នៅថ្ងៃអាទិត្យទី២៦តុលានេះ គឺជាថ្ងៃបោះឆ្នោតជ្រើសរើសប្រធានាធិបតីជុំទីពីរ នៅប្រទេសប្រេស៊ីល។ មានបេក្ខជនពីររូប ដែលប្រជាជនប្រេស៊ីលនឹងត្រូវធ្វើការជ្រើសរើស គឺរវាងលោកស្រី ឌីលម៉ា រូស្សែហ្វ ដែលជាប្រធានាធិបតីចប់អាណត្តិ និងលោក អេស្យ៉ូ ណេវ៉េស។ លទ្ធផលនៃការបោះឆ្នោតនេះ គេកំពុងតែរងចាំមើលទូទាំងពិភពលោក ព្រោះថាប្រេស៊ីល ជាប្រទេសដ៏ធំជាងគេនៅទ្វីបអាមេរិកខាងត្បូង ទាំងផ្ទៃដី ទាំងចំនួនប្រជាជន។ ក្នុងរយៈពេល១០ ឆ្នាំចុងក្រោយនេះ ប្រេស៊ីល បានអភិវឌ្ឍន៍ខ្លួនក្លាយជាប្រទេស មានសក្តានុពលសេដ្ឋកិច្ចល្អប្រសើរ លំដាប់ទី៧ ក្នុងពិភពលោក។
ប្រទេសប្រេស៊ីលមានផ្ទៃដីធំណាស់ ហើយភាគច្រើនជាតំបន់ព្រៃភ្នំអាម៉ាហ្សូន។ ដូច្នេះការ គ្រប់គ្រង និងត្រួតពិនិត្យដំណើរការនៃការបោះឆ្នោត មានលក្ខណៈលំបាកបន្តិច។ តាមការរាយការណ៍ មានការិយល័យបោះឆ្នោតរហូតដល់ ៥៤១៨ការិយាល័យ ព្រោះថា ប្រជាជនប្រេស៊ីលដែលគ្រប់អាយុ និងបានចុះឈ្មោះក្នុងបញ្ជីរឈ្មោះបោះឆ្នោត មានដល់ ជិត១៤៣លាននាក់ឯណោះ។
នេះគឺជាការបោះឆ្នោតជ្រើសរើសប្រធានាធិបតីប្រេស៊ីល ជុំទីពីរ។ ជុំទីមួយបានធ្វើឡើង កាលពីថ្ងៃទី៥ តុលា។ កាលពីបោះឆ្នោតជុំទីមួយនោះ មានបេក្ខជនឈរឈ្មោះ មកពីច្រើនគណៈបក្សណាស់។ ហើយលទ្ធផលជុំទីមួយ គឺគេជ្រើសយកតែបេក្ខជនពីររូបប៉ុណ្ណោះ ដែលបានសំលេងច្រើនជាងគេ យកមកធ្វើការប្រកួតគ្នាផ្តាច់ព្រ័ត្រនៅជុំទីពីរ នៅថ្ងៃទី២៦ តុលា។
បេក្ខជនប្រធានាធិបតីទាំងពីរជានរណា?
បេក្ខជនទាំងពីររូប គឺលោកស្រី Dilma Rousseff និងលោក Aecio Neves។ លោកស្រី Dilma Rousseff គឺជាប្រធានាធិបតីប្រេស៊ីលបច្ចុប្បន្ន ដែលត្រូវចប់អាណត្តិ ដែលលោកស្រីបានចូលកាន់កាលពីឆ្នាំ២០១០។ លោកស្រី Dilma Rousseff គាត់មកពីគណៈបក្សពលករដែលជាគណៈបក្សឆ្វេងនិយម ហើយគាត់ជាមនុស្សជំនិតរបស់លោកអតីតប្រធានាធិបតីប្រេស៊ីលដ៏មានប្រជាប្រិយភាព គឺលោក លូឡា។
ចំណែកឯលោក Aecio Neves វិញ ជាបេក្ខជនមកពីគណៈបក្ស ប្រជាធិបតេយ្យស្តាំនិយម។ គាត់ជាអតីតអភិបាលរដ្ឋ Minas Gerais ដែលជារដ្ឋដ៏ធំរបស់ប្រេស៊ីល មានផ្ទៃដីធំជាងស្រុកខ្មែរយើង ជាងបីដងឯណោះ ហើយមានប្រជាជនរស់នៅ២០លាននាក់។ លោក Aecio Neves នេះ មានប្រជាប្រិយភាពណាស់ នៅក្នុងរដ្ឋរបស់គាត់ ព្រោះថា រដ្ឋនេះក៏ធ្លាប់បានគ្រប់គ្រងដោយជីតារបស់គាត់ដែរ កាលពីជំនាន់ទសវត្សឆ្នាំ៨០។
មិនត្រឹមតែប្រជាជនប្រេស៊ីលផ្ទាល់ទេ ដែលអន្ទះសារ ចង់ដឹងលទ្ធផលចុងក្រោយ នៃការបោះឆ្នោតនេះ តែពិភពលោកទាំងមូលតែម្តង ដែលរងចាំមើលថាតើ ប្រជាជនប្រេស៊ីលភាគច្រើន ជ្រើសរើសយកបេក្ខជនមួយណា។
វា ពិបាកស្មានណាស់ ថានរណានឹងទទួលបានជោគជ័យ ពិតប្រាកដ ព្រោះបេក្ខភាពទាំងពីរ មានប្រជាប្រិយភាពប្រហាក់ប្រហែលគ្នា ហើយ ម្នាក់ៗមានយុទ្ធសាស្រ្ត យកឈ្នះគ្នា មិនចាញ់គ្នាប៉ុន្មានទេ។ បើសិនយោងតាមការស្ទៀបស្ទង់មតិចុងក្រោយ ដែលធ្វើឡើងដោយវិទ្យាស្ថានស្ថិតិជាតិប្រេស៊ីល គេរំពឹងថា លោកស្រី Dilma Rousseff អាចនឹងបានសំឡេងឆ្នោត ៥៣ភាគរយ លើសលោក Aecio Nevesដែលអាចបានត្រឹម ៤៧ភាគរយ។ ទោះបីជាយ៉ាងណា នេះគ្រាន់ជាការស្ទង់មតិបណ្តោះអាសន្នប៉ុណ្ណោះ។
នរណា ខ្លាំងជាងនរណា?
ចំណុចខ្លាំង និងចំណុចខ្សោយរបស់លោកស្រី Dilma Rousseff៖
ចំណុចខ្លាំងរបស់លោកស្រី Dilma Rousseff គឺលោកស្រី បានបន្តដំណែងពីលោក ប្រធានាធិបតី លូឡា។ លោកស្រីបានបន្តនយោបាយកាត់បន្ថយភាពក្រីក្រ របស់ប្រេស៊ីលបានច្រើនណាស់។ ក្នុងរយៈពេល១០ឆ្នាំចុងក្រោយនេះ ប្រេស៊ីលក្លាយជាប្រទេសដែលមានសក្តានុពលសេដ្ឋកិច្ចខ្លាំងក្លាជាងគេ ក្នុងតំបន់អាមេរិកខាងត្បូង ហើយជាមហាអំណាចសេដ្ឋកិច្ចលំដាប់ទី៧ ប្រហាក់ប្រហែលចិននិងឥណ្ឌា។
កម្មវិធីកាត់បន្ថយភាពក្រីក្រ ដែលបានជោគជ័យ ហើយបានធ្វើឲ្យលោកស្រីមានប្រជាប្រិយភាពខ្លាំងនោះគឺ ការផ្តល់កញ្ចប់ថវិការជួយដល់ប្រជាជនដែលក្រីក្របំផុត នៅតំបន់ដាច់ស្រយ៉ាល ក្នុងរដ្ឋតំបន់ភាគខាងជើងប្រទេស។ កម្មវិធីអភិវឌ្ឍន៍ជាច្រើនត្រូវបានដាក់ចេញ ក្នុងអាណត្តិរបស់លោកស្រីកន្លងមក ដែលបានជួយស្រង់ប្រជាជនប្រេស៊ីលប្រហែល៤០លាននាក់ ចេញពីភាពក្រីក្រតោកយ៉ាក ឲ្យមានជីវភាពមធ្យម។ ដូច្នេះ លោកស្រី សង្ឃឹមយ៉ាងខ្លាំងទៅលើ សំឡេងឆ្នោតរបស់ប្រជាជននៅតំបន់ភាគខាងជើង។
ចំណុចខ្សោយរបស់លោកស្រីវិញ គឺទាក់ទិនទៅនឹងបញ្ហាជាច្រើន ដែលប្រជាជនប្រេស៊ីលមួយភាគធំ ជាពិសេសអ្នកដែលមានជីវភាពមធ្យម និងធូរធារនៅតាមទីក្រុងធំៗគេមិនពេញចិត្តលោកស្រី។ ប្រជាជនទាំងនោះ គឺភាគច្រើននៅក្នុងរដ្ឋភាគខាងកើតប្រទេស ដូចជានៅក្រុង សាវប៉ូឡូ និងក្រុងរីយ៉ូ ជាដើម។ មតិទូទៅរិះគន់លោកស្រី ថាមានគោលនយោបាយ គិតតែអ្នកក្រពេក។ ថ្វីត្បិតតែសេដ្ឋកិច្ចប្រេស៊ីលមានការរីកចំរើន ប៉ុន្មានឆ្នាំចុងក្រោយនេះ ក៏ប៉ុន្តែបើយើងមើលឲ្យល្អិតមែនទែន ពីរបីឆ្នាំចុងក្រោយនេះ កំណើនសេដ្ឋកិច្ចប្រេស៊ីលបានថយចុះវិញជាគំហុក។ មួយវិញទៀត អតិផរណា ពោលគឺគម្លាតរវាង ប្រាក់ចំណូលដែលរកបាន និងការចំណាយចាយវាយ ប្រចាំថ្ងៃវាខុសគ្នាច្រើនណាស់។
គេនៅចាំថាការរៀបចំកីឡាបាល់ទាត់ពិភពលោក នៅប៉ុន្មានខែមុននេះ ជាប្រភពនៃការរិះគន់ ធ្ងន់ធ្ងរណាស់ ទៅលើរដ្ឋាភិបាលរបស់លោកស្រី។ ប្រជាជនប្រេស៊ីល រិះគន់ថា ការរៀបចំកីឡាបាល់ទាត់ពិភពលោកនេះ រដ្ឋាភិបាលចំណាយលុយរដ្ឋច្រើនសន្ធឹកសន្ធាប់ ក្នុងការសាងសង់ពហុកីឡាដ្ឋាន។ ហើយមានរឿងអាស្រូវ ថាមានក្រុមហ៊ុនសំណង់ជាច្រើន បានឃុបឃិត សូកប៉ាន់មន្ត្រីរដ្ឋ ដើម្បីទទួលបានការអនុញ្ញាតសាងសង់។ បញ្ហាទាំងអស់នេះ ហើយដែលធ្វើឲ្យប្រជាជនប្រេស៊ីលដែលមានជីវភាពមធ្យម នៅតាមក្រុងធំៗ មិនពេញចិត្ត លែងគាំទ្រលោកស្រី Dilma Rousseff។
ចំណុចខ្លាំង និងចំណុចខ្សោយរបស់លោក Aecio Neves៖
លោក Aecio Neves មានអាវុធមួយ គឺថា គាត់បានទទួលការគាំទ្រ ពីលោកស្រី Marina Silva ដែលជាអតីតរដ្ឋមន្រ្តីក្រសូងបរិស្ថាន ហើយដែលបានសំឡេងឆ្នោតច្រើនលំដាប់ទីបីកាលពីជុំទីមួយ។ កាលជុំទីមួយ លោកស្រី Marina Silva បានសំឡេង ជាង២១ភាគរយ ឯលោក Aecio Neves បានជាង៣៣ភាគរយ ហើយលោកស្រី Dilma Rousseff បានជាង៤១ភាគរយ។ លោកស្រី Marina Silva មានប្រជាប្រិយភាពណាស់ ក្នុងបណ្តារដ្ឋភាគខាងកើត និងនៅតាមទីក្រុងធំៗរបស់ប្រេស៊ីល។
បើសិនជាអ្នកដែលបានបោះឆ្នោតឲ្យលោកស្រី ធ្វើតាមលោកស្រី ព្រមទៅបោះឆ្នោតឲ្យលោក Aecio Neves នោះ លោកស្រី Dilma Rousseff អាចនឹងមានអាសន្ន។ មួយវិញទៀត ការដែលលោកស្រី Marina Silva ព្រមគាំទ្រលោក Aecio Neves មិនមែនដោយសា គាត់សង្ឃឹមថាបានតំណែងអីទេ ប៉ុន្តែគាត់ធ្វើនេះ ជាថ្នូរ ជាមួយកម្មវិធីនយោបាយមួយចំនួន ដែលលោកស្រីទាមទារឲ្យ លោក Aecio Neves អនុវត្ត បើសិនជាលោក ឈ្នះឆ្នោត។ ប្រការនេះហើយ ដែលធ្វើឲ្យអ្នកគាំទ្រលោកស្រី កាន់តែពេញចិត្តគាត់ថែមទៀត។
ទោះបីយ៉ាងណាក្តី វានៅតែពិបាកស្មានណាស់សំណព្វ ព្រោះថាអ្នកដែលមិនទាន់សម្រេចចិត្ត នៅស្ទើរស្ទាក់នោះច្រើនលាននាក់ណាស់។ ហើយថ្មីៗនេះទៀត មានពាក្យរិះគន់ជាច្រើនទៅលើលោក Aecio Neves ថាជាមនុស្សប្រុស ដែលមានចរិកមើលងាយមនុស្សស្រី មិនសូវឲ្យតំលៃលើមនុស្សស្រីទេ។ លទ្ធផលយ៉ាងណា យើងទុកឲ្យប្រជាជនប្រេស៊ីលជាអ្នកសម្រេចចិត្ត ហើយបេក្ខជនទាំងសងខាង ត្រូវតែទទួលយកការសម្រេចចិត្តរបស់ប្រជាជនភាគច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ