ពួកជីហាតអារកសម្លាប់ចំណាប់ខ្មាំងទីបី
ចំណាប់ខ្មាំងម្នាក់ទៀត ជាជនជាតិអង់គ្លេសឈ្មោះ ដេវីដ ហ៊ែនស៍ ត្រូវបានពួកឧទ្ទាមជីហាតអារកសម្លាប់។ នៅក្នុងខ្សែវីដេអូដែលក្រុមជីហាតបង្ហាញឲ្យឃើញកាលពីថ្ងៃសៅរ៍ ទី ១៣កញ្ញា ពួកជីហាតបានគំរាមទៅដល់ ចក្រភពអង់គ្លេស ដែលជាសម្ព័ន្ធមិត្តរបស់សហរដ្ឋអាមេរិក។ ឃាតកម្មដ៏ព្រៃផ្សៃនេះ ធ្វើឡើងក្នុងពេលដែលអាមេរិក និងសម្ព័ន្ធមិត្ត កំពុងតែប្រមែប្រមូលគ្នា ក្នុងការបង្កើតក្រុមចំរុះមួយ ដើម្បីបោសសម្អាតពួកជីហាតនៅអ៊ីរ៉ាក់ និងស៊ីរី ហើយមួយថ្ងៃប៉ុណ្ណោះ មុនការបើកសន្និសីទអន្តរជាតិក្រុងប៉ារីសដើម្បីស្វែងរកសន្តិភាពនៅអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
លោកដេវីដ ហ៊ែនស៍ (David Haines) ជាជនជាតិអង់គ្លេស គឺជាអ្នកស្ម័គ្រចិត្ត ធ្វើការឲ្យអង្គការមនុស្សធម៌មួយនៅស៊ីរី។ ពួកឧទ្ទាមជីហាតបានសម្លាប់លោកដោយអារកទាំងរស់ ដូចករណីអ្នកកាសែតអាមេរិកពីររូបទៀតដែរ។ ឃាតកម្មដ៏យង់ឃ្នងនេះ ត្រូវបានពួកជីហាតថតក្នុងខ្សែអាត់វីដេអូ រូចដាក់ផ្សាយតាមទំព័រ អ៊ីនធឺនែត របស់ពួកវា(SITE) នៅថ្ងៃសៅរ៍។
ក្នុងវីដេអូដែលមានរយៈពេលជាងពីរនាទី ឃាតករដែលរុំមុខដោយក្រណាត់ បាននិយាយផ្ញើសារដល់សម្ព័ន្ធមិត្តរបស់អាមេរិក។ សម្ព័ន្ធមិត្តនោះគឺសំដៅលើចក្រភពអង់គ្លេសនេះឯង។ ពួកអ៊ីស្លាមជីហាត ចំអកឲ្យអង់គ្លេស ថានេះហើយជាលទ្ធផល ដែលអង់គ្លេសរណបអាមេរិក ធ្វើតាមតែអាមេរិកបញ្ជា។ បើតាមការប៉ាន់ស្មាន ឃាតករនៅក្នុងខ្សែរវីដេអូនេះ ជាឃាតករតែមួយ ដែលបានសម្លាប់អ្នកកាសែតអាមេរិក ពីររូបទៀត កាលពីប៉ុន្មានសប្តាហ៍មុន។
ប្រតិកម្មថ្កោលទោស បានចេញជាបន្តបន្ទាប់ ចំពោះទង្វើដ៏សាហាវ គ្មានធម៌មេត្តារបស់ពួកជីហាត។ លោកប្រធានាធិបតីបារាំង បានហៅពួកនេះ ថាជាពួកកំសាក។ លោកដេវីដ ខាមេរុន នាយករដ្ឋមន្ត្រីអង់គ្លេស បានចាត់ទុកឃាតកម្មនេះ ជាអំពើថោកទាប ដែលមិនអាចអត់ឱនឲ្យបានទេ។ លោកបន្ថែមថា គ្រប់គ្នានឹងធ្វើគ្រប់យ៉ាង ដើម្បីកម្ទេចពួកជីហាត និងចាប់ឃាតករនោះមកទទួលទោស ឲ្យសមទៅតាមអំពើដែលពួកវាបានធ្វើ។
សូមបញ្ជាក់ថា មុនមានឃាតកម្មនេះ ចក្រភពអង់គ្លេស បានប្រកាសចូលរួមជាមួយគម្រោងរបស់អាមេរិក ក្នុងការកម្ទេចពួកជីហាតអ៊ីស្លាម នៅអ៊ីរ៉ាក់ និងស៊ីរី។ អង់គ្លេសបានប្រកាសថានឹងប្រគល់អាវុធ គ្រាប់កាំភ្លើង ទៅឲ្យទាហានគៀដអ៊ីរ៉ាក់ ដើម្បីធ្វើការប្រយុទ្ធតទល់ជាមួយពួកជីហាត។ កាលពីថ្ងៃព្រហស្បតិ៍ អ្នកនាំពាក្យរដ្ឋាភិបាលអង់គ្លេស ថែមទាំងបាននិយាយថា អង់គ្លេសអាចនឹងប្រើកម្លាំងយោធាដោយផ្ទាល់ ដើម្បីធ្វើការវាយប្រហារទៅលើទីតាំងពួកជីហាតទៀតផង។
ថ្ងៃចន្ទស្អែក នៅក្រុងប៉ារីស នឹងមានបើកសន្និសីទអន្តរជាតិមួយ ដើម្បីពិភាក្សាស្វែងរកដំណោះស្រាយនៅអ៊ីរ៉ាក់ និងបោសសម្អាតពួកឧទ្ទាមអ៊ីស្លាមជីហាតនិកាយស៊ុននីត ដែលជាក្រុមជ្រុលនិយមសាហាវព្រៃផ្សៃ។ ក្រុមចំរុះអន្តរជាតិមួយ ដែលមានអាមេរិកជាអ្នកដឹកនាំ បានគៀងគរប្រទេសអារ៉ាប់ចំនួន១០ហើយឲ្យចូលរួម។ លោកបារ៉ាក់ អូបាម៉ា ប្រកាសថា នឹងវាយកម្ទេចពួកជីហាតឲ្យអស់ ទាំងនៅអ៊ីរ៉ាក់ និងស៊ីរី។ ថ្ងៃអាទិត្យនេះ អូស្រ្តាលី ក៏បានប្រកាសដែរ ថាខ្លួននឹងចូលរួមក្នុងប្រតិបត្តិការនេះ ដោយនឹងបញ្ជូនកងទ័ពចំនួន៦០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ