បារាំងរឹតបន្តឹងការផ្តល់ឈាមដើម្បីបង្ការការឆ្លងមេរោគហ្ស៊ីកា
ប្រឈមមុខនឹងការឆ្លងរាលដាលនៃមេរោគហ្ស៊ីកា ដែលដំបូងចេញពីតំបន់អាមេរិកឡាទីន ហើយចាប់ផ្តើមចូលមកកាន់តែច្រើនដល់តំបន់អឺរ៉ុប រដ្ឋាភិបាលបារាំងបានចេញវិធានការរឹតបន្តឹងការផ្តល់ឈាមពីអ្នកដែលទើបនឹងធ្វើដំណើរមកពីតំបន់ដែលមានមេរោគហ្ស៊ីកា។ ការរឹតបន្តឹងការផ្តល់ឈាមនេះ ធ្វើឡើងទៅតាមអានុសាសន៍របស់អង្គការសុខភាពពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
រាល់អ្នកដំណើរទាំងឡាយណា ដែលទើបនឹងធ្វើដំណើរមកពីតំបន់ដែលកំពុងប្រឈមមុខនឹងការរាតត្បាតនៃមេរោគហ្ស៊ីកា ក្រោយពីមកត្រឡប់មកប្រទេសបារាំងវិញ ត្រូវរង់ចាំយ៉ាងតិច ២៨ថ្ងៃ ទើបអាចធ្វើការផ្តល់ឈាមបាន។ នេះបើតាមការប្រកាសរបស់រដ្ឋមន្រ្តីក្រសួងសុខាភិបាលបារាំង នៅថ្ងៃអាទិត្យ ដោយបានបន្ថែមថា នៅតាមបណ្តាដែនដីរបស់បារាំងឯនាយសមុទ្រ ដែលស្ថិតនៅក្នុងតំបន់អាមេរិក រាល់ការផ្តល់ឈាមទាំងអស់ត្រូវតែមានការធ្វើតេស្តរកមើលមេរោគហ្ស៊ីកាជាមុន ទើបអាចយកទៅប្រើប្រាស់បាន។
ក្រៅពីបារាំង ប្រទេសចំនួនពីរទៀត គឺអង់គ្លេស និងកាណាដា ក៏បានប្រកាសចាត់វិធានការរឹតបន្តឹងការផ្តល់ឈាមនេះដែរ ដោយសារតែគេដឹងថា ក្រៅពីឆ្លងតាមភ្នាក់ងារចម្លង គឺមូសខ្លា មេរោគហ្ស៊ីកាក៏អាចឆ្លងផងដែរតាមរយៈការបញ្ចូលឈាម។
កាលពីពេលថ្មីៗនេះ ការឆ្លងមេរោគហ្ស៊ីការតាមរយៈការបញ្ចូលឈាមត្រូវបានគេរកឃើញចំនួនពីរករណី នៅក្នុងប្រទេសប្រេស៊ីល ហើយអង្គការសុខភាពពិភពលោកទើបនឹងបានចេញសេចក្តីប្រកាសមួយ កាលពីថ្ងៃព្រហស្បតិ៍ ទី៤កុម្ភៈថ្មីៗនេះ ស្នើដល់គ្រប់ប្រទេសទាំងអស់កុំឲ្យទទួលការផ្តល់ឈាមពីអ្នកដែលទើបនឹងធ្វើដំណើរមកពីតំបន់មានមេរោគហ្ស៊ីកា។
រដ្ឋមន្រ្តីក្រសួងសុខាភិបាលបារាំងក៏បានឲ្យដឹងផងដែរថា រហូតមកទល់នឹងពេលនេះ ការឆ្លងមេរោគហ្ស៊ីកាត្រូវបានគេរកឃើញចំនួន ១៨ករណី នៅក្នុងប្រទេសបារាំង ក៏ប៉ុន្តែ សុទ្ធតែជាករណីឆ្លងពីបរទេស ដោយមិនមានការឆ្លងរាលដាលតគ្នាពីមួយទៅមួយ នៅក្នុងប្រទេសបារាំងនោះទេ។ ទោះជាយ៉ាងណា រដ្ឋាភិបាលបារាំងបានសម្រេចចាត់វិធានការរឹតបន្តឹងការត្រួតពិនិត្យសុខភាពរបស់ស្រ្តីមានផ្ទៃពោះ តាមរយៈការធ្វើតេស្ត និងអេកូសាស្រ្តនៅរៀងរាល់មួយខែម្តង ដោយសារតែគេដឹងថា គ្រោះថ្នាក់ធំបំផុតនៃមេរោគហ្ស៊ីកា គឺមិនមែនចំពោះមនុស្សធំនោះទេ តែចំពោះទារកដែលនៅក្នុងផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ