ការបោះឆ្នោតប្រធានាធិបតីដ៏ទំនើបនៅប្រេស៊ីល
ចុះផ្សាយនៅថ្ងៃ៖
ស្តាប់ - ០៦:៣៥
ពលរដ្ឋប្រេស៊ីលប្រមាណជិត ១៤៣លាននាក់ ត្រូវចេញទៅបោះឆ្នោតនៅថ្ងៃអាទិត្យនេះ។ មានការបោះឆ្នោតដល់ទៅប្រាំមុខ ក្នុងនោះមានមួយសំខាន់ជាងគេ គឺការបោះឆ្នោតជ្រើសរើសប្រធានាធិបតី។ បេក្ខជនដែលនាំមុខខ្លាំងអាចជាប់ឆ្នោតភ្លាមនៅជុំទីមួយ ដោយគ្មានការសង្ស័យ គឺលោកស្រី ឌីលម៉ា រ៉ូសេហ្វ (Dilma Roussef) ប្រធានាធិបតីផុតអាណត្តិ។ ការរង់ចាំកំពុងផ្តោតខ្លាំងទៅបេក្ខជន ដែលត្រូវមកប្រកួតប្រជែងយកតំណែងប្រធានាធិបតីនៅជុំទីពីរ ៖ បើតាមការស្ទង់មតិ បេក្ខនារីនៃបក្សបរិស្ថាន លោកស្រី ម៉ារីណា ស៊ីលវ៉ា (Marina Silva)និងលោក អាអេស្យូ ណេវ្ស (Aécio Neves)នៃគណបក្សសង្គមប្រជាធិបតេយ្យ (ស្តាំកណ្តាលនិយម) បានទទួលសំឡេងគាំទ្រប្រដំប្រសងគ្នាយ៉ាងខ្លាំង។
នៅប្រេស៊ីល ការបោះឆ្នោតគឺជាកាតព្វកិច្ចរបស់ពលរដ្ឋគ្រប់រូប ពីអាយុ ១៨ ដល់៧០ឆ្នាំ! អ្នកអវត្តមាននឹងអាចទទួលការផាកពិន័យ ប្រសិនបើគ្មានភស្តុតាងបញ្ជាក់ពីមូលហេតុនៃការអាក់ខានមិនទៅបោះឆ្នោត។
ការបោះឆ្នោតថ្ងៃអាទិត្យទី ៥ តុលា នេះ មាន៥ ៖ ការបោះឆ្នោតប្រធានាធិបតី -បោះឆ្នោតជ្រើសរើសអភិបាលរដ្ឋទាំង ២៧ -ការបោះឆ្នោតសភា ជ្រើសរើសសមាជិកថ្នាក់ជាតិ ចំនួន៥១៣រូប -ជ្រើសរើសសមាជិកសភាថ្នាក់តំបន់ចំនួន១០៦៩នាក់ និងការបោះឆ្នោតមួយភាគជ្រើសរើសសមាជិកព្រឹទ្ធិសភា ចំនួន ២៧រូប (មួយភាគបីនៃសមាជិកព្រឹទ្ធសភាសរុប)។ ការបោះឆ្នោតប្រធានាធិបតី និងអភិបាល ជាទូទៅត្រូវធ្វើឡើងដោយពីរដង។ ជុំទីមួយគឺនៅថ្ងៃអាទិត្យទី ៥ តុលានេះ និងជុំទីពីរ នៅថ្ងៃទី ២៦ តុលា។
ប្រព័ន្ធបោះឆ្នោតអេឡិចត្រូនិច
ថ្វីបើថ្ងៃនេះ ពលរដ្ឋប្រេស៊ីល ត្រូវបោះឆ្នោតដល់ទៅ៥ដងមែន ប៉ុន្តែបុគ្គលម្នាក់ៗ ត្រូវការចំណាយពេលជាមធ្យមត្រឹមតែ៤០វិនាទីប៉ុណ្ណោះ។ នេះក៏ព្រោះតែដោយសារបច្ចេកវិទ្យាទំនើប ! ប្រេស៊ីលមានប្រព័ន្ធបោះឆ្នោតអេឡិចត្រូនិច តាំងពីឆ្នាំ១៩៩៦មក។ ម្ចាស់ឆ្នោតគ្រាន់តែចងចាំលេខរបស់បេក្ខជននីមួយ ឬបក្សនយោបាយ រួចចុចសរសេរលើប្រអប់អេឡិចត្រូនិច ជាការស្រេច។ សំឡេងអនុប្បវាទ សន្លឹកឆ្នោតមិនបានការ នឹងត្រូវដឹងរាប់ឃើញ និងបូកសរុបក្នុងលទ្ធផលឆ្នោតទាំងអស់។ ជាហេតុធ្វើឱ្យបេក្ខជនខ្លះអាចទទួលសំឡេងគាំទ្រដាច់ខាត ដោយមិនបាច់មានសំឡេងលើសពី៥០%។
ការតាមរយៈប្រព័ន្ធបោះឆ្នោតអេឡិចត្រូនិចដ៏ទំនើបនេះ គេអាចកំរិតគ្រោះលួចបន្លំ និងអាចរាប់សំឡេងឆ្នោតព្រមទាំងដឹងលទ្ធផលបានយ៉ាងឆាប់រហ័ស។ តែការរៀបចំបោះឆ្នោតបែបនេះ តម្រូវឱ្យមានចំណាត់ការ(ចាត់ចែង)ផ្នែកបច្ចេកវិទ្យាអេឡិចត្រូនិចខ្លាំង ព្រោះប្រេស៊ីល ជាប្រទេសធំ (ធំ ជិត៥ដងលើសបារាំង) មានប្រជាជនសរុបដល់ទៅជាង២០២លាននាក់ មានម៉ោងខុសគ្នាដល់ទៅបីម៉ោង។ លទ្ធផលជុំទីមួយនឹងត្រូវដឹងនៅយប់ថ្ងៃអាទិត្យនេះតែម្តង។
បេក្ខជនជាគូប្រជែងយកតំណែងប្រធានាធិបតី
មានបេក្ខជន-បេក្ខនារី បីនាក់ ដែលលេចមុខខ្លាំង នៅក្នុងការបោះឆ្នោតប្រធានាធិបតីលើកនេះ។
លោកស្រី ឌីលម៉ា រ៉ូសេហ្វ - អ្នកឆ្វេងនិយម
លោកស្រីប្រធានាធិបតីផុតអាណត្តិ ឌីលម៉ា រ៉ូសេហ្វ នៃគណបក្សឆ្វេងនិយម ដែលចូលប្រកួតប្រជែងយកតំណែងសម្រាប់អាណត្តិទីពីរ មានប្រជាប្រិយភាព និងមានប្រៀបជាងបេក្ខជនផ្សេងទៀត។ លោកស្រីរ៉ូសេហ្វ ដែលប្រសូតចេញពីគ្រួសារអន្តោប្រវេសប៊ុលហ្ការី ឪពុកជាមេធាវី ជាជនកុម្មុយនិស្ត បានក្លាយជាប្រធានាធិបតី (ទី ៣៦)ស្ត្រីទីមួយ របស់ប្រេស៊ីល ។
គ្រាន់តែបានឡើងកាន់តំណែងបានពីរឆ្នាំកន្លះសោះ ប្រជាប្រិយភាពរបស់លោកស្រី បានឡើងខ្ពស់ត្រដែត ដល់ទៅ៧៧% មុននឹងធ្លាក់ចុះ យ៉ាងសាហាវមិនធ្លាប់មានក្នុងប្រវត្តិប្រជាធិបតេយ្យប្រេស៊ីល អស់ពាក់កណ្តាលមកនៅត្រឹម ៣០% នៅខែមិថុនា២០១៣ នៅពេលមានចលនាបះបោរសង្គម។ ប៉ុន្តែលោកស្រីមានសមត្ថភាព ចេះវាយប្រហារត្រូវចំណុចនៅក្នុងពេលឃោសនាបោះឆ្នោត វាយប្រហារគូប្រជែងដែលមានប្រជាប្រិយភាពខ្លាំង និងជាស្ត្រីភេទដូចគ្នា អាចគាស់រំលើងការគាំទ្រឱ្យរើបឡើងវិញ ចាប់ខែកញ្ញាមក នាំលោកស្រីឱ្យមានប្រៀបជាងគេ។
លោកស្រី ម៉ារីណា ស៊ីលវ៉ា - អ្នកបរិស្ថាននិយម
គូប្រជែងដែលមិនអាចមើលស្រាលបាន និងដែលមតិសាធារណៈសំឡឹងឃើញថាអាចនឹងមានការប្រកួតប្រជែង១០០%ស្ត្រី ដណ្តើមយកតំណែងប្រធានាធិបតី នោះគឺលោកស្រី ម៉ារីណា ស៊ីលវ៉ា។ ជារដ្ឋមន្ត្រីក្រសួងបរិស្ថានរបស់រដ្ឋាភិបាលលោកស្រីរ៉ូសេហ្វ មានប្រវត្តិកុមារភាពជាអ្នកក្រខ្សត់ លោកស្រីស៊ីលវ៉ា ដែលកំពុងប្រយុទ្ធតស៊ូចង់ក្លាយជាប្រធានាធិបតីស្បែកខ្មៅប្រេស៊ីលជាលើកដំបូង បានអង្រួនចិត្តពលរដ្ឋប្រេស៊ីល ឱ្យស្រមៃឃើញ ផ្លូវនយោបាយថ្មី មិនអាស្រ័យតែលើបក្សនយោបាយធំៗ។
ប៉ុន្តែកំហុសនយោបាយធ្ងន់ពីរបានទម្លាក់ប្រជាប្រិយភាពលោកស្រី ៖ នយោបាយថាមពលនុយក្លេអ៊ែរ និង ច្បាប់ប្រឆាំងនឹងការស្អប់ខ្ពើមអ្នកស្រលាញ់ភេទដូចគ្នា។ លោកស្រីស៊ីលវ៉ា ដែលជាគូប្រជែងដ៏គ្រោះថ្នាក់ និងដេញយ៉ាងប្រកិតពីក្រោយលោកស្រី ឌីលម៉ា រ៉ូសេហ្វ បែរជាត្រូវបានបេក្ខជនមកពីបក្សស្តាំកណ្តាលនិយម នាំមុខទៅវិញនៅក្នុងការស្ទង់មតិចុងក្រោយ។ ហើយជាលើកទីមួយនៃការស្ទង់មតិ បក្សបរិស្ថាន អាចនឹងត្រូវធ្លាក់ចាញ់នៅជុំទីមួយនេះតែម្តង។
លោក អាអេស្យូ ណេវ្ស - អ្នកស្តាំកណ្តាលនិយម
អាយុ ៥៤ឆ្នាំ ជាចៅអតីតប្រធានាធិបតីប្រេស៊ីល ជាសមាជិកសភា ព្រឹទ្ធសភា ជាអភិបាលរដ្ឋ មានរូបសង្ហា លោក អាអេស្យូ ណេវ្ស Aécio Neves គឺជាកូនប្រេស៊ីលថ្នាក់ខ្ពស់។ លោកត្រូវបានគេមើលឃើញថាជាបេក្ខជនលម្អការបោះឆ្នោតប្រធានាធិបតី ដែលមានស្ត្រីពីររូបកំពុងប្រកួតប្រជែងគ្នាខ្លាំង។ ប៉ុន្តែតាំងពីជាងមួយសប្តាហ៍ចុងក្រោយនេះ លោក អាអេស្យូ ណេវ្ស អ្នកជំនាញផ្នែកសេដ្ឋកិច្ចបានប្តូរយុទ្ធសាស្ត្រឃោសនា វាយបកគូប្រជែង ថាលោកស្រី ឌីលម៉ា រ៉ូសេហ្វ បានដឹកនាំប្រទេសឱ្យធ្លាក់ក្នុងសេដ្ឋកិច្ចដើរថយក្រោយ បូកផ្សំនឹងការធ្លាក់ចុះប្រជាប្រិយភាពរបស់លោកស្រី ម៉ារីណា ស៊ីលវ៉ា បាននាំបេក្ខជន អាអេស្យូ ណេវ្ស ឱ្យមានប្រៀបកាន់តែខ្លាំង អាចឡើងដល់ជុំទីពីរ។
គណបក្សពលកររបស់លោកស្រី រ៉ូសេហ្វ ផ្តើមរៀបចំយុទ្ធសាស្ត្របណ្តើរៗ ដើម្បីត្រៀមប្រឈមនឹងបេក្ខជនអ្នកកណ្តាលនិយមស្រេចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ