្រី Carly Fiorina ជាបេក្ខជនអនុប្រធានាធិបតី ក្នុងករណីដែលលោកត្រូវបានជ្រើសតាំងជាផ្លូវការតំណាងឲ្យបក្សសាធារណរដ្ឋ។ រយៈពេលចុងក្រោយនេះ លោក Ted Cruz កំពុងព្យាយាមបង្កើតយុទ្ធសាស្រ្តថ្មី ក្នុងគោលបំណងទប់ស្កាត់គូប្រជែង គឺលោក Donald Trump។ តើលោកស្រី Carly Fiorina ជានរណ? តើយុទ្ធសាស្រ្តថ្មីនេះអាចផ្តល់ផលប្រយោធន៍អ្វីខ្លះដល់លោក Ted Cruz?
នៅក្នុងជំនួបជាមួយអ្នកគាំទ្រនៅទីក្រុង Indianapolis នៃរដ្ឋ Indiana លោក Ted Cruz បានបង្ហាញបេក្ខភាពលោកស្រី Carly Fiorina ក្នុងឋានៈជាអនុប្រធានាធិបតី ប្រសិនបើលោកជាប់ឆ្នោត។ ការប្រកាសដំណឹងបែបនេះត្រូវបានគេយល់ឃើញថា លោក Ted Cruz កំពុងតែព្យាយាមបញ្ចេញគ្រប់សន្លឹកបៀរទាំងអស់ ដែលអាចលេងបាន ក្នុងគោលបំណងទប់ស្កាត់ដំណើរទៅមុខរបស់គូប្រជែង គឺ លោក Donald Trump។
បើយោងតាមការគណនារបស់ស្ថានីយ៍ទូរទស្សន៍ CNN បានឲ្យដឹងថា គិតមកដល់ពេលនេះ លោក Donald Trump កំពុងដឹកមុខគេ ដោយប្រមូលបានប្រតិភូនៅក្នុងដៃចំនួន ៩៩១ នាក់។ ទីពីរ គឺលោក Ted Cruz ទទួលបានប្រតិភូចំនួន ៥៦៨ នាក់។ មានរដ្ឋចំនួន ១០ទៀត ដែលគណបក្សសាធារណរដ្ឋនឹងត្រូវរៀបចំការបោះឆ្នោតជ្រើសរើសបេក្ខជនប្រចាំបក្ស។ លោក Ted Cruz ចាំបាច់ត្រូវតែឈ្នះនៅតាមរដ្ឋទាំងនោះ ដើម្បីទប់ស្កាត់លោក Donald Trump មិនឲ្យទទួលបានប្រតិភូចំនួន ១២៣៧ នាក់។ សូមបញ្ជាក់ថា ចំនួននេះ គឺជាការទាមទាររបស់គណបក្សសាធារណរដ្ឋ ដើម្បីអាចក្លាយជាបេក្ខជនផ្លូវការស្វ័យប្រវត្តិតំណាងឲ្យបក្សតែម្តង។
ការប្រកាសសម្ព័ន្ធភាពជាមួយលោកស្រី Carly Fiorina ទំនងត្រូវបានគេយល់ឃើញថា ជាកិច្ចខិតខំប្រឹងប្រែងមួយរបស់លោក Ted Cruz ដើម្បីទទួលប្រជាប្រិយភាពក្នុងចំណោមអ្នកគាំទ្របក្សសាធារណរដ្ឋ។ ហើយជាពិសេសនោះ ប្រសិនបើលោក Cruz ឈ្នះឆ្នោតនៅតាមរដ្ឋមួយចំនួនក្នុងប៉ុន្មានសប្តាហ៍ខាងមុខនេះ គឺលោកប្រហែលអាចកាត់បន្ថយគន្លាតចំនួនប្រតិភូជាមួយលោក Donald Trump។
យោងតាមប្រពៃណីនយោបាយកន្លងមករបស់បក្ស ជាធម្មតា បេក្ខជនប្រធានាធបិតីតែងប្រកាសបេក្ខជនអនុប្រធានាធិបតី ក្រោយពេលដែលខ្លួនបានទទួលបានការតែងតាំងជាបេក្ខជនផ្លូវការប្រចាំបក្ស។ ផ្ទុយទៅវិញ លោក Ted Cruz ពុំនៅរង់ចាំរហូតដល់ខែកក្កដា ដែលការធ្វើសមាជបោះឆ្នោតជ្រើសរើសបេក្ខជនផ្លូវការឡើយ។
ហេតុអ្វីបានជាលោកធ្វើបែបនេះ? នៅចំពោះមុខអ្នកគាំទ្រ លោក Ted Cruz បានពន្យល់ប្រាប់ ថា លោកចង់ឲ្យពលរដ្ឋអាមេរិកចាត់ទុកលោកជាបេក្ខជនម៉ឹងម៉ាត់ មិនចេះតែផ្លាស់ប្តូរពាក្យសំដីគ្រប់ពេលវេលានោះទេ។ ការនិយាយបែបដៀមដាមបែបនេះរបស់លោក Cruz គឺសំដៅទៅលើគូបដិបក្ខ Donald Trump។ ម៉្យាងទៀត លោកក៏បានបញ្ជាក់ថា ការបង្កើតសម្ព័ន្ធភាពរវាងលោក និងលោកស្រី Carly Fiorina ជាក្រុមការងារតែមួយ គឺជាការផ្តល់ជម្រើសដ៏ច្បាស់លាស់មួយជូនពលរដ្ឋអាមេរិក។
លោកក៏មិនភ្លេចអួតសរសើរលោកស្រី Carly Fiorina ដោយបានចាត់ទុកថាជាអ្នកដឹកនាំម្នាក់មានសមត្ថភាពអស្ចារ្យ ក្នុងមជ្ឈដ្ឋានអ្នកជំនួញអាមេរិក។ លោកស្រី Carly Fiorina ជាអតីតៈប្រធានអគ្គនាយកក្រុមហ៊ុនផលិតគ្រឿងបរិក្ខាកុំព្យូទ័រម៉ាក Hewlett-Packard ដែលគេតែងហៅឈ្មោះកាត់ថា HP ។ លោកស្រីមានឱពុកឈ្មោះ Joseph Tyree Sneed III ដែលជាសាស្រ្តាចារ្យច្បាប់ដ៏ល្បីឈ្មោះម្នាក់មាននិន្នាការអភិរក្សនិយម។ ឱពុករបស់លោកស្រីក៍ធ្លាប់ជាអនុរដ្ឋមន្រ្តីក្រសួងយុត្តិធម៌ និងជាសមាជិកចៅក្រមសហព័ន្ធ ក្នុងអាណ្ណត្តិរបស់លោកប្រធានាធិបតី Richard Nixon។
នៅក្នុងជួរគណបក្សសាធារណរដ្ឋ លោកស្រី Carly Fiorina ត្រូវបានគេដឹងថា ជាអ្នកមាននិន្នាការសិទ្ធិជាមួយក្រុមអភិរក្សនិយមដ៏តឹងរឹង ប៉ុន្តែក៏ងាកទៅរកក្រុមជំនួញផងដែរ។ មានអាយុ ៦១ ឆ្នាំ លោកស្រីបានប្រឡូកក្នុងឆាកនយោបាយជាលើកតំបូងកាលពីឆ្នាំ២០១០។ នាពេលនោះ លោកស្រីបានឈរឈ្មោះបោះឆ្នោតជាបេក្ខជសមាជិកព្រឹទ្ធសភា ប៉ុន្តែបានទទួលបរាជ័យ។ បន្ទាប់មក គឺនៅឆ្នាំ២០១៥ លោកស្រីបានឈរឈ្មោះជាបេក្ខជនប្រធានាធិបតី ក្នុងការបោះឆ្នោតជ្រើសរើសអ្នកតំណាងបក្សផ្លូវការសំរាប់គណបក្សសាធារណរដ្ឋ។
ប៉ុន្តែ លោកស្រីបានបោះបង់ចោលការប្រកួតភ្លាមៗកាលពីដើមកុម្ភៈកន្លងមកនេះ ក្រោយពីទួលបានលទ្ធផលមិនល្អ នៅក្នុងការបោះឆ្នោតនៅរដ្ឋ Iowa និងរដ្ឋ New Hampshire។លោកស្រីសម្រេចចិត្តបង្រួបបង្រួមជាធ្លុងមួយជាមួយលោក Ted Cruz ព្រោះលោកស្រីយល់ឃើញថា លោក Ted Cruz ជាអ្នកតំណាងឲ្យគំនិតអភិរក្សនិយមមិនអាចតថ្លៃបាន។ បើទោះបីជាមានចំនុចមួយចំនួន ដែលអ្នកនយោបាយទាំងពីរមិនចុះសម្រុងគ្នា ប៉ុន្តែ អ្នកទាំងពីរឯកភាពគ្នាលើនយោបាយអភិរក្សនិយម ក្នុងនោះការប្រឆាំងនឹងការរំលូតកូន នឹងអាពាហ៍ពិពាហ៍រវាងមនុស្សស្រលាញ់ភេទដូចគ្នាជាដើម។
សំរាប់លោក Ted Cruz រូបភាពរបស់លោកស្រី Carly Fiorina មានសារៈសំខាន់ខ្លាំងណាស់។ ទីមួយ គឺលោកស្រីជាអ្នកមានបទពិសោធន៍ផែ្នកជំនួញ។ សម្ព័ន្ធភាពជាមួយលោកស្រី គឺប្រហែលជាអាចទប់លោក Donald Trump បាន ព្រោះអ្នកជំនួញទាំងពីរនាក់នេះមិនត្រូវរ៉ូវគ្នាឡើយ។ ហើយលោកស្រី Carly Fiorina ក៏ធ្លាប់ប៉ះសម្តីគ្នាច្រើនដងផងដែរ ជាមួយលោក Donald Trump ក្នុងអំឡុងពេលកិច្ចពិភាក្សាដេញដោលកាលពីឆ្នាំ២០១៥។
ទីពីរ រូបភាពរបស់លោក Carly Fiorina ក៏អាចបន្សាបបានផងដែររូបភាពរបស់លោកស្រី Hillary Clinton មកពីគណបក្សប្រជាធិបតេយ្យ ដែលកំពុងរះត្រដែត។ កន្លងលោកស្រី Clinton តែងប្រើប្រាស់ទស្សនស្រ្តីនិយម ដោយរិះគន់ថាគណបក្សសាធារណរដ្ឋ គឺជាបក្សប្រឆាំងនឹងស្រ្តីភេទក្នុងឆាកនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ